1 Timothy 6 - The New Testament in Islander Creole

¹ Aal demya pipl weh gat fiet iina Christ ahn weh dah sliev, dehn fi luk pahn dehn maasta dem az pipl weh dehn fi rispek iina evrywie. Aala di sliev dem fi du dis, so nonbady gwain kyaahn taak bad bout God, niida taak bad bout weh wi deh tiich dem.

² Ahn demya sliev weh gat wan maasta weh chros iina Christ, dehn no fi tink seh, bikaaz dehn dah breda iina Christ, dehn fi tek advantij ahn no gi dehn maasta dem non rispek. Insida dat, demya sliev fi work iivn muo beta fi dehn maasta, bikaaz di work weh dehn deh du gwain help dem weh dah biliiva, weh dehn lov. Timothy, yu fi tiich di pipl dem demya tingz yah, ahn inkorij dem fi du dem.

Demya tingz weh chruu ahn demya weh no chruu

³ If enybady deh tiich di pipl dem fi fala di Laad iina wan difrent wie, ahn dehn no grii wid di chruu tiichin weh kom fahn Jesus Christ,

⁴ den datde porsn ton tuu proud, ahn ihn no andastan notn ataal! Demya kain a pipl jos laik aagyo ahn fait uova wodz. Ahn dat bad, bikaaz dat deh mek di pipl dem jalas wan anada. Ih mek dehn get beks ahn taak bad bout wan anada. Ih bring separieshan mongs di pipl dem ahn mek dehn tink seh ada pipl waahn du dem bad tingz.

⁵ Dah demya kain a pipl, weh no grii wid weh wi tiich, mek di pipl dem aagyo aal di taim, bikaaz dehn no tink rait. Dehn no tiich langa weh chruu bout Christ no muo, so di chruu tiichin don get tek weh fahn dem. Demde kain a pipl iivn tink seh dehn shuda sorv God jos fi get plenty mony!

⁶ Now, wi get gud tingz fi chruut wen wi sorv God wid wan kliin haat, ahn wi satisfai wid weh wi gat.

⁷ Bikaaz wi no bring notn iina disya worl, ahn wi kyaahn ker notn out niida!

⁸ So den, if wi gat fuud fi iit ahn kluoz fi wier, wi shuda fiil satisfai.

⁹ Bot di pipl dem weh waahn get plenty tingz, dehn faal iina temtieshan ahn dehn drap iina di trap a dehn uon los. Ahn dat dah wan fuulish guol iina dehn laif weh gwain mes'op dehn laif plenty, ahn aftawod ih gwain distrai dem fi chruut!

¹⁰ Bikaaz di lov a mony mek plenty pipl du aal kain a wikid tingz. Ahn bikaaz demde pipl waahn mony so bad, dehn gaan aaf far fahn God, ahn now dehn sofa plenty.

Dehn tingz weh Paul inkorij Timothy fi du tu di laas

¹¹ Bot yuu, Timothy, yu dah wan man weh wehn gi'yo laif fi du weh God waahn yu fi du. So, yu no fi gat notn fi du wid demde kain a tingz. Insida dat, trai haad fi liv rait evry die, ahn fi liv fi pliiz God fi chros him wid aal yo haat, ahn lov di pipl dem. Ahn yu fi trai haad evry die fi stie chruu tu di Laad tu, iivn wen di haad taim dem kom, ahn fi triit evrybady wid pieshens.

¹² Trai az haad az yo kyan fi du yo bes wail yo deh fait di gud fait a di fiet, ahn huol aan faas tu dat laif weh neva gwain don nontaim ataal. Bikaaz God wehn kaal yu tu dat laif, pahn dah die wen yu wehn taak bout yo fiet iina Jesus Christ out iina di uopm fronta plenty pipl.

¹³ So den, Ah deh aada yu fronta God, weh gi evryting laif; ahn fronta Christ Jesus, weh no wehn fried fi taak klier bout di chruut wen ihn wende fronta Pontius Pilate:

¹⁴ Yu fi obie di aadaz dem weh Ah gi'yo tudeh, ahn yo no fi get miks'op wid non sin, so nonbady gwain kyaahn fain faalt wid yu fahn now til di die wen di Laad Jesus Christ kom bak!

¹⁵ Wen di rait taim kom, God gwain mek im apier. Dat dah fi wi God, weh wi priez, ahn weh dah di King uova evryting ahn evrybady. Him dah di King uova aal di ada king dem, ahn di Laad uova aal di ada Laad dem!

¹⁶ Ahn God dah di ongli'is wan weh gwain neva ded. Him liv iina di lait weh nonbady kyan iivn get nier tu. Nonbady wehn eva si'im iina di paas, ahn nonbady kyaahn si'im now. So, mek wi gi'im aal di ana, bikaaz dah him weh gat di powa fi ruul fareva ahn eva. Amen!

Paul mesij fi di Kristyan weh bles wid plenty tingz

¹⁷ Now, Timothy, demya pipl weh rich ahn gat plenty tingz iina disya worl, yu fi tel dem seh dehn no fi bii proud, nar chros iina dehn paila fansy tingz weh dehn gat. Bikaaz nonbady no nuo fi chruut how lang demde tingz gwain laas. Insida dat, dehn fi chros iina God. Dah him dah di Wan weh gi wi evryting wi niid —iivn muo an nof fi mek wi hapy.

¹⁸ Komaan dem fi du gud. Dehn fi bii rich iina di gud tingz weh dehn deh du evry die; ahn bii frii-handid, redy fi shier weh dehn gat wid dem weh deh iina niid.

¹⁹ If dehn du dat, demya pipl gwain pail op plenty richiz fi demself, weh gwain mek dem redy fi di fyutyo. Ahn demya pipl gwain win datde laif weh dah di chruu laif.

²⁰ Uo, Timothy, kiip sief dat weh God don chros yu fi tek kier ah. Ahn no gat notn fi du wid demde kain a taak weh no gat notn fi du wid God. Ton weh fahn dehn tiichin weh no grii wid God, weh som pipl kaal “nalij,” bot dat dah no so!

²¹ Main, som a demya pipl weh wende seh dehn gat dah “nalij,” dehn aredy laas di wie a fiet. So fi di laas, Ah prie seh God gries gwain deh wid aala unu aalwiez. Amen!