1 Peter 4 - The New Testament in Islander Creole

How fi liv fi God

¹ So den, bikaaz Christ sofa yah iina ihn bady iina dis worl, unu fi tink jos laik how Christ wehn tink. So, wen unu deh sofa, unu gwain bii strang tu, bikaaz sin kyaahn kanchruol nonbady wen dehn deh sofa.

² Fahn yah go bak, unu niid fi liv di res a unu laif yah pahn ort deh du weh God waahn unu fi du, ahn no weh unu fiil fi du.

³ Unu don spen nof taim bak den deh du dehn tingz weh di pipl dem weh non nuo God du. Unu yuuztu spen unu taim deh go dah wail paaty, unu jrink ahn get jronk, unu liv wan slak laif, ahn unu ful a los. Unu yuuztu du di muos disgostin tingz dem, ahn unu yuuztu waaship di aidal dem tu.

⁴ Ahn now, unu fren dem weh unu yuuztu gat, dehn sopraiz seh unu no waahn jain dem agen fi du dehn wikidnis weh unu yuuztu du. So, dehn ton roun ahn insolt unu!

⁵ Bot jos memba seh demde kain a pipl gwain hafy gi akount tu God weh gwain joj aala dem, di livin ahn di ded!

⁶ Dat dah wai di Gud Nyuuz wehn priich iivn tu demde pipl weh don ded. Bikaaz alduo dehn ded —jos laik evrybady— dehn wehn get wan chaans fi fain laif iina di spirit chruu obie weh God waahn dem fi du.

Tek gud kier a God gif dem

⁷ Bredrin, unu main! Di en a di worl suun kom, so unu hafy get siiryos ahn kanchruol unuself, so dat unu kyan prie gud.

⁸ Ahn di muos impuotant ting an aal: unu fi lov wan anada wid chruu lov, bikaaz lov kova plenty sin.

⁹ Ahn unu fi uopm unu huom tu wan anada bitout deh komplien nontaim.

¹⁰ Memba seh: God wehn bles evry wan a unu wid wan a ihn speshal gif dem, so unu kyan yuuz ih fi sorv ada pipl.

¹¹ So, if unu gat di gif fi priich; wel, priich God Wod gud. If unu gat di gif fi help ada pipl; wel, du'ih wid aala di strent weh God gi'yo. Unu fi du evryting so dat ih kyan bring ana tu God chruu Jesus Christ weh gat aal di gluory ahn powa iina him fareva ahn eva. Amen!

Sofarin bikaaz wii deh chros iina Jesus

¹² Mi dier fren dem, wan neks ting: unu no fi fraitn wen unu deh go chruu dehn traiyalz weh bon unu laik faiya, laik if dah somting strienj deh hapm tu unu.

¹³ Insida dat, unu fi glad seh, unu deh get di chaans fi shier iina Christ sofarin, bikaaz aftawod unu gwain get di jai fi shier iina ihn gluory tu, wen di taim kom fi dehn shuo ih tu di pipl a disya worl.

¹⁴ So den, kount'ih wan blesin wen dehn insolt unu bikaaz unu dah wan biliiva iina Christ. Dis shuo seh God Spirit deh wid unu!

¹⁵ Bot, if unu dah wan mordara, wan tiif, wan kriminal, or sombady weh laik faas iina pipl bizniz, wel den, unu dizorv fi sofa!

¹⁶ Bot, if unu sofa bikaaz unu dah wan chruu Kristyan, unu no hafy shiem den. Insida dat, tank di Laad seh unu sofa fi him siek.

¹⁷ Unu pipl: Main, di taim fi jojment deh yah, ahn ih gwain staat fos mongs God uon pipl dem! Ahn if God jojment staat wid wii, unu kyan imajin how teribl ih gwain bii teribl fi demde pipl weh rifyuuz fi biliiv di Gud Nyuuz fahn God! Dah laik weh di Skriptyo seh:

¹⁸ “If di pipl weh raichos ongl get-weh, bai di skin a dehn tiit, weh unu tink gwain hapm, tu di sina dem ahn demya pipl, weh no gat non rispek fi God?”

¹⁹ So den, if unu deh sofa bikaaz dat dah weh God waahn fi unu, kiip aan deh du weh rait ahn put unuself iina God han —di Wan weh mek unu— bikaaz him no gwain fiel unu nontaim!