लूका 17 - ದೆವಾಚಿ ಖರಿ ಕಬರ್ ನವಾ ಕರಾರ್

ಪಾಪ್

¹ ಯೇಸು ಆಪ್‌ಲ್ಯಾ ಶಿಶಾನಾ ಮನ್ಲಾ, “ಲೊಕ ಪಾಪ ಕರಾಚಾ ಸಂಗತಿ ಯಯಾಚಾ ಹಾತಾ ಫನ್ ಹ್ಯಾ ಯತ್ಯಾಲ್ಯಾ ಗುಶ್ಟಿ ನಾಹಿತ ಹ್ಯಾ ಗುಶ್ಟಿನಾ ಕಾರನ್ ಜಾ಼ಲ್ಯಾಲ್ಯಾ ಮಾನ್ಸಾಚಿ ಗತ್ ಚಾ಼ಂಗ್ಲಿ ರಾಹಿತ್ನಾಹಿ?

² ತ್ಯೊ ಹ್ಯಾ ಬ್ಯಾರ್ಕ್ಯಾತ್‍ಲ್ಯಾ ಯಕಾಲಾ ಪಾಪಾತ್ ಪಾಡಾಚೆ ವಾಟ್ನಿಚ಼ ತ್ಯಚಾ ಗಳ್ಯಾತ್ ಜಾ಼ತ್ಯಾಚಾ಼ ದೊಂಢಾ ಬಾಂದುನ್ ಸಮಿಂದೊರಾತ್ ಟಾಕುನ್ ದಿಯಾಚ಼ ಬರ.

³ ತುಮ್ಚೆ ಗುಶ್ಟಿತ್ ಸಂಬಾಳುನ್ ರಾವ್ಹಾ! ತುಜಾ ಬಾವ್ಹಾನಿ ಚು಼ಕ್ ಕಿಲಿತರ್ ತ್ಯಲಾ ದಪ್‌ಕ್ಯಾವ್. ತ್ಯೊ ಚು಼ಕ್ ವಪುನ್ ಆಲಾತ ತ್ಯಚಿ ಚು಼ಕ್ ಮಾಪ್ ಕರುನ್ ಶೊಡ್.

⁴ ತ್ಯನಿ ದಿಸಾಲಾ ಸಾತ್ ಖೆಪಾ ತುಜೆ ಆಡ್ವಾ ಚು಼ಕ್ ಕರುನ್ ಸಾತ್ ಖೆಪಾಬಿ ತುಜಿ಼ಕ್ಡ ಪರ್ತುನ್ ಮಾಜಿ ಚು಼ಕ್ ಜಾ಼ಲಿ ಮಾಪ್ಕರ್ ಮನ್ಹುನ್ ಸಾಂಗ್ಲತ ತ್ಯಲಾ ಮಾಪ್ ಕರ್ ಮನ್ಲಾ.

ಇಸ್ವಾಸ್

⁵ ಅಪೊಸ್ತಲಾಂಚಾನಿ ಪ್ರಭುಲಾ, “ಆಮಚಾ಼ ಇಸ್ವಾಸ್ ವಾಡಿವ್” ಮನ್ಹುನ್ ಸಾಂಗ್ಲ.

⁶ ತವಾ ಪ್ರಭುನಿ, “ಮೌರ‍್ಹಿ ಇತ್ಕಾ ಇಸ್ವಾಸ್ ತುಮಾನಾ ರಾಯ್‍ಲ್ಯಾವ ತುಮಿ ಹ್ಯಾ ಹುಂಬ್ರಾಚಾ ಜಾ಼ಢಾಲಾ, ‘ತು ಮುಳಾ ಸಾಹಿತ್ ಉಪ್ಟುನ್ ಜಾ಼ವುನ್ ಸಮಿಂದೊರಾತ್ ಉಬ ರ‍್ಹಾ ಮನ್ಹುನ್ ಸಾಂಗ್‍ಲ್ಯಾವಬಿ ತ್ಯ ತುಮಚಾ಼ ಸಬೊತ್ ಐಕ್ನಾರ್

ಯಕಾ ಆಳಾಚ಼ ಕಾಮ್

⁷ ತುಮ್ಚಾತ್ ಕಚಾಲಾ ತರಿ ಶಾತ್ ನಾಂಗರ‍್ನಾರಾ ನಾಹಿತ ಬಕ್ರಿ ವಳ್‍ತ್ಯಲಾ ಆಳ್ ಆಸ್‍ಲ್ಯಾವ ತ್ಯೊ ಸೆತಾತ್ನಿ ಗರ‍್ಹಾತ್ ಅಲ್ಯಾಲ್ಯಾ ತ್ಯಾ ಆಳಾಲಾ, ‘ತು ಪಾಟ್ನಿ ಯವುನ್ ಖಾಯಾ ಬಸ್ ಮನ್ಹುನ್ ಸಾಂಗಿಲ್ ಕ್ಯಾ?

⁸ ನಾಹಿ! ತಸ ಸಾಂಗಾಚ಼ ಸುಡುನ್, ‘ತು ಮನಾ ಜೆವ್ನಾಲಾ ಕಾಯ್ತರಿ ತಯಾರ್‍ ಕರ್ ಮಿ ಖಾವುನ್ ಪಿವುನ್ ವ್ಹಯಿಸ್ ಪರ‍್ಯಾತ್ ಮಾಜಿ ಚಾ಼ಕ್ರಿ ಕರ್ ಮಂಗ್ ತು ಖಾ ಪಿ’ ಮನ್ಹುನ್ ಸಾಂಗ್ನಾರ್ ನವ್ಹ.

⁹ ಆಪ್ನು ಸಾಂಗ್‌ಲ್ಯಾ ಶಾರ್ಕ ಕೆಲ್ಯಾಲ್ಯಾ ತ್ಯಾ ಆಳಾಲಾ ತುಜಿಪ್ನಿ ಮಜ಼ತ್ ಜಾ಼ಲಿ ಮನ್ಹುನ್ ಸಾಂಗಿಲ್ ಕ್ಯಾ?

¹⁰ ತುಮಿ ತುಮಾನಾ ಸಾಂಗ್‍ಲ್ಯಾಲ ಸಗ್ಳ ಕೆಲ್ಯಾ ನಂತರ್ ಆಮಿ ಸಾದರನ್ ಆಳ್, ಕರಾ ವ್ಹಯಿ ಆಸ್‍ಲ್ಯಾಲಸ್ ಕೆಲ್ಯಾ ಮನ್ಹಾ” ಮನ್ಹುನ್ ಸಾಂಗ್ಲ.

ಯೇಸುನಿ ಧಾ ಜ಼ನಾನಾ ಬರ ಕೆಲ್ಯಾಲ

¹¹ ಯೇಸು ಯೆರುಸಲೇಮಿತ್ ಜಾ಼ತ್ಯಾಲಾ ಆಸ್ಥಾನಾ ಸಮಾರ‍್ಯ ಗಲಿಲಾಯ್ ಸಿಮಂಚೆ ಮದ್ನಿ ಗೆಲಾ.

¹² ಯಕಾ ಖೆಡ್ಯಾ ಗಾವಾತ್ ಆಲಾ ತವಾ ಧಾ ಜಾ಼ನ್ ಕುಶ್ಟ ರೊಗಿ ತ್ಯಚೆ ಮೊರ‍್ಹ ಯವುನ್ ದುರ್ ಉಬರಾಹುನ್,

¹³ “ಯೇಸು! ಪ್ರಭು! ಆಮ್ಚಿವ ಕರ್ನಾ ಥೆವ್” ಮನ್ಹುನ್ ವರ್ಡುನ್ ಸಾಂಗ್ಲ.

¹⁴ ಯೇಸುನಿ ತ್ಯನಾ ಬಗುನ್, “ತುಮಿ ಜಾ಼ವುನ್ ತುಮ್ಚಾ ಯಾಜಕಾಲಾ ಆಂಗ್ ದಾವಾ” ಮನ್ಹುನ್ ಸಾಂಗ್ಲ. ತೇ ಜಾ಼ತಾನಾಸ್ ಬರ ಜಾ಼ಲ.

¹⁵ ತ್ಯಾತ್‍ಲ್ಯಾ ಯಕಾನಿ ಆಪ್‌ಲ್ಯಾಲಾ ಬರ ಜಾ಼ಲ್ಯಾಲ ಬಗುನ್ ಮೊಟ್ಯಾನಿ ದೇವಾಲಾ ವವ್ಯಾಳಿತ್ ಮಾಗಾರಾ ಆಲಾ

¹⁶ ಆನಿ ತ್ಯೊ ಯೇಸುಚಾ ಪಾಯಾತ್ ಪಡುನ್ ತ್ಯಲಾ ಉಪ್ಕಾರ್ ಸಾಂಗ್ಲಾ ತ್ಯೊ ಸಮಾರ‍್ಯಾತ್ಲಾ.

¹⁷ ಯೇಸುನಿ ಹ್ಯ ಬಗುನ್, “ಧಾ ಜಾ಼ನ್ಬಿ ಬರ ಜಾ಼ಲ್ಥ ನವ್ಹ? ಆನಿ ರಾಯ್‍ಲ್ಯಾಲ ನವುಜಾ಼ನ್ ಕುಠ?

¹⁸ ಪ್ರಭುಲಾ ವವ್ಯಾಳಾಲಾ ಹ್ಯೊ ದುಸ್ರೆ ದೆಶಾತ್ಲಾ ಸುಡುನ್ ಆನಿ ಕಚಾ಼ಸ್ ಮಾಗಾರಾ ಪರ್ತುನ್ ಆಲಾ ನಾಹಿ ಕ್ಯಾ?

¹⁹ ಮನ್ಹು‍ನ್ ಸಾಂಗುನ್ ತ್ಯಲಾ, “ಉಠುನ್ ಜಾ಼ ತುಜಾ ಇಸ್ವಾಸಾನಿ ತುಲಾ ಬರ ಕೆಲ್ಯಾ ಮನ್ಹುನ್ ಸಾಂಗ್ಲ.

ದೇವಾಚಾ ರಾಜಾಚ಼ ಯನ

²⁰ ಯಕಸಿ ಥೊಡ್ಯಾ ಫರಿಸಾಯಂಚಾನಿ ಯೇಸುಲಾ, “ದೇವಾಚ಼ ರಾಜೆ ಕವಾ ಯನಾರ್” ಮನ್ಹುನ್ ಇಚಾರ್ಲ ತವಾ ತ್ಯೊ ತ್ಯನಾ, “ದೇವಾಚ಼ ರಾಜೆ ಯತ್ಯಾಲ ಧ್ಯಾನ್ತಿವುನ್ ಕುನಾಲಾ ವಳ್ಕಾಯಾ ವ್ಹಯಿತ್ ನಾಹಿ,

²¹ “ಹಾಬ ಹಿತ್ತ ಹಾ, ಥಬ ತಿಥ ಹಾ, ಮನ್ಹುನ್ ಸಾಂಗಾಯಾ ವ್ಹಯಿತ್ ನಾಹಿ; ದೇವಾಚ಼ ರಾಜೆ ತುಮ್ಚಿಪಸ್ ಹಾ ಮನ್ಹುನ್ ಸಮಜು಼ನ್ ಗೆವ್ಹಾ” ಮನ್ಹುನ್ ಉತ್ತರ್ ದಿಲಾ.

²² ಆನಿ ತ್ಯನಿ ಆಪ್‌ಲ್ಯಾ ಶಿಶಾನಾ ಕ್ಯಾ ಸಾಂಗ್ಲ ಮಂಜೆ, “ಯೊಕ್ ಟಾಯಿಮ್ ಯನಾರ್ ತ್ಯಾತ್ ತುಮಿ ಮಾನ್ಸಾಚಾ ಲೇಕಾಚಾ ದಿಸಾತ್ ಯೊಕ್ ದಿಸ್ ಬಗಾಯಾ ವ್ಹಯಿ ಮನ್ಹುನ್ ಆಶಾ ಕಿಲಿಸಾ ತರಿ ತ್ಯೊ ಬಗಾಚೆ ಆಂದಿ ರಾಸಿಲಾ.

²³ ಲೊಕಾಂಚಾನಿ ತುಮಾನಾ, ‘ಥಬೊ, ತಿಥ ಹಾ, ಹಬೊ ಹಿತ್ತ ಹಾ!’ ಮನ್ಹುನ್ ಸಾಂಗ್ಲ ತರ್ ತುಮಿ ಜಾ಼ವು ನಕೊಸಾ.

²⁴ ಕಾ ಮಂಜೆ ಅಬ್ಳಾತ್ ಚ಼ಕ್ಮಕ್‍ತ್ಯಾಲೆ ಇಜ಼ಚೆಗತ್ ಹಾ ತೀ ಯವುನ್ ಯಕಿಕ್ನಿ ಆನಿ ಯಕಿಕ್ಡ ಕಸಾ ಉಜಿಡ್ ದಿಸ್ತೊ ತಸಾಸ್ ಮಾನ್ಸಾಚಾ಼ ಲ್ಯೊಕ್ ಮಿ ಯತಾನಾ ತುಮಾನಾ ಸಮಾಜ್ನಾ಼ರ್.

²⁵ ಫನ್ ಆಂದಿ ತ್ಯನಿ ಖುಬ್ ಯಾಪ್ ಖಾವುನ್ ಹೆ ಪಿಳ್ಗಿಚಾ ಲೊಕಾಂಚಿಪ್ನಿ ನಾಖರುನ್ ಗಿಹ್ಯಾ ವ್ಹಯಿ.

²⁶ ನೊಹಾಚಾ ದಿಸಾತ್ ಜಾ಼ಲ್ಯಾ ಶಾರ್ಕ ಮಾನ್ಸಾಚಾ ಲೇಕಾಚಾ ದಿಸಾತ್ಬಿ ಚಾ಼ಲ್ನಾರ್.

²⁷ ನೊಹಾ ವ್ಹಡಿತ್ ಗೆಲ್ಯಾಲ್ಯಾ ದಿಸಾ ಪರ‍್ಯಾತ್ ಲೊಕ ಖಾಯಿತಿತ, ಪಿಯಿತಿತ, ಲಗ್ನ ಕರುನ್ ದಿಯಿತಿತ, ತವಾ ಪ್ರಳಯ್ ಯವುನ್ ಸಗ್‌ಳ್ಯಾಂಚಾ಼ ನಾಸ್ ಕೆಲಾ.

²⁸ ಆನಿ ಲೊಟಾಚಾ ದಿಸಾತ್ ಆಸಸ್‍ ಹುತ ತಿ ಲೊಕ ಖಾಯಿತ್, ಪಿಯಿತ್ ಹುತ್ತಿತ, ನಿಹಿತಿತ, ಇಕಿತಿತ, ಪಿರಿತಿತ, ಗರ‍್ಹ ಬಾಂದಿತಿತ,

²⁹ ಫನ್ ಲೊಟಾ ಸೊದೊಮ್ ಗಾವ್ ಸುಡುನ್ ಗೆಲ್ಯಾಲ್ಯಾ ದಿಸಾದಿಸಿ ಆಬ್ಳಾತ್ನಿ ಇಸ್ತು ಆನಿ ಇಂಗಾಳ್ ಪಡುನ್ ತ್ಯನಾ ಸಗ್‍ಳ್ಯಾನಾ ನಾಸ್ ಕೆಲಾ.

³⁰ ಮಾನ್ಸಾಚಾ಼ ಲ್ಯೊಕ್ ಯತ್ಯಾಲ್ಯಾ ದಿಸಾತ್ ತಸಸ್ ವ್ಹನಾರ್.

³¹ ತ್ಯಾ ದಿಸಾತ್ ಮಾಳಿವ ಆಸ್‍ಲ್ಯಾಲಾ ಆಪ್ಲಾ ದಾಗಿನಾ ಗಿಹ್ಯಾ ಉತ್ರುನ್ ಯವು ನಾಹಿ; ತಸಸ್ ಸೆತಾತ್ ಆಸ್‍ಲ್ಯಾಲಾ ಸಾಹಿತ್ ಪರ್ತುನ್ ಗರ‍್ಹಾತ್ ಮಾಗಾರಾ ಜಾ಼ವು ನಾಹಿ.

³² ದೇವಾನಿ ಶಿಕ್ಶೆ ದಿಲ್ಯಾಲೆ ಲೊಟಾಚೆ ಬ್ಯಾಯ್ಕೊಚಿ ಯಾದ್ ಕರಾ

³³ ಆಪ್ಲಾ ಜೀವ್ ಉರ್ವಾ ವ್ಹಯಿ ಮನ್‍ಲ್ಯಾಲಾ ಜೀವ್ ಸಾಂಡುನ್ ಗೆನಾರ್; ಆನಿ ಜೀವ್ ಸಾಂಡುನ್ ಗೆತಲ್ಯಾಲ್ಯಾನಿ ಜೀವ್ ರಾಖುನ್ ಗೆನಾರ್.

³⁴ “ತೇ ರಾತಿತ್ ಯಕಾ ಪಲಂಗಾವ ದೊಗ ರಾನ್ಹಾರ್; ತ್ಯಾತ್‌ಲ್ಯಾ ಯಕಾಲಾ ನೆನ್ಹಾರ್ ಆನಿ ಯಕಾಲಾ ತಿಥಸ್ ಥೆವ್ನಾರ್

³⁵ ದುಗಿ ಬ್ಯಾಯ್ಕಾ ಯಕಾಸ್ ಜಾ಼ತ್ಯಾವ ದಳ್ನಾರ್; ಯಕಿ ಲಾ ನೇನ್ಹಾರ್ ಆನಿ ಯಕಿಲಾ ಸುಡುನ್ ಜಾ಼ನಾರ್ ಮನ್ಲಾ.

³⁶

³⁷ ಹ್ಯಾ ಸಬ್ದಾಲಾ ಶಿಶಾಂಚಾನಿ, “ಪ್ರಭು ತ್ಯ ಕುಠ ವ್ಹನಾರ್ ಮನ್ಹು‍ನ್ ಇಚಾರ್ಲ ತ್ಯಲಾ ಯೇಸುನಿ ತ್ಯನಾ ಮಡ ಕುಠ ತಿಥ ಗಿದ್ಡ ಜ಼ಮತ್ಯಾತ ಮನ್ಹುನ್ ಉತ್ತರ್ ದಿಲಾ.