1 Corinthians 14 - The New Testament in Islander Creole

Di gif dem weh di Holy Spirit gi

¹ So den, muo an aal, unu fi mek lov bii di ting weh unu go afta di muos. Ahn unu shuda set unu haat fi get demde spiritwal gif weh di Holy Spirit gi, speshaly di gif fi priich God mesij klier-klier.

² Bikaaz if sombady gat di gif weh mek dehn kyan taak iina ada langwij, demde pipl gwain deh taak tu God, no tu di pipl dem; ahn nonbady gwain kyaahn andastan dem niida. Dehn gwain deh seh weh di Holy Spirit tel dem fi seh, weh nonbady els no nuo bout.

³ Bot demde pipl weh deh priich God mesij deh help di bredrin dem, ahn deh inkorij ahn komfort dem.

⁴ Di man weh taak iina ada langwij, jos deh help ihn uonself fi get muo stranga, bot di man weh deh tiich God mesij klier-klier deh help aala di pipl dem iina di chorch fi get muo stranga.

⁵ Now, Ai wuda waahn aala unu gat di gif fi taak iina ada langwij, bot Ah wuda reda unu priich God mesij. Demde pipl weh du dat, dehn muo grieta an demde pipl weh kyan taak iina ada langwij —ahn den, dat ongl wortwail if sombady deh, weh kyan intorprit weh dah porsn seh, so di pipl dem iina di chorch kyan benifit fahn weh ihn seh iina di ada langwij.

⁶ So, unu weh dah mi fren dem, wen Ah kom tu unu, if Ah staat taak iina som ada langwij weh unu no andastan, how dat gwain help unu? Ih ongl gwain help unu, if Ah taak tu unu iina fi wi langwij weh God wehn shuo mi or weh ihn mek Ah nuo weh somting miin. Or, ih ongl gwain help unu, if Ah tel unu klier-klier som mesij Ah gat dairek fahn God, or som ada chruut fahn ihn Wod.

⁷ Dah di siem ting wid di instrument dem weh dehn plie myuuzik wid —iivn if dehn no gat non laif. If sombady deh plie fluut or haap, nonbady no gwain nuo weh tyuun dehn deh plie, if dehn no deh plie di rait nuot dem.

⁸ Ahn if di porsn, weh deh bluo di byuugl, no bluo'ih gud ahn klier, den nonbady no gwain get redy fi waar!

⁹ Dah di siem wie wid unu: Nonbady gwain andastan weh unu deh taak bout, if unu deh taak difrent kain a langwij weh di pipl dem kyaahn andastan. Unu wuda deh taak ongl tu di briiz!

¹⁰ Dah chruut seh plenty difrent langwij deh iina di worl, bot aala dem miin somting.

¹¹ Bot, if Ah no andastan di langwij weh sombady deh taak, den mii ahn di wan weh deh taak gwain bii strienja tu wan anada.

¹² So, sieka unu waahn di spiritwal gif dem so bad weh di Holy Spirit gi wi, den ih muo beta unu aks im fi help unu fi laan fi yuuz di gif dem weh gwain mek di chorch get stranga, no chruut?

¹³ So den, enybady weh gat di gif fi taak iina ada langwij, shuda prie tu God fi mek dem gat di gif fi intorprit weh dehn deh seh.

¹⁴ Bikaaz, if Ai prie iina wan difrent langwij, dah mi spirit deh prie, bot mi main no get notn fahn ih bikaaz Ai no andastan weh Ai deh seh.

¹⁵ So, weh Ah fi du? Ah gwain prie wid mi spirit, bot Ah gwain prie wid mi main tu. Ah gwain sing priez tu God wid mi spirit, bot siem wie Ah gwain sing priez wid mi main tu.

¹⁶ Wen unu deh tank God wid jos unu spirit, dah how di aadinary man weh kom dah unu miitn gwain kyan seh, “Amen, dat dah so!” tu weh unu deh gi tanks fah, if di man no andastan weh unu deh seh? Ihn no gwain kyan du'ih!

¹⁷ So den, unu maita deh gi God tanks iina wan wandaful wie, bot dat no deh du notn ataal fi di ada porsn.

¹⁸ Az faar az Ai kansaan, Ai tank God seh Ai kyan taak iina ada langwij muo an aala unu.

¹⁹ Stil yet, wen Ah deh iina wan chorch miitn, Ah wuda reda seh five wodz weh Ai kyan andastan, so dat Ah kyan tiich di pipl dem, insida ten thousand wodz iina wan langwij weh nonbady no andastan!

²⁰ Bredrin, unu no fi tink laik pikniny. Yees, unu kyan bii laik pikniny wen ih kom tu nuo bout wikid tingz, bot unu shuda bii laik big pipl wen ih kom tu how unu shuda tink bout gud tingz!

²¹ Dah laik weh di Laad seh iina di Skriptyo. Ihn seh: “Ah gwain bring pipl fahn ada nieshan, weh taak difrent kain a langwij. Ah gwain taak chruu dem tu mi uon pipl dem, bot stil yet dehn no gwain lisn tu mi.”

²² So den, wen di pipl dem taak iina difrent langwij, dah fi get wan sain a God powa tu di pipl dem weh no chros iina di Laad —no tu demde weh biliiv aredy. Bot di gif fi tiich God mesij klier, dah fi demde pipl dem weh biliiv.

²³ So, if di pipl dem a di chorch gyada tugeda ahn den, aala dem staat taak difrent kain a langwij siem taim, ahn som ada pipl weh no nuo bout demde kain a tingz, or weh no chros iina di Laad, kom iina di chorch miitn, unu no tink seh demya pipl gwain seh aala unu mad? Dehn gwain sehso!

²⁴ Bot, if evrybady deh taak bout God Wod klier-klier, wen som porsn weh no chros iina di Laad kom iina di chorch miitn, dah man gwain kom fi nuo seh ihn dah wan sina, wen ihn hier weh unu deh seh, ahn ihn gwain waahn chienj ihn wiez sieka weh ihn hier.

²⁵ Den, wen evryting iina ihn haat kom out iina di uopm, dah man gwain niil dong ahn waaship God, ahn tel di chorch seh, “God deh wid unu fi chruut!”

God laik aada iina di chorch

²⁶ So den, unu weh dah mi fren dem, dis dah weh Ah deh seh: Wen unu kom tugeda fi waaship, wan porsn gwain sing, wan gwain tiich, wan neks wan gwain tel somting weh God shuo im, wan gwain gat wan mesij iina difrent langwij, ahn wan nada wan gwain intorprit weh him seh. Jos mek evryting weh unu du bii fi mek aal di pipl iina di chorch get stranga.

²⁷ Bot no muo an two or three pipl shuda taak iina difrent langwij; ahn mek dehn tek torns. Ahn sombady fi dedeh, fi intorprit weh dehn deh seh.

²⁸ Bot, if nonbady no dedeh fi intorprit weh dehn deh seh, den mek dem no seh notn ataal. Mek dehn jos taak tu demself ahn God.

²⁹ Two or three pipl weh priich God mesij kyan taak, ahn di res fi lisn gud, ahn den tink bout weh dehn deh seh.

³⁰ Bot, if sombady els weh deh sidong iina di miitn get wan mesij fahn God, den di porsn weh deh taak fi stap taak, ahn mek dah porsn weh intarop seh weh God tel im fi seh.

³¹ So den, aala unu kyan priich God Wod wan bai wan, so dat evrybady kyan laan ahn get inkorij.

³² Bot demde pipl weh gat di gif fi priich God Wod, shuda kanchruol di gif weh dehn gat.

³³ Memba: God waahn unu fi du evryting iina wan aadaly ahn piisabl wie. Iina di siem wie, iina aal di chorch dem weh God pipl dehn miit,

³⁴ di uman dem no fi seh notn iina demde chorch miitn. Dehn no fi taak dehso ahn dehn fi bii laik dehn deh aanda atarity —jos laik weh Moses Laa seh.

³⁵ If di uman dem waahn nuo bout somting, mek dehn aks dehn hozban bout'ih wen dehn get huom; bikaaz, dah wan shiemful ting fi mek wan uman taak iina di chorch miitn.

³⁶ Wan nada ting: unu tink seh God Wod kom fahn unu fos, or unu dah di ongl wan dem weh ihn kom tu? Nuo sah, dah no so!

³⁷ So den, enybady weh tink seh ihn dah God mesinja or tink seh ihn gat wan spiritwal gif, ihn hafy riiyalaiz seh weh Ai deh rait tu unu dah wan komaan fahn God ihnself.

³⁸ Bot, if ihn no pie non main tu weh Ah seh, den nonbady no fi pie him non main niida!

³⁹ So den, bredrin, unu fi iiga fi priich God Wod klier-klier, ahn unu no fi stap nonbady fahn taak iina wan difrent langwij.

⁴⁰ Jos mek shuor seh unu du evryting iina aada, ahn iina wan diisent wie.