1 Timothy 2 - The New Testament in Islander Creole

How fi waaship God fi chruut

¹ Fos ting, Ah deh beg unu fi prie fi evrybady. Aks God fi bles aal di pipl dem ahn fi help dem. Tel di Laad how yu tank im fi iich wan a dem.

² Wi fi prie fi di king dem ahn aala dehn ada pipl dem weh gat plenty atarity, so dat wi kyan liv wan kwaiyet ahn piisabl laif, deh waak nier tu God ahn no deh du notn weh gwain mek wi shiem.

³ Dat dah di wie wi shuda prie, bikaaz dat kain a praya uova gud ahn ih pliiz God, fi wi Sievya.

⁴ Dah him weh waahn siev aal di pipl dem, ahn waahn iich porsn kom fi nuo di chruut.

⁵ Bikaaz, dah ongl wan God ahn wan porsn weh deh stan bitwiin God ahn man fi bring wi tugeda, ahn dah man dah Christ Jesus himself!

⁶ Jesus wehn sakrifais ihn laif fi set aal wi pipl frii fahn sin, ahn dat sakrifais wehn mek iina di rait taim.

⁷ Ahn so, dat dah wai God wehn pik mii ahn sen mi fi bii ihn gud nyuuz kariya ahn wan apasl, fi tiich dehn pipl weh dah no Jew how dehn fi chros iina Christ, deh shuo dem di chruu wie fi get siev. Ahn Ai deh tel unu di chruut; Ah no deh tel non lai ataal!

⁸ So den, Ah waahn aal di man dem evrywie fi prie. Dehn fi bii pipl weh gi God aredy dehn laif, ahn weh deh liv far im. So, wen dehn lif op dehn han fi prie, dehn no fi get beks wid nonbady, ahn dehn no fi stie deh aagyo wid nonbady niida.

⁹ Ahn az faar az di uman dem kansaan, Ah no waahn dem fi deh kaal atenshan tu demself bai di wie how dehn dres. Dehn fi dres sensabl ahn diisent. Dehn no fi deh wier dehn hier fansy fi kaal atenshan tu demself. Ahn dehn no fi deh wier fansy guol, nar porl biidz niida, nar fansy dres weh uova dier.

¹⁰ Insida dat, wan uman shuda du plenty gud tingz —demya dah di tingz weh wan uman shuda du, weh seh ihn lov God.

¹¹ Ahn wen unu deh tiich, wan uman fi kiip kwaiyet ahn bii aanda atarity, ahn dehn fi laan iina sailens.

¹² Ahn yu no fi mek non uman tiich, niida gat atarity uova di man dem. Di uman fi kiip kwaiyet,

¹³ bikaaz God wehn mek Adam fos, bifuor ihn mek Eve.

¹⁴ Ahn di devl neva fuul Adam; dah Eve imself, weh dah di wan weh di devl fuul'op ahn mek shii faal iina sin.

¹⁵ Bot God gwain siev di uman dem wen dehn pikniny deh baan, if dehn kiip aan deh chros iina Jesus Christ, lov di pipl dem, stie huoly, ahn if dehn deh liv wan diisent laif.