1 Corinthians 7 - The New Testament in Islander Creole

Paul taak bout marij

¹ Now, Ah gwain diil wid demya tingz weh unu wehn rait tu mi bout iina unu leta. Yees, ih gud if wan man no marid.

² Bot sieka weh so moch slak livin deh roun, evry man shuda gat ihn uon waif ahn evry uman shuda gat ihn uon hozban.

³ Di man weh marid shuda satisfai ihn waif. Siem wie, di marid uman shuda satisfai ihn hozban. Iich wan a dem shuda satisfai dehn niid dem.

⁴ Di waif no gat non rait fi seh no tu ihn hozban; bikaaz fi shii bady dah fi ihn hozban. Siem wie, di hozban no gat non rait fi seh no tu ihn waif; fi him bady dah fi ihn waif.

⁵ So, unu no fi huol bak unuself fahn wan anada, eksep wen unu grii tugeda fi du dat jos fi wan likl wail so unu kyan spen taim fi prie. Bot, az suun az dah taim uova, go bak ahn bii wid wan anada. Iina dah wie, unu no gwain gi Satan non chaans fi temp unu sieka weh unu kyaahn kanchruol unuself.

⁶ Ai no deh seh, dat dah weh unu hafy du. Ah jos deh tel unu weh Ai tink gud fi mek unu du.

⁷ Di chruut dah seh, Ah wish aala unu kuda bii jos laik mii. Bot evrybady gat dehn uon speshal gif fahn God. Som gat di gif fi get marid, ahn som gat di gif fi stie singl.

⁸ Now dis dah weh Ah deh seh tu unu weh no marid, ahn tu demde uman weh dehn hozban ded: ih gud if unu no get marid, jos laik mii.

⁹ Bot, if unu kyaahn kanchruol unuself, den ih beta unu marid, bikaaz ih beta fi unu get marid an fi bon wid los.

¹⁰ Dis dah weh Ah deh seh tu unu weh marid, ahn dis dah no jos mii deh taak; dis dah wan komaan fahn di Laad: Wan waif no fi lef ihn hozban.

¹¹ Bot, if shii lef im, shii no fi get marid agen. Iida shii stie singl, or shii go bak tu ihn hozban. Ahn wan hozban no fi lef ihn waif niida.

¹² Now Ah deh seh dis tu di res a unu ahn dis dah fahn mii; ih dah no fahn di Laad. If wan man, weh dah wan biliiva, gat wan waif weh no chros iina di Laad ahn di waif grii fi kiip aan deh liv wid im, di man no fi divuors ihn waif.

¹³ Iina di siem wie, if wan uman, weh dah wan biliiva, gat wan hozban weh no chros iina di Laad, ahn di hozban grii fi kiip aan deh liv wid shii, di uman no fi divuors ihn hozban.

¹⁴ Bikaaz di hozban weh no chros iina di Laad, ihn don kom fi bii wan wid ihn waif aredy; so God gwain aksep di hozban laik wan a ihn uon. Ahn, bikaaz di waif weh no biliiv aredy, kom fi bii wan wid ihn hozban, God gwain aksep di waif laik wan a ihn uon. If dat dah neva so, fi dehn pikniny neva wehn gwain bii huoly fi God. Bot iina dah wie, dehn kom fi bii huoly fronta God tu.

¹⁵ Bot, if di hozban or di waif weh no chros iina di Laad waahn go, den mek dehn go. Wen dat hapm, di hozban or waif weh chros iina di Laad frii fi go dehn uon wie. Bikaaz God waahn wi liv iina piis.

¹⁶ Main, unu waif weh chros iina di Laad, how unu neva kyaan tel if unu hozban weh no biliiv, kyan kom fi chros iina di Laad sieka unu? Ahn unu hozban weh chros iina di Laad, how unu neva kyan tel if unu waif weh no biliiv, kyan kom fi chros iina di Laad sieka unu? Dat kyan hapm, no chruut?

Di wie wii shuda waak wid God

¹⁷ Now, evrybady shuda stie siem wie how dem wehn deh, wen di Laad Jesus kaal dem fi fala im. Dis dah di komaan weh Ah deh gi aal di chorch dem.

¹⁸ Ahn, if wan man wehn sorkomsaiz aredy wen God kaal im, mek im stie how ihn wende. Ahn if wan man neva sorkomsaiz wen God kaal im, ihn no hafy ron go, go get sorkomsaiz.

¹⁹ Bikaaz, if wan man sorkomsaiz or if ihn no sorkomsaiz, dat no miin notn ataal. Bot, wen dehn kiip aan deh obie aal weh God deh tel dem fi du, dat dah weh kount muo beta an enyting els.

²⁰ So, den, evrybady shuda kiip aan di siem wie how dehn wehn deh wen God kaal dem.

²¹ If unu dah wehn sliev wen God kaal unu, no mek dat bada unu. Bot, if unu get di chaans fi bii frii, tek'ih.

²² Bikaaz enybady weh dah wehn sliev wen di Laad kaal dem, di Laad don mek im frii iina ihn spirit. Siem wie, if unu wehn frii wen di Laad kaal unu, den now unu dah wan sliev fi Jesus Christ.

²³ Memba seh: God don pie wan dier prais fi unu aredy, so no go bii sliev fi nonbady els!

²⁴ So den, unu weh dah mi fren dem, iich wan a unu shuda waak wid God iina di siem kandishan weh unu wende iina, wen ihn kaal unu fi bii ihn pikniny.

Wan wod fi demde pipl weh no marid

²⁵ Now, Ah deh seh dis bout demde pipl weh no marid yet: God neva gi mi non komaan bout'ih, bot stil yet Ah deh tel unu weh Ai joj fi bii rait. Ahn God —weh shuo morsy— gi mi wizdom so dat, wen Ah deh taak, di pipl dem kyan biliiv weh Ah deh tel dem.

²⁶ Now sieka weh wi deh go chruu som haad taim, Ah tink ih beta fi evrybady stie siem laik how dehn deh.

²⁷ So, if unu marid, stie marid. Ahn if unu no marid, no go get marid.

²⁸ Bot, if wan man weh no marid, go get marid, ihn no deh sin. Ahn if wan vorjin get marid, shii no deh sin niida. Ah jos deh trai siev unu fahn aala di prablem dem weh unu gwain gat, wen unu marid.

²⁹ Unu weh dah mi fren dem, dis dah weh Ah miin: Di taim shaat ahn di Laad suun kom bak. So iivn if unu marid, unu no ongl gat unu main set pahn unu marij, bot pahn di Laad tu, wen ih muo beta fi set'ih ongl pahn di Laad.

³⁰ Iina di siem wie, mek demde pipl weh deh hala, go aan laik dehn no sad. Mek demde pipl weh hapy, go aan laik dehn no hapy. Ahn mek dem weh deh bai tingz, liv laik dehn no gat notn ataal.

³¹ Ahn demde pipl weh gat bizniz wid aal di tingz iina dis worl, dehn shuda no spen aal dehn taim pahn demde tingz. Bikaaz dis worl, laik how wi nuo ih now, gwain suun disapier!

³² Ah no waahn unu wory bout notn ataal. Wan man weh no marid, ongl luk bout di Laad work ahn how ihn kyan pliiz di Laad,

³³ bot di neks man weh marid, ongl luk pan di tingz a disya worl ahn how ihn kyan pliiz ihn waif.

³⁴ So, ihn gat two tingz weh deh haal'im iina two difrent dairekshan aal di taim. Rait so, wan uman weh ihn hozban ded, or wan uman weh dah vorjin, ongl luk bout di Laad work aal di taim, bikaaz shii waahn gi ihn huol self tu di Laad. Bot wan marid uman ongl wory bout di tingz a disya worl, ahn how ihn kyan pliiz ihn hozban.

³⁵ Main, Ah deh tel unu dis fi help unu. Ah no deh trai stap unu fahn du weh unu waahn du. Bot Ah waahn unu liv iina di rait wie ahn no mek notn stap unu fahn sorv di Laad wid aala unu haat.

³⁶ Now, if wan man ingiej tu wan uman, ahn ihn gat trobl fi kanchruol himself ahn plenty taim deh paas, den dehn shuda get marid siem taim bitout wiet no muo. Notn no rang wid dat.

³⁷ Bot, if ihn kyan kanchruol himself ahn ihn don mek'op ihn main seh ihn no waahn get marid tu di yong uman, den dis man deh du di rait ting tu.

³⁸ So den, di man weh get marid tu di yong uman deh du di rait ting; bot di man weh no get marid, deh du beta yet.

³⁹ Di siem wie, wan uman weh marid no frii fahn ihn hozban az lang az ihn stil yet deh liv. Bot, if ihn hozban ded, di uman frii fi get marid tu eny man shii waahn, az lang az dah man dah fi di Laad tu.

⁴⁰ Bot Ai tink seh dah uman gwain bii muo beta aaf, if shii stie singl. Ahn Ah biliiv dah God Spirit deh gaid mi, wen Ah seh dis.