1 Corinthians 3 - The New Testament in Islander Creole

God sorvant dem

¹ Unu weh dah mi fren dem, Ah kudn taak tu unu laik how Ah taak tu di pipl dem weh mek God Spirit kanchruol dem. Ah wehn hafy taak tu unu siem laik how Ah taak tu pipl weh dah fi disya worl, laik likl pikniny weh no andastan di wie a Jesus Christ yet.

² So, Ah wehn hafy gi unu milk fi jrink, ahn neva gi unu eny miit fi iit, bikaaz unu neva redy fi dat. Ahn stil yet unu no redy fi it;

³ bikaaz unu kiip aan deh liv laik dis worl deh kanchruol unu! Unu waahn weh di ada pipl dehn gat, ahn unu aagyo wid wan anada tu, ahn neva grii wid wan anada. Unu dah jos laik di pipl dem iina disya worl fi chruut.

⁴ Som a unu seh, “Ai deh fala Paul!” Ahn wan nada wan seh, “Wel, Ai deh fala Apollos!” Dat no deh shuo seh unu deh du jos laik di pipl dem fahn disya worl? Dat dah weh ih miin, man!

⁵ Aftaraal, dah huu dah Apollos? Ahn dah huu dah Paul? Wii dah jos God sorvant dem weh deh taak bout God tu unu, so unu kuda kom fi chros iina Jesus Christ. Mii ahn Apollos jos deh du di work weh God gi wi fi du!

⁶ Ai wehn plaant di siid iina unu haat, ahn den Apollos waata it, bot God dah di Wan weh mek di plaant gruo!

⁷ So den, di wan weh plaant di siid ahn di wan weh waata it, dehn dah no notn ataal. God dah di ongli'is wan weh kount, bikaaz dah him dah huu mek di plaant dem gruo.

⁸ Di wan weh plaant ahn di wan weh waata, deh work tugeda iina di siem ting. Ahn God gwain gi iich wan a dem dehn pie fi di work weh dehn du.

⁹ Memba seh: mii ahn Apollos dah paadna weh deh work tugeda fi God. Ahn unu dah God gyaadn, ahn ihn hous weh him deh bil.

Ongl wan foundieshan deh

¹⁰ Bai God gries Ai kom fi bii wan waiz maasta bilda. Ai aredy don put dong wan strang foundieshan ahn sombady els deh bil pahn tapa it. Bot evrybady hafy wach out how dehn deh bil pahn ih.

¹¹ Bikaaz Jesus Christ dah di ongl haad foundieshan weh deh, ahn nonbady kyaahn put dong wan nada foundieshan laik him!

¹² Now, wen di tiicha dem deh bil pahn tapa dis foundieshan, som a dem deh yuuz guol, or silva, or preshos stuon. Bot ada pipl ongl yuuz buod, or graas, or straa fi bil wid.

¹³ Bot, wen Dat Die kom wen God gwain joj aal di pipl dem, evrybady gwain kyan si weh kain a work iich porsn wende du. Pahn Dat Die faiya gwain tes evrybady work, ahn ih gwain shuo jos weh kain a work iich porsn wende du.

¹⁴ If, pahn tapa weh wan tiicha don bil pahn, dah foundieshan no bon'op iina daty faiya, God gwain gi'im ihn pie fi ihn work.

¹⁵ Bot if, pahn tapa weh wan porsn don bil, get bon'op iina faiya, dah porsn gwain laas evryting. Ihn gwain bii siev, bot laik sombady weh biely get outa di faiya!

¹⁶ Bredrin, unu no nuo seh unu dah God templ, ahn fi him Holy Spirit deh liv iina unu?

¹⁷ So, if enybady distrai God templ, God gwain distrai dah porsn tu! Bikaaz God templ huoly ahn unu unuself mek'op ihn templ.

¹⁸ No mek non a unu fuul'op unuself! If eny a unu tink seh unu waiz akaadn tu di pipl dem iina disya worl, beta unu ton laik wan fuul ahn put-weh unu uon wizdom, so dat unu kyan ton wan waiz man iina God wizdom.

¹⁹ Bikaaz, weh di pipl dem fahn disya worl tink dah wizdom, dah no non wizdom ataal iina God sait! Ih dah laik weh rait dong iina di Skriptyo seh, “Di Laad deh kech demya pipl weh tink dehn smaat iina dehn uon smaatnis.”

²⁰ Ahn iina wan neks plies iina di Skriptyo ih seh, “Di Laad nuo weh demya pipl weh gat di wizdom a dis worl tink bout, ahn ihn nuo seh ih no wot notn ataal!”

²¹ So den, nonbady shuda buos bout weh di pipl dem iina disya worl kyan du, bikaaz notn no deh, weh dah no fi unu aredy.

²² Rait now, aal di apasl dem dah fi unu: Paul, Apollos, ahn Peter. Ahn evryting dah fi unu tu: disya worl, ahn laif, ahn det, ahn demya tingz weh deh now, ahn demya tingz weh gwain hapm lietaraan tu —aala dem dah fi unu.

²³ Ahn unu dah fi Jesus Christ, ahn Jesus dah fi God!