ದರ್ಶಾನ್ 1 - ದೆವಾಚಿ ಖರಿ ಕಬರ್ ನವಾ ಕರಾರ್

¹ ಹ್ಯ ಯೇಸು ಕ್ರಿಸ್ತಾಚ಼ ದರ್ಶಾನ್ ಬಿಗಿನಿ ಘಡತ್ಯಾಲ ಆಪ್‌ಲ್ಯಾ ಸೇವಕಾನಾ ದಾವಾಯಾ ಸಾಟಿ ಹ್ಯ ಸಗ್ಳ ದೆವಾನಿ ಕ್ರಿಸ್ತಾಲಾ ಸಾಂಗ್ಲ. ಹ್ಯನಿ ಆಪ್ಲಾ ಸೇವಕ್ ಜಾ಼ಲ್ಯಾಲ್ಯಾ ಯೊಹಾನಾಲಾ ಹ್ಯ ದಾವಾಯಾ ಆಪ್‌ಲ್ಯಾ ದುತಾಲಾ ಲಾವುನ್ ದಿಲಾ.

² ಯೊಹಾನಾನಿ ಆಪ್ನು ಬಗ್‍ಲ್ಯಾಲ ಸಗ್ಳ ಸಾಂಗ್ಲ. ಹ್ಯ ಯೇಸು ಕ್ರಿಸ್ತಾನಿ ತ್ಯಲಾ ಸಾಂಗ್‍ಲ್ಯಾಲ ಖರ. ಹ್ಯ ದೇವಾಪ್ನಿ ಆಲ್ಯಾಲ ಸಾಂಗ್ನ.

³ ಹ್ಯ ಪ್ರವಾದನೆಚಾ ವಾಕ್ಯಾ ವಾಚಿವ್‌ಲ್ಯಾಲ ಐಕ್‌ತ್ಯಾಲ ಹ್ಯಾ ಪುಸ್ತಕಾತ್ ಲಿವ್‌ಲ್ಯಾಲ್ಯಾ ಬೊಲ್ಯಾಚೆಗತ್ ಚಾ಼ಲತ್ಯಾಲ ಕ್ಯವ್ಡಕಿ ಬರ. ಹ್ಯಾ ಸಗ್‌ಳ್ಯಾ ಗುಶ್ಟಿ ವ್ಹಯಾಚಾ಼ ಯೊಳ್ ಜ಼ವಳ್ ಹಾ.

ಆಶ ಶಿಮಚಾ ಸಾತ್ ಸಭೆನಾ ನಮಸ್ಕಾರ್

⁴ ಯೊಹಾನ್ ಆಶಾ ಸಿಮತ್ ಆಸ್‌ಲ್ಯಾಲ್ಯಾನಾ ಲಿವಾಚ಼ ಕ್ಯಾ ಮಂಜೆ ರಾನ್ಹಾರಾ, ಯನಾರಾ ಜಾ಼ಲ್ಯಾಲ್ಯಾಪ್ನಿ ಆನಿ ಯಚಾ ಸಿಂಹಾಸನಾಚೆ ಮೊರ‍್ಹ ಆಸ್‌ಲ್ಯಾಲಿ ಸಾತ್ ಆತ್ಮಾತ್ನಿ ತುಮಾನಾ ಶಾಂತಿ ಕ್ರಪಾ ಗಾಹುನಿ.

⁵ ಆನಿ ಯೇಸು ಕ್ರಿಸ್ತಾಪ್ನಿ ತ್ಯೊ ಖರ‍್ಯಾಚಿ ವಳಕ್ ಜಾ಼ಲ್ಯಾ ಮೆಲ್ಯಾಲ್ಯಾತ್ನಿ ಆಂದಿ ಜಿತ್ತಾ ವ್ಹವುನ್ ಆಲ್ಯಾಲಾ ತ್ಯೊಸ್ ಆನಿ ತ್ಯೊಸ್ ಹ್ಯಾ ಲೊಕಾಂಚಾ ರಾಜಾನಾ ಅಧಿಪತಿ ಜಾ಼ಲ್ಯಾ. ಯೇಸು ಆಮ್ಚಿ ಮಾಯಾ ಕರ್ತೊ. ತ್ಯನಿ ಆಪ್‌ಲ್ಯಾ ರಕ್ತಾನಿ ಆಮಾನಾ ಆಮ್ಚಾ ಪಾಪಾಂಚೆ ಚು಼ಕಿತ್ನಿ ಶೊಡ್‍ಲ್ಯಾತ;

⁶ ಆಮಾನಾ ಯಾಕ್ ರಾಜೆ ಕರುನ್ ಆಮಾನಾ ಆಪ್ಲಾ ಬಾ ಜಾ಼ಲ್ಯಾಲ್ಯಾ ದೇವಾಚಿ ಸೇವಾ ಕರ್ತ್ಯಾಲ್ಯಾ ಯಾಜಕಾಂಚೆಗತ್ ಕೇಲ. ಯೇಸುಲಾ ಖಾಯಿಮ್ ಮೈಮೆ ಅಧಿಕಾರ್ ರಾಹುನಿ! ತಸಸ್ ವ್ಹವುನಿ.

⁷ “ಬಗಾ, ಯೇಸು ಢಘಾಂಚೆ ಸಂಗ ಯತ್ಯೊ” “ಪರತೇಕ್ ಜಾ಼ನ್ ತ್ಯಲಾ ಬಗ್ನಾರ್ ತ್ಯಲಾ ಬುಚಿವ್‌ಲ್ಯಾಲ ಸಾಹಿತ್ ಬಗ್ನಾರ್” “ತ್ಯಲಾ ಬಗುನ್ ದುನೆತ್ಲಿ ಲೊಕ ಸಗ್ಳಿ ಶಾತಿ ಬಡ್ವುನ್ ಗೆನ್ಹಾರ್” ವ್ಹಯ್, ಹ್ಯ ವ್ಹನಾರ್! ತಸಸ್ ವ್ಹವುನಿ.

⁸ ಪ್ರಭು ಜಾ಼ಲ್ಯಾಲಾ ದೇವ್ ಸಾಂಗಾಚ಼ ಕ್ಯಾ ಮಂಜೆ: “ಮೀ ಪೈಲಾ ಆನಿ ಸರ್ತಾ ಜಾ಼ಲ್ಯೊ. ಆಂದಿಚಾ಼, ಅತಾಚಾ಼, ಮೊರ್ಹ ಯತ್ಯಾಲಾ ಸರ್ವ ಅಧಿಕಾರ್ ಆಸ್‌ಲ್ಯಾಲಾ ಮೀಸ್. ”

ಕ್ರಿಸ್ತಾಚ಼ ದರ್ಶನ್

⁹ ಯೊಹಾನ್ ಮಂಥ್ಯಾಲಾ ಮೀ ಕ್ರಿಸ್ತಾಪ ತುಮಚಾ಼ ಭಾಹು ಜಾ಼ಲ್ಯೊ. ಆಮಿ ಸಗ್ಳ ಯಂಗ್ದಾಸ್ ಯೇಸುಸ್ ಲಾಗುನ್ ತರಾಸಾತ್ ರಾಜಾತ್ ಥಂಡ್ಪನಾತ್ ಹಾವ್. ಮೀ ದೇವಾಚಾ ಸಾಂಗ್‍ನ್ಯಾಲಾ ಯೇಸುಚೆ ವಳ್ಕಿಸಾಟಿ ಹಾ ಮನ್ಹುನ್ ಪತ್ಮೊಸ್ ದ್ವಿಪಾತ್ ಹಾ.

¹⁰ ಪ್ರಭುಚಾ ದಿಸಾತ್ ಪವಿತ್ರಾತ್ಮಾನಿ ಮನಾ ಗೇತ್ಲಾ. ತವಾ ಮಾಜೆ ಮಾಗ ಯೊಕ್ ಮೊಟಾ ಸಬ್ದ ಐಕು ಆಲಾ. ತ್ಯೊ ಸಬ್ದ ತುತುರಿಚಾ ನಾದಾಚೆಗತ್ ಹುತ್ತಾ.

¹¹ ತ್ಯೊ ನಾದ್, “ತು ಬಗ್‍ತ್ಯಾಲ ಸಗ್ಳ ಯಕಾ ಪುಸ್ತಕಾತ್ ಲಿವುನ್ ಎಫೆಸಾ, ಸ್ಮುರ್ನ, ಪೆರ್ಗಮ, ಥುವತೈರ, ಸಾರ್ದಿಸ್, ಫಿಲದೆಲ್ಫಿಯ ಆನಿ ಲವೊದಿಕಿಯ ಮಂಥ್ಯಾಲ್ಯಾ ಸಾತ್ ಸಭೆನಾ ಲಾವುನ್ ದೆ” ಮನ್ಹುನ್ ಸಾಂಗತೊ.

¹² ಮಾಜೆ ಸಂಗ ಕೊನ್ ಬೊಲ್‍ತ್ಯಾ ಮನ್ಹುನ್ ಬಗಾಯಾ ಮೀ ಮಾಗ ಬಗ್ತಾನಾ, ಸಾತ್ ಸೊನ್ಯಾಚ಼ ದಿವಲಾವ್ನ ಬಗಲ.

¹³ ತ್ಯಾ ದಿವಲಾವನ್ಯಾಂಚೆ ಮದ್ದಿ “ಮಾನ್ಸಾಚಾ ಲೇಕಾಚೆಗತ್ ಆಸ್‍ಲ್ಯಾಲ್ಯಾಲಾ ಮೀ ಬಗ್ಲಾ. ತ್ಯನಿ ಲಾಂಬ್ಡಾ ಜ಼ಘಾ ಗ್ಯಾತ್ಲಾಹುತ್ತಾ; ಸೊನ್ಯಾಚಿ ಪಟ್ಟಿ ಶಾತಿವ ಬ್ಯಾಂದ್ಲಿಹುತ್ತಿ.

¹⁴ ತ್ಯಚೆ ಡುಯಿಚ಼ ಕ್ಯಾಸ್ ಮಂಜಾ಼ಚೆಗತ್ ಪಾಂಡರ‍್ಯಾ ಮೆಂಡ್ರಾಚೆಗತ್ ಹುತ್ತ; ಡೊಳ ಇಸ್‍ಥ್ಯಾಚೆ ಜ಼ಳಿಚೆಗತ್ ಹುತ್ತ.

¹⁵ ಪ್ಯಾ ಬಠಿತ್ ತಾಪಿವಲ್ಯಾಲ್ಯಾ ತಾಂಬಿಲಾಲ್ ತಾಂಬ್ಯಾಚೆಗತ್ ಹುತ್ತ; ತ್ಯಚಾ಼ ನಾದ್ ವ್ಹಾವ್‍ತ್ಯಾಲ್ಯಾ ಪಾನ್ಯಾಚಾ ಜ಼ರ‍್ಯಾಚೆಗತ್ ಹುತ್ತಾ.

¹⁶ ತ್ಯನಿ ಆಪ್‍ಲ್ಯಾ ಉಜ್‍ವ್ಯಾ ಹಾತಾತ್ ಸಾತ್ ಚಾನ್ಯಾ ದರ್ಲ್ಯಾಹುತ್ಯಾ. ತ್ಯಚಾ ತೊಂಡಾತ್ನಿ ಧಾರ್ ಆಸ್‌ಲ್ಯಾಲ ದುಯಿಕ್ನಿ ಲಾಗ್‌ತ್ಯಾಲ ಥಲ್ವಾರ್ ಬಾಹಿರ್ ಯಯಿತ. ತ್ಯಚ಼ ತ್ವಾಂಡ್ ದೊಪ್ಯಾರ್ಚಿ ದಿಸತ್ಯಾಲ್ಯಾ ದಿಸಾಚೆಗತ್ ಹುತ್ತ.

¹⁷ ಮೀ ತ್ಯಲಾ ಬಗ್ಲಾ ತವಾ, ತ್ಯಚಾ ಪಾಯಾತ್ ಮೆಲ್ಯಾಚೆಗತ್ ಬಡ್ಲೊ. ತ್ಯನಿ ಆಪ್ಲಾ ಉಜ್ವಾ಼ ಹಾತ್ ಮಾಜಿವ ಥಿವುನ್, “ಭಿಹುನಕೊಸ್! ಮೀಸ್ ಆಂದಿಚಾ಼ ಆನಿ ಸರ್ತಾ.

¹⁸ ಮೀಸ್ ಜಿತ್ತಾ ಪ್ರಭು. ಮೀ ಮೆಲ್ಯೊ, ಫನ್ ಆತಾ ಬಗ್, ಮೀ ಖಾಯಿಮ್ ಜ಼ಗತ್ಯಾಲಾ ಜಾ಼ಲ್ಯೊ. ಮರ್ನಾವ ಆನಿ ಪಾತಾಳಾವ ಅಧಿಕಾರ್ ಮನಾ ಹಾ. ”

¹⁹ “ಮನ್ಹುನ್ ತು ಬಗ್‍ಲ್ಯಾಲ್ಯಾ ಗುಶ್ಟಿ ಲಿವ್. ಆತಾ ಚಾ಼ಲತ್ಯಾಲ್ಯಾ ಖನ್ಕತಿ ಆನಿ ಮೊರ‍್ಹ ಚಾ಼ಲತ್ಯಾಲ್ಯಾ ಖನ್ಕತಿ ಲಿವ್.

²⁰ ಮಾಜಾ ಉಜ್‍ವ್ಯಾ ಹಾತಾತ್ ತು ಬಗ್‍ಲ್ಯಾಲ್ಯಾ ಸಾತ್ ಚಾನ್ಯಾ ಆನಿ ತು ಬಗ್‍ಲ್ಯಾಲ ಸಾತ್ ಸೊನ್ಯಾಚಾ ದಿವಲಾವನ್ಯಾಂಚಾ಼ ಅರ್ಥ್ ಆಸ ಹಾ: ಸಾತ್ ಚಾನ್ಯಾ ಮಂಜೆ ಸಾತ್ ಸಭೆಚ಼ ಧುತ್. ಸಾತ್ ದಿವಲಾವ್ನ ಮಂಜೆ ಸಾತ್ ಸಭೆ. ” ಮನ್ಹುನ್ ಸಾಂಗ್ಲ.