1 Thessalonians 3 - The New Testament in Islander Creole

Timothy mishon tu di chorch dah Thessalonica

¹ So, wen wi kudn stan'ih no langa, wi disaid seh wii aluon gwain stie bak iina Athens,

² ahn sen wi breda, Timothy, fi go, go si unu. Timothy wehn work tugeda wid wii, deh du God work deh tel di pipl dem di Gud Nyuuz bout Christ. So, wi sen him fi strentn ahn inkorij unu, ahn help unu fi chros di Laad muo ahn muo,

³ so dat non a unu no ton bak sieka aal di trobl ahn haad taim dem weh unu deh go chruu now a diez. Bot unu aredy nuo dat trobl dah paat a God plan fi wi!

⁴ Fahn lang taim abak, wen wi wende wid unu, wi wehn waan unu seh dehn wehn gwain gi wi haad taim, ahn dat dah jos weh hapm, az unu wel nuo.

⁵ Dat dah wai, wen Ah kudn tek'ih no muo, Ah wehn sen Timothy fi fain out if unu stil yet gat fiet iina God. Ah wende huop seh Satan —di wan weh laik temp pipl— neva kom temp unu tu di paint fi mek aal di work weh wi wehn put iina unu gaan tu notn!

⁶ Wel, Timothy jos kom bak fahn ihn vizit tu unu, ahn ihn wehn gat gud nyuuz fi gi wi seh fi unu fiet ahn lov deh az strang az eva. Ahn ihn tel wi seh unu gat gud memry bout wi, ahn dat unu waahn si wi az moch az wii waahn si unu tu.

⁷ So den, bredrin, iivn duo wi wehn sofa ahn gaan chruu plenty trobl, wen wi hier bout unu strang fiet, dah gud nyuuz wehn inkorij wi haat plenty.

⁸ Ahn sieka weh unu no mek notn stap unu fahn waak strang iina di wie a di Laad, dat mek wi fiil laik fi wi laif wot somting fi chruut.

⁹ So, dah how wi kyan gi God tanks nof fi unu? Bikaaz a unu, wi don ful'op a jai, wen wi kom fronta fi wi Faada op iina hevn.

¹⁰ Ahn now, die ahn nait wi deh prie wid aal wi haat dat wi gwain si unu fies tu fies, so wi kyan help unu wid enyting weh unu niid fi help unu fiet get stranga ahn stranga.

¹¹ So den, mek fi wi Faada God ahn ihn Son, di Laad Jesus, uopm datde wie fi mek wi vizit unu suun!

¹² Ahn Ah deh aks di Laad tu seh fi mek unu lov wan anada, ahn fi aal di pipl dem evrywie gruo muo ahn muo, ahn fi dah lov get az big az wat wi gat fi unu!

¹³ Wen unu du dat, Christ gwain mek unu haat strang, ahn nonbady gwain kyaahn fain non faalt wid unu ataal. So den, unu gwain bii kliin ahn huoly fronta fi wi God ahn Faada pahn Dat Die wen di Laad Jesus kom bak wid aala di pipl dem weh dah fi him.