1 ತಿಮೊತಿ 4 - ದೆವಾಚಿ ಖರಿ ಕಬರ್ ನವಾ ಕರಾರ್ಲಬಾಡ್ ಸಿಕಿವ್ನಾರ 1 ಆತ್ಮ ಶಾರ್ಕ ಸಾಂಗ್ತ, ಮೊರ‍್ಹ ಯತ್ಯಾಲ್ಯಾ ದಿಸಾತ್ ಥುಡಿ ಲೊಕ ಇಸ್ವಾಸಾತ್ನಿ ದುರ್ ವ್ಹನಾರ್ ತೀ ಲಬಾಡ್ ಆತ್‌ಮ್ಯಾಚೆಗತ್ ಪ್ಯಾಳ್ನಾರ್ ಆನಿ ಸೈತಾನ್ ಸಿಕಿವ್‌ತ್ಯಾಚೆಗತ್ ಚಾ಼ಲ್ನಾರ್. 2 ಹಿ ಸಿಕ್ಷಾ ಉಗಸ್ ಸಾಂಗ್‍ತ್ಯಾಲ್ಯಾನಾ ಆನಿ ಮೋಸ್ ಕರ್ತ್ಯಾಲ್ಯಾ ಲೊಕಾಂಚಿಪ ಪಗಾಳ್ತಿ. ತಾಪ್‍ಲ್ಯಾಲ್ಯಾ ಲೊಖಾಂಡಾನಿ ಜ಼ಳುನ್ ರಾಕ್ ವ್ಹತ್ಯಾಚೆಗತ್ ತ್ಯಂಚ಼ ಗಿನ್ಯಾನ್ ಹಾಳ್ ಜಾ಼ಲ್ಯಾ. 3 ಆಸ್ಲಿ ಲೊಕ ಲಗಿನ್ ಕರುನ್ ಗಿಹ್ಯಾಚ಼ ಆನಿ ಥೊಡ ಜೆ಼ವ್ನಾಚ಼ ಜಿನೊಸ್ ಖಾವುನಾಹಿ ಮನ್ಹುನ್ ತೇ ಸಾಂಗ್‌ತ್ಯಾತ. ಫನ್ ಇಸ್ವಾಸ್ ಅಸ್‍ಲ್ಯಾಲಿ ಆನಿ ಖರ ಸಮಜು಼ನ್ ಗೆತಲ್ಯಾಲಿ ದೇವಾಲಾ ದನ್ಯವಾದಾಚ಼ ಮಾಗ್ನ ಕರುನ್ ತ್ಯ ಜೇವಾನ್ ಖಾವುಂತ ಕಾ ಮಂಜೆ ತ್ಯ ಸಗ್ಳ ಕೆಲ್ಯಾಲ ತ್ಯನಿಸ್. 4 ಕಾ ಮಂಜೆ ತ್ಯನಿ ಕೆಲ್ಯಾಲ ಪರತೇಕ್ ಯಾಕ್ ಚಾ಼ಂಗ್ಲ ಹಾ. ಕಚ಼ಸ್ ಸಾಮಾನ್ ನಕ್ವಾಟ್ ಕರಾಚ಼ ನಾಹಿ ಸಗ್ಳಿ ಸಾಮ್ನ ದನ್ಯವಾದಾಚ಼ ಮಾಗ್ನ ಕರುನ್ ಗಿಹ್ಯಾ ವ್ಹಯಿತ. 5 ಕಾ ಮಂಜೆ ದೇವಾಚಾ ವಚನಾನಿ ಆನಿ ಮಾಗ್‍ನ್ಯಾನಿ ತ್ಯ ದೇವಾಲಾ ಮಾನ್ಯಾ ಜಾ಼ಲ್ಯಾ. ಕ್ರಿಸ್ತ ಯೇಸುಚಾ಼ ಚಾ಼ಂಗ್ಲಾ ಸೇವಕ್ 6 ತಿಥ ಆಸ್ಲ್ಯಾಲ್ಯಾ ಇಸ್ವಾಸಿ ಭನ್ ಬಾವ್ಹಾಂಡಾನಾ ಹ್ಯಾ ಗುಶ್ಟಿ ಸಾಂಗ್‌ಲ್ಯಾವ. ತು ಕ್ರಿಸ್ತ ಯೇಸುಚಾ಼ ಚಾ಼ಂಗ್ಲಾ ಸೇವಕ್ ವ್ಹಸಿಲ್. ತ್ಯಚ಼ ಬಾಳಗ್ನ ಇಸ್ವಾಸಾಚ಼ ಆನಿ ಖರ‍್ಯಾ ಸಿಕ್ಷನಾಚೆಗತ್ ವ್ಹತ್ತ. ತ್ಯ ತು ಗೆತಲ್ಯಾಸ್. 7 ಫನ್ ಮಾಥಾರಿಂಚಾ ಭಕ್ತಿ ನಸ್‌ಲ್ಯಾಲ್ಯಾ ಲಬಾಡ್ ಕಾಯನ್ಯಾತ್ನಿ ದುರ್ ರ‍್ಹಾ. ಭಕ್ತಿಚಾ಼ ಜೀವ್ನಾ ಚಾ಼ಲ್ವಾಯಾಸಾಟಿ ತುಲಾ ತುಸ್ ತರಬೇತಿ ಘೆ. 8 ತುಜಾ ಶರಿರಾಚಾ ವಾಯಾಮಾನಿ ಥೊಡಾ ಫಾಯ್ದಾ ವ್ಹನಾರ್ ಫನ್ ಭಕ್ತಿಚಾ ಜೀವ್ನಾಚಾ಼ ಸಗ್ಳೆ ತರನಿ ಫ್ಯಾಯ್ದಾ ಹಾ ಕಾ ಮಂಜೆ ಹ್ಯಾತ್ ಆತಾಚಾ ಕಾಲ್ ಆನಿ ಮೊರ‍್ಹ ಯತ್ಯಾಲ್ಯಾ ಜೀವ್ನಾಲಾ ದಿಲ್ಯಾಲಾ ವಾಗ್ದಾನ್ ಮಿಳಾಲ್ಯಾ. 9 ಹ್ಯ ಸಾಂಗ್ನ ಖರ ಜಾ಼ಲ್ಯಾ ಆನಿ ಹಿ ಬುಲಿ ಪುರೆ ತರನಿ ಸ್ವಿಕಾರ್ ಕರಾಯಾ ಆನಿ ಇಸ್ವಾಸ್ ಥೆವಾಯಾ ಲಾಯಕ್ ಹಾ. 10 ಆನಿ ಆಮಿ ಕಠಿನ್ ತರಾಸ್ ಕಾಡುನ್ ಆಮಿ ಆಮ್ಚಿ ಆಶಾ ಜೀವ್ ಆಸ್ಲ್ಯಾಲ್ಯಾ ದೇವಾವ ಥೆವ್‌ಲ್ಯಾ ಆನಿ ಖುಬ್ ತರನಿ ಇಸ್ವಾಸಾತ್ ಆಸ್‌ಲ್ಯಾಲ್ಯಾನಾ ರಾಖನ್ದಾರ್ ಜಾ಼ಲ್ಯಾ. 11 ಹ್ಯಾ ಗುಸ್ಟಿ ತ್ಯನಾ ಸಾಂಗ್ ಆನಿ ಸಿಕಿವ್. 12 ತು ಪ್ಯೊರ್ಗಾ ಹಾಸ್ ಕುನಿ ತುಜಾ಼ ಗಾಳ್ ಕರುನ್ ಬಗುನಾಹಿ ಫನ್ ಇಸ್ವಾಸಿನಾ ತುಜಾ ಬೊಲ್‌ನ್ಯಾ ಚಾ಼ಲನ್ಯಾನಿ ಮಾಯೆನಿ ತುಜಾ಼ ಇಸ್ವಾಸ್ ಆನಿ ಪವಿತ್ರ ಜೀವ್ನಾನಿ ಸಗ್‌ಳ್ಯಾನಾ ಉದಾಹರನ್ ವ್ಹವುನ್ ರ‍್ಹಾ. 13 ದೇವಾಚಿ ವಚ಼ನ ಲೊಕಾನಾ ವಾಚ಼ವುನ್ ಸಾಂಗುನ್ ತ್ಯನಾ ಸಾಂಗ್ ಆನಿ ಸಿಕಿವ್ ಮೀ ಯಯಿ ಪರತ್ ಹಿ ಕಾಮ ಕರಿತ್ ರ‍್ಹಾ. 14 ತುಜಿಪ ಆಸ್‍ಲ್ಯಾಲ ವರದಾನ್ ನಕಾರ್ ಕರುನಕೊ ತುಲಾ ಪ್ರವಾದನೆಚಾ ರುಪಾತ್ ಆನಿ ಜಾಂತ್ಯಾಂಚಾನಿ ಆಪ್ಲ ಹಾತ್ ತುಜಿವ ಥೆವ್ಲ ತವಾ ತ್ಯ ವರದಾನ್ ತುಲಾ ದಿಲ್ಯಾ. 15 ಹಿ ಕಾಮ ಕರೀತ್ ತ್ಯಂಚೆಸ್ ಗುಂಗಿತ್ ರ‍್ಹಾ ಕಾ ಮಂಜೆ ತುಜಿ ಪ್ರಗತಿ ಸಗ್‌ಳ್ಯಾ ಲೊಕಾಂಚೆ ಮೊರ‍್ಹ ದಿಸುನ್ ಯವುನಿ 16 ತುಜೆ ಗುಸ್ಟಿತ್ ಆನಿ ತುಜಾ ಶಿಕ್ಷೆನಾಚೆ ಗುಸ್ಟಿತ್ ಹುಶಾರ್ ರ‍್ಹಾ. ತು ಹಿ ಕಾಮ ಕರೀತುಸ್ ರ‍್ಹಾ, ತವಾ ತು ತುಲಾಬಿ ಆನಿ ತುಜ಼ ಶಿಕ್ಷೆನ್ ಐಕ್‌ತ್ಯಾಲ್ಯಾನಾಬಿ ರ‍್ಯಾಕ್ನಾರ್. |
The New Testament in Gowli Marathi Language © The Word for the World International and Gowli Marathi Translation Samiti, Karnataka, 2023.