2 Corinthians 13 - The New Testament in Islander Creole

Paul laas waanin ahn griitin dem

¹ Dis dah di third taim Ah deh go luk fi unu. Ahn, laik wi riid iina di Skriptyo, wan porsn hafy gat at liis two wiknis fi pruuv eny chaaj weh ihn bring gens enybady fi dehn get ponish.

² Wel, wen Ah wende wid unu pahn mi sekant vizit, Ah waan demde pipl weh wende sin. So now, wail Ah no dedeh wid unu yet, Ah deh waan demde pipl agen, so wen Ah go tu unu, non a dem no gwain eskiep ponishment fi dehn sin!

³ Ahn if som a unu waahn pruuf seh Christ deh taak chruu mi fi chruut; wel, Christ gwain shuo unu. Memba, di Laad no wiik ataal wen ihn diil wid unu, bot ihn dah wan maity powa mongs unu.

⁴ Ahn memba tu seh: alduo Jesus wehn ded pahn di kraas iina wiiknis, him deh liv now bai di maity powa a God! Siem laik so, iina Christ wi wiik tu —siem laik how him wehn wiik— bot now wi gwain liv bai God powa jos laik how Jesus du wen wi go diil wid unu!

⁵ So den, unu fi chek unu haat gud ahn si if unu deh liv iina fiet fi chruut. Tes out unuself ahn si if Christ Jesus riily deh liv iina unu. If unu no deh liv iina fiet, den unu fiel di tes!

⁶ Ahn az fi wii, wi huop seh unu gwain get fi nuo seh wi neva fiel dah tes.

⁷ Now, Ah prie tu God seh unu no gwain du notn weh rang. Ahn Ah prie laik so, no bikaaz wi waahn evrybady si seh wi deh tiich unu uova gud, bot dah bikaaz wi riily waahn unu fi du weh rait, iivn duo mongs ada pipl ih maita luk laik wi deh fiel iina wi work.

⁸ Bredrin, wi waahn unu fi nuo seh wi kyaahn du notn fi fait gens di chruut; wi kyan ongl fait far ih!

⁹ So, wi hapy wen wi wiik, bot unu strang. Ahn wi prie seh God gwain mek unu gruo evry die tu di fulis!

¹⁰ Ahn dat dah wai Ai deh rait demya tingz tu unu now, bifuor Ah get deh. Ahn Ah deh du'ih, so dat wen Ah kom, Ah no gwain hafy bii so haad pahn unu wen Ah yuuz di atarity weh di Laad wehn gi mi. Ahn dat atarity gwain bii fi bil unu op, no fi tier unu dong!

¹¹ Fi di laas paat a mi leta, bredrin, Ah waahn tel unu gudbai! Lisn tu weh Ah deh beg unu: Unu fi trai fi gruo evry die iina di Laad tu di fulis! Ahn unu fi trai get lang wid wan anada tu ahn liv iina piis wid evrybady. Ahn den, di God a lov ahn piis gwain deh wid unu aalwiez!

¹² Hiel'op wan anada wid wan huoly kis.

¹³ Aala God pipl dem seh fi tel unu heluo.

¹⁴ Mek di gries a di Laad Jesus Christ ahn di lov a God deh wid unu, ahn mek di Holy Spirit jain aala unu haat tugeda. Amen!