1 Thessalonians 4 - The New Testament in Islander Creole

Di kain a laif weh God waahn wi fi liv

¹ Bredrin, mek Ah shier dis laas wod wid unu: Ah deh beg unu iina di niem a di Laad Jesus fi liv iina wan wie weh gwain pliiz God. Liv jos laik how wi wehn tiich unu. Ahn dat dah weh unu deh du aredy, bot wi deh inkorij unu fi liv wan huoly laif iivn muo ahn muo;

² bikaaz unu aredy nuo demya tingz weh wi wehn tel unu fi du chruu di atarity a di Laad Jesus.

³ God waahn unu bii huoly, so unu fi kiip weh fahn aal sin weh gat fi du wid seks.

⁴ Evry wan a unu man fi laan how fi kanchruol unu uon bady iina wan wie weh huoly ahn rait.

⁵ Unu no fi bii wan sliev tu unu los, ahn no fi liv laik di pipl dem weh no nuo God.

⁶ Ahn wan nada ting, non a unu fi tek advantij a eny biliiva, nar du eny rang tu im wen ih kom tu demya mataz. Wi wehn tel unu dis mesij aredy, ahn wi deh waan unu agen seh, di Laad gwain ponish enybady weh du demya tingz.

⁷ Bikaaz, God neva kaal wi fi liv wan doty laif. Ihn wehn kaal wi fi liv iina wan huoly wie!

⁸ So den, if unu no waahn obie disya tiichin, dah no wii unu deh go gens, bot dah God unu deh ton unu bak pan —di Wan weh wehn gi unu ihn Holy Spirit!

⁹ Now, Ah no hafy rait tu unu bout how unu shuda lov wan anada, bikaaz God wehn don tiich unu dat aredy!

¹⁰ Di chruut dah seh, Ah nuo seh unu lov aal di biliiva dem iina aala Macedonia lan, bot Ah deh beg unu, bredrin, fi lov wan anada iivn muo beta.

¹¹ Ahn mek'op unu main fi trai fi liv iina piis wid wan anada, ahn main unu uon bizniz tu. Work wid unu uon han jos laik weh wi wehn tel unu, wen wi wende wid unu.

¹² If unu du dat, den unu gwain mek di pipl dem weh dah no biliiva luk'op tu unu. Ahn unu no gwain hafy dipen pahn nonbady niida.

Weh gwain hapm pahn Dat Die wen di Laad Jesus kom bak

¹³ Bredrin, wan nada ting: wi waahn unu fi nuo di chruut bout di biliiva dem weh don ded, so dat unu no get uova sad laik how dehn ada pipl fiil sad, bikaaz dehn no gat non huop iina God.

¹⁴ Now, wii biliiv seh Jesus wehn ded ahn ihn riez'op bak fahn di ded. Ahn wii biliiv tu seh, God gwain sen bak wid Jesus aala demya pipl weh wehn ded ahn weh wehn put dehn fiet iina him.

¹⁵ So den, dis dah di Laad Jesus tiichin weh wii deh tel unu: Pahn Dat Die wen di Laad kom bak, wii weh no ded yet, no gwain go hed a demya pipl weh don ded aredy.

¹⁶ Bikaaz pahn Dat Die, aal di pipl dem pahn ort gwain hier wan haad vais gi di komaan. Dehn gwain hier di vais a di hed ienjel, ahn ihn gwain bluo God trompit. Ahn den di Laad ihnself gwain kom dong fahn hevn. Ahn demya pipl, weh wehn ded —weh don chros iina Christ— dehn gwain riez'op fos!

¹⁷ Afta dat, wii weh no ded yet ahn weh wehn lef yah, gwain go'op iina di kloud dem lang wid aala dem weh wehn don ded —aala wi tugeda gwain miit di Laad iina di skai. Ahn so aala wi gwain bii wid di Laad fareva ahn eva!

¹⁸ So den, unu weh dah mi fren dem, inkorij wan anada wid demya wod.