2 Corinthians 2 - The New Testament in Islander Creole

¹ So Ah mek'op mi main no fi mek unu fiil so sad pahn mi neks vizit;

² bikaaz, if Ah mek unu fiil sad, den dah huu els gwain mek Ah get glad eksep unu unuself weh Ah jos wehn mek fiil sad?

³ Dat dah wai Ah wehn rait tu unu iina dah wie, so wen Ah go si unu, di siem wan dem weh fi mek mi hapy no gwain mek Ah fiil sad. Bikaaz Ah nuo fi chruut seh, wen aala unu hapy, ih mek mi hapy tu.

⁴ Lisn, ih wehn hot mi bad fi rait dat leta tu unu; ih wehn brok mi haat ahn ih ongl mek Ah krai. So, Ah neva rait tu unu fi mek unu fiil sad, bot fi mek unu nuo ho moch Ah lov unu!

Fargiv di man weh wehn kaaz aal di trobl

^5-6 Now, Ah no waahn ekzajeriet, bot iina som wiez dah man weh kaaz aal di trobl, hot aala unu muo an how ihn wehn hot mii. Ahn muos a unu don kandem di man fi weh ihn wehn du, ahn dat dah nof ponishment far im.

⁷ Now den, unu shuda fargiv im ahn inkorij im, so dat ihn no get so sad ihn no iivn waahn go aan.

⁸ So, Ah deh beg unu: pliiz mek shuor seh ihn nuo unu lov ahn fargiv im.

⁹ Bredrin, di riizn wai Ah wehn rait datde leta tu unu dah fi tes unu, fi si if unu redy fi obie evryting weh Ah wehn tel unu fi du.

¹⁰ Ai fargiv enybady weh unu fargiv. Ahn wen Ai fargiv dem —if enyting deh fi fargiv— Ah du'ih sieka unu, wid Christ az mi wiknis.

¹¹ Ahn Ah du dat so Satan kyaahn out-smaat wi iina notn; bikaaz wi nuo aal weh deh iina fi him main gens wi.

Paul get anchos iina Troas

¹² Wen Ah get dah Troas sity fi priich di Gud Nyuuz bout Christ, Ah si seh di Laad wehn don mek wan wie fi mek Ah work deh.

¹³ Bot mi main neva deh iina piis, bikaaz Ah neva fain mi breda Titus deh. So, Ah seh gudbai tu di pipl dem deh ahn gaan aan tu Macedonia.

Viktry chruu Jesus

¹⁴ Bredrin, Ah gi tanks tu God weh aalwiez liid wi iina Christ viktry maach! Dah him weh deh yuuz wi fi spred di Gud Nyuuz evrywie, weh di pipl dem kyan nuo Christ —ahn fi nuo him dah laik di smel a wan swiit porfyuum.

¹⁵ Bikaaz wi dah jos laik di smel a insens, weh Christ deh aafa op tu God, ahn dis smel deh spred mongs demya pipl weh deh get siev, ahn mongs dehn pipl weh deh pahn di ruod tu distrokshan tu.

¹⁶ Fi di pipl dem weh deh pahn dehn wie tu distrokshan, wi dah wan bad sent weh liid tu det. Bot wi dah wan swiit smel tu di pipl dem weh deh get siev! Ahn dat dah wan blesin weh wi get, iivn duo wi neva du notn fi dizorv ih.

¹⁷ Unu si, wi dah no laik plenty pipl weh waahn get rich aafa priich God mesij. Bot wi fi priich God Wod wid di atarity weh Christ gi wi, ahn wid wan kliin haat fronta God, bikaaz dah him sen wi fi du ihn work.