1 Peter 1 - The New Testament in Islander Creole

Di Apasl Peter rait tu Kristyan pipl aal uova di worl

¹ Dis leta dah fahn mii, Peter, weh dah wan apasl a Jesus Christ. Ah deh rait dis leta tu aala di pipl dem weh God wehn pik, weh deh liv laik strienja skyata aal uova di sekshan dem weh dehn kaal Pontus, Galatia, Cappadocia, Asia ahn Bithynia.

² Bredrin: God, fi wi Faada, wehn pik unu weh dah ihn pipl fahn lang-lang taim abak. Ahn chruu ihn Spirit ihn mek unu huoly, so dat unu obie Jesus Christ, ahn ihn blod mek unu kliin iina ihn sait! So, Ah prie seh God gwain shuo unu plenty muo gries ahn piis iina unu haat!

Di riizn wai wi gat huop

³ Bredrin, mek wi gi tanks tu God, di Faada a wi Laad Jesus Christ, bikaaz dah fi him griet morsy dah wai ihn mek wi kyan baan agen. Ahn siem taim ihn gi wi wan huop weh alaiv, sieka weh Jesus Christ riez'op bak fahn di ded!

⁴ Ahn so, aala wi deh luk ahed tu di rich blesin dem weh God put'op fi wii iina hevn. Ahn demya blesinz gwain kyaahn ratn nar spail nar fiedaweh nontaim ataal!

⁵ God gwain protek unu wid ihn griet powa til unu get dis salvieshan, bikaaz unu chros iina him. Ahn dis salvieshan gwain redy fi evrybady pahn dah Laas Die wen taim en.

⁶ Unu gwain glad pahn Dat Die, bot rait now unu sad, sieka aal di troblz ahn haad taim dem weh unu hafy go chruu fi wan likl wail langa.

⁷ Ahn dehn traiyalz dah fi pruuv seh unu fiet dah di chruu ting. Memba: iivn guol, weh kyaahn laas, dehn tes wid faiya, ahn fi unu fiet wot plenty muo an guol! So unu fiet hafy tes wid faiya, so dat ih kyan laas lang. Den, pahn Dat Die wen Jesus Christ kom bak, unu gwain get priez ahn gluory ahn ana.

⁸ Alduo unu neva si Jesus Christ yet, unu stil yet lov him, ahn alduo unu no deh si'im now niida, unu chros iina him. So, unu no gat di wod dem fi eksplien di griet jai weh unu fiil iina unu haat.

⁹ Ahn disa jai fi nuo muo ahn muo, bikaaz di pie fi weh unu put unu fiet iina im, dah di salvieshan a unu suol!

¹⁰ Ahn dis salvieshan dah wehn somting weh di prafit dem wehn waahn nuo muo bout. Dehn wehn prafisai bout dis gif weh God wehn waahn gi unu fahn lang-lang taim abak, ahn dehn wehn saach fi fain out bout'ih.

¹¹ Dehn wende wanda dah wat di Spirit a Christ —weh deh iina dem— wende taak tu dem bout. Ihn tel dem fahn bifuor ih hapm bout how Christ wuda sofa ahn bout ihn gluory aftawod. Den, dehn wende wanda dah wen aala dis gwain hapm ahn dah huu ih gwain hapm tu.

¹² Bot God tel di prafit dem seh, weh dehn deh rait bout dah no fi dem benifit, bot dah fi unu. Dehn wehn taak bout demde tingz weh now unu deh hier fahn demya pipl weh deh priich di Gud Nyuuz chruu di powa a di Holy Spirit, weh kom fahn hevn. Demya dah di tingz dem weh iivn di ienjel dem wuda laik fi nuo bout.

Wi fi bii huoly

¹³ So den, bredrin, get unu main redy fi akshan ahn kiip unuself aanda kanchruol aal taim. Set unu huop pahn dah speshal gries weh unu gwain get wen Christ kom bak.

¹⁴ Obie God, bikaaz unu dah fi him pikniny. Ahn no go bak, go liv dehn uol wikid wiez weh unu yuuztu liv —demde taim unu neva nuo no beta.

¹⁵ Insida dat, unu fi liv wan huoly laif iina evryting weh unu du; jos laik God, weh pik unu fi bii fi him uon pikniny, bikaaz him huoly.

¹⁶ Dat dah wai di Skriptyo seh, “Unu fi bii huoly, bikaaz Ai huoly.”

¹⁷ Unu nuo seh God dah unu Faada, bot memba tu seh, ihn no gat non fievarit nontaim. Him gwain joj unu, or ihn gwain pie unu bai weh unu du. So den, spen di res a unu laif yah pahn ort, deh ana ahn rispek im!

¹⁸ Unu nuo seh, God pie wan hai prais fi siev unu fahn dis wotlis wie a laif weh wehn paas dong tu unu fahn unu ansesta dem. Ahn di prais weh God pie dah neva silva nar guol weh kyaahn laas.

¹⁹ Ihn pie fi unu wid di preshos blod a Christ di Lam a God, weh neva gat non sin ataal, ahn neva gat non spat nar maak pan im niida.

²⁰ God wehn pik Christ iivn bifuor di worl wehn mek, bot now iina demya laas diez, ihn sen im dah ort fi evrybady si. Ahn ihn du dis fi unu.

²¹ Dah bikaaz a Christ unu kyan chros iina God. Ahn bikaaz God riez'op bak Christ fahn di ded ahn gi'im gluory, unu kyan put unu fiet ahn huop wid kanfidens iina God!

²² Now, az breda ahn sista iina Christ, unu kyan gat chruu lov fi wan anada, bikaaz unu obie di Gud Nyuuz weh dah di chruut, ahn so now unu kliin fahn sin. So den, si tu it dat unu riily lov wan anada wid aala unu haat.

²³ Unu baan agen chruu God Wod weh alaiv ahn gwain laas fareva. Unu no baan agen fahn wan muma ahn pupa fahn dis ort, bikaaz di laif weh dehn gi'yo gwain en'op iina det. Bot disya nyuu laif gwain laas fareva, bikaaz ih kom fahn God Wod, weh alaiv ahn gwain laas fareva.

²⁴ Dah jos laik weh di Skriptyo seh: “Hyuuman bi'in dah jos laik graas, weh iizy fi ded. Dehn pritinis fied-weh iina nontaim ataal, jos laik som prity flowaz.

²⁵ Bot di Wod a di Laad gwain laas fareva!” Ahn dat Wod dah di Gud Nyuuz weh dehn priich tu unu!