1 Corinthians 6 - The New Testament in Islander Creole

No fi ker unu Kristyan breda or sista dah kuot

¹ Now, if wan a unu gat enyting gens wan nada biliiva, unu no fi ker im dah kuot fronta demya joj weh no nuo God. Insida dat, mek God pipl hangl di kies demself.

² Unu no nuo seh di taim deh kom wen God pipl demself gwain joj di huol worl? So den, if unu gwain joj di huol worl fi chruut, dah wai unu kyaahn joj di likl tingz evry die?

³ Ahn unu no nuo seh wii gwain joj di ienjel dem tu? Wel den, if wi gwain joj di ienjel dem, unu no tink seh wi shuda kyan joj dehn aadinary tingz iina disya laif?

⁴ So, if demde kain a tingz kom op, dah wai unu gwain ker dem fronta wan joj weh no nuo notn bout how God chorch work?

⁵ Ai deh seh dis fi mek unu fiil shiem! Unu waahn tel mi seh unu no gat nonbady mongs unu weh gat wizdom fi joj, wen unu breda dem gat tingz gens wan anada?

⁶ Az fi unu, insida unu mek God pipl dem hangl demya kies, unu breda dehn ker wan anada dah kuot. Ahn dehn mek demde man, weh no chros iina God, joj di kies fi dem! Dat no deh gud ataal, bredrin.

⁷ Ahn muo wosa yet, jos weh unu hafy ker unu kies dah kuot fi sekl ih, shuo seh unu no deh waak rait wid God iina di fos plies. Ih wuda beta fi unu fi mek ada pipl du unu bad ahn tiif unu, ahn jos lef ih so!

⁸ Bot insida dat, unu kantinyo deh tiif unu uon breda dem, ahn deh du dem bad tingz!

⁹ Tel mi now: Unu no nuo seh aal di wikid pipl dem no gwain gat non paat iina God Kingdom? No fuul'op unuself! Aala demde kain a pipl weh waaship di aidal dem, ahn demde kain a pipl weh sliip roun ahn weh gat ada uman wid dehn waif, or ada man wid dehn hozban; ahn demde kain a man weh sliip wid nada man;

¹⁰ ahn demde pipl weh tiif, or weh gat red ai, or weh drink til dehn jronk; ahn demde pipl weh taak bad bout ada pipl, ahn weh tiif pipl —non a dem no gwain gat non paat iina God Kingdom ataal!

¹¹ Ahn, som a unu yuuztu bii jos laik demde kain a pipl. Bot now, unu sin dem don get wash weh ahn God wehn set unu asaid fi him uonself. Ahn sieka weh di Laad Jesus Christ ahn God Spirit du fi unu, evryting now deh rait bitwiin unu ahn God.

Yuuz unu bady fi God gluory

¹² Som pipl seh, “Ai frii fi du enyting weh Ai waahn. Non Laa no deh fi stap mi.” Dat dah chruut, bot dah no evryting weh unu kyan du, gud fi unu. Iivn duo Ai kyan seh, “Ai frii fi du enyting weh Ai waahn, ahn non Laa no deh fi stap mi,” Ai no waahn mek notn weh Ai du mek Ai bii wan sliev tu ih!

¹³ Ada pipl kyan seh, “Fuud dah fi di stomik, ahn di stomik dah fi fuud.” Dat dah chruut tu, bot wan die God gwain put wan en tu di two a dem. Memba seh: di Laad no mek fi wi bady fi deh sliip roun. Ihn mek wi bady so wi kyan sorv him. Ahn di Laad dah di Wan weh gi aala wi evryting weh gud fi wi bady.

¹⁴ Ahn som die God gwain riez'op bak aala wi bady fahn di ded, wid di siem powa weh ihn riez'op bak di Laad Jesus wid.

¹⁵ Unu no riiyalaiz seh fi unu bady dah paat a Jesus Christ bady? So, unu tink seh ih rait fi jain paat a di bady a Jesus Christ tu wan prastityut? Neva!

¹⁶ Unu no nuo seh, wen wan man jain ihn bady tu wan prastityut, him ahn di prastityut kom fi bii wan? Bikaaz di Skriptyo seh klier-klier, “Di two a dem gwain bii wan.”

¹⁷ Iina di siem wie, wen pipl jain demself tu di Laad, dehn kom fi bii wan spirit wid him tu.

¹⁸ So den, unu fi ron fahn eny kain a sin weh gat fi du wid seks. Aal di ada sin dem weh pipl du, no go gens dehn uon bady. Bot enybady weh deh gat wail seks bout di plies deh sin gens ihn uon bady!

¹⁹ Unu no nuo seh unu bady dah di templ weh di Holy Spirit liv iina? Ahn dah God ihnself gi unu ihn Spirit, so unu dah no fi unu uonself no muo. Unu dah fi God!

²⁰ Ahn God don pie wan hai prais fi unu aredy. So den, unu shuda ana God wid unu bady evry die.