1 Corinthians 8 - The New Testament in Islander Creole

Fuud weh aafa tu di aidal dem

¹ Now, dis dah weh Ah deh seh bout fuud weh get aafa op tu di aidal dem: Dah chruut weh dehn seh, aala wi nuo somting bout dis mata. Bot, wen som pipl tink dehn nuo somting, plenty taim dehn get swel-hed! Bot, wen wi lov wan anada, wi help wan anada fi waak muo niera tu God.

² If sombady tink seh him dah wan man weh nuo fi chruut, ih kuda bii seh di man stil yet no nuo aal weh ihn shuda nuo!

³ Bot, if dah man lov God, den God gwain nuo dah porsn fi chruut.

⁴ So den, weh wi fi seh? Wi fi iit fuud weh dehn aafa op tu di aidal dem? Wel, wi nuo seh demya aidal dah neva non god ataal. Ahn wi nuo tu seh, di ongli'is god dah fi wi wan God!

⁵ Iivn if pipl gat plenty tingz iina hevn ahn pahn disya worl weh dehn kaal “god,” or weh dehn kaal “laad,”

⁶ stil yet, wi nuo seh wi ongl gat wan God, di Faada! Dah him weh mek evryting, ahn now wi liv ongl fi him. Ahn wi nuo tu seh dah ongl wan Laad deh —Jesus Christ. Ahn God wehn mek evryting chruu him, ahn dah him weh gi wi chruu laif!

⁷ Bot dah no evrybady nuo dis. Som pipl weh yuuztu chros iina di aidal dem, stil yet tink seh demya aidal riil. So, wen dehn deh iit fuud weh dehn nuo wehn aafa op tu som a di aidal dem, dehn biliiv seh di fuud stil yet dah fi demya aidal. So, sieka weh dehn main wiik, dehn tink seh dehn deh du rang wen dehn iit dah fuud.

⁸ Bot, wi nuo seh di fuud weh wi iit neva mek wi non beta iina God sait. Wi no gat notn fi luuz wid God, if wi no iit'ih; ahn wi no gat notn fi gien niida, if wi iit'ih.

⁹ Bot unu fi wach out; tek kier bredrin! No, jos bikaaz unu frii fi iit enyting weh unu waahn, unu gwain mek unu breda or sista weh gat wiika main an unu, faal iina sin?

¹⁰ Sopuoz sombady, weh no nuo yet wat dah di rait ting fi du bout dis, si wan a unu weh nuo weh rait, deh iit fuud iina wan templ weh pipl waaship som aidalz? Wen dehn si unu deh, dehn gwain tink seh ih aarait fi iit fuud weh don get aafa op tu som aidalz.

¹¹ So den, dis ting weh unu nuo, gwain distrai di ada breda weh Christ wehn ded fah, bikaaz him no nuo beta yet.

¹² Wen unu du dat, ih dah laik unu deh sin gens unu breda, ahn unu deh haam im, bikaaz unu deh inkorij im fi du weh ihn tink no rait fi him du. Dat miin seh unu deh sin gens Christ.

¹³ So den, if weh Ai iit gwain mek mi breda faal iina sin, Ai no gwain iit no muo miit agen, bikaaz Ai no waahn bii rispansabl fi mek mi breda sin.