2 Corinthians 9 - The New Testament in Islander Creole

Help wi fela biliiva dem iina niid

¹ Now, Ah no hafy rait tu unu bout di gif dem weh unu gwain sen fi help God pipl dem dah Jerusalem,

² bikaaz Ah nuo seh unu wilin fi help. Ahn Ah wende buos tu wi fren dem dah Macedonia bout how unu biliiva fahn Achaia lan wehn redy fahn laas yier fi sen wan gif fi dem. Di chruut dah seh, sieka weh unu so wilin fi gi, dat staat op plenty a dem fi waahn gi tu.

³ Ahn now, Ah deh sen demya breda dem jos fi mek shuor seh unu redy fi chruut, laik weh Ah wehn tel dem. Ah no waahn ih end'op laik Ah wende buos bout unu fi notn!

⁴ If di pipl dem fahn Macedonia wuda kom lang wid mi ahn fain out seh unu no redy wid unu gif, Ah gwain fiil shiem —ahn no ongl mii, bot unu tu afta aal weh Ah wehn tel dem.

⁵ Ahn dat dah wai Ah wehn aks Titus ahn di res fi go ahed ahn mek shuor seh di gif weh unu wehn pramis, wehn don redy. Ahn Ah waahn unu gi dis gif bikaaz unu waahn gi'ih, ahn no bikaaz enybady fuos unu fi du'ih.

⁶ Memba dis seyin: Wan faama weh ongl plaant wan likl bit a siid, ongl gwain riip wan likl krap. Bot di faama weh plaant plenty siid, ihn gwain riip wan huol pail!

⁷ So den, evrybady fi mek'op dehn uon main az tu ho moch dehn gwain gi. Ahn dehn no fi tink haad fi gi, nar fiil laik enybady deh presha dem fi gi, bikaaz God lov di wan weh hapy fi gi!

⁸ Ahn him kyan bles unu wid plenty muo an weh unu niid, so unu aalwiez gwain gat nof fi unuself, ahn plenty muo fi shier wid ada pipl tu!

⁹ Laik weh rait iina di Skriptyo seh: “God pipl dem gi tu di puor wid wan frii han, Di gud weh dehn du gwain laas fareva.”

¹⁰ So, God, weh gi di faama siid fi plaant, gi'im bred fi iit tu! Siem wie, di Laad gwain gi unu plenty chaans fi du gud, ahn ihn gwain mek weh unu gi kom bak tu unu uova ahn uova agen!

¹¹ God gwain bles unu nof so unu gwain kyan aalwiez gat fi gi tu ada pipl. Den, demde pipl weh unu deh gi tingz tu, dehn haat gwain ful'op wid tanks tu God;

¹² bikaaz dis givn weh unu deh du laik wan sorvis tu God pipl dem dah Jerusalem, no ongl gwain mek dehn get weh dehn niid, bot ih gwain mek plenty tanks go'op tu God tu!

¹³ Memba: unu gwain deh bring gluory ahn priez tu God sieka dah gif weh unu gi. Ahn dat pruuv seh unu deh obie di Gud Nyuuz a Jesus Christ.

¹⁴ Ahn plenty pipl gwain prie fi unu wid plenty lov aal di taim iina dehn haat, sieka di wandaful gries weh God gi dem chruu unu.

¹⁵ So den, mek wi tank fi wi Faada God fi di uova speshal gif weh ihn wehn sen fi wi. Wi kyaahn iivn fain di wod dem fi tel im tanks nof!