1 Corinthians 5 - The New Testament in Islander Creole

Slak livin iina di chorch dah Corinth

¹ Now, Ah kyaahn biliiv di nyuuz weh di pipl dem deh spred bout, deh seh som pipl mongs unu iina di chorch deh liv som slak laif weh muo wosa an weh demde pipl weh no nuo God deh liv. Ai deh hier seh wan man deh sliip wid ihn uon step-muma!

² Ahn fi si, unu stil yet proud a unuself? Dah how dis kyan bii! Insida dat, unu shuda sary ahn ben dong unu hed iina shiem! Bredrin, unu shuda put out dah man weh deh liv laik dat fahn mongs unu.

³ Lisn, iivn duo Ah no dedeh wid unu iina bady, Ah stil dedeh wid unu iina spirit. Ahn Ai don joj daty man aredy iina di niem a di Laad Jesus siem laik if Ah wende rait deh wid unu!

⁴ Agen, Ah seh, wen unu gyada tugeda Ai deh rait deh wid unu iina spirit, ahn bai di powa a di Laad Jesus,

⁵ unu fi han daty man uova tu Satan fi ihn bady get distrai, so ihn spirit kyan get siev pahn Dat Die wen di Laad gwain kom bak!

⁶ Ih no rait fi unu buos bout how unu so spiritwal. Unu neva hier bout di seyin weh seh, “Jos wan likl bit a iis mek di huol bred duo riez?” Ah shuor seh unu wehn hier'ih.

⁷ So den, get rid a di sin weh deh mongs unu weh dah jos laik uol iis! Den, unu gwain get kliin agen ahn no gat non sin mongs unu. Unu gwain get kliin agen laik fresh bred duo wehn no gat iin non iis. Ahn dat dah how Ah nuo seh unu gwain stie, bikaaz dah Christ dah fi wi Paasuova Lam weh don sakrifais imself fi wi.

⁸ So, bredrin, unu no fi selibriet di Paasuova fiis wid sin ahn wikidnis iina unu laif! Dat dah laik wen unu deh iit bred weh gat iin uol iis —dat iis dah sin ahn wikidnis— bot mek wi selibriet fi wi Paasuova fiis wid wan laif weh kliin ahn aanes, weh dah laik bred weh mek bitout iis.

⁹ Now Ah don rait iina mi leta tu unu seh unu no fi gat notn fi du wid demde kain a pipl weh liv slak laif.

¹⁰ Main, Ah no deh taak bout di pipl dem weh iina disya worl weh no nuo God weh deh liv slak laif, or weh red ai, or demde kain a pipl weh tiif, or demde weh waaship di aidal dem. If dah dem Ah wende taak bout, den unu wehn gwain hafy get outa disya worl fi chruut fi get-weh fahn pipl laik dat.

¹¹ Wat Ai wehn miin fi seh dah dis: unu no fi gat notn fi du wid nonbady weh kaal dehnself wan biliiva ahn stil yet deh liv wan slak laif, or gat red ai, or deh waaship di aidal dem, or deh taak bad bout pipl, or deh jrink til dehn get jronk, or deh tiif. Unu shuda no iivn sidong fi iit wid nonbady weh du demde kain a tingz.

^12-13 Enywie, dah no mai bizniz fi joj di pipl dem weh dah no fi di chorch. Dah God weh gwain joj aala demde kain a pipl. Bot dat no miin seh unu shuda no joj unu uon chorch memba dem. Dat, dah weh di Skriptyo seh, “Unu fi mek di wikid man kom out fahn mongs unu!”