1 Timothy 1 - The New Testament in Islander Creole

Di Apasl Paul rait wan leta tu Timothy

¹ Dis leta dah fahn mii, Paul, weh dah wan apasl a Christ Jesus. Dah wehn God, fi wi Sievya, ahn ihn Son, Christ Jesus —di Wan weh wi put wi huop iina— weh pik mi fi bii wan apasl.

² Ah deh rait tu yu, Timothy, weh dah laik mi uon son, bikaaz di two a wi gat di siem fiet iina Jesus Christ. Ah deh prie seh God di Faada ahn Christ Jesus, fi wi Laad, gi'yo ihn gries, morsy ahn piis iina yo haat.

Paul waan Timothy bout som priicha weh no tiich di chruut

³ Timothy, jos laik Ah beg yo wen Ah wehn gwain Macedonia, Ah deh seh it agen: yu fi stie rait deh dah Ephesus, bikaaz dehn gat som pipl deh, weh deh tiich som tingz weh dah no chruu! So, yu fi stie deh, so dat yu kyan tel dem fi stap tiich di pipl dem datde wie.

⁴ Ahn yu fi tel dem seh dehn no fi spen nontaim ataal deh stody suporstishan ahn dehn lang-lang lis a niem a dehn griet-griet-griet granfaada dem weh kyaahn don. Bikaaz demde kain a tingz dehn jos mek di pipl dem aagyo. Ahn dat no help di plan dem weh God gat fi dem weh dah fi mek dehn fiet muo stranga.

⁵ Insida dat, unu fi tiich di biliiva dem how dehn kyan get riil lov fi wan anada. Ahn datde lov kom fahn wan kliin haat, wan klier kanshans, ahn wan chruu fiet.

⁶ Bot som pipl don ton weh fahn dehn tingz. Ahn now dehn deh taak plenty fuulish tingz weh no gat non sens ataal.

⁷ Dehn waahn tiich di pipl dem bout God Laa laik if dehn so nuo ih, bot dehn no andastan dehn uon wod dem, nar andastan weh di Laa miin. Bot stil yet dehn deh taak bout'ih wid plenty kanfidens.

⁸ Now wi nuo seh di Laa gud, if di pipl dem fala ih laik dehn shuda fala.

⁹ Wi nuo tu seh di Laa neva wehn mek fi raichos pipl weh kiip'ih. Di Laa wehn mek fi demde kain a pipl weh no waahn kiip'ih! —fi di kriminal dem, fi dem weh no nuo God, ahn fi demde pipl weh ful a sin. Dah Laa wehn mek fi demde pipl weh no gat non rispek fi God, ahn tek ihn tingz fi miin notn ataal, ahn fi demde kain a pipl weh kil dehn uon pupa ahn muma, ahn demde kain a pipl weh kil ada pipl tu!

¹⁰ Di Laa wehn mek fi di pipl dem weh sliip roun, ahn fi dehn kain a man weh deh sliip wid ada man tu. Di Laa dah fi demde pipl weh deh kidnap pipl ahn sel dem fi sliev, ahn fi demde kain a pipl weh no tel di chruut nontaim, ahn fi dem weh deh lai, ahn swie seh dehn deh tel di chruut! Ahn di Laa dah fi demde kain a pipl, weh deh du enyting weh kantriery tu di chruu tiichin a Christ.

¹¹ Dis chruu tiichin dah paat a di wandaful Gud Nyuuz weh wi blesed God gi mi fi Ah go tel evrybady.

Paul gi tanks fi God morsy

¹² So den, Ah gi tanks tu fi wi Laad Christ Jesus, huu wehn gi mi strent fi du mi work. Dah him wehn chros mi wid ihn mesij, ahn pik mi out fi sorv im.

¹³ Iivn duo Ai yuuztu insolt God, ahn Ah yuuztu ongl bii kruwil ahn mek ihn pipl dem sofa plenty; stil yet, Christ gat morsy pahn mi, bikaaz Ah neva wehn nuo beta, ahn bikaaz Ah neva chros iina Christ demde taim.

¹⁴ Bot, fi wi Laad Jesus puor out ihn gries pahn mi plenty, ahn gi mi fiet ahn lov. Ahn, bredrin, dis dah weh hapm, wen wi dah wan wid Christ Jesus!

¹⁵ So den, dis mesij weh Ah deh tel unu, dah chruu ahn evrybady shuda biliiv'ih. Dis mesij weh Ah priich seh: “Christ Jesus kom iina di worl fi siev di sina dem!” Ahn Ai shiem fi seh, dat Ah yuuztu bii di wos wan a dem! Ah yuuztu sin muo wosa an enybady els.

¹⁶ Bot God wehn gat morsy pahn mi, so dat ihn kuda shuo seh, if Christ Jesus bier'op wid mi weh wehn sin muo an aal di res a dem, den ihn gwain kyan bier'op wid ada pipl laik mii weh gwain kom fi chros iina him tu. Ahn so ihn gwain gi dem laif weh neva gwain don nontaim.

¹⁷ So mek wi ana ahn priez di King fi huu Kingdom dah fareva —di Wan weh wi kyaahn si, ahn weh gwain neva ded. Him dah di ongli'is God fi chruut. So, mek wi gi'im aal di ana ahn priez fareva ahn eva. Amen!

¹⁸ Timothy, mi son, dis dah di instrokshan weh Ah deh gi'yo: fala disya mesij weh God wehn gi tu di prafit dem bout yu, so dat yu gwain gat di main fi fait haad iina disya gud fait.

¹⁹ Yuu fi chros iina God ahn du weh yu nuo dah di rait ting fi du. Som pipl don ton weh fahn weh dehn nuo fi bii rait, ahn bikaaz a dat, dehn don mes'op dehn fiet iina Christ.

²⁰ Hymenaeus dah wan a dem, ahn Alexander dah wan neks wan. So, Ah don ton dem uova tu Satan fi tiich dem seh dehn no fi insolt God no muo.