1 Corinthians 13 - The New Testament in Islander Creole

Wat dah riil lov

¹ Iivn if Ai kuda taak iina aal di langwij dem weh pipl taak —ahn iivn weh di ienjel dem taak— if Ah no gat non lov fi ada pipl, aal weh Ah deh seh no miin notn ataal! Dah jos laik di naiz weh sombady mek, wen dehn deh lik wan jrom or lik simbal.

² Ahn, if Ah kuda prafisai ahn andastan aal di siikrit tingz fahn God ahn nuo evryting weh deh fi nuo; ahn, if Ai wehn gat fiet weh kuda muuv di mountin dem —bot Ai no gat lov fi nonbady— Ai dah no notn ataal!

³ Iivn if Ah gi-weh evryting weh Ah gat, ahn iivn gi'op mi bady, mek dehn bon'ih op, bot Ah no lov ada pipl, non a dat gwain du mi non gud.

⁴ Unu si, wen unu lov ada pipl, unu gwain gat pieshens wid dem. Unu gwain bii kain tu dem ahn unu no gwain jalas afta dem. Unu no gwain tink tuu moch a unuself, ahn unu no gwain bii proud ahn triit ada pipl bad.

⁵ If unu lov pipl, unu no gwain bii selfish niida, nar waahn unu uon wie aal di taim. Wen unu lov pipl, unu no gwain iizy fi get beks niida, ahn unu no gwain deh kiip trak ah aala di bad tingz weh hapm.

⁶ If unu lov ada pipl, unu no gwain get hapy uova notn weh wikid, bot unu gwain bii hapy uova di chruut.

⁷ If unu lov pipl, unu no gwain gi'op nontaim. Unu fiet gwain aalwiez strang. Unu gwain bii fietful ahn no gwain luuz huop. Unu gwain bii redy fi biliiv gud tingz bout pipl, ahn unu gwain kyan bier evryting tu.

⁸ Memba seh: lov gwain laas fareva. Bot di gif fi prafisai, ahn fi taak iina ada langwij, ahn evry kain a nalij gwain kom tu wan en.

⁹ Bikaaz iivn wen wi priich, or wen wi tink wi nuo somting, wi no nuo evryting —wi jos seh ahn nuo, paat a di huol a ih.

¹⁰ Bot, wen di rait taim kom, wen evryting gwain bii how dehn fi bii, wi no gwain jos haaf-nuo tingz, wi gwain nuo evryting!

¹¹ Wen Ai dah wehn wan pikniny, Ah yuuztu taak laik wan pikniny, ahn tink laik wan pikniny, ahn andastan laik wan pikniny. Bot now sins Ah get big, Ah put-weh aala dehn pikniny wiez.

¹² Rait now, di wie wi deh si tingz dah laik wen wi deh luk iina wan lukin-glaas weh fagy. Bot wen dah taim kom, wi gwain si aala it, fies tu fies. Ai ongl nuo paat a evryting now, bot wen dah taim kom Ai gwain nuo evryting uova gud, jos laik how God nuo mii now!

¹³ Now den, bredrin, wii gat three tingz weh gwain laas fareva: fiet, huop, ahn lov. Bot lov dah di grietis wan outa di three a dem!