1 Corinthians 10 - The New Testament in Islander Creole

Kiip faar fahn enyting weh gat fi du wid di aidal dem

¹ Unu weh dah mi fren dem, alduo unu don nuo ih aredy, Ah waahn memba unu bout weh wehn hapm tu fi wi ansesta dem, wen dehn fala afta Moses: Unu nuo seh aala dem wehn waak aanda di protekshan a wan kloud, ahn den dehn paas chruu di sii bitout get ienja ataal.

² Ahn dis dah laik dem weh get baptaiz iina di kloud, ahn di sii tu, laik Moses falowa dem.

³ Aala dem wehn iit di siem spiritwal bred fahn hevn.

⁴ Ahn aala dem wehn jrink di siem spiritwal jrink weh God wehn gi dem, bikaaz God uon spiritwal rak wende wid dem. Ahn dah rak dah wehn Christ imself.

⁵ Stil yet, God neva pliiz wid plenty a dem, so ihn distrai demya pipl, ahn dehn bady wehn get skyata aal uova di dezart.

⁶ Now aala demya tingz hapm so dat wi kuda tek waanin ahn no fala afta fi wi ansesta dem, ahn put wi ai pahn demde tingz weh wikid laik weh dehn wehn du;

⁷ nar fi waaship non aidal laik weh som a dem wehn du. Dah laik weh di Skriptyo seh, “Di pipl dem wehn sidong fi iit ahn jrink, ahn den dehn ton ih iina wan wail paaty!”

⁸ Wi no fi get iina slak laif nontaim, laik weh som a dem wehn du. Ahn sieka dat, twenty-three thousand a dem wehn ded iina wan die!

⁹ Ahn wi no fi trai tes di Laad niida, laik weh som a dem wehn du, ahn dah dem weh wehn ded fahn sniek bait.

¹⁰ Ahn wi no fi grombl niida, laik weh som a dehn pipl wehn du ahn mek di Det Ienjel distrai dem!

¹¹ Aala demde tingz wehn hapm fi mek wi nuo weh gwain hapm tu wi tu, if wi du weh dehn wehn du. Ahn aala dis get rait dong iina di Skriptyo fi waan wi, bikaaz wi deh liv iina di laas diez dem.

¹² So, if enywan a unu tink seh unu deh stan op strang, unu beta wach out; main unu no faal dong tu!

¹³ Memba, evry kain a tes weh unu go chruu dah di siem kain a tes dem weh ada pipl gaan chruu. Bot God fietful tu ihn pramis, ahn him no gwain mek di taim weh unu get tes stie so lang seh unu kyaahn bier'ih no muo. Bot, wen di tes kom, God gwain gi unu di strent fi stan'ih ontil ihn shuo unu wan wie out.

¹⁴ So den, unu weh dah mi fren dem, unu fi kiip weh fahn deh waaship di aidal dem.

¹⁵ Ah deh taak tu unu laik pipl weh gat sens, so unu kyan joj unu uonself bout weh Ah deh tel unu:

¹⁶ Wen wi get tugeda fi wan Brokin a Bred sorvis, ahn bles di kop ahn jrink outa it, wi deh shier iina di blod a Christ. Ahn, wen wi brok di bred ahn iit aafa it, wi deh shier iina di bady a Christ.

¹⁷ Now, aala wi deh iit aafa di wan bred, ahn dat shuo seh —alduo wi dah plenty pipl— wii dah wan bady wid him.

¹⁸ Now, tink bout di pipl fahn Israel: Wen dehn iit di tingz dem weh sakrifais tu God, aala dem tek paat iina di waaship dah di alta.

¹⁹ So, weh Ah deh trai fi seh? —seh wan aidal ahn di fuud weh get aafa tu ih, miin enyting ataal?

²⁰ Nuo sah, weh Ah deh seh dah, wen pipl weh no nuo God sakrifais tu wan aidal, dehn deh sakrifais tu wan diimon, no tu God. Ahn Ah no waahn unu tek paat iina notn wid non diimon.

²¹ Unu kyaahn jrink di wain fahn di kop weh di Laad gi, ahn den jrink fahn di kop weh pipl don yuuz fi waaship wan diimon wid. Iina di siem wie, unu kyaahn iit ahn gat paat iina di Laad tiebl, ahn den di tiebl a wan diimon niida.

²² Weh unu waahn du, pipl? Unu waahn mek God jalas? Or, unu tink seh, wi stranga an God den?

Aalwiez ana di Laad God

²³ Bot, som pipl seh, “Wii frii fi du enyting weh wi waahn. Non laa no deh weh kyan stap wi.” Ahn Ai seh, “Yees, bot dah no evryting gud fi bil wi op!”

²⁴ So den, unu no ongl fi tink bout unu uonself, bot tink bout weh gud fi ada pipl tu!

²⁵ Unu frii fi iit enyting weh dehn sel dah di maakit. Ahn wen unu bai'ih, no bada trobl unu kanshans ahn aks weh paat di miit kom fram;

²⁶ bikaaz dah laik weh di Skriptyo seh, “Disya ort ahn evryting weh deh iina it dah fi di Laad.”

²⁷ So, if sombady weh no chros iina Jesus invait unu fi go iit wid im, go ahn iit'op enyting weh dehn put fronta unu. Ahn no trobl unu kanshans deh aks weh di fuud kom fram.

²⁸ Bot, if sombady tel unu seh, “Dehn sakrifais dah fuud tu di aidal dem,” unu no fi iit'ih, bikaaz ih maita bii wan prablem fi di wan weh tel unu dat, ahn ih maita trobl ihn kanshans.

²⁹ Lisn, Ah no deh seh, if unu iit di fuud, ih gwain bada unu kanshans; bot ih maita trobl di kanshans a di wan weh tel unu bout'ih! Den, wan neks porsn maita aks, “Dah wai Ai fi huol dong pahn mai friinis jos fi pliiz sombady els kanshans?

³⁰ If Ai tank God fi mi fuud bifuor Ah iit'ih, den wai enybady shuda kandem mi jos bikaaz Ai iit'ih?”

³¹ Bot Ai ansa seh: “Evryting weh unu du, weda dah iit or jrink, or enyting els, unu fi du evryting iina soch a wie, weh God get di gluory far ih!”

³² Unu no fi disrispek di Jew dem, nar dehn pipl weh dah no Jew, nar demde pipl weh dah fi God chorch niida.

³³ Unu shuda du laik weh Ai du. Az fi mii, iina evryting weh Ai du, Ai trai fi pliiz evrybady. Ai no trai fi get notn, nar du notn fi pliiz miself, bot Ai work fi help ada pipl, so dehn kyan get siev.