1 ತಿಮೊತಿ 3 - ದೆವಾಚಿ ಖರಿ ಕಬರ್ ನವಾ ಕರಾರ್ಸಬೆಚ಼ ಜಾಂತ 1 ಮೀ ಸಾಂಗ್‌ಲ್ಯಾಲ್ಯಾ ಹ್ಯಾ ಗುಶ್ಟಿ ಖರ‍್ಯಾ ಜಾ಼ಲ್ಯಾತಾ ತ್ಯಾ ಕ್ಯಾ ಮಂಜೆ ಮೆಳ್ಯಾತ್ಲಾ ಜಾಂತಾ ವ್ಹಯಾ ಖುಬ್ ಯತ್ನ ಕರ್ತ್ಯಾಲಾ ಚಾ಼ಂಗ್ಲಿ ಕಾಮ ಕರಾಯಾ ಮನ್ ಕರ್ತ್ಯಾಲಾ ಜಾ಼ಲ್ಯಾ. 2 ಆಮಿ ಆನಿ ಆಮ್‍ಚ಼ ಬಾಹು ದೆವಾಸಾಟಿ ಕ್ರಿಸ್ತಾಚಿ ಬರಿ ಖಬರ್ ಸಾಂಗಾಚಾತ್ ಮಾಜೆ ಸಂಗಚಾ಼ ಕಾಮ್ಗಾರಿ ಜಾ಼ಲ್ಯಾಲ್ಯಾ ತಿಮೊತ್ಯಲಾ ತುಮಾನಾ ಘಟ್ ಕರಾಯಾ ಆನಿ ಇಸ್ವಾಸಾತ್ ಉಮೆದ್ ದಿಯಾ ತುಮಚಿಪ ಆಂದಿ ಲಾವುನ್ ದಿಲ. 3 ತರಾಸ್ ದೆತ್ಯಾಲಾ ರಾಹು ನಾಹಿ ತ್ಯೊ ಚಾ಼ಂಗ್ಲಾ ಮಾನುಸ್ ಆನಿ ಥಂಡ್ ಮನಾಚಾ಼ ರಾಹ್ಯಾ ವ್ಹಯಿ ಪೈಶಾಂಚಿ ಆಸೆ ಕರ್ತ್ಯಾಲಾ ರಾಹು ನಾಹಿ. ಆಮಿ ತರಾಸ್ ಸುಸ್ವುನ್ ಗಿಹ್ಯಾಚಾ಼ ದೇವಾಚಾ ಮನಾಚೆಗತ್ ಮನ್ಹುನ್ ಆಮಾನಾ ಠಾವ ಹಾ. 4 ಆಪ್ನು ಆಪ್ಲ್ಯಾ ಸ್ವತಾಚಾ ಕುಟ್ಮಾಲಾ ಚಾ಼ಂಗ್ಲಾ ಧನ್ಹಿ ವ್ಹವುನ್ ರಾಹ್ಯಾ ವ್ಹಯಿ. ತ್ಯಚಿ ಪ್ಯುರ್ಗಿ ತ್ಯನಿ ಸಾಂಗ್‌ಲ್ಯಾ ಶಾರ್ಕ ಚಾ಼ಲತ್ಯಾಲಿ ಸಗ್ಳಿ ಮರ‍್ಯಾದ್ ದಿವುನ್ ರಾಹ್ಯಾ ವ್ಹಯಿತ ಮನ್ಹುನ್ ಹ್ಯಚಾ಼ ಆರ್ಥ. 5 ಯಕ ಯಳಿ ಆಪ್ಲಾ ಸ್ವತಾಚಾ಼ ಕುಟುಮ್ ಸಂಬಾಳಾಯಾ ಸಮಜ಼ತ್ ನಸ್ನಾರಾ ದೇವಾಚಿ ಸಬೆ ಕಸಿ ಸಂಬ್ಯಾಳ್ನಾರ್? 6 ತ್ಯೊ ನವಾ ಇಸ್ವಾಸಿ ರಾಹುನಾಹಿ. ನವ್ಯಾ ಇಸ್ವಾಸಿಲಾ ಸಬೆಚಾ಼ ಜಾಂತಾ ಕೆಲ್ಯಾವ ತ್ಯಲಾ ದಿಮಾಕ್ ಯನಾರ್ ಸೈತಾನ್ ತ್ಯಚಾ ದಿಮಾಕಾಸ್ ಲಾಗುನ್ ಚು಼ಕಿತ್ ಗಾಹುನಾಹಿ ಮನ್ಹುನ್ ಹ್ಯೊ ಚು಼ಕಿತ್ ಗಾವ್ನಾರ್. 7 ಸಬೆಚಾ಼ ಜಾಂತಾ ಸಭೆತ್ ನಸ್‍ಲ್ಯಾಲ್ಯಾ ಲೊಕಾಂಚೆ ಮರ‍್ಯಾದಿಚಾ಼ ವ್ಹವುನ್ ರಾಹ್ಯಾ ವ್ಹಯಿ ತವಾ ತ್ಯೊ ಆನಿ ದುಸ್‌ರ‍್ಯಾಂಚಿಪ್ನಿ ಹಿರಮಟ್ನಾ ಕರುನ್ ಗಿಹಿತ್ ನಾಹಿ, ಸೈತಾನಾಚಾ ಜಾ಼ಚಾ಼ತ್ ಗಾಹುನ್ ಪಡತ್ ನಾಹಿ. ಸಬೆಚ಼ ಸೇವಕ್ 8 ಆಸ ಸಭೆತ್ ಸಬೆಚ಼ ಸೇವಕ್ ಸಾಹಿತ್ ಮರ‍್ಯಾದ್ ಗೆತ್ಯಾಲಾ ರಾಹ್ಯಾ ವ್ಹಯಿತ. ಆನಿ ತ್ಯಂಚಿ ಬುಲಿ ದೊನ್ತರಚಿ ರಾಹುನಾಹಿ ಇಸ್ವಾಸಾಚಿ ರಾಹ್ಯಾ ವ್ಹಯಿ. ದಾರು ಪಿನಾರಾ ರಾಹುನಾಹಿ. ಪೈಶಾಚಿ ಆಶಾ ರಾಹುನಾಹಿ. 9 ಇಸ್ವಾಸಾಚ಼ ಖರ ಶಾರ್ಕೆ ಬುದ್ದಿನಿ ಚಾ಼ಂಗಲ್ಯಾ ಮನಾನಿ ದರ‍್ಹುನ್ ರಾಹ್ಯಾ ವ್ಹಯಿ. 10 ತ್ಯಂಚಿ ತು ಆಂದಿ ಪಾರಕ್ ಕರ್. ತ್ಯಂಚಿಪ ಕಾಯೆಕ್ ಬುರ್ಸ ನಸ್ಲತ. ಸೇವಕ್ ವ್ಹವುನ್ ಸೇವೆ ಕರುಂತ. 11 ಆಸ್ಹಸ್ ಸಭಾಸೇವಕಿ ಜಾ಼ಲ್ಯಾಲ್ಯಾ ಬ್ಯಾಯ್ಕಾಮಾನ್ಸ ಲೊಕಾಂಚಿಪ್ನಿ ಮರ‍್ಯಾದಿ ಗೆಥ್ಯಾಲ್ಯಾ ವ್ಹವುನ್ ರಾಹ್ಯಾ ವ್ಹಯಿತಾ. ತ್ಯಾ ದುಸರ‍್ಯಾ ಲೊಕಾಂಚಾ ಚಾ಼ಡ್ಯಾ ಸಾಂಗ್‍ತ್ಯಾಲ್ಯಾ ರಾಹು ನಾಹಿತಾ. ತ್ಯಾ ಥಂಡ್ಫನ್ ವ್ಹವುನ್ ರಾಹ್ಯಾ ವ್ಹಯಿತಾ; ಸಗ್‌ಳ್ಯಾ ಗುಶ್ಟಿತ್ ಇಸ್ವಾಸಾನಿ ರಾಹ್ಯಾ ವ್ಹಯಿತಾ. 12 ಸಭೆತ್‌ಲ್ಯಾ ಸೇವಕಾಲಾ ಯೇಕುಸ್ ದನ್ಗರ್ ರಾಹ್ಯಾ ವ್ಹಯಿ ತ್ಯಂಚಾನಿ ಆಪ್ಲ್ಯಾ ಮುಲಾನಾ ಆನಿ ಕುಟ್ಮಾನಾ ಚಾ಼ಂಗ್ಲಿ ವ್ಹವುನ್ ರಾಹ್ಯಾ ವ್ಹಯಿತ. 13 ಚಾ಼ಂಗಲ್ಯಾ ಮಾರ್ಗಾನಿ ಸೇವೆ ಕರ್ತ್ಯಾಲ್ಯಾ ಲೊಕಾನಾ ಕುಠಬಿ ಮರೆದಿಚಾ಼ ಜಾ಼ಗಾ ಗಾವ್ತೊ. ಕ್ರಿಸ್ತ ಯೇಸುವ ಆಪ್‌ಲ್ಯಾಲಾ ಆಸ್‌ಲ್ಯಾಲಾ ಇಸ್ವಾಸಾಸೆ ಗುಶ್ಟಿತ್ ತೇ ಘಟ್ ರಾಥ್ಯಾತ. ಮುಟಿ ಗುಟ್ 14 ಮಿ ಆಶೆನಿ ಹ್ಯ ಪತ್ರ ಇಸ್ವಾಸಾನಿ ತುಮಾನಾ ಲಿವ್‌ತ್ಯೊ ಮಿ ಬಿಗಿನಿ ತುಜಿಪ ಯನಾರ್. 15 ಫನ್ ಯಕ್ ವೆಳಿ ಮೀ ಯಯಾ ಯೊಳ್ ಜಾ಼ಲ್ಹಾತರಿ ದೇವಾಚಾ ಕುಟ್ಮಾತ್ ತ್ಯ ಜೀವ್ ಆಸ್ನಾರೆ ದೇವಾಚೆ ಸಬೆತ್ ಚಾ಼ಲಾಚಿ ರಿತ್ ತುಲಾ ಸಮಜಾ಼ಯಾ ಹ್ಯ ಪತ್ರ ಲಿವಲ್ಯಾ. ಕಾ ಮಂಜೆ ಸಭೆಸ್ ಖರ‍್ಯಾಲಾ ದಾರ‍್ಯೊನ್ ಆನಿ ಆಧಾರ್ ಜಾ಼ಲ್ಯಾ. 16 ಆಮ್ಚಾ ದೇವಾಪ ಭಕ್ತಿಚಾ ಜೀವ್ನಾಚಿ ಖರಿ ಗುಟ್ ಗಂಬಿರ್ ಜಾ಼ಲ್ಯಾಲಿ ಮನ್ಹುನ್ ಆಮಿ ಸಗ್ಳಿ ಮ್ಯಾನ್ತಾವ್, ತ್ಯ ಕ್ಯಾ ಮಂಜೆ- ಕ್ರಿಸ್ತ ಮಾನ್ಸಾಚಾ ರುಪಾತ್ ದಿಸ್ಲಾ ಆನಿ ಆತ್‍ಮ್ಯಾನಿ ತ್ಯಲಾ ಖರ ದಾವುನ್ ದಿಲ ದೇವ್ ದುತಾಸ್ ಲಾಗುನ್ ದಿಸ್ಲಾ ಲೊಕಾಂಚೆ ಮದ್ದಿ ಸಾಂಗ್ಲ. ದುನೆನಿ ತ್ಯಚಿವ ಇಸ್ವಾಸ್ ಥೆವ್ಲಾ ಆನಿ ಮೈಮೆನಿ ತ್ಯಲಾ ಸ್ವರ್ಗಾತ್ ಉಚ಼ಲ್ಲಾ. |
The New Testament in Gowli Marathi Language © The Word for the World International and Gowli Marathi Translation Samiti, Karnataka, 2023.