ಯೊಹಾನ್ 11 - ದೆವಾಚಿ ಖರಿ ಕಬರ್ ನವಾ ಕರಾರ್

ಲಾಜ಼ರಾಚ಼ ಮರಾನ್

¹ ಲಾಜ಼ರ್ ಮಂಥ್ಯಾಲಾ ಯೊಕ್ ಬರಾ ನವ್ತಾ. ತ್ಯೊ ಬೆತಾನ್ಯಾ ಮಂಥ್ಯಾಲ್ಯಾ ಗಾವಾತ್ ಹುತಾ. ಮರಿಯಾ ಆನಿ ತಿಚಿ ಭನ್ ಮಾರ್ಥಾ ಹ್ಯಾಸ್ ಗಾವಾತ್ ಹುತ್ಯಾ.

² ಪ್ರಭುಲಾ ವಾಸಾಚ಼ ತ್ಯಾಲ್ ಲಾವುನ್ ತ್ಯಚ಼ ಪ್ಯಾ ಆಪ್‍ಲ್ಯಾ ಡುಯಿಚಾ ಕೆಸಾಚಾಂನಿ ಪುಸ್‌ಲ್ಯಾಲ ಹಿನಿಸ್. ಬರಾ ನಸಲ್ಯಾಲಾ ಲಾಜ಼ರ್ ಹ್ಯೊಸ್ ಮರಿಯಾಚಾ಼ ಬಾಹು ಜಾ಼ಲ್ತಾ.

³ ಬನ್ಹಿಂಚಾನಿ ಯೇಸುಲಾ, “ಪ್ರಭು, ತುಜಾ಼ ಮಾಯೆಚಾ಼ ಸುಪ್ತಿ ಲಾಜ಼ರ್ ಬರಾ ನಾಹಿ” ಮನ್ಹುನ್ ಬಾತ್ನಿ ಲಾವುನ್ ದಿಲಿ.

⁴ ಯೇಸುನಿ ಹ್ಯ ಐಕ್ಲ ತವಾ, “ಹ್ಯ ದುಃಖ್ನ ಲಾಜ಼ರಾಚಾ಼ ಜಿವ್ ಕಾಡಾಯಾ ಆಲ್ಯಾಲ ನವ್ಹ ದೇವಾಚ಼ ಆನಿ ದೇವಾಚಾ ಲೇಕಾಚಾ ನಾವಾಚೆ ಮೈಮಾ ಸಾಟಿ ಆಲ್ಯಾಲ. ಮನ್ಲಾ.

⁵ ಯೇಸು ಮಾರ್ಥಾಚಿ ತಿಚೆ ಭನ್ಹಿಚಿ ಆನಿ ಲಾಜ಼ರಾಚಿ ಮಾಯಾ ಕರೀತಾ.

⁶ ಲಾಜ಼ರ್ ದುಕ್‌ನ್ಯಾತ್ ಹಾ ಮಂಥ್ಯಾಲಿ ಖಬರ್ ತ್ಯನಿ ಐಕ್ಲಿ ತವಾ ಆಪ್ನು ಹುತ್ತಾ ತಿತ್ತಸ್ ಆನಿಕ್ ದೊನ್ ದೀಸ್ ರಾಯ್ಲಾ.

⁷ ಮಂಗ್ ತ್ಯನಿ ಆಪ್‌ಲ್ಯಾ ಶಿಶಾನಾ ಆಮಿ ಯುದಾಯಾತ್ ಮಾಗಾರ ಜಾಯಾ ವ್ಹಯಿ ಮನ್ಹುನ್ ಸಾಂಗ್ಲ

⁸ ಶಿಶಾಂಚಾನಿ ಪ್ರಭು ಯುದಾಯಾಚ಼ ಯೆಹುದ್ಯಾಂಚಾನಿ ತುಲಾ ದೊಂಡ್ಯಾನಿ ಮಾರಾಯಾ ಯತ್ನಕಿಲಿತ. ತ್ಯ ಜಾ಼ಲ್ಯಾಲ ನಿಸ್ಥ ಥೊಡ್ಯಾ ಯಳಾಚೆ ಮಾಗ ತ್ಯವ್ಡಸ್ ಆತಾ ತು ಆನಿಕ್ ತಿಥ ಜಾ಼ಯಾ ವ್ಹಯಿ ಮಂಥೊಸ್ ಕ್ಯಾ? ಮನ್ಹುನ್ ಮನ್ಲ.

⁹ ತವಾ ಯೇಸು ದಿಸಾಚ಼ ಬಾರಾ ತಾಸ್ ಹಾತ್ತ ವ್ಹಯ್ ಕ್ಯಾ ನವ್ಹ? ದಿಸಾಚಾ಼ ಚಾ಼ಲತ್ಯಾಲಾ ಠ್ಯಾಸ್ ಲಾಗುನ್ ಪಡತ್ ನಾಹಿ ಕಾ ಮಂಜೆ ಹೆ ದುನೆತ್‌ಲ್ಯಾ ಉಜಿಡಾನಿ ಬಗ್ತೊ.

¹⁰ ಫನ್ ರ‍್ಯಾಚಾ಼ ಚಾ಼ಲತ್ಯಾಲಾ ಪಡ್ತೊ ಕಾ ಮಂಜೆ ಬಗುನ್ ಚಾ಼ಲಾಯಾ ಕಸ್ಲಾ ಉಜಿಡ್ ತ್ಯಲಾ ರಾಹಿತ್ ನಾಹಿ ಮನ್ಹುನ್ ಉತ್ತರ್ ದೇತೊ

¹¹ ಯೇಸುನಿ ಹ್ಯಾ ಗುಶ್ಟಿ ಸಾಂಗ್‍ಲ್ಯಾ ನಂತರ್ ಆಮಚಾ಼ ಸುಪ್ತಿ ಲಾಜ಼ರ್ ಆತಾ ನಿಜ಼ಲ್ಯಾ ತ್ಯಲಾ ಉಟ್ವಾಯಾ ಮಿ ತಿಥ ಜಾ಼ತ್ಯೊ ಮನ್ಲಾ

¹² ಶಿಶಾ ಪ್ರಭು ತ್ಯೊ ನಿಜ್ಲಾ಼ ಆಸ್ಲಾತ ಬರಾ ವ್ಹನಾರ್ ಮನ್ಲ.

¹³ ಯೇಸು ಲಾಜ಼ರಾಚಾ ಮರ್ನಾಚೆ ಗುಶ್ಟಿತ್ ಬೊಲತಾ ಫನ್ ಶಿಶಾಂಚಾನಿ ತ್ಯೊ ಸ್ವಾಬಾವಿಕ್ ನಿಜ಼ಚೆ ಗುಶ್ಟಿತ್ ಬೊಲ್‌ತ್ಯೊ ಮನ್ಹುನ್ ಯವಜ಼ಲ.

¹⁴ ಯೇಸುನಿ ಲಾಜ಼ರ್ ಮೆಲ್ಯಾ ಮನ್ಹುನ್ ಶಾರ್ಕ ಸಾಂಗ್ಲ.

¹⁵ ಫನ್ ಮಿ ತಿತ್ತ ನವ್ತೊತ್ಯೊ ಬರ ಜಾ಼ಲ್ಹ. ಕಾ ಮಂಜೆ ತುಮಾನಾ ಮಾಜಿವ ಇಸ್ವಾಸ್ ಯಯಾ ಹ್ಯ ಸಗ್ಳ ಜಾ಼ಲ್ಹ. ಯವಾ ಆಮಿ ತ್ಯಚಿಪ ಜಾ಼ವುಯಾ ಮನ್ಲಾ

¹⁶ ತವಾ ದಿದುಮ್ ಮಂತ್ಯಾಲಾ ತೊಮಾ ಬಾಕಿಚಾ ಶಿಶಾನಾ ಯವಾ ಆಮಿಬಿ ತ್ಯಚಿಸಂಗ ತಿಥ ಮರಾಯಾ ಜಾ಼ವುಯಾ.ಮನ್ಲಾ

ಯೇಸುಸ್ ಪುನರುಥಾನ್ ಆನಿ ಜಿವ್

¹⁷ ಯೇಸು ಬೆತಾನ್ಯಾತ್ ಆಲಾ. ಲಾಜ಼ರಾಲಾ ಮಸುರ್ಡಿತ್ ಥಿವುನ್ ಚಾರ್ ದೀಸ್ ಜಾ಼ಲ್ಯಾತ ಮನ್ಹುನ್ ಯೇಸುಲಾ ಸಮಾಜ಼್ಲ.

¹⁸ ಬೆತಾನಿ ಯೆರುಸಲೇಮಿತ್ನಿ ದೊನ್ ಮೈಲಾಚೆ ಆತ್ ಹುತ್ತಿ.

¹⁹ ಬಾಹು ಜಾ಼ಲ್ಯಾಲಾ ಲಾಜರಾಚೆ ಗುಶ್ಟಿತ್ ಸಮಜಾ಼ವಾಯಾ ಖುಬ್ ಯೆಹುದಿ ಮಾರ್ಥಾ ಆನಿ ಮರಿಯಾಪ ಆಲ್ತ.

²⁰ ಯೇಸು ಯತ್ಯೊ ಮನ್ಹುನ್ ಬಾತ್ನಿ ಐಕುನ್ ಮಾರ್ಥಾ ತ್ಯಲಾ ಭೇಠಾಯಾ ಬಾಹಿರ್ ಗಿಲಿ ಫನ್ ಮರಿಯಾ ಗರ‍್ಹಾತುಸ್ ಹುತ್ತಿ

²¹ ಮಾರ್ಥಾನಿ ಯೇಸುಲಾ ಪ್ರಭು ತು ಹಿತ್ತ ಆಸ್ಥಾಸ್ತ ಮಾಜಾ಼ ಬಾಹು ಮರತ್ ನವ್ಥಾ

²² ಫನ್ ಆತಾಸಾಹಿತ್ ದೇವಾಪ ಮಾಗ್‌ಲ್ಯಾಲ ತ್ಯೊ ತುಲಾ ದೆನಾರ್ ಮನ್ಹುನ್ ಠಾವ ಹಾ.

²³ ಯೇಸುನಿ ತುಜಾ ಬಾಹು ಆನಿಕ್ ಜಿತ್ತಾ ವ್ಹವುನ್ ಉಠುನ್ ಯನಾರ್ ಮನ್ಹುನ್ ಸಾಂಗ್ಲ.

²⁴ ಮಾರ್ಥಾ ಸರ್ತ್ಯಾ ದಿಸಾತ್ ಮರ್ನಾತ್ನಿ ಉಠುನ್ ಯತಾನಾ ತ್ಯೊ ಆನಿಕ್ ಉಠುನ್ ಯನಾರ್ ಮನ್ಹುನ್ ಮನಾ ಠಾವಾ ಹಾ. ಮನ್ಹುನ್ ಮನ್ಲಿ.

²⁵ ಯೇಸು ತಿಲಾ ಮೀಸ್ ಮರ್ನಾತ್ನಿ ಉಠುನ್ ಯನಾರಾ ಆನಿ ಮಾಜಿವ ಇಸ್ವಾಸ್ ಥೆವ್‍ತ್ಯಾಲಾ ಮೆಲ್ಯಾ ನಂತರ್ ಆನಿಕ್ ಜೀವ್ ಗೇನಾರ್.

²⁶ ಆನಿಕ್ ಜೀವ್ನಾ ಕರೀತ್ ಮಾಜಿವ ಇಸ್ವಾಸ್ ಥೆವ್‌ಥ್ಯಾಲಾ ಕಂದಿಸ್ ಮರತ್ ನಾಹಿ ಹ್ಯಚಿವ ತು ಇಸ್ವಾಸ್ ಥಿವ್ತಿಸ್ ಕ್ಯಾ? ಮನ್ಲಾ

²⁷ ತವಾ ತಿ, “ವ್ಹಯ್ ಪ್ರಭು ತು ಕ್ರಿಸ್ತ ಮನ್ಹುನ್ ಮಿ ಇಸ್ವಾಸ್ ಥೆವ್ತೆ, ದೇವಾಚಾ಼ ಲ್ಯೊಕ್, ಹೆ ದುನೆತ್ ಯನಾರಾ ತುಸ್, ಮನ್ಲಿ.

ಯೇಸು ರಡ್ತೊ

²⁸ ಹ್ಯಾ ನಂತರ್ ಮಾರ್ಥಾ ತಿಥ್ನಿ ಮಾಗಾರಿ ಗಿಲಿ ಆನಿ ಆಪ್ಲಿ ಭನ್ ಮರಿಯಾಲಾ ಯಕಾನ್ಸಿ ಹಾಕ್ಟುನ್, “ಗುರು ಹಿತ್ತ ಹಾ ಆನಿ ತುಲಾ ಹಾಕಟ್ಯೊ. ಮನ್ಹುನ್ ಸಾಂಗ್ತಿ.

²⁹ ಹ್ಯ ಐಕ್‌ಲ್ಯಾ ಬರ್ಬರ್ ಮರಿಯಾ ಉಠುನ್ ಯೇಸುಪ ಬಿಗಿ ಬಿಗಿ ಗಿಲಿ.

³⁰ ಯೇಸು ಆಜು಼ನ್ ಗಾವಾತ್ ಆಲಾ ನವ್ಥಾ. ಮಾರ್ಥಾ ಆಪ್‌ಲ್ಯಾಲಾ ಗಾವಲ್ಯಾಲ್ಯಾ ಜಾ಼ಗ್ಯಾವಸ್ ತ್ಯೊ ಹುತ್ತಾ.

³¹ ಯೆಹುದಿ ಮರಿಯಾ ಸಂಗ ಗರ‍್ಹಾತ್ ಹುತ್ತ ತಿಲಾ ಸಮ್ಜಾವಿತ ಮರಿಯಾ ಉಠುನ್ ಗಡ್ಬಡಿನಿ ಜಾ಼ತ್ಯಾಲಿ ತ್ಯಂಚಾನಿ ಬಗ್ಲಿ ತೀ ರಡಾಯಾ ಸಾಟಿ ಮಸುರ್ಡಿಪ ಜಾ಼ತೆ ಮನ್ಹುನ್ ತ್ಯಂಚಾನಿ ಸಮಜು಼ನ್ ಗಿಹುನ್ ತೀಚೆ ಮಾಗ್ನಿ ಗೇಲ.

³² ಯೇಸು ಆಸ್‌ಲ್ಯಾಲ್ಯಾ ಜಾ಼ಗ್ಯಾವ ಮರಿಯಾ ಗಿಲಿ ಆನಿ ಯೇಸುಲಾ ಬಗ್‌ಲ್ಯಾ ಬರ್ಬರ್ ತ್ಯಚಾ ಪಾಯಾತ್ ಪಡುನ್ ಪ್ರಭು ತು ಹಿತ್ತ ಆಸ್ಥಾಸ್ತ ಮಾಜಾ಼ ಬಾಹು ಮರಾಚಾ಼ ನವ್ಥಾ ಮನ್ಲಿ

³³ ಮರಿಯಾ ಆನಿ ತಿಚೆ ಸಂಗ ಆಲ್ಯಾಲ್ಯಾ ಯೆಹುದ್ಯಾಂಚ಼ ದುಕ್ ಯೇಸುನಿ ಬಗ್ಲ ತವಾ ತ್ಯಚಾ ಮನಾಲಾ ಖುಬ್ ದುಕ್ ಜಾ಼ಲ.

³⁴ ಆನಿ ಯೇಸುನಿ ತ್ಯನಾ ತ್ಯಲಾ ಕುಠ ಥೆವ್‍ಲ್ಯಾಸಾ ಮನ್ಹುನ್ ಇಚಾರ್ಲ ತವಾ ತೇ ಪ್ರಭು ಯವುನ್ ಬಗ್ ಮನ್ಲ.

³⁵ ಯೇಸು ರಡ್ಲಾ

³⁶ ತ್ಯಲಾ ಯೆಹುದಿಂಚಾನಿ ಬಗಾ ಹ್ಯೊ ಲಾಜ಼ರಾಚಿ ಕ್ಯವ್ಡಿ ಮಾಯಾ ಕರ್ತೊ.

³⁷ ಫನ್ ಥೊಡ ಯೆಹುದಿ ಯೇಸುನಿ ಆಂದ್‍ಳ್ಯಾಚ಼ ಡೊಳ ಬರ ಕೆಲ ನವ್ಹ ಲಾಜ಼ರಾಲಾ ಸಾಹಿತ್ ಮಜ಼ತ್ ಕರುನ್ ತ್ಯಲಾ ಮರ್ನಾತ್ನಿ ಚು಼ಕ್ವು ನಾಹಿ ಕ್ಯಾ?ಮನ್ಹಿತ.

ಲಾಜ಼ರಾಲಾ ಪರ್ತುನ್ ಜೀವ್ ಗಾವ್ಲಾ

³⁸ ಯೇಸುಲಾ ಆನಿಕ್ ದುಕ್ ವ್ಹವುನ್, ಲಾಜ಼ರಾಚೆ ಮಸುರ್ಡಿಪ ಗೇಲಾ, ತೀ ಮಸುರ್ಡಿ ಯೇಕ್ ಘಬ್ ಹುತ್ತಿ. ತಿಚಾ ತೊಂಡಾಲಾ ಮೊಟಾ ದೊಂಢಾ ಜಾಕ್ಲಾ ಹುತ್ತಾ.

³⁹ ತ್ಯೊ ದೊಂಢಾ ಕಾಡಾ ಮನ್ಹುನ್ ಯೇಸುನಿ ಸಾಂಗ್ಲ. ಮೆಲ್ಯಾಲ್ಯಾಚಿ ಭನ್ ಮಾರ್ಥಾನಿ, “ಪ್ರಭು ಲಾಜ಼ರ್ ಮರುನ್ ಚಾರ್ ದೀಸ್ ಜಾ಼ಲ. ಆತಾ ಬುರ್ಸಾ ವಾಸ್ ಯಯಿತ್ ಆಸಲ್” ಮಂಥಿ.

⁴⁰ ಯೇಸುನಿ ತಿಲಾ ಸಾಂಗ್ಲ, “ಮಿ ತುಲಾ ಸಾಂಗ್‌ಲ್ಯಾಲ್ಯಾವ ಇಸ್ವಾಸ್ ಥೆವ್‍ಲ್ಯಾವ ದೇವಾಚಿ ಮೈಮಾ ಬಗ್ನಾರ್?

⁴¹ ಮನ್ಹುನ್ ತ್ಯಂಚಾನಿ ಮಸುರ್ಡಿಚಾ ತೊಂಡಾವ್ಲಾ ದೊಂಢಾ ಕ್ಯಾಡ್ಲಾ ತವಾ ಯೇಸುನಿ ವರ್ ಬಗುನ್ ಬಾ ಮಾಜ಼ ಮಾಗ್ನ ಐಕ್ಲಸ್ ಮನ್ಹುನ್ ತುಲಾ ವವ್ಯಾಳ್ತೊ.

⁴² ತು ಕವಾಬಿ ಮಾಜ಼ ಐಕ್ತೊಸ್ ಮನ್ಹುನ್ ಮನಾ ಠಾವ ಹಾ. ಫನ್ ಹಿತ್ತ ಮಾಜೆ ಸರಬವಾರಿ ಆಸ್‍ಲ್ಯಾಲ್ಯಾ ಲೊಕಾಂಚೆ ಸಾಟಿ ಮಿ ಹ್ಯಾ ಗುಶ್ಟಿ ಸಾಂಗ್‌ಲ್ಯಾ. ತುಸ್ ಮನಾ ಲಾವುನ್ ದಿಲ್ಯಾಸ್ ಮನ್ಹುನ್ ತ್ಯಂಚಾನಿ ಇಸ್ವಾಸ್ ಥೆವಾಲಾ ವ್ಹಯಿ ಮನ್ಹುನ್ ಮಿ ಮನ್ ಕರ್ತೊ” ಮನ್ಲಾ.

⁴³ ಹ್ಯ ಸಗ್ಳ ಸಾಂಗ್‌ಲ್ಯಾ ನಂತರ್ ಯೇಸು ಜೋ಼ರಾನಿ, “ಲಾಜ಼ರಾ ಬಾಹಿರ್ ಯೇ” ಮನ್ಹುನ್ ಹಾಕಟ್ಟೊ.

⁴⁴ ಮೆಲ್ಯಾಲಾ ಮಾನುಸ್ ಬಾಹಿರ್ ಆಲಾ. ತ್ಯಚ಼ ಹಾತ್ ಪ್ಯಾ ಕಪ್ನಾನಿ ಬ್ಯಾಂದ್ಲ ಹುತ್ತ. ತ್ಯಚ಼ ತ್ವಾಂಡ್ಬಿ ತ್ಯನಿಸ್ ಜಾಕ್ಲ ಹುತ್ತ. ತವಾ ಯೇಸುನಿ ತ್ಯನಾ ಸಾಂಗ್ಲ ತ್ಯಲಾ ಸೊಡಾ ತ್ಯೊ ಜಾ಼ವುನಿ.

ಯೇಸುಚೆ ಆಡ್ವಾ ದಂಗಾ

⁴⁵ ಮರಿಯಾಲಾ ಬೊಲ್ವಾಯಾ ಆಲ್ಯಾಲ ಯೆಹುದಿ ತಿಥ ಖುಬ್ ಹುತ್ತ. ಯೇಸುನಿ ಕೆಲ್ಯಾಲ ಹ್ಯ ಕಾಮ್ ಬಗ್‌ಲ್ಯಾಲ ತ್ಯಾತ್‍ಲ್ಯಾ ಖುಬ್ ಜ಼ನಾಂಚಾನಿ ತ್ಯಚಿವ ಇಸ್ವಾಸ್ ಥೆವ್ಲಾ.

⁴⁶ ಫನ್ ಯೇಸುನಿ ಕ್ಯಾ ಕೆಲ ಮನ್ಹುನ್ ತ್ಯಾತ್‌ಲ್ಯಾ ಥೊಡ್ಯಾಂಚಾನಿ ಫರಿಸಾಯಾಂಚಿಪ ಜಾ಼ವುನ್ ಸಾಂಗ್ಲ.

⁴⁷ ತವಾ ಮುಖ್ಯ ಯಾಜಕ್ ಆನಿ ಫರಿಸಾಯ್ ಯೆಹುದ್ಯಾಂಚಾ ಯವಜ್ನಾ಼ಚಾ ಮೆಳ್ಯಾಲಾ ಹಾಕ್ಟುನ್ ಆಮಿ ಕ್ಯಾ ಕರಾಯಾ ವ್ಹಯಿ? ಹ್ಯೊ ಮಾನುಸ್ ಖುಬ್ ಚಾ಼ಂಗ್ಲಿ ಕಾಮ ಕರ್ತ್ಯೊ.

⁴⁸ ಹಿ ಕಾಮ ಕರಾಯಾ ಆಮಿ ತ್ಯಲಾ ಆವ್ಕಾಸ್ ದಿಲಾತ ಲೊಕ ಹ್ಯಚಿವ ಇಸ್ವಾಸ್ ಥೆವ್ನಾರ್ ತವಾ ರೊಮ್ ರಾಜಾತ್ನಿ ಯವುನ್ ಆಮ್‌ಚ಼ ದಿವುಳ್ ಆನಿ ಆಮ್ಚ಼ ರಾಜೆ ನಾಸ್ ಕರ್ನಾರ್ ಮನ್ಲ.

⁴⁹ ತ್ಯಾತ್ ಕಾಯಫ್ ಮಂಥ್ಯಾಲಾ ಯೊಕ್ ಹುತ್ತಾ. ತ್ಯೊ ತ್ಯಾ ವರ್ಸಾತ್ ಮಹಾಯಾಜಕ್ ಜಾ಼ಲ್ಥಾ ತ್ಯನಿ, “ತುಮಾನಾ ಕಾಯ್ ಠಾವ ನಾಹಿ

⁵⁰ ಹ್ಯಾ ಸಬ್ದಾಚಾ಼ ಅರ್ಥ ಆಜು಼ನ್ ತುಮಾನಾ ಸಮಾಜ್ಲಾ಼ ನಾಹಿ ಹ್ಯನಿ ತುಮಾನಾ ಫ್ಯಾಯ್ದಾ ಹಾ ಸಗಳ್ಯಾಂಚೆಸಾಟಿ ಯಕಾನಿ ಮರಾಚ಼ ಯಕಾಸ್ಲಾಗುನ್ ಸರ್ವಿ ದುನ್ಯಾ ಹಾಳ್ ವ್ಹಯಾಚೆ ಆಂದಿ ರಾಹುನಿ

⁵¹ ಹಿ ಕಾಯಾಫಾಚಿ ಸ್ವತಾಚಿ ಯವಜ್ನಾ಼ ನವ್ಹ. ತ್ಯೊ ತ್ಯಾ ವರ್ಸಾತ್ ಮುಖ್ಯ ಯಾಜಕ್ ಜಾ಼ಲ್ಥಾ ಮನ್ಹುನ್ ಯೆಹುದ್ಯಾಂಚಾ ಲೊಕಾಸಾಟಿ ಯೇಸು ಮರ್ನಾರ್ ಮನ್ಹುನ್ ತ್ಯನಿ ಪ್ರವಾದನೆ ಕಿಲ್ತಿ.

⁵² ವ್ಹಯ್ ಯೆಹುದ್ಯಾಂಚೆ ಸಾಟಿ ದುನೆತ್ ಪಗಾಳ್ಯಾಲ್ಯಾ ದೇವಾಚಾ ಪೊರಾನಾ ಯೇಕ್ ಕರಾಯಾ ಸಾಟಿ ತ್ಯೊ ಮರ್ನಾರ್.

⁵³ ತಿಥ್ನಿ ದರ್ನಿ ಯೆಹುದಿ ಜಾಂತ ಯೇಸುಲಾ ಮಾರಾಯಾ ಪಿತ್ತುರಿ ಕರಾಯಾ ಲಾಗ್ಲ.

⁵⁴ ಮನ್ಹುನ್ ಯೇಸು ಯಹುದ್ಯಾಂಚೆ ಮದ್ದಿ ರಾಜಾರೊಸ್ ಫಿರ್ಲಾ ನಾಹಿ. ಫನ್ ತ್ಯೊ ಜಾ಼ಗಾ ಸುಡುನ್ ಯಕಾನ್ಸಿ ರಾನಾಚೆ ಜ಼ವಳ್ ಆಸಲ್ಯಾಲ್ಯಾ ಎಪ್ರಾಯೀಮ್ ಮಂಥ್ಯಾಲ್ಯಾ ಗಾವಾತ್ ಆಪ್‌ಲ್ಯಾ ಶಿಶಾಂಚೆಸಂಗ ರಾಯ್ಲಾ.

⁵⁵ ತವಾ ಯೆಹುದ್ಯಾಂಚಾ಼ ವಲ್ಯಾಂಡಾಚಾ಼ ಸನ್ ಯಯಾಚಾ಼ ಹುತ್ತಾ ಖುಬ್ ಲೊಕ ಆಪ್‌ಲ್ಯಾ ಗಾವಾತ್ನಿ ವರ್ ಯೆರುಸಲೇಮಿತ್ ಗಿಲ್ತಿತ ತೀ ವಲಾಂಡ್ಯಾಚಾ ಸನಾಚೆ ಆಂದಿ ಆಸಿ ತೀ ಧಾರ್ಮಿಕ್ ಪದ್ದತಿಚೆಗತ್ ಶುದ್ದ ಕರಾಯಾ ಗಿಲಿತ.

⁵⁶ ಆನಿ ತೇ ಯೇಸುಲಾ ಸುದಿತ್ ದೇವ್ಳಾತ್ ಉಬ ರಾಹುನ್ ತುಮಿ ಕ್ಯಾ ಯವಸ್ತಾಸಾ ಕ್ಯಾ ಖರ‍್ಯಾನಿಸ್ ತ್ಯೊ ಹ್ಯಾ ಸನಾಲಾ ಯನಾರ್ನಾಹಿ ಕ್ಯಾ? ಮನ್ಹುನ್ ಯಕಾಮಕಾಲಾ ಇಚಾರಾಯಾ ಲಾಗ್ಲ

⁵⁷ ಆನಿ ತ್ಯಂಚಾನಿ ತ್ಯೊ ಆಸಲ್ಯಾಲಾ ಜಾ಼ಗಾ ಕುನಾಲಾ ತರಿ ಸಮಾಜ್ಲಾ಼ತ ಆಮಾನಾ ಸುಸ್ನಾ ದೇವಾ ಮನ್ಹುನ್ ಖಡ್ಯಾವ್ಲ.