1 Corinthians 4 - The New Testament in Islander Creole

Di work a Christ apasl dem

¹ So den, dis dah how unu shuda taak bout wi: mii ahn Apollos dah Jesus Christ sorvant dem, ahn God put wi inchaaj fi mek dem weh ihn don pik, fi nuo di siikrit tingz dem bout di Laad imself.

² Now, demde weh dehn put inchaaj hafy shuo seh dehn gwain du enyting weh dehn maasta tel dem fi du.

³ Bot ih no riily bada mi if unu or enybady els joj mi. Di chruut dah seh, Ai no iivn joj mi uonself,

⁴ bikaaz iina mi haat Ai no tink seh Ai gilty a notn. Bot dat no miin Ai neva gat non faalt ataal. Dah di Laad ihnself dah di Wan weh gwain joj mi.

⁵ So unu no fi joj nonbady bifuor di rait taim kom. Unu fi wiet til di Laad kom. Dah him dah di wan weh gwain bring out dehn tingz weh deh iina di daak now. Ahn den ihn gwain mek evrybady nuo weh deh iina evrybady haat. Dat dah wen God gwain priez evrybady akaadn tu how dehn dizorv fi get priez.

⁶ Unu weh dah mi fren dem, Ah deh yuuz mii ahn Apollos laik wan egzampl so unu kuda laan wat di seyin miin weh seh, “Fala di ruul dem weh wehn rait dong iina di Skriptyo ahn notn els!” Den, unu gwain stap deh priez ahn ana wan liida; ahn hiet di res.

⁷ Lisn pipl! Dah huu mek unu beta an ada pipl? Dah God uonself weh gi unu evryting weh unu gat. So den, if dat dah chruut, wai unu deh buos ahn mek'ih luk laik God no gi unu notn ataal?

⁸ Unu tink seh unu don gat aal weh unu niid, no chruut? Unu don get rich! Unu deh liv laik king bitout fi wi help. Wel, Ah wish unu dah wehn laik king fi chruut, so wi kuda ruul lang wid unu!

⁹ Bikaaz tu mii, ih luk laik God put wi —weh dah apasl— awie dong dah di laas plies. Jos laik di pipl dem weh kandem fi ded ahn get ker out iina poblik fronta di huol worl ahn aal di ienjel dem.

¹⁰ Sieka weh wi dah fi Jesus Christ, wi luk laik wii dah fuul; bot sieka him, unu get waiz! Wi wiik, bot unu ongl strang. Di pipl dem ana unu, bot dehn luk dong pahn wi!

¹¹ Iivn op tu tudeh, wi no gat nof tingz fi iit nar jrink. Wi no gat notn bot tier op kluoz fi wier. Di pipl dem deh biit wi op aal di taim. Wi no iivn gat non wie fi liv, ahn wi deh wanda fahn plies tu plies.

¹² Wi work haad wid wi uon han dem. Ahn wen di pipl dehn insolt wi, wi bles dem. Wen dehn gi wi haad taim, wi gat pieshens wid dem.

¹³ Ahn wen dehn taak bad bout wi, wi ansa dem bak wid kain wodz. Rait now di pipl dem fahn disya worl kount wi laik robij. Dehn tink wi no wot notn ataal!

¹⁴ Now, Ah no deh rait disya leta fi mek unu fiil shiem. Ai deh rait'ih fi tiich unu how unu fi liv, bikaaz unu dah jos laik mi uon pikniny dem weh Ah lov so moch!

¹⁵ Iivn if unu gat ten thousand pipl fi tiich unu bout Christ Jesus, Ai dah jos laik wan pupa tu unu, bikaaz dah mii wehn tiich unu di Gud Nyuuz bout di Laad fos.

¹⁶ So den, Ah waahn unu fala mi egzampl.

¹⁷ Ahn dat dah wai Ah deh sen Timothy tu unu. Ah lov him jos laik mi uon son, ahn him dah wan a di Laad fietful sorvant. Ihn gwain memba unu bout how Ai deh fala aal demde impuotant tingz a di nyuu laif weh Christ Jesus wehn tiich wi weh dah fi him. Ahn dat dah weh Ai kantinyo deh tiich iina aala di chorch dem evrywie.

¹⁸ Now, som a unu wende get proud, bikaaz unu wehn tink seh Ah neva wehn gwain kom, kom si unu.

¹⁹ Bot, if di Laad waahn, ih no gwain bii lang ataal bifuor Ah kom si unu. Den, Ah gwain fain out if demya pipl weh go aan proud gat powa fi chruut, or dehn dah ongl mout!

²⁰ Bikaaz God Kingdom no gat notn fi du wid non prity wod, bot God powa!

²¹ So den, weh unu waahn Ah fi du wen Ah kom, kom si unu? Unu waahn Ah kom wid wan stik, or unu waahn Ah taak saaf tu unu wid lov? Di chais dah fi unu.