1 Timothy 5 - The New Testament in Islander Creole

How wan liida fi triit di chorch pipl dem

¹ Timothy, yu no fi karek non man weh uolda an yoself. Bot yu fi riizn wid im ahn triit im wid ana, laik if ihn dah yo pupa. Ahn yu fi triit di man dem weh yonga an yu, laik if dehn dah yo breda.

² Ahn, yu fi triit di uman dem weh uolda an yu siem laik if dehn dah yo muma. Ahn yu fi triit di uman dem weh yonga an yu siem laik if dehn dah yo sista. Ahn main, kiip yoself kliin tuwaadz aala dem.

³ Ahn yo fi triit di wido dem, weh no gat nonbady fi help dem wid ana tu.

⁴ Bot, if wan wido gat pikniny or granpikniny, dah dem fi tek kier a im di wie God waahn dem fi du. Ahn iina dah wie, demya pikniny gwain pie bak som a weh dehn huo tu dehn muma ahn pupa, or dehn granmada ahn granfaada. Ahn wen dehn du dat, dehn gwain mek God hapy wid dem.

⁵ So, dehn gat two kain a wido: Wan dah wehn wido fi chruut, bikaaz shii no gat nonbady fi help im; so shii gwain luk tu God fi help. Dah uman gwain prie juurin di die ahn juurin di nait tu, deh aks God fi ihn help.

⁶ Bot di neks wido liv jos fi ihn uon plezha, ahn so ihn don ded iina God sait, iivn duo ihn deh liv.

⁷ Yuu, Timothy, yu fi tiich di pipl dem ahn dehn famaly fi dehn du demya tingz weh Ah deh tel unu fi du, so dat nonbady kyaahn akyuuz yu seh yo deh du bad.

⁸ Evrybady fi tek kier a dehn uon relativ dem —speshaly demya pipl weh deh iina dehn uon famaly. Bot, if dehn no du dat, den demya pipl weh seh dehn biliiv iina God, no miin notn ataal. Dehn wosa an dem weh no chros iina Christ iina di fos plies!

⁹ So, Timothy, yu ongl fi put pahn di chorch lis di niem a wan wido weh gat sixty yierz, ahn weh wehn fietful tu ihn ded hozban.

¹⁰ Pan tapa dat, di pipl dem hafy nuo disya wido fi di gud tingz weh shii deh du. Ihn fi bii wan uman weh wehn riez'op ihn pikniny dem rait, ahn weh yuuztu welkom pipl iina ihn hous, ahn weh yuuztu wash di fut dem a God pipl dem, ahn help demya pipl weh deh sofa tu. Ihn fi bii wan uman weh wehn du plenty gud ting aal di taim.

¹¹ Bot yu no fi rait dong non a di yonga wido niem dem pahn di lis a demya pipl weh di chorch hafy help out. Bikaaz, wen di yonga wido dem get wan strang fiilin ahn dehn waahn get marid agen, dehn deh ton weh fahn dehn pramis fi sorv Christ aluon.

¹² Ahn iina dah wie, dehn gilty, bikaaz dehn don brok di pramis weh dehn wehn fos pramis tu him.

¹³ Den tu, di yonga wido dem laan fi bii aidl, ahn dehn go fahn hous tu hous. Ahn pan tapa dat, dehn laan fi gasip ahn taak bout ada pipl bizniz, deh seh tingz weh dehn no fi seh.

¹⁴ So den, Ah tink ih muo beta if di yonga wido dem get marid agen ahn gat pikniny, ahn main dehn uon hous, so dehn no gi dehn enimy notn bad fi taak bout dem.

¹⁵ Bot som a demya yonga wido don ton weh fahn di Laad aredy ahn deh fala Satan. Imajin!

¹⁶ So, if eny uman weh dah wan biliiva gat wido iina ihn famaly, shii fi help dem ahn no mek di chorch hafy get bordn dong wid dem. Iina dah wie, di chorch gwain kyan help dehn wido weh riily niid di help fi chruut.

Bout di chorch elda dem

¹⁷ Now, Timothy, bout di elda dem weh deh du wan gud work deh liid di chorch, speshaly demya pipl weh deh work uova haad deh priich ahn deh tiich, di pipl dem a di chorch shuda nuo seh dehn fi gi dem dobl pie.

¹⁸ Laik weh rait iina di Skriptyo seh, “Yu no fi tai op di bul mout wail ihn deh grain di grien.” Ahn iina wan neks plies ih seh, “Di workman fi get di pie weh ihn work fah.”

¹⁹ Ahn if sombady deh akyuuz wan a di elda dem, yu no fi lisn tu im. Ongl lisn tu im if ihn ker one or two muo wiknis weh seh wat ihn deh seh dah di chruut.

²⁰ Ahn demya elda weh yu fain gilty, yu fi karek dem iina di uopm fronta evrybady, so di res a di pipl dem gwain fried fi sin.

²¹ So den, Timothy, fronta God ahn Christ Jesus, ahn di Laad ienjel dem, Ah deh waan yu fi du demya tingz yah, weh Ah deh tel yu fi du. Yu fi triit evrybady di siem wie, ahn no shuo non kain a fievaritizm nontaim.

²² Ahn yu no fi ak tuu fas fi put yo han pahn wan man fi pik im fi bii wan chorch liida niida. Tek yo taim, or yu maita uova-luk som sin weh ihn deh du. Ahn den, lietaraan ih maita luk laik yu wehn kom aanda agriiment wid dem! Insida dat, yu fi kiip yo haat kliin aal di taim.

²³ Wan wod bout yo helt, mi son: yuu no fi ongl jrink waata. Yu fi jrink wan likl wain fi help yo stomik, bikaaz yo stody get sik so moch.

²⁴ Som pipl sin, ahn evrybady kyan si weh dehn deh du. Ahn demya pipl weh sin iina datde wie, dehn sin deh go hed a dem tu jojment. Bot ada pipl kyan sin, ahn nonbady no nuo bout'ih now, bot lietaraan evrybady gwain nuo bout'ih!

²⁵ Iina di siem wie, som pipl du gud work ahn evrybady kyan si weh dehn deh du. Bot if di pipl dem kyaahn si dehn gud work now, iivn so lietaraan dehn gwain nuo.