1 Peter 5 - The New Testament in Islander Creole

Weh di eldaz ahn di yong man dem fi du

¹ Now, Ah deh taak tu di chorch elda dem mongs unu. Mii dah wan elda tu ahn Ah dah wan wiknis ah weh Christ sofa, so Ah gwain shier iina ihn gluory weh ihn gwain shuo wi. Unu chorch eldaz, Ah deh beg aala unu

² fi bii laik wan shepad fi di flak weh God wehn gi unu, ahn so tek kier a di shiip dem —laik weh God waahn unu fi du— ahn no bikaaz unu hafy du'ih. Du dah work bikaaz unu riily waahn sorv, no jos fi di mony.

³ Ahn no deh baas'op di pipl dem weh deh iina unu kier niida; bot reda, bii wan egzampl tu dem,

⁴ so dat wen di Chiif Shepad kom bak, unu gwain get wan kroun a gluory weh gwain neva fied-weh.

⁵ Siem wie, unu yonga pipl fi obie unu elda dem. Di chruut dah seh, aala unu niid fi ombl unuself ahn sorv wan anada, bikaaz di Skriptyo seh: “God fait gens dehn pipl weh proud, bot ihn help dem weh ombl.”

⁶ So, unu fi ombl unuself aanda di maity powa a God, ahn ihn gwain ana unu fi shuor wen di prapa taim kom.

⁷ Ahn unu fi chruo aala unu woriz ahn kier pahn God, bikaaz him kier bout unu!

⁸ Stie pahn unu gyaad tu, ahn wach out! Unu enimy —weh dah di devl— him dah laik wan laiyan weh deh ruor. Him deh waak roun fahn plies tu plies deh si huu ihn kyan iit'op!

⁹ So unu hafy stie strang iina unu fiet, so unu kyan stan op gens im. Memba seh: di ada biliiva dem aal uova di worl deh go chruu dehn siem kain a sofarin dem.

¹⁰ Bot, afta unu don sofa fi wan likl wail, di God a Gries —weh kaal unu fi bii wan wid Christ Jesus fi shier ihn gluory weh gwain laas fareva— him gwain mek unu bii aal weh unu supuoz fi bii. Ahn ihn gwain mek unu strang, ahn ihn gwain help unu so unu no gwain shieky iina unu fiet.

¹¹ Memba tu seh: aal powa dah fi wi Laad Jesus Christ fareva ahn eva. Amen!

Di Apasl Peter laas griitin dem

¹² Bredrin, Ah deh rait unu dis shaat leta. Ahn Silas, weh dah wan fietful biliiva, deh help mi du'ih. Di riizn wai Ah deh rait dis leta dah fi inkorij unu ahn fi mek unu nuo seh unu kyan chros di chruu gries a God no mata weh gwain hapm tu unu!

¹³ Unu sista chorch —weh deh dah Babylon, weh God wehn pik— sen seh fi tel unu, heluo. Ahn mi son, Mark, sen heluo tu.

¹⁴ Hiel'op wan anada wid wan huoly kis. Ah prie piis fi aala unu weh dah wan wid Christ!