ಮಾರ್ಕ್ 8 - ದೆವಾಚಿ ಖರಿ ಕಬರ್ ನವಾ ಕರಾರ್

ಯೇಸುನಿ ಚಾರ್ ಹಾಜಾ಼ರ್ ಲೊಕಾನಾ ಖಾಯಾ ದಿಲ್ಯಾಲ

¹ ಹ್ಯ ಜಾ಼ಲ್ಯಾ ನಂತರ್ ಆನಿ ಯಂಗ್ದಾ ಖುಬ್ ಲೊಕ ಜ಼ಮ್ಲಿ ಹುತ್ತಿತ ತ್ಯನಾ ಜೆವಾನ್ ಕಾಯ್ ನವ್ಥ ತವಾ ಯೇಸುನಿ ಆಪ್‌ಲ್ಯಾ ಶಿಶಾನಾ ಜ಼ವಳ್ ಹಾಕ್ಟುನ್,

² “ಹ್ಯಾ ಲೊಕಾನಾ ಬಗುನ್ ಮನಾ ಬೆಜಾರ್ ವ್ಹತ್ಯೋ, ಹಿ ಮಾಜಿಪ ಯವುನ್ ತೀನ್ ದಿಸ್ ಜಾ಼ಲ; ಹ್ಯಂಚಿಪ ಖಾಯಾ ಕಾಯ್ ನಾಹಿ,

³ ಹ್ಯನಾ ಉಪಾಸಿ ಗರ‍್ಹಾತ್ ಲಾವುನ್ ದಿಲ್ಯಾವ ಹಿ ಜಾ಼ತಾನಾ ವಾಟವ ಬುಕನಿ ಚಕರ್ ಯವುನ್ ಪಡ್ತಿಲ; ಕಾ ಮನ್‌ಲ್ಯಾವ ಹ್ಯಾತ್ಲಿ ಥುಡಿ ಜ಼ನ ದುರ್ನಿ ಆಲ್ಯಾತ” ಮನ್ಹುನ್ ತ್ಯನಾ ಸಾಂಗ್ಲ.

⁴ ತ್ಯಲಾ ಶಿಶಾಂಚಾನಿ, “ಹ್ಯಾ ಎಕಾಂತ್ ಪ್ರದೇಶಾತ್ ಯವ್‌ಡ್ಯಾ ಲೊಕಾನಾ ಕುಠ ಜೆವಾನ್ ಗಾವ್‌ನಾರ್” ಮನ್ಹುನ್ ಯೇಸುಲಾ ಇಚಾರ್ಲ.

⁵ ಯೇಸುನಿ ಶಿಶಾನಾ “ತುಮ್ಚಿಪ ಕ್ಯವಡ್ಯಾ ಬಾಕ್‌ರ‍್ಯಾ ಹಾತಾ. ” ಮನ್ಹುನ್ ಇಚಾರ್ಲ ತ್ಯಲಾ ತೆ, “ಸಾತ್ ಹಾತಾ” ಮನ್ಲ.

⁶ ತವಾ ಯೇಸುನಿ, ಲೊಕಾನಾ, “ಜಿಮ್ನಿವ ಬಸಾ” ಮನ್ಹುನ್ ಸಾಂಗ್ಲ ಆನಿ ತ್ಯಾ ಸಾತ್ ಬಾಕ್‌ರ‍್ಯಾ ಹಾತಾತ್ ಗಿಹುನ್ ಪರ್ಮೇಶ್ವರಾಲಾ ದಾವುನ್ ಬಾಕ್‌ರ‍್ಯಾ ಮುಡುನ್ ಶಿಶಾಂಚಾ ಹಾತಾತ್ ಲೊಕಾನಾ ವಾಡಾಯಾ ದಿಲ್ಯಾ; ತ್ಯಂಚಾನಿ ಲೊಕಾನಾ ವ್ಯಾಟ್‌ಲ್ಯಾ.

⁷ ಆನಿ ತ್ಯಂಚಿಪ ಥೊಡ ಬಾರಿಕ್ ಬಾಂಗ್ಡ ಹುತ್ತ; ತೆ ಯೇಸುನಿ ಗಿಹುನ್ ಪರ್ಮೇಶ್ವರಾಲಾ ದಾವುನ್ ಶಿಶಾಂಚಾ ಹಾತಾತ್ ದಿವುನ್ ತೆ ಮಾನ್ಸಾನಾ ವಾಟಾಯಾ ಸಾಂಗ್ಲ.

^8-9 ಪ್ವಾಟ್ಬ ಖಾವುನ್. ಆನಿ ಉರ್ಲ್ಯಾಲ ತುಕ್ಡ ಶಿಶಾಂಚಾನಿ ಜ಼ಮಾ ಕೆಲತೆ ಸಾತ್ ಟುಪ್ಲಿ ಜಾ಼ಲ. ಜೆವ್‌ಲ್ಯಾಲಿ ಲೊಕ ಕಮಿಸ ಕಮಿ ಚಾರ್ ಹಾಜಾ಼ರ್ ಹುತ್ತಿತ.

¹⁰ ಮಂಗ್ ಯೇಸು ತ್ಯನಾ ಲಾವುನ್ ದಿವುನ್ ತವಾಸ್ ಆಪ್‌ಲ್ಯಾ ಶಿಶಾನಾ ಗಿಹುನ್ ವ್ಹಡಿತ್ ಚ಼ಡುನ್ ದಲ್ಮನೂತ್ ಪ್ರದೇಶಾತ್ ಗೆಲಾ.

ಫರಿಸಾಯ್ ಲೊಕ ಯಾಕ್ ಚಮತ್ಕಾರ್ ಇಚಾರತ್ಯಾಲ

¹¹ ಥೊಡ್ಹ ಫರಿಸಾಯ್ ಯೇಸುಪ ಯವುನ್ ತ್ಯಚೆ ಗುಶ್ಟಿತ್ ಕಾಯ್ತರಿ ಚು಼ಕ್ ದರಾಯಾ ತ್ಯಚಿ ಸಂಗ ವಾದ್ ಗಾಲ್ಹಿತ್ ದೇವಾನಿ ತ್ಯಲಾ ಲಾವುನ್ ದಿಲ್ಯಾಲಾ ಜಾ಼ಲ್ಯಾ ತ್ಯನಿ ಆಬ್ಳಾತ್ ಯಾಕ್ ಚಮತ್ಕಾರ್ ಕರಾಯಾ ವ್ಹಯಿ ಮನ್ಹಿತ.

¹² ತವಾ ಯೇಸುನಿ ಉಸ್ಸಾಸ್ ಸುಡುನ್, “ಹಿ ಪಿಳ್ಗಿ ಚಮತ್ಕಾರ್ ಇಚಾರ್ತ್ಯಾಲಿ ಕಾ? ತುಮಾನಾ ಖರ ಸಾಂಗ್ತೋ, ಹೆ ಪಿಳ್ಗಿಲಾ ಚಮತ್ಕಾರ್ ಗಾವನ್ಹಾರುಸ್ ನಾಹಿ” ಮನ್ಹುನ್ ಸಾಂಗುನ್.

¹³ ತ್ಯನಾ ಸುಡುನ್ ಪರ್ತುನ್ ವ್ಹಡಿತ್ ಚ಼ಡುನ್ ಪಲಿಕ್ಡ ಗೆಲಾ.

ಯೇಸುನಿ ಫರಿಸಾಯ್ ಆನಿ ಹೇರೋದಾಂಚಿ ಹುಶಾರ್ಕಿ ದಿಲ್ಯಾಲಿ

¹⁴ ತ್ಯಚ಼ ಶಿಶಾ ಬಾಕ್‌ರ‍್ಯಾ ಗಿಹ್ಯಾ ಇಸಾರ್ಲ. ವ್ಹಡಿತ್ ತ್ಯಂಚಿಪ ಏಕ್ ಬಾಖ್ರಿ ತ್ಯವ್ಡಿಸ್ ಹುತ್ತಿ;

¹⁵ ಯೇಸುನಿ ತ್ಯನಾ, “ಫರಿಸಾಯ್ ಆನಿ ಹೆರೊದಾಚಾ ಆಂಬಾಟ್ ಪಿಠಾಬದಲ್ ಹುಶಾರ್ ರಾವ್ಹಾ” ಮನ್ಹುನ್ ಸಾಂಗ್ಲ.

¹⁶ ತ್ಯಲಾ ತೆ “ಆಮ್ಚಿಪ ಬಾಕ್‌ರ‍್ಯಾ ನಾಹಿತಾ ಮನ್ಹುನ್ ಆಪ್‌ಲ್ಯಾ ಆಪ್‌ಲ್ಯಾತ್ ಬೊಲತ್ ಹುತ್ತ.

¹⁷ ಯೇಸುನಿ ತ್ಯ ಸಮ್‌ಜು಼ನ್, “ಬಾಕ್‌ರ‍್ಯಾ ನಾಹಿತಾ ಮನ್ಹುನ್ ಕಸ್ಯಾಲಾ ಬೋಲ್ತಾಸಾ? ತುಮಿ ಆಜು಼ನ್ ಸಮ್‌ಜು಼ನ್ ಗೆತ್ಲನಾಹಿ ಕ್ಯಾ? ತುಮಾನಾ ತಿಳವಳಕಿ ಆಲಿ ನಾಹಿ ಕ್ಯಾ?

¹⁸ ತುಮ್ಚ ಮನ್ ಘಟ್ ಜಾ಼ಲ ಕ್ಯಾ? ಡೊಳ ಆಸುನ್ ಆಂದ್ಳ ಕ್ಯಾ? ಕಾನ್ ಆಸುನ್ ಕಿಂವ್ಡ ಕ್ಯಾ? ತುಮಾನಾ ಯಾದ್ ನಾಹಿ ಕ್ಯಾ?

¹⁹ ಮಿ ತ್ಯಾ ಪಾಚ಼್ ಬಾಕ್‌ರ‍್ಯಾ ಮುಡುನ್ ಪಾಚ಼್ ಹಾಜಾ಼ರ್ ಲೊಕಾನಾ ವ್ಯಾಟ್‌ಲ್ಯಾತವಾ ತುಕ್ಡ ಬರ್ಲ್ಯಾಲಿ ಟುಪ್ಲಿ ಕ್ಯವ್ಡಿ ನಿಲ್ಹಿಸಾ. ” ಮನ್ಹುನ್ ಇಚಾರ್ಲ ತ್ಯಲಾ ತೆ “ಬಾರಾ ಟುಪ್ಲಿ” ಮನ್ಲ.

²⁰ “ಆನಿ ತ್ಯಾ ಸಾತ್ ಬಾಕ್‌ರ‍್ಯಾ ಚಾರ್ ಹಾಜಾ಼ರ್ ಲೊಕಾನಾ ವ್ಯಾಟ್‌ಲ್ಯಾ ತವಾ ತುಕ್‌ಡ್ಯಾನಿ ಬರ್ಲ್ಯಾಲ್ಯಾ ಬುಠ್ಯಾ ಕ್ಯವಡ್ಯಾ ಗಿಹುನ್ ಗೆಲಾಸಾ” ಮನ್ಹುನ್ ಇಚಾರ್ಲ. ತ್ಯಲಾ ತೆ “ಸಾತ್ ಬುಠ್ಯಾ” ಮನ್ಲ.

²¹ ತವಾ ಯೇಸು ತ್ಯನಾ “ತುಮಾನಾ ಆಜು಼ನ್ ಸಮಾಜ್ಲ ನಾಹಿ ಕ್ಯಾ? ಮನ್ಲಾ.

ಯೇಸುನಿ ಬೆತ್ಸಾಯಿತ್ ಯಕಾ ಅಂದ್‍ಳ್ಯಾಲಾ ನದಾರ್ ದಿಲ್ಯಾಲಿ

²² ತೆ ಬೆತ್ಸಾಯಿತ್ ಆಲ. ತಿಥ ಲೊಕಾಂಚಾನಿ ಯಕಾ ಆಂದ್‍ಳ್ಯಾಲಾ ಯೇಸುಪ ಆನುನ್, “ಹ್ಯಲಾ ತು ಹಾತ್ ಲಾವಾಯಾ ವ್ಹಯಿ” ಮನ್ಹಾಯಾ ಲಾಗ್ಲಿತ.

²³ ತ್ಯನಿ ಅಂದಳ್ಯಾಚಾ಼ ಹಾತ್ ದರುನ್ ಗಾವಾಚೆ ಬಾಹಿರ್ ಗಿಹುನ್ ಜಾ಼ವುನ್ ತ್ಯಚಾ ಡೊಳ್ಯಾತ್ ಥುಕುನ್ ತ್ಯಚಿವ ಹಾತ್ ಥಿವುನ್, “ತುಲಾ ಕಾಯ್ ದಿಸಥ್ಯಾ ಕ್ಯಾ? ಮನ್ಹುನ್ ತ್ಯಲಾ ಇಚಾರ್ಲ.

²⁴ ತ್ಯನಿ ಡುಯಿ ಉಚ್ಲು಼ನ್ ಬಗುನ್ “ಮನಾ ಮಾನ್ಸ ದಿಸಥ್ಯಾತ; ತಿ ಜಾ಼ಢಾಂಚೆಗತ್ ದಿಸ್ಲಿತ ತರಿ ಫಿರತ್ ಹಾತ” ಮನ್ಲಾ.

²⁵ ತವಾ ಯೇಸುನಿ ತ್ಯಚಾ ಡೋಳ್ಯಾವ ಆನಿಕ್ ಹಾತ್ ಥೆವ್ಲಾ; ತ್ಯನಿ ಡೊಳ ಉಗ್ಡುನ್ ಬಗ್ಲ ತವಾ ತ್ಯಲಾ ಬರ ಜಾ಼ಲ ಹುತ್ತ; ಸಗ್ಳ ಚಾ಼ಂಗ್ಲ ದಿಸಾಯಾ ಲಾಗ್ಲ.

²⁶ ಯೇಸು ತ್ಯಲಾ “ತು ಲೊಕಾಂಚಿಪ್ನಿ ಆಲಾಸ್ ತಿಥ ಜಾ಼ವು ನಕೊಸ್” ತುಜಾ ಗರ‍್ಹಾತ್ ಜಾ಼ ಮನ್ಹುನ್ ಲಾವುನ್ ದಿಲಾ.

ಯೇಸುಸ್ ಕ್ರಿಸ್ತ ಮನ್ಹುನ್ ಪೆತ್ರಾನಿ ಸಾಂಗಲ್ಯಾಲ

²⁷ ಯೇಸು ಆನಿ ತ್ಯಚ಼ ಶಿಶಾ ಫಿಲಿಪಾಚಾ ಕೈಸರಾಚಾ ಜ಼ವಳ್ಚಾ ಗಾವಾಗಿರ್ಮಾತ್ನಿ ನಿಗಾಲ. ವಾಟವ ತ್ಯನಿ, “ಲೊಕ ಮನಾ ಕೊನ್ ಮಂಥ್ಯಾತ? ಮನ್ಹುನ್ ಆಪ್‍ಲ್ಯಾ ಶಿಶಾನಾ ಇಚಾರ್ಲ ತ್ಯಲಾ ತೆ.

²⁸ “ತುಲಾ ಥುಡಿಜ಼ನ ಬಾಪ್ತಿಸ್ಮಾ ಯೊಹಾನ್ ಮನ್‌ಥ್ಯಾತ; ಥುಡಿ ಯಲಿಯಾ ಮಂಥ್ಯಾತ; ಆನಿ ಥುಡಿ ಪ್ರವಾದಿತ್ಲಾ ಯೊಕ್ ಮನ್‌ಥ್ಯಾತ” ಮನ್ಲ.

²⁹ ಯೇಸು ತ್ಯನಾ, “ಖರ ತುಮಿ ಮನಾ ಕೊನ್ ಮಂಥಾಸಾ? ಮನ್ಹುನ್ ಇಚಾರ್ಲ ತ್ಯಲಾ ಪೇತ್ರ, “ತು ಯನಾರಾ ಕ್ರಿಸ್ತ್” ಮನ್ಲಾ.

³⁰ ತವಾ ಯೇಸು “ಹ್ಯ ಕುನಾಲಾ ಸಾಂಗು ನಕೊಸಾ” ಮನ್ಹುನ್ ತ್ಯನಾ ಖಡ್ಯಾವುನ್ ಸಾಂಗ್ಲ.

ಯೇಸುಚ಼ ಮರಾನ್ ಆನಿ ಕಸ್ಟ ಆಂದಿಸ್ ಸಾಂಗ್‌ಲ್ಯಾಲ

³¹ ಯೇಸು ಆಪ್‌ಲ್ಯಾ ಶಿಶಾನಾ ಸಾಂಗಾಯಾ ಲಾಗ್ಲಾ, “ಮಾನ್ಸಾಚಾ಼ ಲ್ಯೊಕ್ ಖುಬ್ ತರಾಸ್ ಖಾನಾರ್ ಜಾಂತ ತ್ಯಲಾ ನಕ್ವಾಟ್ ಕರ್ನಾರ್, ಮುಖ್ಯ ಯಾಜಕ್, ದರ್ಮ ಶಾಸ್ತಾರ್ ಸಾಂಗ್‌ತ್ಯಾಲ ತ್ಯಚಾ಼ ರಾಗ್ ಕರ್ನಾರ್ ತ್ಯಲಾ ಮಾರಾಯಾ ದೆನಾರ್ ಆನಿ ತೀನ್ ದಿಸಾ ನಂತರ್ ಜಿ಼ತ್ತಾ ವ್ಹವುನ್ ಉಠುನ್ ಯನಾರ್” ಮನ್ಲಾ.

³² ತ್ಯನಿ ಹೆ ಸಬಾತ್ ಉಗ್ಡುನ್ ಸಾಂಗ್ಲ. ತವಾ ಪೇತ್ರ ತ್ಯಚಾ಼ ಹಾತ್ ದರುನ್ ತ್ಯಲಾ ದಪ್‌ಕಾವಾಯಾ ಲಾಗ್ಲಾ.

³³ ಯೇಸು ಮಾಗಾರಾ ಪರ್ತುನ್ ಆಪ್‌ಲ್ಯಾ ಶಿಶಾನಾ ಬಗುನ್ ಪೇತ್ರಾಲಾ, “ಸೈತಾನಾ, ಮಾಜೆ ಮೋರ್ಹ ಉಬಾ ರಾಹು ನಕೊ! ಚ಼ಲಾಯಾ ಲಾಗ್! ತುಜಾ಼ ಇಚಾರ್ ಮಾನ್ಸಾಚಾ ಇಚಾರ್ ದೇವಾಚಾ಼ ನವ್ಹ” ಮನ್ಹುನ್ ದಪ್‌ಕ್ಯಾವುನ್ ಸಾಂಗ್ಲ.

³⁴ ತ್ಯಾ ನಂತರ್ ತ್ಯನಿ ಆಪ್‌ಲ್ಯಾ ಶಿಶಾಂಚೆ ಸಂಗ ಲೊಕಾನಾ ಜ಼ವಳ್ ಹಾಕ್ಟುನ್ ತ್ಯನಾ ಕ್ಯಾ ಸಾಂಗ್ಲ ಮನ್‌ಲ್ಯಾವ, “ಕುನಾಲಾ ತರಿ ಮಾಜೆ ಮಾಗ್ನಿ ಯಯಾ ಮನ್ ಆಸ್ಲತ ತ್ಯನಿ ಆಪ್ಲ ಸಗ್ಳ ಇಸ್ರುನ್ ತ್ಯಚಾ಼ ಶಿಲ್ಬೆಚಾ಼ ಖಾಂಬ್ ತ್ಯೊಸ್ ಗಿಹುನ್ ಮಾಜೆ಼ ಮಾಗ್ನಿ ಯವುನಿ.

³⁵ ಕೊನ್ ಆಪ್ಲಾ ಜೀವ್ ಹ್ಯಾ ಲೋಕಾಮದಿ ಉರ್ವಾ ವ್ಹಯಿ ಮನ್ಥೊ ತ್ಯಚಾ಼ ಜೀವ್ ನಾಸ್ ವ್ಹನ್ಹಾರ್; ಫನ್ ಮಾಜಿ಼ಸ್ ಲಾಗುನ್, ಆನಿ ಸೂವಾರ್ತೆಸ್ ಲಾಗುನ್ ಆಪ್ಲಾ ಜೀವ್ ದಿಯಿಲ್ ತ್ಯಲಾ ಶಾಸ್ವಿತ್ ಜೀವ್ ಗಾವಲ್.

³⁶ ಯಕಾ ಮಾನ್ಸಾನಿ ಜ಼ಗ್ ಸಗ್ಳಾ ಮಿಳ್ವುನ್ ಆಪ್‌ಲ್ಯಾ ಜೀವಾಚಾ಼ ನಾಸ್ ಕರುನ್ ಗೆತಲ್ಯಾವ ತ್ಯಲಾ ಕ್ಯಾ ಉಪೆಗ್?

³⁷ ಆಪ್ಲಾ ಜೀವ್ ಮಾಗಾರಾ ಗಿಹ್ಯಾ ಕ್ಯಾ ದಿಯಾ ವ್ಹಯಿಲ್? ಕಾಯೇಕ್ ನಾಹಿ!

³⁸ ವ್ಯಬಿಚಾರಾಚೆಗತ್ ಆಸ್‌ಲ್ಯಾಲೆ ಹೆ ಪಾಪಿ ಪಿಳ್ಗಿ ಮದಿ ಕೊನ್ ಮನಾ ಆನಿ ಮಾಜಾ ಸಬ್ದಾನಾ ಲಾಸ್ತೋ, ತ್ಯಲಾ ಮಾನ್ಸಾಚಾ ಲ್ಯೊಕ್ ಆಪ್ನು ಆಪ್‌ಲ್ಯಾ ಬಾಚೆ ಮೈಮೆನಿ ಚ಼ಮಾಕತ್ಯಾಲ್ಯಾ ಉಜಿಡಾನಿ ಪವಿತ್ರ ದೇವ್ದುತಾಂಚೆ ಸಂಗ ಯತಾನಾ ಲಾಜ಼ಲ್.