लूका 22 - ದೆವಾಚಿ ಖರಿ ಕಬರ್ ನವಾ ಕರಾರ್

ಯೇಸುಲಾ ಮಾರಾಯಾ ಪಾರಕ್ ಕೆಲ್ಯಾಲಿ

¹ ಆಂಬಾಟ್ ನಸ್‍ಲ್ಯಾಲ್ಯಾ ಬಾಕ್‌ರ‍್ಯಾ ಖಾತ್ಯಾಲಾ ವಲಾಂಡ್ಯಾಚಾ಼ ಸನ್ ಜ಼ವಳ್ ಆಲ್ತಾ.

² ತವಾ ದೊನ್ವಾ ಯಾಜಕ್ ಆನಿ ಕ್ಯಾಯ್ದವಾಲ ಯೇಸುಲಾ ಠಾರ್ ಮಾರಾಯಾ ವ್ಹಯಿ ಮನ್ಹಿತ ಫನ್ ಮಾನ್ಸಾನಾ ಬಿಹುನ್ ಹ್ಯಚಾ಼ ಕಸಾ ಘಾತ್ ಕರಾಚಾ಼ ಮನ್ಹುನ್ ಇಚಾರ್ ಕರೀತ.

ಯುದ್ ಯೇಸುಲಾ ದರುನ್ ದೆತೊ ಮನ್‌ಲ್ಯಾಲಾ

³ ತವಾ ಬಾರಾ ಜಾ಼ನ್ ಶಿಶಾತ್ಲಾ ಯುದ್ ಮಂಥ್ಯಾಲ್ಯಾತ್ ಸೈತಾನ್ ಬರ‍್ಲ.

⁴ ತವಾ ಯುದ್ ದೊನವ್ಯಾ ಯಾಜಕಾಂಚಿಕ್ಡ ಆನಿ ದೇವ್ಳಾಚಾ ಅಧಿಕಾರ‍್ಯಾಂಚಿಕ್ಡ ಗೆಲಾ ಆನಿ ತ್ಯಂಚಾ ಹಾತಾತ್ ಯೇಸುಲಾ ಕಸಾ ದರುನ್ ದಿಯಾಚಾ಼ ಹ್ಯ ತ್ಯನಿ ತ್ಯಂಚಿ ಸಂಗ ಬೊಲ್ಲಾ.

⁵ ತವಾ ತ್ಯನಾ ಆನಂದ್ ಜಾ಼ಲಾ ಆನಿ ತ್ಯಂಚಾನಿ ತ್ಯಲಾ ಪೈಸ ದಿಯಾಚಾ಼ ಕರಾರ್ ಕೆಲಾ

⁶ ತ್ಯಲಾ ತ್ಯೊ ಹು ಮನ್ಲಾ ಆನಿ ಲೊಕಾಂಚಿ ಗರ್ದಿನಸ್ಹಲ್ ತವಾ ತ್ಯಂಚಾ ಹಾತಾತ್ ಯೇಸುಲಾ ದರುನ್ ದಿಯಾ ಯೇಳ್ ತ್ಯೊ ಬಗಾಯಾ ಲಾಗ್ಲಾ.

ವಲಾಂಡ್ಯಾಚಾ ಸನಾಚಾ ಜೆವ್ನಾಚಿ ಯೇಸುಚಿ ತಯಾರಿ

⁷ ಮಂಗ್ ವಲಾಂಡ್ಯಾಚ಼ ಯಜ್ಞಪಶು ಮಾರಾಚ಼ ಆಂಬಾಟ್ ನಸ್‍ಲ್ಯಾಲ್ಯಾ ಬಾಕ್‌ರ‍್ಯಾ ಖಾಯಾಚಾ಼ ತ್ಯೊ ದಿಸ್ ಆಲಾ

⁸ ತವಾ ಯೇಸು ಪೇತ್ರಾಲಾ ಆನಿ ಯೊಹಾನಾಲಾ, “ತುಮಿ ಜಾ಼ವುನ್ ಆಮಿ ವಲಾಂಡ್ಯಾಚ಼ ಜೆವಾನ್ ಕರಾಯಾ ತಯಾರಿ ಕರಾ ಮನ್ಹುನ್ ಸಾಂಗುನ್ ತ್ಯನಾ ಲಾವುನ್ ದಿಲ

⁹ ತೇ ಆಮಿ ಕುಠ ತಯಾರಿ ಕರಾವ ಮಂಥೊಸ್? ಮನ್ಲ

¹⁰ ತವಾ ಯೇಸು ತ್ಯನಾ, “ತುಮಿ ಯೇರುಸಲೆಮ್ ಪೆಠತ್ ಗೆಲಾಸಾಕಿ ಯೊಕ್ ಮಾನುಸ್ ಬರಲ್ಯಾಲಿ ಗಾಘರ್ ಗಿಹುನ್ ತುಮ್ಚೆ ಮೊರ‍್ಹ ಯಯಿಲ್ ತ್ಯೊ ಜಾ಼ತ್ಯಾಲ್ಯಾ ಗರ‍್ಹಾತ್ ತುಮಿ ತ್ಯಚೆ ಮಾಗ್ನಿ ಜಾ಼ವುನ್

¹¹ ತ್ಯಾ ಗರ‍್ಹಾಚಾ ದನ್‍ಹ್ಯಾಲಾ, “ಆಮ್ಚಾ ಪ್ರಭುನಿ ಆಪ್‌ಲ್ಯಾ ಶಿಶಾಂಚಿ ಸಂಗ ವಲಾಂಡ್ಯಾಚ಼ ಜೆವಾನ್ ಕರಾಯಾ ಜೆವ್ನಾಚಿ ಖುಲಿ ಕುಠ ಮನ್ಹು‍ನ್ ಇಚಾರಾ

¹² ತ್ಯೊ ಸಗ್ಳ ಸಾಮಾನ್ ಆಂದಿಸ್ ಥೆವ್‍ಲ್ಯಾಲ ಮಾಳಿವ ಮುಟಿ ಖುಲಿ ತುಮಾನಾ ದಾವಿಲ್; ತಿಥ ತಯಾರ್ ಕರಾ ಮನ್ಹುನ್ ಸಾಂಗುನ್ ಲಾವುನ್ ದಿಲ.

¹³ ತೆ ನಿಗಾಲ ಆನಿ ಯೇಸುನಿ ಆಪ್‌ಲ್ಯಾನಾ ಸಾಂಗ್‍ಲ್ಯಾ ಶಾರ್ಕ ಬಗುನ್ ವಲಾಂಡ್ಯಾಚ಼ ಜೆವಾನ್ ತಯಾರ್ ಕೆಲ.

ಪ್ರಭುಚ಼ ರಾತಿಚ಼ ಜೆವಾನ್

¹⁴ ಜೆವ್ನಾಚಾ಼ ಯೊಳ್ ಆಲಾ ತವಾ ಯೇಸು ಆಪ್‌ಲ್ಯಾ ಬಾರಾ ಅಪೊಸ್ತಲಾಂಚೆ ಸಂಗ ಜೆವಾಯಾ ಬಸ್ಲಾ.

¹⁵ ತವಾ ಯೇಸುನಿ ತ್ಯನಾ, “ಮಿ ತರಾಸ್ ಖಾಯಾಚೆ ಆಂದಿ ತುಮ್ಚೆ ಸಂಗ ಹ್ಯ ವಲಾಂಡ್ಯಾಚ಼ ಜೆವಾನ್ ಖಾಯಾ ಖುಬ್ ಹಾವುಸ್ ಹಾ.

¹⁶ ಮಿ ತುಮಾನಾ ಸಾಂಗ್ತೊ ಹ್ಯಚಾ಼ ಖರಾ ಆರ್ಥ ದೇವಾಚಾ ರಾಜಾತ್ ಗಢ ಪರ‍್ಯಾತ್ ಮಿ ಹಿತ್ನಿ ಮೊರ‍್ಹ ವಲಾಂಡ್ಯಾಚ಼ ಜೆವಾನ್ ಖಾನಾರ್ ನಾಹಿ” ಮನ್ಹುನ್ ಸಾಂಗ್ಲ.

¹⁷ ತ್ಯಾ ನಂತರ್ ಯೇಸುನಿ ದರಾಕ್ಶಿಚಾ ರಸಾಚ಼ ಲ್ಯೊಟ್ಕ ಗಿಹುನ್ ದೇವಾಲಾ ಸ್ತೊತ್ರ ಕರುನ್, “ಹ್ಯ ಗಿಹುನ್ ತುಮಿ ವಾಟುನ್ ಗೆವ್ಹಾ.

¹⁸ ಆಚಾನಿ ದೇವಾಚ಼ ರಾಜೆ ಯಯಿ ಪರ‍್ಯಾತ್ ಮಿ ಆನಿ ಆಂಬಾಟ್ ಜಾ಼ಲ್ಯಾಲಾ ದರಾಕ್ಶಿಚಾ಼ ರಸ್ ಪಿನಾರುಸ್ ನಾಹಿ ಮನ್ಹುನ್ ತುಮಾನಾ ಮಿ ಸಾಂಗ್ತೊ” ಮನ್ಲಾ.

¹⁹ ಮಂಗ್ ತ್ಯನಿ ಬಾಖ್ರಿ ಗಿಹುನ್ ದೇವಾಲಾ ಉಪ್ಕಾರ್ ಕರುನ್ ಮುಡುನ್ ತ್ಯನಾ ದಿವುನ್, “ಹ್ಯ ತುಮ್ಚಿ ಸಾಟಿ ದಿಲ್ಯಾಲ ಮಾಜ಼ ಧಡ್; ಮಾಜಿ ಯಾದ್ ಕಾಡಾಯಾ ಆಸ ಕರಾ” ಮನ್ಲಾ.

²⁰ ಜೆವಾನ್ ಜಾ಼ಲ್ಯಾ ನಂತರ್ ಯೇಸುನಿ ತಸಸ್ ಲ್ಯೊಟ್ಕ ಗಿಹುನ್, “ಹ್ಯ ಲ್ಯೊಟ್ಕ ತುಮ್ಚಿ ಸಾಟಿ ಶಾಂಡ್ನಾರ‍್ಯಾ ಮಾಜಾ ರಕ್ತಾನಿ ಕೆಲ್ಯಾಲಾ ನವಾ ಕರಾರ್ ದಾವುನ್ ದೆತ್ಯೊ.

²¹ “ಫನ್, ಬಗಾ! ಮನಾ ದರ‍್ಹುನ್ ದೆನಾರ್ ಮಾಜಿಸಂಗ ಮೆಜಾ಼ವ ಹಾತ್ ಥಿವುನ್ ಖಾತ್ಯೊ.

²² ದೇವಾಚಾ ಮನಾಶಾರ್ಕ ಮಾನ್ಸಾಚಾ಼ ಲ್ಯೊಕ್ ನಿಗುನ್ ಜಾ಼ನಾರ್ ತ್ಯ ಖರ; ಫನ್ ತ್ಯಲಾ ದರುನ್ ದೆನಾರ‍್ಯಾ ಮಾನ್ಸಾಚಿ ಹಾಕಿಗತ್ ಕ್ಯಾ ಸಾಂಗು” ಮನ್ಲಾ.

²³ ಹ್ಯ ಐಕುನ್ ತೆ, “ಆಸ್ಲ ಕಾಮ್ ಕರಾ ವ್ಹಯಿ ಮನ್‌ಲ್ಯಾಲಾ ಆಮ್ಚಾತ್ ಕೊನ್ ಆಸಲ್” ಮನ್ಹುನ್ ಯಕಾಮಕಾಲಾ ಇಚಾರಾಯಾ ಲಾಗ್ಲ.

ಮೊಟ್ಯಾಫನಾಚಾ಼ ವಾದ್ ವಿವಾದ್

²⁴ ಮಂಗ್ ಶಿಶಾಂಚಾ಼ ಆಪ್‌ಲ್ಯಾತ್ ಕಚಾ಼ ಥೊರ‍್ಲಾ ಮನ್ಹುನ್ ಗಿಹಿಲ್ ಹೆ ಗುಶ್ಟಿತ್ ವಾದ್ ವಿವಾದ್ ಚಾ಼ಲ್ಲಾ.

²⁵ ತವಾ ಯೇಸು ತ್ಯನಾ, “ದುಸ್ರೆ ದೆಸೆಚ಼ ರಾಜ಼ ಆಪ್‌ಲ್ಯಾ ಬಳಾನಿ ಆಪ್‌ಲ್ಯಾ ಲೊಕಾನಾ ಹಾಕಾನಿ ಚಾ಼ಲಿವತ್ಯಾತ ಆನಿ ಅಧಿಕಾರಿ ಲೊಕಾಂಚ಼ ಸುಪ್ತಿ ಮನ್ಹುನ್ ಗೆಥ್ಯಾತ.

²⁶ ತುಮ್ಚಾತ್ ತಸ ರಾಹು ನಾಹಿ; ತುಮ್ಚಾತ್ ಥೊರ‍್ಲಾ ಬ್ಯಾರ್‌ಕ್ಯಾಂಚಿಗತ್ ವ್ಹಯಾ ವ್ಹಯಿ ದನ್ಹಿ ಆಳಾಚೆಗತ್ ವ್ಹಯಾ ವ್ಹಯಿ

²⁷ ಕಚಾ಼ ಥೊರ‍್ಲಾ; ಖಾಯಾ ಬಸ್‍ಲ್ಯಾಲಾ ಕ್ಯಾ ಸೇವಾ ಕರ್ನಾರಾ? ಖಾಯಾ ಬಸ್‍ಲ್ಯಾಲಾಸ್ ಫನ್ ಮಿ ತುಮ್ಚಾತ್ ಸೆವಕಾಚೆಗತ್ ಹಾ.

²⁸ ತುಮಿ ಮಾಜಾ ಸಗ್‌ಳ್ಯಾ ತರಾಸಾತ್ ಮಾಜಿಸಂಗ ಖಾಯಿಮ್ ಆಸ್‍ಲ್ಯಾಲ

²⁹ ಮನ್ಹುನ್ ಮಾಜಾ ಪರಮೇಶ್ವರ್ ಬಾನಿ ಮನಾ ಹಾಕ್ ದಿಲ್ಯಾ ಶಾರ್ಕಾ ಮಿ ತುಮಾನಾ ದೆತೋ.

³⁰ ಮಾಜಾ ರಾಜಾತ್ ತುಮಿ ಮಾಜಾ ಮೆಜಾವ ಜೆವಾನ್ ಖಾನಾರ್ ಪಿನಾರ್; ಆನಿ ರಾಜಾಚೆ ಖುರ್ಚಾಂಚಾವ್ನಿ ಬಸುನ್ ಇಸ್ರಾಯಲಾಚಾ ಬಾರಾ ಕುಳಾನಾ ನ್ಯಾಯಿ ನಿವಡ್ನಾರ್.

ಯೇಸುನಿ ಪೇತ್ರಾಚ಼ ಆಂದಿಸ್ ಸಾಂಗ್‌ಲ್ಯಾಲ

³¹ ಸಿಮೊನಾ ಸಿಮೊನಾ ಐಕ್ ಸೈತಾನಾನಿ ತುಮಾನಾ ಚಾ಼ಂಗಲ್ಯಾತ್ನಿ ಬುರ್ಸ ಕಾಡಾಯಾ ಮಾಜಿಪ್ನಿ ಹುಕುಮ್ ಮಾಗ್‌ಲ್ಯಾ ತ್ಯೊ ಕಸಾ ಮಂಜೆ ತ್ಯ ಬುರ್ಶಾತ್ನಿ ಚಾ಼ಂಗ್ಲ ಕಾಡಾಯಾ ಕಸಾ ಯೊಕ್ ಸೇತ್ಕರಿ ಘಹು ಸಡ್ತೊ ತಸ.

³² ಫನ್ ಸಿಮೊನಾ ತುಜಾ಼ ಇಸ್ವಾಸ್ ಠಕು ನಾಹಿ ಮನ್ಹುನ್ ಮಿ ತುಜೆ ಗುಶ್ಟಿತ್ ದೇವಾಪ ಮಾಗುನ್ ಗೆತ್ಲ ಆನಿ ತು ಪರಾತ್‍ಲ್ಯಾ ನಂತರ್ ತುಜಾ ಬಾವ್ಹಾನಾ ಧೀರ್ ದೇ ಮನ್ಹುನ್ ಸಾಂಗ್ಲ.

³³ ಫನ್ ಪೇತ್ರಾ, “ಪ್ರಭು ತುಜಿ ಸಂಗ ತುರುಂಗಾತ್ ಜಾ಼ಯಾಬಿ ಮರಾಯಾಬಿ ಮಿ ಉಬಾ ಹಾ” ಮನ್ಲಾ.

³⁴ ಯೇಸು, “ಪೇತ್ರಾ, ಮಾಜೆ ಗುಶ್ಟಿತ್ ಆಜ಼್ ಸಕಾಳಚಾ಼, ‘ಹ್ಯೊ ಮನಾ ಠಾವಾ ನಾಹಿ’ ಮನ್ಹು‍ನ್ ತು ತೀನ್ ಖೆಪಾ ಸಾಂಗಿ ಪರ‍್ಯಾತ್ ಕೊಂಬ್ಡಾ ಬವ್ನಾರ್ ನಾಹಿ ಆಸ ತುಲಾ ಸಾಂಗ್ತೊ” ಮನ್ಲಾ.

ಪೈಶಾಚಿ ಪಿಸ್ವಿ ಆನಿ ಕುಂಗ್ಳಿ

³⁵ ಆನಿ ಯೇಸುನಿ ಆಪ್‌ಲ್ಯಾ ಶಿಶಾನಾ, “ತುಮಾನಾ ಪೈಶಾಚಿ ಪಿಸ್ವಿ, ಜು಼ಳ್ಹಿ ವ್ಹಾನಾ ನಸ್ಥಾನಾ ಮಿ ಲಾವುನ್ ದಿಲ ತವಾ ತುಮಾನಾ ಕಾಯ್ತರಿ ಕಮ್ಮಿ ಜಾ಼ಲ ಕ್ಯಾ” ಮನ್ಹುನ್ ಇಚಾರ್ಲ. ತವಾ ತೇ, “ಕಾಯ್‍ ನಾಹಿ” ಮನ್ಹುನ್ ಉತ್ತರ್ ದಿಲಾ.

³⁶ ತ್ಯಲಾ ಯೇಸು, “ಆತಾತರಿ ಕಚಾಪ ಪಿಸ್ವಿ ಹಾ ತ್ಯನಿ ಗೆವ್ಹಾವಿ ಜು಼ಳ್ಹಿ ಗೆವ್ಹಾವಿ ಆನಿ ಕಚಾಪ ಹತ್ಯಾರ್ ನಾಹಿ ತ್ಯನಿ ಆಪ್ಲ ಕಪ್ಡ ಇಕುನ್ ಹತ್ಯಾರ ಗೆವ್ಹಾವ.

³⁷ ಕಾ ಮಂಜೆ, ‘ತ್ಯೊ ಅಪರಾದಿತಲ್ಯಾ ಯಕಾಚೆಗತ್ ಥರ್ಲಾ ಹುತ್ತಾ ಮನ್ಹುನ್ ಪ್ರವಾದಿಂಚಾನಿ ಲಿವ್‌ಲ್ಯಾಲ್ಯಾ ಪುಸ್ತಕಾತ್ಲ ಸಬಾತ್ ಮಾಜಿವ ಗಢಾ ವ್ಹಯಿ ಜಾ಼ಲ್ಯಾತ ಮನ್ಹುನ್ ತುಮಾನಾ ಸಾಂಗ್ತೊ; ಮಾಜಿ ಗ್ಯೊಶ್ಟ್ ಸಪಾಯಾ ಪಾಯ್ಜೆ” ಮನ್ಹುನ್ ಸಾಂಗ್ಲ.

³⁸ ತವಾ ಶಿಶಾ, “ಪ್ರಭು ಹಾಬಿ ಹಿತ್ತ ದೊನ್ ಹತ್ಯಾರಿ ಹಾತ್ತ” ಮನ್ಲ ತವಾ ಯೇಸು ತ್ಯನಾ, “ತ್ಯವ್ಡಿ ಪುರೊ” ಮನ್ಲಾ.

ಯೇಸು ಒಲೀವ್ ಗುಢ್ಯಾವ ಮಾಗ್ನ ಕರ್ತ್ಯಾಲಾ

³⁹ ಮಂಗ್ ಯೇಸು ನಿಗುನ್ ಯೆರುಸಲೆಮ್ ಪ್ಯಾಟ್ ಸುಡುನ್ ಖಾಯಿಮ್ಚಿಗತ್ ಒಲೀವ್ ಜಾ಼ಢಾಂಚಾ ಗುಢ್ಯಾವ ಗೆಲಾ ಆನಿ ಶಿಶಾಬಿ ತ್ಯಚೆ ಮಾಗ್ನಿ ಗೆಲ.

⁴⁰ ತ್ಯೊ ತ್ಯಾ ಠಿಕಾನ್ಯಾವ ಆಲಾ ತವಾ ಯೇಸುನಿ ತ್ಯನಾ, “ತುಮಿ ಪರಿಕ್ಷೆತ್ ಗಾವು ನಾಹಿ ಆಸ ದೇವಾಪ ಮಾಗ್ನ ಕರಾ ಮನ್ಹುನ್ ಸಾಂಗ್ಲ.

⁴¹ ಮಂಗ್ ಯೇಸು ತ್ಯನಾ ಸೂಡುನ್ ದೊಂಡ್ಯಾಚಾ ಹೊಲ್ಪಾಟ್ಯಾ ಇತ್ಕಾ ದುರ್ ಜಾ಼ವುನ್ ನಡ್ಗ ಟಿಕುವುನ್,

⁴² “ಬಾ ದೇವಾ ತುಲಾ ಮನ್ ಆಸ್ಲತ ಹ್ಯ ತರಾಸಾಚ಼ ಐದಾನ್ ಮಾಜಿಪ್ನಿ ಕ್ಯಾಡ್; ಕಸ ಬಿ ಮಾಜಾ ಮನಾ ಶಾರ್ಕ ನವ್ಹ ತುಜಾ ಮನಾಚೆಗತ್ ವ್ಹವುನಿ” ಆಸ ಮಾಗ್ನ ಕೆಲ.

⁴³ ತವಾ ಪರಲೊಕಾತ್ನಿ ಆಲ್ಯಾಲಾ ಯೊಕ್ ದೇವ್ ಧುತ್ ತ್ಯಲಾ ದಿಸುನ್ ಧೀರ್ ದಿಲಾ.

⁴⁴ ತ್ಯೊ ಮನಾಲಾ ಬೆಜಾರ್ ವ್ಹವುನ್ ಆಜು಼ನ್ ಮನಾನಿ ಮಾಗ್ನ ಕರ್ತಾನಾ ತ್ಯಚಾ಼ ಘಾಮ್ ದರ್ಥಿವ ಪಡ್‍ತ್ಯಾಲ್ಯಾ ರಕ್ತಾಚಾ ಮೊಟ್ಯಾ ಠೆಮಾಚೆಗತ್ ಹುತ್ತಾ.

⁴⁵ ಯೇಸುನಿ ಮಾಗ್ನ ಸಪ್ವುನ್ ಉಠುನ್ ಶಿಶಾಂಚಿಪ ಯವುನ್ ಹ್ಯನಾ ನಿಜ಼್ ಲಾಗ್‌ಲ್ಯಾಲಿ ಬಗುನ್ ದುಃಖಾನಿ ಬರ‍್ಹುನ್.

⁴⁶ ತ್ಯೊ ಶಿಶಾನಾ, “ತುಮಿ ನಿಸ್‍ತ್ಯಾಲ ಕ್ಯಾ? ಉಠಾ ಪರಿಕ್ಶೆತ್ ಗಾಹು ನಾಹಿ ಆಸ ಮಾಗ್ನ ಕರಾ” ಮನ್ಹುನ್‍ ಸಾಂಗ್ಲ.

ಯೇಸುಲಾ ದರಾಚಾ಼

⁴⁷ ಯೇಸು ಆಜು಼ನ್ ಬೊಲ್ತಾ ಆಸ್ಥಾನಾಸ್ ತಿಥ ಮಾನ್ಸಾಂಚಾ಼ ಹಿಂಡ್ ದಿಸ್ಲಾ. ಬಾರಾಜಾ಼ನ್ ಶಿಶಾತ್ಲಾ ಯಕ್ಲಾ ಯುದ್ ಮಂಥ್ಯಾಲಾ ತ್ಯಾ ಲೊಕಾಂಚೆ ಮೊರ‍್ಹ ಮೊರ‍್ಹ ಲಾಗ್ಲಾ ಆನಿ ತ್ಯನಿ ಯೇಸುಚಾ಼ ಮುಖಾ ಗೆತ್ಲಾ.

⁴⁸ ತವಾ ಯೇಸು ತ್ಯಲಾ, “ಯುದಾ ಯೊಕ್ ಮುಖಾ ಗಿಹುನ್ ಮಾನ್ಸಾಚಾ ಲೇಕಾಲಾ ದರುನ್ ದೇತೊಸ್ ಕ್ಯಾ? ಮನ್ಹುನ್ ಇಚಾರ್ಲ.

⁴⁹ ತ್ಯಚೆ ಮೊರ‍್ಹ ಗಡ್ನಾರ ಸಮಜು಼ನ್, “ಪ್ರಭು ಆಮಿ ಹಾತ್ಯಾರಿ ಗೆವ್ಹಾವಕ್ಯಾ? ಮನ್ಹುನ್ ಇಚಾರ್ಲ

⁵⁰ ತ್ಯಾತ್‍ಲ್ಯಾ ಯಕಾನಿ ಮದ್‌ಲ್ಯಾ ಯಾಜಕಾಚಾ ಆಳಾಲಾ ಮಾರುನ್ ತ್ಯಚಾ಼ ಉಜ್ವಾ಼ ಕಾನ್ ತ್ಯೊಡ್ಲಾ.

⁵¹ ಫನ್ ಯೇಸುನಿ ಯವ್‍ಡ್ಯಾವಸ್ ಸೊಡಾ ಮನ್ಹುನ್ ಸಾಂಗುನ್ ತ್ಯಾ ಕಾನಾಲಾ ಹಾತ್ ಲಾವುನ್ ತ್ಯಲಾ ಬರಾ ಕೆಲಾ.

⁵² ಮಂಗ್ ಯೇಸು ಆಪ್‌ಲ್ಯಾಲಾ ದರಾಯಾ ಆಲ್ಯಾಲ್ಯಾ ಮದ್‌ಲ್ಯಾ ಯಾಜಕಾಲಾ ದೇವ್ಳಾಚಾ ಸರದಾರಾನಾ ಆನಿ ವಡ್ಲಾನಾ, “ಚೊ಼ರಾಲಾ ದರಾಯಾ ಆಲ್ಯಾಚೆಗತ್ ಹಾತ್ಯಾರಿ ಟೊನ ಗಿಹುನ್ ಆಲ್ಯಾಸಾ?

⁵³ ಮಿ ಖಾಯಿಮ್ ದೇವ್ಳಾತ್ ತುಮ್ಚಿ ಸಂಗ ಆಸ್ಥಾನಾ ತುಮಿ ಮನಾ ದರ್ಲಾ ನಾಹಿಸಾ, ಫನ್ ಹ್ಯೊ ತುಮಚಾ಼ ಯೊಳ್, ಹ್ಯಚಿವ ಆಂದಾರಾಚಿ ಸತ್ತಾ ಹಾ ಮನ್ಹುನ್ ಸಾಂಗ್ಲ.

ಪೇತ್ರಾ ಯೇಸುಲಾ ನಾಖಾರ್ತೊ

⁵⁴ ತ್ಯಂಚಾನಿ ಯೇಸುಲಾ ದರುನ್ ಮುಖ್ಯ ಯಾಜಕಾಚಾ ಗರ‍್ಹಾತ್ ಗಿಹುನ್ ಗಿಲಿತ; ಪೇತ್ರಾ ದುರ್ನಿ ಮಾಗ್ನಿ ಮಾಗ್ನಿ ಜಾ಼ಯಿತಾ.

⁵⁵ ಆಂಗ್ನಾತ್ ಮದ್ದಿ ತ್ಯಂಚಾನಿ ಇಸ್ತು ಕರುನ್ ಯಕಿಕ್ಡ ಜ಼ಮುನ್ ತಾಪತ್ ಬಸ್ತಾನಾ ತ್ಯಂಚೆ ಮದ್ದಿ ಪೇತ್ರಾಬಿ ಬಸ್ಲಾ.

⁵⁶ ತ್ಯೊ ಉಜಿಡಾಕ್ಡ ತ್ವಾಂಡ್ ಕರುನ್ ಬಸ್‍ಲ್ಯಾಲಾ ಆಸ್ಥಾನಾ ಯಕ ದಾಸಿನಿ ತ್ಯಲಾ ಶಾರ್ಕ ಬಗುನ್ ಹ್ಯೊ ಸಾಹಿತ್ ಯೇಸುಚೆ ಸಂಗ ಆಸ್‍ಲ್ಯಾಲಾ ಮನ್ಲಿ.

⁵⁷ ಫನ್ ಪೇತ್ರ, “ಮನಾ ತ್ಯಚಿ ವಳಕ್ ನಾಹಿಗ ಬಾಯಿ ಮನ್ಹುನ್ ಸಾಂಗ್ಲ.

⁵⁸ ಥೊಡ್ಯಾ ಯಳಾ ನಂತರ್ ಯಾಕಾ ಆಳಾನಿ ತ್ಯಲಾ ಬಗು‍ನ್, “ತು ದಿಕಿಲ್ ತ್ಯಂಚಾತ್ಲಾ ಯೊಕ್ ಮನ್ಲಾ ತವಾ ಪೇತ್ರ, “ನವ್ಹ” ಮನ್ಲಾ.

⁵⁹ ಖುಬ್ ಥೊಡಾ ಯಕಾ ತಾಸಾ ನಂತರ್ ಆನಿಯಕ್ಲಾ, “ಖರ‍್ಯಾನಿಸ್ ಹ್ಯೊ ದಿಖಿಲ್ ತ್ಯಚಿ ಸಂಗ ಆಸ್‍ಲ್ಯಾಲಾಸ್ ಹ್ಯೊ ಗಲಿಲಾಯಾತ್ಲಾಸ್” ಮನ್ಹು‍ನ್ ಖಾತ್ರಿನಿ ಮನ್ಲಾ.

⁶⁰ ಫನ್ ಪೇತ್ರ, “ತು ಸಾಂಗ್‍ತ್ಯಾಲ ಕ್ಯಾತ್ಯ ಮನಾ ಠಾವಸ್ ನಾಹಿ” ಮನ್ಲಾ ತ್ಯೊ ಹ್ಯೊ ಸಬೊತ್ ಬೊಲ್ತಾ ಆಸ್ಥಾನಾ ಕೊಂಬ್ಡಾ ಬವಾಲಾ.

⁶¹ ಪ್ರಭುನಿ ಮಾಗಾರಾ ಪರ್ತುನ್ ಪೇತ್ರಾಕ್ಡ ನದಾರ್ ಕಿಲಿ ತವಾ ಪೇತ್ರಾ, “ಆಜ಼್ ರ‍್ಯಾಚಾ಼ ಕೊಂಬ್ಡಾ ಬವಾಚೆ ಆಂದಿ ತೀನ್ ಖೆಪಾ ಮಾಜೆ ಯಸಿ ತ್ಯೊ ಮನಾ ಠಾವಾ ನಾಹಿ ಮನ್ಹುನ್ ಸಾಂಗ್ಸಿಲ್” ಮನ್ಹುನ್ ಪ್ರಭುನಿ ಸಾಂಗ್‍ಲ್ಯಾಲಾ ಸಬೊತ್ ಯವುಜು಼ನ್

⁶² ಬಾಹಿರ್ ಜಾ಼ವುನ್ ಮೊಟ್ಯಾ ದುಖಾನಿ ರಡ್ಲಾ.

ಯೇಸುಚಿ ನಿಂದಾ ಕೆಲ್ಯಾಲಿ ಆನಿ ಮ್ಯಾರ್ಲ್ಯಾಲಾ

⁶³ ಮಂಗ್ ಯೇಸುಲಾ ರ‍್ಯಾಕ್‌ತ್ಯಾಲ ತ್ಯಚಿ ಮಸ್ಕರಿ ಕರೀತ.

⁶⁴ ತ್ಯಚ಼ ಡೊಳ ಬಾಂದುನ್ ಮಾರುನ್ “ತುಲಾ ಮ್ಯಾರ್ಲ್ಯಾಲ ಕುನಿ ತ್ಯ ಸಾಂಗ್? ಮನ್ಹುನ್ ತ್ಯಲಾ ಇಚಾರ್ಲ.

⁶⁵ ತ್ಯಲಾ ಆಜು಼ನ್ ಖುಬ್ ಬಾದ್ ಸಬಾತ್ ಬುಲುನ್ ತ್ಯಂಚಾನಿ ತ್ಯಚಿ ನಿಂದಾ ಕಿಲಿ.

ಯೇಸುಲಾ ಜಾಂತ್ಯಾಂಚೆ ಮೊರ‍್ಹ ಹಾಕಟ್‌ಲ್ಯಾಲಾ

⁶⁶ ದಿಸ್ರೆ ದಿಸಿ ಉಜಾ಼ಡಲ್ಯಾ ನಂತರ್ ಯೆಹುದ್ಯಾಂಚ಼ ಮುಖ್ಯ ಯಾಜಕ್, ಕ್ಯಾಯ್ದದಾರ್, ಜಾಂತ ಜ಼ಮುನ್ ತ್ಯಲಾ ಆಪ್ಲೆ ನ್ಯಾಯಿ ಕರ್ತ್ಯಾಲೆ ಸಭೆತ್ ಆನುನ್ ತ್ಯಂಚೆ ಮೊರ‍್ಹ ಉಬಾ ಕೆಲಾ.

⁶⁷ “ತು ಕ್ರಿಸ್ತ ಆಸ್ಲಾಸ್ತ ಆಮಾನಾ ಸಾಂಗ್” ಮನ್ಲ ತ್ಯೊ ತ್ಯನಾ, ಮಿ ತುಮಾನಾ ಸಾಂಗ್ಲಕಿ ತುಮಿ ಖರ ದರ‍್ನಾರ್ ನಾಹಿಸಾ.

⁶⁸ ಮಿ ತುಮಾನಾ ಕಾಯ್ತರಿ ಇಚಾರ್ಲತ ತುಮಿ ಉತ್ತರ್ ದಿಯಿತ್ ನಾಹಿಸಾ.

⁶⁹ ಫನ್ ಆತಾಚಾನ್ ಮಾನ್ಸಾಚಾ಼ ಲ್ಯೊಕ್ ಸರ್ವಶಕ್ತ ಜಾ಼ಲ್ಯಾಲ್ಯಾ ದೇವಾಚೆ ಉಜ಼ವ್ಯಾಂಗ್ನಿ ಬಸ್ನಾರ್ ಮನ್ಹುನ್ ಸಾಂಗ್ಲ.

⁷⁰ ತವಾ ಸಗ್ಳಿ, “ತಸ ಜಾ಼ಲ್ಯಾ ತು ದೇವಾಚಾ಼ ಲ್ಯೊಕ್ ಕ್ಯಾ? ಮನ್ಹುನ್ ಇಚಾರ್ಲ್ಯಾಲ್ಯಾಲಾ ತ್ಯನಿ ತ್ಯನಾ, “ಮಿ ತ್ಯೊಸ್ ಮನ್ಹುನ್ ತುಮಿಸ್ ಸಾಂಗ್ತಾಸಾ” ಮನ್ಹುನ್ ಸಾಂಗ್ಲ.

⁷¹ ತವಾ ತೇ, “ಆಮಾನಾ ಆನಿ ಸಾಕ್ಶಿ ಕಶಾಲಾ ವ್ಹಯಿ ಆಮಿಸ್ ಹ್ಯಚಾ ತೊಂಡಾನಿ ಐಕ್‍ಲ್ಯಾ ನವ್ಹ” ಮನ್ಲ.