लूका 1 - ದೆವಾಚಿ ಖರಿ ಕಬರ್ ನವಾ ಕರಾರ್

¹ ಮಾಯೆಚಾ ಥೆಯೊಪಿಲಾ, ಆಮ್ಚೆ ಮದ್ದಿ ಚಾ಼ಲ್ಯಾಲಿ ಕಾಮ ಸಾಂಗಾಯಾಸಾಟಿ ಖುಬ್ ಜ಼ನಾಂಚಾನಿ ಖಟ್ಪಟ್ ಕಿಲಿ.

² ಮುಳಾದರ‍್ನಿ ಹಿ ಕಾಮ ಡೊಳ್ಯಾನಿ ಬಗುನ್ ದೇವಾಚಿ ಖಬರ್ ಸಾಂಗ್ಲೆ ಮನ್ಹುನ್ ಆಮಿ ಐಕ್‌ಲ್ಯಾಲ್ಯಾ ಗುಶ್ಟಿಸ್ ತ್ಯಂಚಾನಿ ಲಿವ್‌ಲ್ಯಾತಾ.

³ ಪರ್ತೆಕ್ ಯೇಕ್ ಖಬರ್ ಮಿ ಮುಳಾದರ‍್ನಿ ಧ್ಯಾನ್‌ಥಿವುನ್ ವಾಚಿವ್‌ಲ್ಯಾಲೆಸಾಟಿ ತ್ಯ ಸಗ್ಳ ತುಲಾ ಶಾರ್ಕ ಸಮಜಾ಼ಯಾ ಪುಸ್ತಕಾಚೆಗತ್ ಲಿವ್ಲ.

⁴ ತುಲಾ ಸಾಂಗ್‌ಲ್ಯಾಲ್ಯಾ ಗುಶ್ಟಿ ಖರ‍್ಯಾ ಮನ್ಹುನ್ ಹ್ಯನಿ ತುಲಾ ಚಾ಼ಂಗ್ಲ ಸಮಜ಼ಲ್.

ಬಾಪ್ತಿಸ್ಮಾ ಯೊಹಾನಾಚಾ ಜ಼ಲಾಮ್‌ನ್ಯಾಚಿ ಖಬರ್ ಸಾಂಗ್ಲಿ

⁵ ಯುದಾಯಾಚಾ಼ ರಾಜಾ಼ ಹೆರೊದ್ ಹ್ಯಚಾ ಕಾಲಾತ್ ಅಬಿಯಚಾ ವರ್ಗತ್ಲಾ ಜಕರಿಯಾ ನಾವಾಚಾ಼ ಯೊಕ್ ಯಾಜಕ್ ಹುತ್ತಾ. ತ್ಯಚಿ ದನ್ಗರ್ ಆರೊನ್ ಯಾಜಕಾಚಾ ಗರ‍್ಹಾನ್ಯಾಚಿ. ತಿಚ಼ ನಾವ್ ಎಲಿಜಬೆತ್.

⁶ ಜಕರಿಯಾ ಆನಿ ಎಲಿಜಬೆತ್ ಖರ‍್ಯಾನಿ ದೇವಾಚೆ ನದ್ರಲಾ ಚಾ಼ಂಗ್ಲಿ ಹುತ್ತಿತ. ಪ್ರಭುಚಾ ಸಗ್‌ಳ್ಯಾ ಆಜ್ಞಾ ಚು಼ಕಾಚೆಆಂದಿ ಪಾಳಿತಿತ ಆನಿ ತೀ ಚು಼ಕ್ ನಸ್ನಾರಿ ಹುತ್ತಿತ.

⁷ ಫನ್ ತ್ಯನಾದೊಗಾನಾ ಪ್ಯುರ್ಗಿನವ್ಥಿತ; ಕಾ ಮಂಜೆ ಎಲಿಜಬೆತ್ ವಾಂಜೊಳಿ ಹುತ್ತಿ; ಆನಿ ತ್ಯಾ ದೊಗಾನಾಬಿ ವಯಾಜಾ಼ಲಿಹುತ್ತಿ.

⁸ ಯಕಸಿ ಜಕರಿಯಾಚಿ ಪಾಳಿ ಆಲಿ ತವಾ, ತ್ಯೊ ದೇವ್ಳಾತ್ ದೇವಾಚೆ ಮೊರ‍್ಹ ‍ಯಾಜಕಾಚ಼ ಕಾಮ್ ಕರೀತಾ.

⁹ ಯಾಜಕಾಂಚಾನಿ ಧುಪ್ ಗಾಲಾಯಾ ಆಪ್ಲೆ ಚಾ಼ಲಿಚೆಗತ್ ಚಿಟ್‌ ಗಾಲ್ಹುನ್ ಯಕಾ ಯಾಜಕಾಲಾ ನಿವ್ಡಿತಿತ. ಜಕರಿಯಾಲಾ ಯಾಜಕಾಂಚೆ ಪದ್ದತಿಚೆಗತ್ ಜಕರಿಯಾಲಾ ದೇವ್ಳಾತ್ ಧುಪ್ ಗಾಲಾಯಾ ಚೀಟಿ ಗಾಲ್ಹುನ್ ನಿವಡ್ಲಾ.

¹⁰ ಜಕರಿಯಾ ಧುಪ್ ಗ್ಯಾಲ್‌ಥ್ಯಾಲ್ಯಾ ಯಳಲಾ ಲೊಕ ಸಗ್ಳಿ ಬಾಹಿರ್ ಉಬಿರಾಹುನ್ ದೇವಾಪ ಮಾಗ್ನ ಕರಿತಿತ.

¹¹ ತವಾ, ದೇವಾಚಾ಼ ಧುತ್ ಯೊಕ್ ಯವುನ್ ದುಪಾರ್ತಿಚೆ ಉಜ಼ವ್ಯಾಂಗ್ನಿ ಉಬಾರಾಯ್‌ಲ್ಯಾಲಾ ತ್ಯಲಾ ದಿಸ್ಲಾ.

¹² ತವಾ ಜಕರಿಯಾ ತ್ಯಲಾ ಬಗುನ್ ಬಿಹುನ್ ಕ್ಯಾಪ್ರ ಬರ್ಲ.

¹³ ಫನ್ ತ್ಯಾ ಧುತಾನಿ ತ್ಯಲಾ “ಜಕರಿಯಾ ಬಿಹುನಕೊ; ತುಜ಼ ಮಾಗ್ನ ದೇವಾಲಾ ಐಕು ಆಲ್ಯಾ ತುಜಿ ದನ್ಗರ್ ಎಲಿಜ಼ಬೆತ್ ತಿಲಾ ಯೊಕ್ ಪ್ಯೊರ್ಗಾ ಜ಼ಲಾಮ್ನಾರ್. ತು ತ್ಯಲಾ ಯೊಹಾನ್ ಮನ್ಹುನ್ ನಾವ್ ಥೇವಾಯಾಹ್ವಯಿ.

¹⁴ ತ್ಯೊ ಜ಼ಲಾಮ್ಲಾ ಮನ್ಹುನ್ ತುಲಾ ಖುಬ್ ಹೌಸ್ ಉಲ್ಲಾಸ್ ವ್ಹಯಿಲ್; ಆನಿ ಖುಬ್ ಲೊಕಾನಾ ಆಂನದ್ ವ್ಹನಾರ್.

¹⁵ ದೇವಾಚೆ ನದ್ರಲಾ ಯೊಹಾನ್ ಮೊಟಾ ಮಾನುಸ್ ವ್ಹನಾರ್; ದರಾಕ್ಶಿಚಾ಼ ರಸ್ ನಾಹಿತ ನಿಶಾಚಾ಼ ರಸ್ ಪಿನಾರ್ ನಾಹಿ; ಯೊಹಾನ್ ಜ಼ಲಾಮ್‌ಲ್ಯಾ ದರ್ನ್ಹಿ ಪವಿತ್ರಾತ್ಮಾನಿ ಬರ‍್ಹುನ್ ರಾನ್ಹಾರ್.

¹⁶ “ಹ್ಯೊ ಇಸ್ರಾಯಲ್ ಪಿಳ್ಗಿತ್‌ಲ್ಯಾ ಖುಬ್ ಲೊಕಾನಾ ತ್ಯಂಚಾ಼ ದೇವ್ ಪರಮೇಶ್ವರಾಕ್ಡ ಪರತಾಯಾ ಮಜ಼ತ್ ಕರ್ನಾರ್

¹⁷ ತ್ಯೊ ದೇವಾಚಾ಼ ಫುಡಾರಿ ವ್ಹವುನ್ ಜಾ಼ವುನ್ ಪ್ರವಾದಿ ಜಾ಼ಲ್ಯಾಲ್ಯಾ ಯಲಿಯಾಚಾ ಆತ್‌ಮ್ಯಾನಿ ಆನಿ ಬಳಾನಿ ಬರ‍್ಹುನ್ ಬಾಸಂಚ಼ ಮನ್ ಪೊರಾಂಚಿಕ್ಡ. ಹಾಟ್ ದರ್ಲ್ಯಾಲ್ಯಾಲಾ ನಿತಿವಂತಾಂಚಾ ಗಿನ್ಯಾನಾಕ್ಡ ಪರ್ತುನ್ ತಯಾರ್ ಜಾ಼ಲ್ಯಾಲ್ಯಾ ಲೊಕಾನಾ ದೇವಾಕ್ಡ ನೇನಾರ್”

¹⁸ ಜಕರಿಯಾನಿ ದೇವ್ದುತಾಲಾ ಆಸ ಇಚಾರ್ಲ “ಹ್ಯ ಮಿ ಕಸ ಸಮಜು಼ನ್ ಗಿಹು? ಮಿ ಮಾಥಾರಾ; ಮಾಜಿ ದನ್ಗರ್ ವಯೆಜಾ಼ಲ್ಯಾಲಿ”

¹⁹ ದೇವ್ದುತಾನಿ, “ಮಾಜ಼ ನಾವ್ ಗಬ್ರಿಯಲ್. ಮಿ ದೇವಾಚೆ ಮೊರ‍್ಹ ಉಬಾರಾಥ್ಯಾಲಾ ದೇವಾನಿ ಹ್ಯೊ ಚಾ಼ಂಗ್ಲಾ ಸಮಾಚಾರ್ ತುಲಾ ಕಳ್ವಾಯಾಸಾಟಿ ಮನಾ ಲಾವುನ್ದಿಲ್ಯಾ.

²⁰ ಆತಾ ಐಕ್! ಹ್ಯೊ ಮಾಜಾ಼ ಸಬೋತ್ ಗಡ್ನಾರ್; ಖರ ತು ತ್ಯಚಿವ ಇಸ್ವಾಸ್ ಥೆವ್ಲಾನಾಹಿಸ್ ಮನ್ಹುನ್ ಮಿ ಸಾಂಗ್‌ಲ್ಯಾಲಾ ಸಬ್ದ ಗಢ ಪರ‍್ಯಾತ್ ಬೋಲಾಚೆಆಂದಿ ಮುಕ್ಕಾಹ್ವವುನ್ ರಾನ್ಹಾರ್” ಮನ್ಲಾ.

²¹ ಆನಿ ಹಿಕ್ಡ ಲೊಕ ಜಕರಿಯಾಚಿ ವಾಟ್ ಬಗಿತ್ ತ್ಯನಿ ದೇವ್ಳಾತ್ ಖುಬ್ ಯೊಳ್ ಕಾ ಕೆಲಾ ಮನ್ಹುನ್ ಗಾಭಾರ್ಲಿತ

²² ಮಂಗ್ ಜಕರಿಯಾ ದೇವ್ಳಾತ್ನಿ ಬಾಹಿರ್ ಆಲಾ ತವಾ ತ್ಯಂಚಿ ಸಂಗ ಕಾಯ್ ಬೊಲಾಚೆಆಂದಿ ರಾಯ್ಲಾ ತವಾಚಾನ್ ತ್ಯೊ ತ್ಯನಾ ಹಾತಾನಿ ಖುನಾ ಕರೀತ್ ಮುಕ್ಕಾಹ್ವವುನ್ ಹುತ್ತಾ. ತವಾ ಲೊಕಾಂಚಾನಿ ತ್ಯಲಾ ಕಾಯ್ ತರಿ ದರ್ಶಾನ್ ಜಾ಼ಲ ಆಸಲ್ ಮನ್ಹುನ್ ಸಮಜು಼ನ್ ಗೆತ್ಲ.

²³ ಕವಾ ಆಪ್ಲೆ ಯಾಜಕಾಚೆ ಪಾಳಿಚ಼ ದಿಸ್ ಸರ್ಲ ತವಾ ಜಕರಿಯಾ ಆಪ್‌ಲ್ಯಾ ಗರ‍್ಹಾತ್ ಮಾಗಾರಾ ಗೆಲಾ.

²⁴ ತೆ ದಿಸ್ ಜಾ಼ಲ್ಯಾ ನಂತರ್ ತ್ಯಚಿ ದನ್ಗರ್ ಎಲಿಜಬೆತ್ ಗರ್ವಾರ್ ರಾಹುನ್ ಪಾಚ಼್ ಮೈನ್ಹ ಗರ‍್ಹಾತ್ನಿ ಬಾಹಿರ್ ಆಲಿನಾಹಿ.

²⁵ ಆನಿ ಎಲಿಜ಼ಬೆತ್, “ಬಗಾ, ದೇವಾನಿ ಮಾಜಿಸಾಟಿ ಕ್ಯವ್ಡ ಮೊಟ ಕಾಮ್ ಕೆಲ್ಯಾ! ಹೆ ದುನೆತ್ ಮನಾ ಆಸ್‌ಲ್ಯಾಲಾ ಆವ್ಮಾನ್ ದುರ್” ಕೆಲಾ ಮನ್ಲಿ.

ಯೇಸು ಕ್ರಿಸ್ತಾಚಾ಼ ಜ಼ಲ್ಮ ದೇವ್‌ ದುತಾಂಚಾನಿ ಆಂದಿಸ್ ಸಾಂಗ್‌ಲ್ಯಾಲ

²⁶ ಎಲಿಜಬೆತ್ ಸಾ ಮೈನ್ಯಾಚಿ ಗರ್ವಾರ್ ಆಸ್ಥಾನಾ ದೇವಾನಿ ಗಬ್ರಿಯಲ್ ಮಂಥ್ಯಾಲ್ಯಾ ಆಪ್‌ಲ್ಯಾ ಧುತಾಲಾ ಗಲಿಲಾಯಾ ಸಿಮೆಚೆ ನಜ಼ರೇತ್ ಮಂಥ್ಯಾಲ್ಯಾ ಗಾವಾತ್ ಯಕ ಕನ್ಯಾಪ ಲಾವುನ್ ದಿಲಾ;

²⁷ ತೆ ಕನೆಚ಼ ನಾವ್ ಮರಿಯಾ; ತಿಚಿ ರಾಜಾ಼ ಜಾ಼ಲ್ಯಾಲ್ಯಾ ದಾವಿದಾಚಾ ಗರ‍್ಹಾನ್ಯಾಚಾ಼ ಯೊಸೆಪ್ ಮಂಥ್ಯಾಲ್ಯಾ ಪ್ಯೊರ್ಗ್ಯಾ ಸಂಗ ಸಾಕಾರ್ಸಾಡಿ ಜಾ಼ಲ್ಥಿ.

²⁸ ತ್ಯೊ ದುತ್ ತೀಚಿಪ ಯವುನ್ “ದೇವಾಚಿ ದಯೆ ಆಸ್ನಾರೆ, ತುಲಾ ಬರ ವ್ಹವುನಿ! ದೇವ್ ತುಜೆ ಸಂಗ ಹಾ” ಮನ್ಲಾ.

²⁹ ದೇವ್‌ದುತಾಚಾ಼ ಸಬ್ದ ಐಕುನ್ ಗಾಬ್ರುನ್ ಮರಿಯಾ “ಹ್ಯಚಾ಼ ಆರ್ಥ ಕ್ಯಾ ಆಸಲ್? ಮನ್ಹುನ್ ಯವ್ಜಿತಿ.

³⁰ ಪರತ್ ದೇವ್ದುತ್ ತಿಲಾ ಮನ್ಲಾ “ಮರಿಯಾ, ಬಿಹುನಕೊಸ್; ದೇವಾನಿ ತುಜಿವ ಖುಬ್ ಕ್ರುಪಾ ಕಿಲಿ. ”

³¹ ಐಕ್! ಆತಾ ತು ಗರ್ವಾರ್ ರಾಹುನ್ ಯಕಾ ಲೇಕಾಲಾ ಜ಼ಲ್ಮ ದೇನಾರ್. ತ್ಯಲಾ, ‘ಯೇಸು’ ಮನ್ಹುನ್ ನಾವ್ ಥೆವಾಯಾ ವ್ಹಯಿ.

³² ತ್ಯೊ ಮೊಟಾ ಮಾನುಸ್‌ವ್ಹಯಿಲ್. ಆನಿ ಲೊಕ ತ್ಯಲಾ ಸಗ್‌ಳ್ಯಾತ್ ಥೊರ್‌ಲ್ಯಾ ದೇವಾಚಾ಼ ಲ್ಯೊಕ್ ಮಂಥಿಲ; ತ್ಯವ್ಡಸ್ ನವ್ಹ ದೇವ್‌ಜಾ಼ಲ್ಯಾಲಾ ಪ್ರಭು ತ್ಯಲಾ, ತ್ಯಚಾ಼ ಪೈಲಾ ವಡಿಲ್ ರಾಜಾ಼ ದಾವಿದಾಚಿ ಜಾಂತಿಕ್ ದಿಯಿಲ್.

³³ ತ್ಯೊ ಯಾಕೊಬಾಚಾ ಗರಾನ್ಯಾವ ಖಾಯಿಮ್ ಅಧಿಕಾರ್ ಚಾ಼ಲಿವ್ನಾರ್; ತ್ಯಚಾ಼ ರಾಜ್‌ಭಾರ್ ಕಂದಿಸ್ ಸಪ್ನಾರ್ನಾಹಿ ಮನ್ಹುನ್ ಸಾಂಗ್ಲ.

³⁴ ಮರಿಯಾ ದೇವ್ದುತಾಲಾ “ಹ್ಯ ಕಸ ವ್ಹಯಿಲ್? ಮಿ ಲಗಿನ್ ಜಾ಼ಲ್ಯಾಲಿ!” ನವ್ಹ ಮನ್ಲಿ

³⁵ ತವಾ ದೇವ್ದುತ್ ಮರಿಯಾಲಾ, “ತುಜಿವ ಪವಿತ್ರಾತ್ಮ ಯನಾರ್; ಪರ್ಮೇಶ್ವರಾಚಾ ಬಳಾಚ಼ ಸಾವುಟ್ ತುಜಿವ ಪಡ್ನಾರ್. ಮನ್ಹುನ್ ಜ಼ಲಾಮ್‌ತ್ಯಾಲ ತ್ಯ ಪವಿತ್ರ ಮುಲ್ ದೇವಾಚಾ಼ ಲ್ಯೊಕ್ ವ್ಹನಾರ್.

³⁶ ಆನಿ ತುಜೆ ಮಾಯೆಚಿ ಜಾ಼ಲ್ಯಾಲಿ ಎಲಿಜಬೆತ್ ಹಾ ನವ್ಹ. ತೀ ಸಾಹಿತ್ ಮಾಥಾರಿಜಾ಼ಲಿತರಿ ಗರ್ವಾರ್ ಹಾ; ತೀಚಾ ಪೊಟಾತ್ ಪ್ಯೊರ್ಗಾ ಹಾ; ಲೊಕಾಂಚಾನಿ ತಿಲಾ ಪೊರ ವ್ಹನಾರುಸ್ ನಾಹಿತ ಮನ್‌ಲ್ಯಾಲಿ ತೀ ಆತಾ ಸಾ ಮೈನ್ಯಾಚಿ ಗರ್ವಾರ್ ಹಾ.

³⁷ ಕಾ ಮಂಜೆ ದೇವಾಲಾ ವ್ಹಯಿತ್ನಾಹಿ ಆಸ ಕಚ಼ಸ್ ನಾಹಿ,”ಆನಿ ದೆವಾಪ್ನಿ ಆಲ್ಯಾಲಾ ಸಬ್ದ ಯೊಕ್ಬಿ ವಾಯಾ ಜಾ಼ಯಿತ್ನಾಹಿ ಮನ್ಲಾ.

³⁸ ತವಾ ಮರಿಯಾ “ಮಿ ಪ್ರಭುಚಿ ಚಾ಼ಕ್ರಿನ್. ತು ಸಾಂಗ್‌ಲ್ಯಾಶಾರ್ಕ ಮನಾ ವ್ಹವುನಿ!” ಮನ್ಲಿ. ಮಂಗ್ ದೇವ್ದುತ್ ತಿಚಿಪ್ನಿ ಗೆಲಾ.

ಮೆರಿನಿಸ ಎಲಿಜ಼ಬೆತಾಲಾ ಭೇಟ್ ದಿಲ್ಯಾಲಿ

³⁹ ತವಾಸ್ ಮರಿಯಾ ಉಠುನ್ ಗಡ್ಬಡಿನಿ ಗುಢ್ಯಾವ್ನಿ ಯಹುದಾತ್‌ಲ್ಯಾ ಯಕಾ ಗಾವಾತ್ ಜಾ಼ವುನ್,

⁴⁰ ತಿಥ ಜಕರಿಯಾಚಾ ಗರ‍್ಹಾತ್ ಯವುನ್ ಎಲಿಜ಼ಬೆತಾಲಾ ನಮಸ್ಕಾರ್ ಕೆಲಾ.

⁴¹ ಎಲಿಜ಼ಬೆತನಿ ಮರಿಯಾಲಾ ನಮಸ್ಕಾರ್ ಕೆಲಾ ತವಾಸ್ ತೀಚಾ ಪೊಟಾತ್‌ಲ್ಯಾ ಮುಲಾನಿ ಉಡಿ ಮ್ಯಾರ್ಲಿ. ಆನಿ ಎಲಿಜ಼ಬೆತ್ ಪವಿತ್ರಾತ್ಮಾನಿ ಬರುನ್ ಹುತ್ತಿ

⁴² ಆನಿ ಮೊಟ್ಯಾನಿ ಆಸಿ ಮನ್ಲಿ: “ಬ್ಯಾಯ್ಕಾಮಾನ್ಸಾಂಚೆಮದಿ’ ತು ದೇವಾವಾಪ್ನಿ ಖುಬ್ ಆಶಿರ್ವಾದ್ ಗೆತಲ್ಯಾಲಿ ಆನಿ ತುಲಾ ಜ಼ಲಾಮ್‌ತ್ಯಾಲ್ಯಾ ಮುಲಾಲಾಬಿ ದೇವಾನಿ ಆಶಿರ್ವಾದ್ ‌ಕೆಲ್ಯಾ.

⁴³ ಮಾಜಾ ಪ್ರಭುಚಿ ಆಯಿ ಮಾಜಿಪ ಯಯಾಚಿ ಮಾಜ಼ ಮೊಟ ನಸೀಬ್!

⁴⁴ ತುಜಾ಼ ನಮಸ್ಕಾರಾಚಾ಼ ಆವಾಜ಼್ ಮಾಜಾ ಕಾನಾವ ಪಡ್ತಾನಾಸ್ ಮುಲ್ ಮಾಜಾ ಪೊಟಾತ್ ಸಂತೊಶಾನಿ ಉಡಿ ಮ್ಯಾರ್ಲಿ.

⁴⁵ ಇಸ್ವಾಸ್ ಥೆವ್‌ಲ್ಯಾಲಿ ತು ಬರಿ ಪ್ರಭುನಿ ತುಲಾ ಸಾಂಗ್‌ಲ್ಯಾಲ್ಯಾ ಗುಶ್ಟಿ ಪುರ್ತಿ ವ್ಹನಾರ್. ಮನ್ಲಿ.

ಮರಿಯಾಚ಼ ಸ್ತುತಿ ಗೀತ್

⁴⁶ ತವಾ ಮೆರಿ ಮನ್ಲಿ, “ಮಾಜಾ಼ ಜೀವ್ ಪ್ರಭುಲಾ ಧನ್ಯಾವಾದ ಕರ್ತ್ಯೊ”

⁴⁷ ದೇವುಸ್ ಮಾಜಾ಼ ರಾಖ್ನಿ ಜಾ಼ಲ್ಯಾ ಮನ್ಹುನ್ ಮಾಜ಼ ಮನ್ ಸಂತೊಶ್ ಜಾ಼ಲ್ಯಾ.

⁴⁸ ದೇವಾನಿ ಆಪ್ಲೆ ಚಾ಼ಕ್ರಿನಿಚ಼ ಹಾಲ್ ಬಗ್ಲ. ಆನಿ ಆಚ್ಚಾನಿ ಲೊಕ ಸಗ್ಳಿ ಮನಾ ಬರಿ ಮನ್ಹಾರ್.

⁴⁹ ತಸ ಮನ್ಹುನ್ ಸರ್ವಶಕ್ತ ಜಾ಼ಲ್ಯಾಲ್ಯಾ ದೇವಾನಿ ಮನಾ ಮೊಟಾ ಉಪಕಾರ್ ಕೆಲ್ಯಾ; ತ್ಯಚ಼ ನಾವ್ ಪರಿಶುದ್ದ

⁵⁰ ಆನಿ ದೇವಾಲಾ ಕೊನ್ ಬಿಥೊ ತ್ಯಚಿವ ದೇವಾಚಿ ದಯಾ ತ್ಯಚೆ ಪಿಡಿನ್ಪಿಡಿ ಪರ‍್ಯಾತ್ ರಾಹಿಲ್.

⁵¹ ತ್ಯನಿ ಆಪ್ಲ ಬಳ್ ದಾವುನ್ ಮಸ್ತಾವ್‌ಲ್ಯಾಲ್ಯಾಂಚಿ ಮನ ತ್ಯೊ ಖಿದಡ್ತೊ.

⁵² ಫನ್ ಅಧಿಕಾರ‍್ಯಾನಾ ಸಿಂಹಾಸಾವ್ನಿ ಉತ್ರುನ್ ಗರಿಬಾನಾ ವರ್ ಆಂತೊ.

⁵³ ಫನ್ ಬುಖ್ಯಾಲ್ಯಾಲ್ಯಾನಾ ಚಾ಼ಂಗ್ಲಿ ಸಾಮ್ನ ದಿವುನ್ ಲಾವುನ್ ದಿಲಿತ ಸಾವ್ಕಾರಾನಾ ಮೊಕ್‌ಳ್ಯಾಹಾತಾನಿ ಲಾವುನ್ ದಿಲಿತ

⁵⁴ ದೇವಾನಿ ಆಮ್ಚಾ ವಡ್ಲಾನಾ ಸಬ್ದ ದಿಲ್ಯಾ ಶಾರ್ಕಾ ಆನಿ ಗುಲಾಮಾತ್ ಆಸ್‌ಲ್ಯಾಲ್ಯಾ ಆಪ್‍ಲ್ಯಾ ಇಸ್ರಾಯಲಾನಾ ಮಜ಼ತ್ ಕರಾಯಾ ಆಲ್ಯಾ.

⁵⁵ ತ್ಯೊ ಅಬ್ರಹಾಮಾಲಾ ಯದತ್ ಥಿವುನ್ ದಯಾ ದಾವುನ್ ಸಗ್‍ಳ್ಯಾ ಲೊಕಾನಾ ಕವಾಬಿ ಆಸ್ನಾರಿ ಕೃಪಾ ದ್ಯಾವ್ಲೆ.

⁵⁶ ಮರಿಯಾ ಕಮಿಸ್ ಕಮಿ ತೀನ್ ಮೈನ ಎಲಿಜ಼ಬೆತಾಪ ರಾಹುನ್ ಆಪ್‌ಲ್ಯಾ ಗರ‍್ಹಾತ್ ಪರ್ತುನ್ ಗಿಲಿ.

ಬಾಪ್ತಿಸ್ಮಾ ಯೊಹಾನಾಚಾ಼ ಜ಼ಲ್ಮ

⁵⁷ ಎಲಿಜಬೆತಾಲಾ ಬಾಳತ್ಫನಾಚ ದೀಸ್ ಬರ್ಹುನ್ ಯೊಕ್ ಪ್ಯೊರ್ಗಾ ಜಾ಼ಲಾ

⁵⁸ ತಿಚಾ ಸೆಜಾರ‍್ಯಾಂಚಿ ಮಾಯೆದಾಯೆಚಿ ತಿಚಿವ ದೇವಾನಿ ಆಪ್ಲಿ ದಯೆ ವಿಶೆಸ್ ದ್ಯಾವ್ಲಿ ಮನ್ಹುನ್ ಐಕುನ್ ತಿಚಿ ಸಂಗ ಆನಂದ್ ಜಾ಼ಲ್ಹಿತ.

⁵⁹ ಆಟ್ವೆ ದಿಸಿ ತೀ ತ್ಯಾ ಮೂಲಾಲಾ ಮುಂಜಿ ಕರಾಲಾ ಯವುನ್ ತ್ಯಲಾ “ಜಕರಿಯಾ” ಮನ್ಹುನ್ ನಾವ್ ಥೆವಾ ವ್ಹಯಿ ಮನ್ಲಿತ. ಕಾ ಮಂಜೆ ತ್ಯ ತ್ಯಾ ಮುಲಾಚಾ ಬಾಚ಼ ನವ್ ಜಾ಼ಲ್ತ.

⁶⁰ ಫನ್ ಹೆ ಗುಶ್ಟಿಲಾ ತ್ಯಚಿ ಆಯಿ, “ನಕೊ! ‘ಯೊಹಾನುಸ್, ಮನ್ಹುನ್ ತ್ಯಚ಼ ನಾವ್ ಥೆವಾಯಾ ವ್ಹಯಿ” ಮನ್ಲಿ

⁶¹ ಖರ ಆಲ್ಯಾಲಿ ಲೊಕ ಎಲಿಜಬೆತಾಲಾ, “ತುಜಾ ಗರ‍್ಹಾನ್ಯಾತ್ ಹ್ಯಾ ನಾವಾಚ಼ ಕೊನ್ ನಾಹಿ ನವ್ಹ!” ಮನ್ಲಿತ.

⁶² ಮಂಗ್ ಹ್ಯಲಾ ಕ್ಯಾ ನಾವ್ ಥೆವಾವ್ಹಯಿ ಮನ್ಥೊಸ್ ಮನ್ಹುನ್ ಮುಲಾಚಾ ಬಾಲಾ ಖುನಾ ಕರುನ್ ಇಚಾರ್ಲ.

⁶³ ತ್ಯನಿ ಯೇಕ್ ಪಾಟಿ ಆನುನ್ ಗಿಹುನ್ “ತ್ಯಚ಼ ನಾವ್ ಯೊಹಾನುಸ್” ಮನ್ಹುನ್ ಲಿವ್ಲ ತ್ಯಲಾ ಲೊಕಸಗ್ಳಿ ಗಾಭಾರ್ಲಿತ.

⁶⁴ ತವಾಸ್ ತ್ಯಲಾ ತ್ವಾಂಡ್ ಆಲ ಜಿ಼ಬ್ ಸಯಿಲ್ ಜಾ಼ಲಿ ತ್ಯಲಾ ಬೋಲಾಲಾ ಬಳ್ ಯವುನ್ ದೇವಾಲಾ ಉಪ್ಕಾರ್ ಸಾಂಗ್ಲ.

⁶⁵ ಹ್ಯ ಐಕುನ್ ಸೆಜಾ಼ರವಾಲ್ಯಾನಾ ಭೆವಾಟಾಯಾಲಾಗ್ಲ ಆನಿ ಹ್ಯಾ ಸಗ್‌ಳ್ಯಾ ಗುಶ್ಟಿಚೆ ಬದಲ್ ಯುದಾಯಾಚೆ ಡಂಗ್ಳಿಚಾಗಾವಾತ್ನಿ ಬೊಲತಿತ

⁶⁶ ಐಕ್‍ಲ್ಯಾಲಿ ಸಗ್ಳಿ ಲೊಕ ಗಾಬ್ರುನ್ ಆಜಾಬ್ ವ್ಹವುನ್ ಹ್ಯ ಮುಲ್ ಮೊಟಹ್ವವುನ್ ಕಸ್ಲಾ ಮಾನುಸ್ ವ್ಹತ್ಯೊ? ಮನ್ಹುನ್ ಯವ್‌ಜಾ಼ಯಾಲಾಗ್ಲಿತ ಕಾ ಮಂಜೆ ದೇವಾಚ಼ ಬಳ್ ತ್ಯಚಿವ ಹುತ್ತ.

ಜಕರಿಯಾಚಿ ಪ್ರವಾದನೆ

⁶⁷ ತ್ಯವ್ಡಸ್ ನವ್ಹ ಯೊಹಾನಾಚಾ಼ ಬಾ ಜಕರಿಯಾ ಪವಿತ್ರಾತ್ಮಾನಿ ಬರ‍್ಹನ್ ದೇವಾಚ಼ ವಾಕ್ಯ ಸಾಂಗ್ಲ.

⁶⁸ “ಇಸ್ರಾಯಲ್ ಲೊಕಾಂಚಾ಼ ದೇವ್ ಜಾ಼ಲ್ಯಾಲ್ಯಾ ಪ್ರಭುಲಾ ಸ್ತೊತ್ರ ವ್ಹವುನಿ. ಆಪ್‌ಲ್ಯಾ ಲೊಕಾನಾ ಮಜ಼ತ್ ಕರಾಯ ಆನಿ ಆಪ್‌ಲ್ಯಾ ಲೊಕಾನಾ ಸೊಡ್ವಾಯಾ ಆಲಾ;

⁶⁹ ಆಪ್ಲಾ ಸೇವಕ್ ದಾವಿದಾಚಾ ಗರ‍್ಹಾನ್ಯಾತ್ ದೇವಾನಿ ಸರ್ವಶಕ್ತ ರಕ್ಷಕ್ ಆಮಾನಾ ದಿಲ್ಯಾ.

⁷⁰ ಹ್ಯ ತ್ಯನಿ ಪೈಲ್ಯಾಕಾಲಾತ್‌ಲ್ಯಾ ಆಪ್‌ಲ್ಯಾ ಪವಿತ್ರ ಪ್ರವಾದಿಂಚಾಪ್ನಿ ಸಾಂಗ್ಲ.

⁷¹ ದೇವಾನಿ ಆಮಾನಾ ಆಮ್ಚಾ ವಾದಿಂಚಾಪ್ನಿ ಆನಿ ರಾಗಿಷ್ಟಾಂಚಾ ಹತಾತ್ನಿ ರಕ್ಶಿಸ್ಲ.

⁷² ಕರ್ನಾ ದ್ಯಾವ್ನಾರ್ ವಡ್ಲಾನಾ ಕೆಲ್ಯಾಲಿ ಆಪ್ಲಿ ಶೆಪತ್ ತ್ಯನಿ ಯದತ್ ಆನ್ಲಿ.

⁷³ ಆಮ್ಚಾ ವಾದಿಂಚಾ ಹಾತಾತ್ನಿ ಆಮಾನಾ ಸೊಡ್ವಾಯಾ ದೇವಾನಿ ಆಮಚಾ಼ ವಡಿಲ್ ಅಬ್ರಹಾಮಾಲಾ ಶೆಪತ್ ದಿಲೆ.

⁷⁴ ತ್ಯೊ ಆಮ್ಚಾ ವಾದಿಂಚಾ ಹಾತಾತ್ನಿ ಆಮಾನಾ ಸೊಡ್ವಾಯಾ ಆಮಾನಾ ತ್ಯಲಾ ಕಾಯೇಕ್ ಭೆನಸ್ತಾನಾ ಉಪ್ಕಾರ್ ಕರಾಯಾ ಹುಕುಮ್ ದಿಲಾ.

⁷⁵ ಹ್ಯಚಿಸ್ ಲಾಗುನ್ ಆಮಿ ತ್ಯಚಿ ಮೊರ‍್ಹ ಆಮ್ಚಾ ಜೀತಾಚ಼ ಸಗ್ಳ ದೀಸ್ ತ್ಯಚೆ ಮೊರ‍್ಹ ಪರಿಶುದ್ದ ಆನಿ ನಿಯತೀನಿ ವ್ಹವುನ್ ರಾಹ್ಯಾ ವ್ಹಯಿ

⁷⁶ ಆನಿ ಜಕರಿಯಾ ಬಾಳಾ ತುತರಿ ಪರಾತ್ಪರಾಚಾ಼ ಸಾಂಗ್ ಸಾಂಗ್ನಾರಾ (ಪ್ರಾವಾದಿ) ಮನ್ಹುನ್ ಗಿಹಿಲ್ ತು ಪ್ರಭುಚೆ ಮೊರ‍್ಹ ಜಾ಼ವುನ್ ತ್ಯಚಾ಼ ರಸ್ತಾ ನೀಟ್ ಕರ್ನಾರಾ ವ್ಹವುನ್

⁷⁷ ಆನಿಕ್ ಆಮಚಾ಼ ದೇವ್ ಪಾಪ ಮಾಪ್ ಕರಾಯಾ ಸಾಟಿ ರಕ್ಷನೆಚಾ ಗಿನ್ಯಾನ್ ಆಪ್‌ಲ್ಯಾ ಲೊಕಾನಾ ದೇನಾರಾ

⁷⁸ ಆಮಚಾ಼ ದೇವ್ ದಯಾ ದಾವುನ್ ಕರ್ನಾ ಆಸ್ನಾರಾ ಪರಲೊಕಾತ್ನಿ ಸಕಾಳಚ಼ ರಕ್ಶನೆಚಾ಼ ನವಾ ದೀಸ್ ಆಮ್ಚಿವ ಉಗುವುನ್.

⁷⁹ ಆಂದಾರಾತ್ನಿ ಮರ್ನಾಚಾ ಭ್ಯಾತ್ ರಾಥ್ಯಾಲ್ಯಾ ಆಮಾನಾ ಉಜಿಡ್ ದಿವುನ್ ತ್ಯೊ ಅಮಾನಾ ಶಾಂತಿಚೆ ವಾಟವ ಲಾವುನ್ ಚಾ಼ಲಿವ್ನಾರ್ ಮನ್ಲಾ

⁸⁰ ತ್ಯೊ ಪ್ಯೊರ್ಗಾ ಆಂಗಾತ್ಬಿ ಬರ‍್ಹುನ್ ಆನಿ ಆತ್‌ಮ್ಯಾನಿ ಬರ‍್ಹುನ್ ಇಸ್ರಾಯಲ್ ಲೊಕಾನಾ ಆಪ್‌ಲ್ಯಾಲಾ ದಾವುನ್ ದಿಯಾಚಾ ದಿಸಾಪರ‍್ಯಾತ್ ರಾನಾತ್ನಿ ಹುತ್ತಾ.