1 Thessalonians 2 - The New Testament in Islander Creole

Paul work iina Thessalonica

¹ Bredrin, unu nuo seh di taim weh wi wehn spen wid unu dah neva wan wies a taim.

² Unu nuo seh how dehn wehn triit wi bad ahn insolt wi dah Philippi, jos bifuor wi wehn kom tu unu. Bot wii neva mek dat stap wi iivn duo plenty pipl wende gens wi. God gi wi di korij ahn so wi neva fried ataal fi tel fi him Gud Nyuuz tu unu dah Thessalonica.

³ So unu kuda si seh wi neva deh trai fuul unu, nar trik unu, nar liid unu astrie, wen wi wehn kom priich tu unu.

⁴ Insida dat, weh wi wende seh dah aalwiez weh God wehn waahn wi seh, bikaaz him wehn si seh ihn kuda wehn chros wi wid fi him Gud Nyuuz. Wi no fi trai pliiz nonbady —ongl God— bikaaz dah him dah di Wan weh nuo ahn tes wi haat.

⁵ Unu wel nuo tu seh wi neva kom tu unu wid non swiit-taak niida; wii neva put aan no shuo laik if wii dah wehn unu fren so dat wi kuda wehn get mony fahn unu. Ahn God ihnself dah fi wi wiknis.

⁶ Ahn wii neva wende luk fi non priez fahn unu nar fahn nonbady els niida.

⁷ Ahn iivn duo wi kuda wehn dimaan help fahn unu, sins wi dah apasl, wii no du'ih. Bot, wii wehn triit unu uova saaf, laik wen wan muma deh tek kier a ihn bieby.

⁸ Dat dah bikaaz a fi wi lov fi unu, dah wai wi wehn redy fi shier —no ongl di Gud Nyuuz fahn God— bot fi wi uon laif!

⁹ Bredrin, Ah no tink unu kyan farget how haad wi wehn work mongs unu. Wi work nait ahn die fi tek kier a wiself, bikaaz wi neva waahn nonbady seh wi dah wehn wan borden tu unu, wail wi wende priich di Gud Nyuuz bout Jesus Christ.

¹⁰ Unu dah fi wi wiknis, ahn God imself tu, dat wi wehn liv huoly ahn raichos, ahn nonbady kudn fain non faalt wid wi wail wi wende mongs unu weh chros iina Christ.

¹¹ Ahn unu wel nuo seh wi wehn triit evry wan a unu laik how wan pupa wuda triit ihn uon pikniny dem.

¹² Wi wehn inkorij unu, ahn wi chier unu op, ahn wi beg unu fi kiip aan deh waak iina di wie weh fit fi God pipl dem fi waak. Bikaaz God kaal unu fi bii paat a fi him Kingdom ahn di gluory weh ihn gat.

¹³ Ahn no ongl dat, bot wi aalwiez tank God seh unu biliiv di mesij weh wi wehn priich tu unu. Unu wehn tek'ih laik dat dah wehn God mesij —ahn dah mesij wehn kom fahn God ihnself fi chruut! Dah neva notn weh wi wehn mek'op outa wi hed —ahn now dis siem mesij deh work iina unu laif tudeh stil yet!

¹⁴ So den, bredrin, di siem tingz weh wehn hapm tu God chorch dem iina Judea lan, hapm tu unu weh dah wan wid Christ Jesus tu. Unu sofa di siem kain a porsikyuushan fahn unu uon pipl, weh dehn wehn sofa fahn di Jew dem uova deh.

¹⁵ Demde kain a pipl dah dem weh wehn kil di prafit dem, ahn dehn wehn kil di Laad Jesus, ahn now dehn mek wi sofa uova bad tu. Fi chruut, God neva laik weh dehn deh du, ahn di chruut dah seh, nonbady els neva laik weh dehn deh du niida!

¹⁶ Dehn wehn iivn trai stap wi fahn priich di mesij weh wehn gwain gi salvieshan tu dehn pipl weh dah no Jew! Ahn bikaaz a dat, dehn gaan tuu faar, ahn dehn gilt deh pail op sin pahn tapa sin! Ahn so now God wehn ongl beks wid dem ahn ihn raat don kom dong pahn dem uova haad.

Paul waahn si di Thessalonian biliiva dem plenty

¹⁷ Wel, az fi wii, bredrin, wi kudn go si unu fi wan likl wail, bot wi neva stap tink bout unu. Wi wehn waahn go si unu so bad, dat wi wende trai wi bes fi kom.

¹⁸ Bot Satan trai haad fi stap wi. Mii, Paul, wehn trai uova ahn uova fi kom!

¹⁹ Aftaraal, wen di Laad Jesus kom, dah huu gwain mek wi fiil gud bot unu? Unu dah wai wii kyan buos. Unu dah fi wi huop; unu gi wii jai; ahn unu gwain bii laik wan kroun a gluory fi wii wen wi stan tugeda fronta di Laad Jesus wen ihn kom bak.

²⁰ Fi chruut, unu dah fi wi praid ahn jai ahn dat dah wai wi wehn waahn si unu agen suun-suun!