1 John 4 - The New Testament in Islander Creole

Tes di spirit dem

¹ Mi dier fren dem, unu no fi chros evrybady weh seh, dah God Spirit deh taak chruu dem. Bot unu fi tes out di spirit dem fos, fi si if dehn dah fahn God fi chruut, bikaaz wan paila faals prafit deh iina di worl.

² Dis dah how unu gwain nuo seh dah God Spirit: enybady weh seh wid dehn uon mout ahn biliiv seh, Jesus Christ wehn kom iina di worl az wan hyuuman porsn, dah fahn God.

³ Ahn enybady weh no seh dat, dah no fahn God; ahn di spirit weh deh taak chruu dem dah fahn di Enimy a Christ himself! Unu don hier seh di Enimy a Christ wehn fi kom iina di worl —ahn ihn deh yahso iina di worl aredy.

⁴ Bot, unu —weh dah mi pikniny dem— unu dah fi God, ahn unu don win di viktry uova dehn faals prafit aredy, bikaaz di Wan weh deh iina unu, muo grieta an di wan weh deh iina disya worl.

⁵ Demde faals prafit dah fahn dis worl, ahn di pipl dem fahn dis worl lisn tu dem, bikaaz dehn taak laik how di worl taak.

⁶ Bot, wii dah fi God, ahn enybady weh nuo God, lisn tu wii; ahn enybady weh dah no fahn God, no lisn tu wi. Dat dah how wi nuo wich spirit deh tel di chruut, ahn wich wan deh tel lai.

Lov kom fahn God

⁷ Mi dier fren dem, mek wi lov wan anada, bikaaz lov dah fahn God; ahn evrybady weh lov, dah God pikniny, ahn dehn nuo God.

⁸ Bot enybady weh no lov, no nuo God; bikaaz God dah lov!

⁹ Dis dah di wie how God wehn shuo wi ihn lov: ihn sen ihn ongl Son iina di worl so dat chruu him, wii kuda gat laif weh no gwain don nontaim ataal.

¹⁰ Dis dah weh dah riil lov: dah no seh, wii wehn lov God bot dah seh, him wehn lov wii, ahn ihn sen ihn Son fi bii wan sakrifais, so ihn kuda paadn wi sin dem!

¹¹ Mi dier fren dem, jos laik how God wehn lov wii plenty, wii fi lov wan anada plenty tu.

¹² Nonbady neva si God yet, bot if wi lov wan anada, den God lov deh iina wi fi chruut.

¹³ Dis dah how wi nuo seh, wi liv iina him ahn seh, him liv iina wi; bikaaz ihn gi wi ihn Spirit.

¹⁴ Wii don si fi wiself ihn lov, so now wi kyan mek evrybady nuo seh, di Faada wehn sen ihn Son fi siev di worl!

¹⁵ Ahn aal dem weh biliiv ahn seh wid dehn uon mout seh, Jesus dah di Son a God fi chruut, gat God deh liv iina dem ahn dem liv iina God!

¹⁶ So den, wii wehn kom fi nuo di lov weh God gat fi wi, ahn wi kyan dipen pahn ihn lov fareva! God dah lov, ahn di pipl dem weh liv iina lov deh liv iina God, ahn God liv iina dem.

¹⁷ Ahn wail wi liv iina God, ihn lov gwain gruo plenty muo stranga iina wii til'ih get weh ih shuda bii. Den, wen Jojment Die kom, wi no gwain hafy fried, bikaaz wi deh liv iina dis worl jos laik how Christ deh liv.

¹⁸ Wen unu gat riil lov unu no hafy fried, bikaaz weh paat riil lov deh, non fier kyaahn deh. So den, if wi fried, dah bikaaz wi neva gat di riil lov iina wi.

¹⁹ Ahn di riizn wai wi lov dah bikaaz God wehn lov wii fos.

²⁰ Bot demde pipl weh seh, “Ai lov God,” bot hiet dehn breda or dehn sista, dehn deh tel lai; bikaaz demde pipl weh no lov dehn breda or dehn sista weh dehn kyan si, dehn kyaahn lov God weh dehn neva si yet!

²¹ So den, dis dah di komaanment weh wi wehn get fahn di Laad: Di pipl dem weh lov God hafy lov dehn breda ahn dehn sista dem tu!