1 Peter 2 - The New Testament in Islander Creole

Jesus dah di Stuon weh Livin

¹ So bredrin, unu fi stap deh du di tingz dem weh hot ada pipl, ahn deh trai fuul dem op. Unu no fi bii wan hipokrit, nar jalas afta nonbady, nar taak bad bout dem niida!

² Insida dat, siem laik how dehn nyuu baan bieby no waahn notn els eksep dehn muma milk, unu fi tek God Wod laik milk ahn drink'ih plenty taim so ih kyan mek unu gruo iina unu salvieshan;

³ bikaaz dah laik weh di Skriptyo seh, “Unu don ties ahn si how gud di Laad gud!”

⁴ So den, kom tu di Laad. Dah him dah di Stuon weh Livin, weh ihn pipl wehn rijek bot weh God don pik, bikaaz Christ wehn uova preshos tu im!

⁵ Ahn unu dah stuon weh livin tu, so mek God yuuz unu fi bil wan spiritwal hous. Unu dah priis weh huoly, so di Laad Jesus gwain help unu fi aafa sakrifais tu God weh ihn gwain aksep.

⁶ Dah jos laik weh God wehn seh iina di Skriptyo, wen ihn seh: “Si, luk, Ah deh put wan brik iina Zion. Dah wan chief kaana-stuon weh Ai pik —di muos impuotant wan— ahn dah stuon ongl preshos tu mi! Dah him weh no gwain disapaint nonbady, weh put dehn chros iina him!”

⁷ Yees, him preshos tu aala demde pipl weh chros iina him; bot tu dehn pipl weh no chros, di Skriptyo seh: “Di stuon weh di bilda dem neva tink wehn wot notn, ton out fi bii di muos impuotant wan outa aala dem!”

⁸ Ahn ih rait iina di Skriptyo tu seh: “Dis dah di stuon weh mek di pipl dem bok dehn fut dem ahn stombl, ahn dah stuon gwain mek dem faal dong!” Demde pipl trip uova ih, bikaaz dehn neva obie weh God seh. So weh hapm tu dem, dah weh God wehn plan fi hapm tu dem!

⁹ Bot unu dah di speshal pipl dem weh God wehn pik out. Unu dah priis weh dah fi God, di King. Unu dah wan nieshan weh God set wan-said fi ihnself. God bring unu fahn outa daaknis ahn put unu iina fi him wandaful lait. Now unu hafy tel evrybady aal di wandaful tingz weh God wehn du.

¹⁰ Wan taim wehn deh, wen unu dah neva nonbady; bot now unu dah God pipl dem! Wan taim nonbady neva shuo unu morsy; bot now God shuo unu morsy!

Liv how God sorvant dem shuda liv

¹¹ Mi dier fren dem, unu dah no fi disya worl; unu dah farina ahn strienja. So, Ah deh waan unu: unu no fi giv iin tu dehn sinful fiilin weh deh fait gens unu uon suol!

¹² Unu fi liv iina soch a wie mongs di pipl dem weh no nuo God, dat iivn wen dehn deh akyuuz unu seh, unu deh du di tingz dem weh wikid, demya pipl hafy uon'op ahn seh dah neva chruu. Ahn di gud tingz weh unu du, gwain liid dem fi biliiv ahn gi God ana pahn Dat Die wen ihn kom bak fi joj di worl!

¹³ Ahn fi di Laad siek, put unuself aanda di pipl dem weh gat atarity iina disa worl: di king weh dah di haiyis atarity,

¹⁴ ahn di govana dem weh ihn put fi ponish demde kain a pipl weh brok di Laa, ahn fi pie dem pipl weh dah gud sitizn.

¹⁵ God waahn unu fi du weh gud, so dat unu kyan shet op demde kain a man weh no nuo notn ahn laik taak fuulishnis.

¹⁶ Unu dah no sliev; unu frii! Bot, no bikaaz unu frii, unu gwain yuuz dat laik wan ekskyuus fi go du rang. Unu frii fi liv laik wan sliev weh dah fi God!

¹⁷ Unu fi rispek evrybady, ahn shuo speshal lov fi unu breda ahn sista dem weh dah biliiva. Unu niid fi fier God ahn rispek di King.

Fala Christ egzampl

¹⁸ Ahn unu sorvant, unu niid fi obie unu maasta ahn aalwiez shuo dem rispek. No ongl du dis wen dehn kain tu unu ahn kansida unu, bot wen dehn kruwil tu unu tu.

¹⁹ God gwain bles unu, if unu wilin fi tek di pien fi somting weh unu no dizorv, bikaaz unu waahn pliiz him.

²⁰ Bot nuo dat unu kyaahn get non kredit fi tek di pien fi somting rang weh unu du. Bot God gwain bles unu, if unu wehn hafy sofa fi somting gud weh unu wehn du.

²¹ Aftaraal, God kaal unu fi sofa, if unu gwain fala iina di fut-step dem weh Christ lef. Dah him wehn lef wan porfek egzampl wen ihn sofa fi wii.

²² “Him neva sin, ahn ihn neva fuul'op nonbady niida.”

²³ Wen di pipl dem wehn insolt Christ, ihn neva insolt dem bak. Wen ihn wende sofa, ihn neva tretn dem. Ihn lef dem tu God, bikaaz God ongl joj striet.

²⁴ Ahn Christ himself ker fi wi sin dem iina fi ihn bady pahn di kraas, so dat wi kuda ded tu sin ahn liv fi weh rait. Dah chruu di kot ahn di bruuz dem weh ihn wehn sofa fi wi, wii kyan get hiil.

²⁵ Unu dah wehn laik shiip weh laas dehn wie, bot now unu kom bak tu di Wan weh dah unu Shepad ahn weh protek unu suol!