ಇಬ್ರಿಯ 3 - ದೆವಾಚಿ ಖರಿ ಕಬರ್ ನವಾ ಕರಾರ್ಯೇಸು ಮೊಶೆವ್ನಿ ಮೊಟಾ 1 ಮನ್ಹುನ್ ಮಾಜಾ ಇಸ್ವಾಸಿ ಬನ್ಹಿ ಬಾವ್ಹಾನು, ಪರಿಶುದ್ದ್ ಲೊಕ ವ್ಹಯಾ ಸಾಟಿ ದೇವಾನಿ ಹಾಕಟ್ಯಾಲಿ ತುಮಿ ಯೇಸುಚೆ ಗುಶ್ಟಿತುಸ್ ಯವಜಾ಼. ದೇವಾನಿ ತ್ಯಲಾ ಆಮ್ಚಿಪ ಲಾವುನ್ ದಿಲಾ. ತ್ಯೊಸ್ ಆಮ್ಚಾ ಇಸ್ವಾಸಾಚಾ಼ ಪೈಲಾ ಯಾಜಕ್ 2 ಯೇಸುಲಾ ದೇವಾನಿ ಆಮ್ಚಿಪ ಲಾವುನ್ ದಿವುನ್, ತ್ಯಲಾ ಆಮ್‍ಚಾ಼ ಪೈಲಾ ಯಾಜಕ್ ಕೆಲಾ. ತ್ಯೊ ಮೊಶೆಚೆಗತ್ ದೇವಾಚಾ ಇಸ್ವಾಸಾಚಾ಼ ಜಾ಼ಲ್ತಾ. ದೇವಾಚಾ ಗರ‍್ಹಾತ್ ದೇವಾಚಾ ಮನಾಚೆಗತ್ ಕರಾಯಾ ಪಾಯ್ಜೆ ತ್ಯ ಸಗ್ಳ ತ್ಯನಿ ಕೆಲ. 3 ಯಕಾ ಮಾನ್ಸಾನಿ ಘರ್ ಬ್ಯಾಂದ್ಲ ತವಾ, ಲೊಕಾಂಚಾನಿ ಗರ‍್ಹಾವ್ನಿ ತ್ಯಲಾ ಲ ಮರ‍್ಯಾದ್ ದೆತ್ಯಾಚೆಗತ್ ಯೇಸುಲಾ ಮೊಶೆವ್ನಿ ಲ ಮರ‍್ಯಾದ್ ಗಾವ್ಲೆ. 4 ಪರತೆಕ್ ಘರ್ ಕುನಾಪ್ನಿ ತರಿ ಯಕಾಪ್ನಿಸ್ ಬ್ಯಾಂದ್‍ಲ್ಯಾಲ ರಾಹ್ಯಾ ವ್ಹಯಿ. ಫನ್ ದೇವಾನಿ ಸಗ್ಳ ನಿರ್ಮಾನ್ ಕೆಲ. 5 ದೇವಾಚಾ ಗರ‍್ಹಾತ್ ಸಗ್‍ಳ್ಯಾ ಮೊಶೆ ಸೇವಕಾಚೆಗತ್ ಇಸ್ವಾಸಾಚಾ಼ ಜಾ಼ಲ್ತಾ. ಮೊರ‍್ಹ ಸಾಂಗ್‍ತ್ಯಾಲ್ಯಾ ಗುಶ್ಟಿನಾ ತ್ಯೊ ವಳಕ್ ಜಾ಼ಲ್ತಾ. 6 ಕ್ರಿಸ್ತ ತರಿ ಲ್ಯೊಕ್ ವ್ಹವುನ್ ದೇವಾಚ಼ ಘರ್ ಚಾ಼ಲ್ವಾಚಾತ್ ಇಸ್ವಾಸಾಚಾ಼ ಜಾ಼ಲ್ಯಾ. ಆಮಿ ಆಮಾನಾ ಆಸ್‌ಲ್ಯಾಲೆ ಆಶೆತ್ ಘಟ್ ಗರ‍್ಹಾವ್ನಿ ರಾಹ್ಯಾಚ಼ ಜಾ಼ಲತ ದೇವಾಚಾ ಗರ‍್ಹಾತ್ಲಿ ಜಾ಼ಲ್ಯಾವ್. ದೇವಾಚಾ ಲೊಕಾನಾ ಇಸ್ರಾಂತಿ 7 ಮನ್ಹುನ್ ಪವಿತ್ರಾತ್ಮ ಸಾಂಗತ್ಯಾ ಶಾರ್ಕ, “ತುಮಿ ಆತಾ ದೇವಾಚಾ ಸಬ್ದಾಲಾ ಕಾನ್ ದಿಲಸಾತ, 8 ಪೈಲ್ಯಾ ಕಾಲಾತ್ ತುಮ್ಚ಼ ವಡಿಲ್ ದೇವಾಲಾ ವೈರಿ ಜಾ಼ಲ್ಯಾ ಶಾರ್ಕ ತುಮ್ಚಿ ಮನ ಘಟ್ ಕರುನಕೊಸಾ. ತಿಸಿ ತ್ಯಂಚಾನಿ ರಾನಾತ್ ದೇವಾಚಿ ಪಾರಕ್ ಕೆಲಿ. 9 ಮಿ ರಾನಾತ್ ಚಾಳಿಸ್ ವರ್ಸಾ ಪರತ್ ಕೆಲ್ಯಾಲಿ ಕಾಮ ತುಮ್ಚಾ ವಡ್ಲಾಂಚಾನಿ ಬಗುನ್ಬಿ ಮಾಜಿ ಆನಿ ಮಾಜಾ ಥಂಡ್ಫನಾಚಿ ಪಾರಕ್ ಕೆಲಿ. 10 ಮನ್ಹುನ್ ತ್ಯಚಿವ ಮಿ ರಾಗ ಕೆಲಾ. ‘ತ್ಯಂಚಾ ಯವಜ಼್ನಾ ಕವಾಬಿ ಚು಼ಕಿಚಾ ಜಾ಼ಲ್ಯಾತಾ. ಮಾಜಿ ವಾಟ್ ತ್ಯಂಚಾನಿ ಸಮಜು಼ನುಸ್ ಗಿತ್ಲಿ ನಾಹಿ’ ಮನ್ಹುನ್ ಮಿ ಸಾಂಗ್ಲ. 11 ‘ತಿ ಲೊಕ ಮಾಜಾ ಇಶ್ರಾಮ್ಯಾತ್ ಕಂದಿಸ್ ಜಾ಼ನಾರ್ ನಾಹಿತ’ ಮನ್ಹುನ್ ಮಿ ರಾಗಾನಿ ಶಪತ್ ಕಿಲಿ. ” ಕೀರ್ತನೆ 95:7-11 12 ಮನ್ಹುನ್ ಬನ್ಹಿ ಬಾವ್ಹಾನು, ತುಮ್ಚಾತ್ ಕೊನ್ ಬುರ‍್ಸಾ ಇಚಾರ್ ಆಸ್‍ಲ್ಯಾಲ ವ್ಹವುನಾಹಿ ಆಸ, ಇಸ್ವಾಸ್ ನಸ್‌ಲ್ಯಾಲಾಚೆ ಗತ್, ಜೀವ್‌ ಆಸ್‌ಲ್ಯಾಲ್ಯಾ ದೇವಾಲಾ ದುರ್‌ ಕರುನಾಹಿ ಆಸ ಹುಶಾರ್ ರಾವ್ಹಾ. 13 ಫನ್ ಯಕಾಮಕಾಲಾ ಪರತೇಕ್ ದಿಸಿ ಸಮಜಾವಾ. “ಆಜ಼್” ಮನ್ಹುನ್ ಹಾಕಟ್ಯಾಲಾ ಆವ್ಕಾಸ್ ಆಸ್ಥಾನಾಸ್ ಹ್ಯ ಸಗ್ಳ ಕರಾ. ಪಾಪಾಚಾ಼ ಮ್ಹೊಸ್ ಕರತ್ಯಾಚೆಗತ್ ವ್ಹವುನಿ ತುಮಚಾತ್ ಕೊನ್ ಘಟ್ ಮನಾನಿ ರಾವ್ಹು ನಾಹಿ ಆಸ ಯಕಾ ಮಕಾಲಾ ಮಜ಼ತ್ ಕರಾ. 14 ಕಾ ಮಂಜೆ ಆಮಿ ಸಗ್ಳಿ ಯೇಕ್ ವ್ಹವುನ್ ಕ್ರಿಸ್ತಾಚೆ ವಾಟ್ನಿತ್ಲಿ ಜಾ಼ಲ್ಯಾವ್. ಸುರು ವ್ಹತಾನಾ ಆಮ್ಚಿಪ ಆಸ್‌ಲ್ಯಾಲಾ ಘಟ್ ಇಸ್ವಾಸ್ ಸರ್ತ್ಯಾ ಪರತ್ ಗಟ್ ದರ್ಲಾತ ಹ್ಯ ಖರ ವ್ಹನಾರ್. 15 ಪವಿತ್ರ ಪುತೀಕ್ ಕ್ಯಾ ಸಾಂಗ್ತ ಮಂಜೆ: “ತುಮಿ ಆತಾ ದೇವಾಚಾ಼ ಸಬ್ದ ಐಕ್ಲಾಸಾತ ತುಮ್ಚಿ ಮನ ಘಟ್ ಕರು ನಕೊಸಾ, ತುಮ್ಚ಼ ವಡಿಲ್ ದೇವಾಲಾ ವೈರಿ ಜಾ಼ಲ್ಯಾಚೆಗತ್ ಮಂಡ್ ವ್ಹವುನಕೊಸ್. ” ಕೀರ್ತನೆ 95:7-8 16 ದೇವಾಚಾ಼ ಸಬ್ದ ಐಕುನ್ಬಿ ತ್ಯಲಾ ವೈರಿ ಜಾ಼ಲ್ಯಾಲಾ ಕೊನ್? ಮೊಶೆಸ್ ಲಾಗುನ್ ಈಜಿಪ್ತಾತ್ನಿ ಸುಟ್ಕ ಜಾ಼ಲ್ಯಾಲ ನವ್ಹತ ಕ್ಯಾ? 17 ಚಾಳಿಸ್ ವರ‍್ಸ ದೇವಾನಿ ಕುನಾವ ರಾಗ್ ಕೆಲಾ? ಪಾಪ್ ಕೇಲ್ಯಾಲ್ಯಾಂಚಿವ ನವ್ಹ ಕ್ಯಾ? ತಿ ಸಗ್ಳಿ ರಾನಾತ್ ಮಿಲಿತ. 18 ಮಾಜಾ ಇಸ್ರಾಮ್ಯಾತ್ ತಿ ಮಿಳನಾರುಸ್ ನಾಹಿತ ಮನ್ಹುನ್ ದೇವಾನಿ ಶಪತ್ ಕಿಲಿ ತವಾ, ತ್ಯೊ ಕುನಾ ಸಂಗ ಬೊಲತಾ ಆಪ್ಲ ಐಕಲ್ಯಾ ನಸ್‌ಲ್ಯಾಲ್ಯಾ ಲೊಕಾಂಚೆ ಗುಶ್ಟಿತ್ ನವ್ಹ ಕ್ಯಾ? 19 ತ್ಯಂಚಿಪ ಇಸ್ವಾಸ್ ನಸ್‌ಲ್ಯಾಲ್ಯಾ ಕಾರ್ನಾನಿ ಇಸ್ರಾಮ್ಯಾತ್ ಜಾ಼ಯಾ ತ್ಯಾ ಲೊಕಾನಾ ಆವ್ಕಾಸ್ ಗಾವ್ಲಾ ನಾಹಿ. |
The New Testament in Gowli Marathi Language © The Word for the World International and Gowli Marathi Translation Samiti, Karnataka, 2023.