2 पतरस 1 - ದೆವಾಚಿ ಖರಿ ಕಬರ್ ನವಾ ಕರಾರ್ನಮಸ್ಕಾರ್ 1 ಯೇಸು ಕ್ರಿಸ್ತಾಚಾ಼ ಸೇವಕ್ ಆನಿ ಅಪೊಸ್ತಲ್ ಜಾ಼ಲ್ಯಾಲಾ ಸಿಮೆಯೊನ್ ಪೇತ್ರಾ ಆಮಚಾ಼ ದೇವ್ ಆನಿ ರ‍್ಯಾಕ್ನಾರಾ ಜಾ಼ಲ್ಯಾಲ್ಯಾ ಯೇಸು ಕ್ರಿಸ್ತಾಚೆ ನಿಯತಿನಿ ಆಮ್ಚಿಗತುಸ್ ಬರಾ ಇಸ್ವಾಸ್ ಗೆತಲ್ಯಾಲ್ಯಾನಾ ಲಿವಾಚ಼ ಕ್ಯಾ ಮಂಜೆ, 2 ದೇವಾಚೆ ಗುಶ್ಟಿತ್, ಆನಿ ಆಮಚಾ಼ ಪ್ರಭು ಜಾ಼ಲ್ಯಾಲ್ಯಾ ಯೇಸು ಕ್ರಿಸ್ತಾಚೆ ಗುಶ್ಟಿಚಿ ಆಸ್‌ಲ್ಯಾಲ್ಯಾ ಅಕ್ಲತ್ ತುಮಾನಾ ಕ್ರಪಾ, ಶಾಂತಿ ಖುಬ್ ಗಾಹುನಿ. ದೇವಾಚ಼ ಹಾಕಟ್ನ ಆನಿ ನಿವಡ್ನ 3 ಆಮಾನಾ ಆಪ್ಲೆ ಮೈಮೆನಿಬಿ, ಗುನಾನಿಬಿ ಹಾಕಟ್‌ಲ್ಯಾಲ್ಯಾ ದೇವಾಚೆ ಗುಶ್ಟಿತ್ ಯೇಸುಚಾ ಚಾ಼ಂಗಲ್ಯಾ ಬಳಾನಿ ಆಮಾನಾ ದೇವಾಚ಼ ಗಿನ್ಯಾನ್ ದಿಲ್ಯಾಲ್ಯಾಸ್ ಲಾಗುನ್ ಜೀವಾಲಾಬಿ, ಬಕ್ತಿಲಾಬಿ ವ್ಹಯಿಜಾ಼ಲ್ಯಾಲ ಸಗ್ಳ ದಿಲ್ಯಾ ಮನ್ಹುನ್ ಆಮಾನಾ ಠಾವ ಹಾ. 4 ತುಮಿ ದುನೆತ್ ಬುರ್ಶೆ ಆಶೆನಿ ವ್ಹನಾರ‍್ಯಾ ಬುರ್ಶಾ ಫನಾಲಾ ದುರ್ ವ್ಹವುನ್ ದೇವಾಚಾ ಸ್ವಬಾವಾತ್ ವಾಟದಾರ್ ವ್ಹವಾವ ಮನ್ಯಾಚಾ ಉದ್ದೆಶಾನಿ ದೇವಾನಿ ಆಪ್ಲ ಖುಬ್ ಮತ್ವಾಚ಼ ಆನಿ ಕಿಮ್ತಿಚ಼ ವಾಗ್ದಾನ್ ಆಮಾನಾ ದಿಲ್ಯಾ. 5 ಹ್ಯಾ ಕಾರ್ನಾನಿಸ್ ತುಮಿ ಪುರಿ ಬಳ್ ಆಸ್‌ಲ್ಯಾಲಿ ವ್ಹವುನ್ ತುಮಾನಾ ಆಸ್‌ಲ್ಯಾಲ್ಯಾ ಇಸ್ವಾಸಾನಿ ಚಾ಼ಂಗ್ಲಾ ಗುನ್, ಚಾ಼ಂಗಲ್ಯಾ ಗುನಾಲಾ ಗಿನ್ಯಾನ್ಬಿ, 6 ಗಿನ್ಯಾನಾಲಾ ದಮೆಬಿ, ದಮೆಲಾ ಥಂಡ್ಫನ್ಬಿ, 7 ಥಂಡ್ಫನಾಲಾ ಬಕ್ತಿಬಿ, ಬಕ್ತಿಲಾ ಬಾವ್ಹಾಚ಼ ಸುಪ್ತಿಫನ್ಬಿ, ಬನ್ಹಿ ಬಾವ್ಹಾಚಾ ಸುಪ್ತಿಫನಾಲಾ ಮಾಯಾಬಿ ಮಿಳವಾ. 8 ಹಿ ತುಮ್ಚಿಪ ರಾಹುನ್ ವಾಡತ್ ಆಲಿತತ, ಆಮ್‍ಚಾ಼ ಪ್ರಭು ಜಾ಼ಲ್ಯಾಲ್ಯಾ ಯೇಸು ಕ್ರಿಸ್ತಾಚೆ ಗುಶ್ಟಿಚೆ ಅಕ್ಲತ್ ತುಮಿ ಮಜ಼ತ್ ಕರಿನಸ್ನಾರಿ, ಉಪೇಗ್ ನಸ್ನಾರಿ ವ್ಹವುನಾಹಿ ಆಸ ಕರ್ತ. 9 ಹ್ಯ ಸಗ್ಳ ನಸ್‌ಲ್ಯಾಲಾ ಅಂದ್ಳಾ ಜಾ಼ಲ್ಯಾ. ತ್ಯೊ ದುರ್ಚ಼ ದಿಸನಸ್ನಾರಾ ವ್ಹವುನ್ಬಿ ಆಪ್‌ಲ್ಯಾ ಮಾಗ್‌ಲ್ಯಾ ಪಾಪಾಂಚ಼ ಪರಿಹಾರ್ ಆಪ್ನು ಶುದ್ದ ಜಾ಼ಲ್ಯಾಲಾ ಇಸಾರ್ಲ್ಯಾ. 10 ಮನ್ಹುನ್ ಬನ್ಹಿ ಬಾವ್ಹಾನು, ದೇವಾಪ ತುಮ್ಚ಼ ಹಾಕಟ್ನಬಿ, ಥರಿವ್‌ಲ್ಯಾಲ ಘಟ್ ಕರಾಯಾ ಯತ್ನ ಕರಾ. ಕಾ ಮಂಜೆ ತುಮಿ ಆಸ ಕೆಲ್ಯಾವ ಕಂದೀಸ್ ತುಮಿ ಇಸ್ವಾಸಾತ್ ಪಡತ್ನಾಹಿಸಾ. 11 ಆಸ ಆಸ್ಥಾನಾ ಆಮಚಾ಼ ಪ್ರಭು, ರ‍್ಯಾಕ್ನಾರಾ ಜಾ಼ಲ್ಯಾಲ್ಯಾ ಯೇಸು ಕ್ರಿಸ್ತಾಚಾ ಶಾಶ್ವತ್ ರಾಜಾತ್ ತುಮಾನಾ ಆಡಚ಼ನ್ ನಸ್ತಾನಾ ಜಾ಼ಯಾವ್ಹನಾರ್. 12 ಮನ್ಹುನ್ ತುಮಿ ಹ್ಯಾ ಗುಸ್ಟಿ ಸಮಜು಼ನ್ ತುಮಾನಾ ಗಾವಲ್ಯಾಲ್ಯಾ ಖರ‍್ಯಾತ್ ಗಟ್ ಆಸ್ಲತರಿ ತೀ ತುಮಾನಾ ಯಾದ್‍ಕರಾಯಾ ಮೀ ಕವಾಬಿ ತಯಾರ್ ಹಾ. 13 ಹೆ ದುನೆತ್ ಮಿ ಜೀವ್ನಾ ಕರಿಪರತ್ ತುಮ್ಚಿ ಯಾದ್ ಕರುನ್ ಸಾಂಗಾಚ಼ ಬರ ಮನ್ಹುನ್ ಕೇಲ್ಯಾ. 14 ಕಾ ಮಂಜೆ ಆಮಚಾ಼ ಪ್ರಭು ಜಾ಼ಲ್ಯಾಲ್ಯಾ ಯೇಸು ಕ್ರಿಸ್ತಾನಿ ಮನಾ ಸಾಂಗಲ್ಯಾಸಾರ ಮೀ ಹ್ಯ ಶರೀರ್ ಸುಡುನ್ ಜಾ಼ಯಾಚಾ಼ ದಿಸ್ ಜ಼ವಳ್ ಆಲ್ಯಾ ಮನ್ಹುನ್ ಠಾವಾ ಹಾ. 15 ತುಮಿ ಮೀ ಮೆಲ್ಯಾ ನಂತರ್ಬಿ ಹ್ಯಂಚಿ ಯಾದ್ ಕರಾಯಾ ವ್ಹಯಿಸಾ ಮನ್ಹುನ್ ಮೀ ಮನ್ಕರ್ತೊ. ಕ್ರಿಸ್ತಾಚೆ ಮೈಮೆಚಾ಼ ಸಾಕ್ಷಿದಾರ್ 16 ಆಮಚಾ಼ ಪ್ರಭು ಜಾ಼ಲ್ಯಾಲ್ಯಾ ಯೇಸು ಕ್ರಿಸ್ತಾಚ಼ ಬಳ್, ದಿಸ್ನ ತುಮಾನಾ ಸಾಂಗ್‌ಲ್ಯಾಲ್ಯಾತ್ ಚ಼ಮತ್ಕಾರಾನಿ ಘಡಿವಲ್ಯಾಲ್ಯಾ ಕ್ಯಾಯ್‍ನ್ಯಾಂಚೆಗತ್ ಆಮಿ ಚಾ಼ಲಾವ್ ನಾಹಿ. ತ್ಯಚಿ ಚಮತ್ಕಾರ ಡೊಳ್ಯಾನಿ ಬಗುನ್ ತೀ ಸಾಂಗ್ತಾವ್. 17 ಕಾ ಮಂಜೆ, ಹ್ಯೊ ಮಾಯಾಚಾ಼ ಮಾಜಾ಼ ಲ್ಯೊಕ್, ಹ್ಯೊ ಮನಾ ಆವಾಡಲ್ಯಾ ಮಂಥ್ಯಾಲಾ ಆವಾಜ಼್ ಮೊಟೆ ಮೈಮಾನಿ ತ್ಯಲಾ ಗಾವಲ್ಯಾಲ್ಯಾತ್ ತ್ಯನಿ ಬಾ ದೇವಾಪ್ನಿ ಮರ‍್ಯಾದ್, ಮೈಮಾ ಗೇತ್ಲೆನವ್ಹ. 18 ಆಮಿ ಪರಿಶುದ್ಧ್ ಪರ್ವತಾವ ತ್ಯಚಿ ಸಂಗ ಆಸ್ತಾನಾ ಸ್ವರ್ಗಾತ್ನಿ ಆಲ್ಯಾಲಾ ತ್ಯೊ ಸಬ್ದ ಆಮಿ ಐಕ್ಲಾ. 19 ಯವ್ಡಸ್ನವ್ಹ ಪ್ರವಾದನ್ ವಾಕ್ಯಾ ಖುಬ್ ಘಟ್ ಗಾವಲ್ಯಾತಾ. ತ್ಯೊ ದಿಸ್ ಪಾಂಡ್ರ ವ್ಹಯಿಪರತ್ ಆನಿ ಉಜಿಡಾಚಿ ಚಾನ್ನಿ ತುಮ್ಚಾ ಮನಾತ್ ಉಗ್ವಪರತ್ ತ್ಯೊ ಆಂದಾರಾತ್ ಉಜಿಡ್ ದೇನಾರಾ ದಿವಾ ಮನ್ಹುನ್ ತ್ಯಚಿವ ಲಕ್ಷ ದಿಲ್ಯಾವ ಬರ. 20 ಕುಟ್ಲಿಸ್ ಪ್ರವಾದನ್ ವಾಕ್ಯಾ ನಿಸ್ತಿ ಮಾನ್ಸಾಚೆ ಸ್ವತಾಚೆ ಬುದ್ಧಿನಿ ಉಗುಡುನ್ ಸಾಂಗಾಯಾ ವ್ಹಯಿತ್ನಾಹಿ ಹ್ಯ ಆಂದಿ ಸಮಜು಼ನ್ ಗೇವಾ. 21 ಕಾ ಮಂಜೆ ಕಚಿಸ್ ಪ್ರವಾದನೆ ಕಂದಿಸ್ ಮಾನ್ಸಾಚಾ ಯವಜ್ನಿನಿ ಗಡ್ಲಿನಾಹಿ. ಫನ್ ಮಾನ್ಸ ಪವಿತ್ರಾತ್ಮಾಚಾ ಸಾಂಗ್‌ನ್ಯಾನಿ ದೇವಾನಿ ದಿಲ್ಯಾಲ್ಯಾನಿಸ್ ಬೊಲ್ಯಾತ. |
The New Testament in Gowli Marathi Language © The Word for the World International and Gowli Marathi Translation Samiti, Karnataka, 2023.