2 Corinthians 8 - The New Testament in Islander Creole

How di biliiva dehn shuda help wan anada

¹ Now, bredrin, wi waahn unu fi nuo bout God gries weh ihn wehn gi tu di chorch dem dah Macedonia.

² Dehn wende go chruu plenty trobl ahn haad taim, bot stil yet dehn wehn wilin fi gi wan aafrin iivn duo dehn wehn so puor dehnself —ahn now di jai weh dehn wehn gat wende ron uova plenty!

³ Ai deh yah fi tel unu seh, alduo nonbady neva tel dem fi du'ih, dehn gi wan big aafrin, no ongl weh dehn kuda wehn afuod, bot iivn muo an dat!

⁴ Dehn wehn beg wi wid aala dehn haat fi mek dem gat di jai fi deh mongs demde pipl weh waahn gi wan gif tu di Laad pipl dem dah Jerusalem.

⁵ Ahn dehn du plenty muo an dat! Fos, dehn gi dehnself tu di Laad, den tu wii —jos laik weh di Laad wehn waahn dem fi du.

⁶ So, wi wehn inkorij Titus —weh wehn help unu staat dis speshal work a kainis— fi go, go aan ahn help unu fi finish'ih op.

⁷ Ahn Ah nuo seh unu du evryting muo stranga an enybady els: Unu gat stranga fiet; unu kyan ekspres unuself beta; ahn unu nuo muo tingz tu. Unu kudn wiet fi gi unu gif, ahn unu nuo how fi lov iina wan beta wie. So den, Ah shuor seh unu gwain bii muo beta iina di wie how wi shuda gi.

⁸ Main, Ah no deh gi unu dis wod laik wan komaan; bot Ah jos waahn tes unu out fi si if unu lov dah laik fi di ada bredrin dem.

⁹ Bikaaz, unu nuo how fi wi Laad Jesus Christ wehn so kain tu wi iivn duo him wehn so rich; bot sieka ihn lov fi unu, ihn mek ihnself get puor so dat chruu fi him puonis, unu kuda bii rich.

¹⁰ So den, Ah wuda advaiz unu fi finish weh unu staat. Laas yier unu dah wehn di fos chorch fi staat gi. No ongl dat, bot unu dah wehn di fos wan dem weh iivn wehn waahn gi!

¹¹ So, siem wie how unu wehn so iiga fi staat dis kalekshan, unu fi waahn finish'ih now. Unu fi gi weh unu kyan, akaadn tu weh unu gat.

¹² Ahn ih no mata ho moch unu gat, az lang az unu wilin fi gi. Memba, God ongl waahn unu gi weh unu gat, no weh unu no gat.

^13-14 Az fi mii, Ah no deh trai fi put presha pahn unu, ahn mek'ih muo iiziya fi som neks wan. Bot ih ongl fier fi mek unu shier wid demde pipl weh gat so likl bit now. Den, wan neks taim dehn kyan shier wid unu, wen unu niid ih. Iina dah wie deh, evrybady gwain get weh dehn niid wen dehn niid ih.

¹⁵ Laik weh rait iina di Skriptyo seh, “Di wan weh gyada plenty, neva gat notn lef; ahn di wan weh gyada likl bit, gat nof!”

Titus gaan dah Corinth

¹⁶ Bot Ah tank God seh ihn mek Titus wilin fi help unu jos laik how wii wilin fi help unu.

¹⁷ Wen wi aks Titus fi go tu unu, ihn wehn iiga fi go iivn chruu ihn uon frii wil.

¹⁸ Ahn wi deh sen wan nada breda lang wid Titus. Evrybady rispek him iina aal di chorch dem, az sombady weh laik priich di Gud Nyuuz.

¹⁹ Ahn no ongl dat, di chorch dem pik im fi go lang wid wi, wen wi ker dis aafrin tu di biliiva dem dah Jerusalem. Dis dah wan gif weh gwain bring gluory tu God, ahn ih gwain shuo ho moch wi waahn help.

²⁰ Unu fi nuotis seh, wi deh mek shuor seh nonbady gwain kyaahn kritisaiz wi fi how wi deh ker dis big gif yah tu dem.

²¹ Wi trai wi bes fi du weh rait iina God sait, ahn iina di sait a di pipl dem tu.

²² Ahn so, bredrin, wi deh sen wan nada wan a wi breda dem fi go lang wid di two a dem. Dis man pruuv tu wi uova ahn uova seh wi kyan chros im, ahn wi fain seh him muo wilin ahn iiga fi help now dat him gat plenty kanfidens iina unu tu.

²³ Now, az fi Titus, him dah mi paadna weh work lang wid mi fi help unu. Ahn, az fi di ada breda dem, dehn dah di wan dem weh di chorch dem sen, ahn dehn bring gluory tu Christ.

²⁴ So den, shuo iich wan a dem unu lov fi pruuv tu di ada chorch pipl dem seh wi gat aal di raits fi buos bout unu.