1 Timothy 4 - The New Testament in Islander Creole

Muo bout di faals tiicha dem

¹ Now, God Spirit taak klier-klier, seh juurin demya laas diez, som a di pipl dem gwain stap biliiv di chruu tiichin bout Christ weh wii biliiv. Dehn gwain fala di wikid spirit dem, weh waahn fuul'op di pipl dem ahn fala demya tiichin weh di diimon dem deh tiich.

² Demya pipl dah riil hipokrit ahn tiich di pipl dem plenty lai. Dah laik dehn kanshans don bon wid wan hat aiyan ahn dehn no gat non fiilinz ataal.

³ Dehn gwain tel di pipl dem seh ih no rait fi marid, ahn ih no rait fi iit sortn kain a fuud niida. Bot God don mek di pipl dehn fuud fi dehn iit! Ahn demya pipl weh chros iina Christ nuo di chruut, dat dehn kyan iit eny fuud afta dehn prie ahn gi God tanks far ih.

⁴ Bikaaz evryting weh God wehn mek, gud! Ahn notn ataal deh weh di pipl dem shuda seh, “Ih no gud fi iit.” Dehn kyan iit eny kain a fuud if dehn gi God tanks far ih,

⁵ bikaaz God Wod ahn dehn praya dem mek'ih fit fi iit fahn how God si'it.

How wi shuda du Jesus Christ work

⁶ So, Timothy, if yu tel aala dem weh dah fi wi uon fela biliiva fi du demya tingz yah, weh now Ah deh tel yo, yu gwain du di work weh Christ Jesus wehn gi'yo fi du. Ahn yu gwain gruo muo stranga iina Christ chruu demya tiichin weh yu don laan, weh gud ahn weh yu stil deh fala.

⁷ Siem wie, yu no fi gat notn fi du wid demya mek'op stuory weh go gens di chruu tiichin bout God, ahn weh no wot notn ataal. Insida dat, Ah deh waan yu fi trien yoself fi liv muo ahn muo fi God.

⁸ Ih gud fi trien wi bady, bot ih muo beta if wi deh trien wiself fi liv muo ahn muo fi God. Bikaaz dat gwain help iina evry paat a wi laif, ahn iina di laif weh fi kom tu.

⁹ Demya wod weh Ah deh seh dah chruut, ahn evrybady shuda biliiv dem.

¹⁰ Ahn dat dah wai wi work, ahn kiip aan deh trai muo haada evry die, bikaaz wi don put wi chros iina di livin God, weh dah evrybady Sievya, speshaly demya pipl weh chros iina him.

¹¹ Demya dah di tingz weh yu fi insis pan ahn tiich:

¹² Yu no fi mek nonbady luk dong pahn yu bikaaz yu yong. Insida dat, yu fi shuo demya pipl weh chros iina Christ di wie dehn shuda bihiev, bai how yu yoself deh taak, how yu deh stan op fi di gud ting dem, how yu deh lov pipl, how yu deh chros iina Christ, ahn how yu deh liv wan kliin laif.

¹³ So, til Ah get deh, yo fi mek shuor seh yo riid God Wod tu aal di pipl dem fi inkorij dem, ahn tiich dem fi nuo how God waahn dem fi liv.

¹⁴ Ahn yu no fi stap yuuz di spiritwal gif weh God wehn gi'yo, wen di prafit dem tel yu weh God seh bout yu ahn di elda dem put dehn han pahn yo hed fi bles yo.

¹⁵ So den, Timothy, kiip aan deh du demya tingz aal di taim. Put aal yo haat iina ih, so evrybady wi si seh yu deh du muo beta aal di taim.

¹⁶ Pie main, mi son, tu how yo deh liv ahn wat yo deh tiich di pipl dem. Mek shuor seh yo tiichin no chienj ataal. Yu no fi stap du demya kain a tingz nontaim, bikaaz if yu kiip aan deh du dem, yu gwain siev demya pipl weh deh lisn tu yu ahn yoself tu!