1 ಕೋರಿಂಥ್ 13 - ದೆವಾಚಿ ಖರಿ ಕಬರ್ ನವಾ ಕರಾರ್ಮಾಯಾ ಮುಟಿ 1 ಮೀ ಮಾನ್ಸಾಚಾ ಬೊಲ್ಯಾ, ದೇವ್ ದುತಾಚಾ ಬೊಲ್ಯಾ ಬೊಲ್‌ತ್ಯಾಲೊ ಜಾ಼ಲೊ ತರಿ ಮಾಯಾ ನಸ್ನಾರಾ ಜಾ಼ಲೊತ ವಾಜ಼್ತ್ಯಾಲ್ಯಾ ಥಾಳ್ಯಾಚೆಗತ್ , ನಾಹಿತ ವಾಜ಼್ತ್ಯಾಲೆ ಗಾಠಚೆಗತ್ ಜಾ಼ಲ್ಯೊ. 2 ಮನಾ ಪ್ರವಾದನ್ ವರ ಆಸ್ಲ ತರಿ, ಸಗ್ಳ ದಡುನ್ ಆಸ್‌ಲ್ಯಾಲ , ಸಗ್ಳೆ ತರಚಿ ವಿದ್ಯಾ ಸಮಾಜ್ಲಿ ತರಿ, ಡೊಂಗೊರ್ ಹಾಲ್ವಿಜೊ಼ಗಾ ಇಸ್ವಾಸ್ ಆಸುನ್, ಮಾಯಾ ನಸ್‌ಲ್ಯಾವ ಮೀ ಕಾಯ್ ನಸ್ನಾರಾ ಜಾ಼ಲ್ಯೊ. 3 ಮಾಜಿಪ ಆಸ್‌ಲ್ಯಾಲ ಸಗ್ಳ ಗರಿಬಾನಾ ದಾನ್ ಕೆಲ ತರಿ, ಸಗ್ಳ ಮಾಜ಼ ಧಡ್ ಗಮೆಂಡಿಲಾ ದಿಲತ, ಮಾಯಾ ಮನಾ ನಸ್ಲಿತ ಮನಾ ಕಾಯ್ ಪ್ಯಾಯ್ದಾ ನಾಹಿ. ಮೀ ಮೊಕ್ಳಾ. 4 ಮಾಯಾ ಖುಬ್ ಸಮಾಧಾನಾಚಿ, ದಯಾ ಆಸ್ನಾರಿ. ಮಾಯಾ ಖೊಟಫನ್ ಕರಿತ್ನಾಹಿ, ಸೆಬಾಸ್ಕಿ ಗಿಹಿತ್ನಾಹಿ. ಗಮ್ಹೆಂಡಿ ಕರಿತ್ ನಾಹಿ, 5 ರಿತ್ ಸುಡುನ್ ಚಾ಼ಲತ್ನಾಹಿ. ಸ್ವತಾಚಿ ಯವಜ಼್ನಾ ಕರಿತ್ನಾಹಿ. ಸಿರ್ಕ್ಯಾನ್ ರಾಗ್ ಕರಿತ್ನಾಹಿ. ಅಪಕಾರ್ ಮನಾತ್ ತಿವಿತ್ನಾಹಿ. 6 ಖೊಟ್ಯಾತ್ ಆನಂದ್ ವ್ಹಯಿತ್ನಾಹಿ ಫನ್ ಖರ‍್ಯಾತ್ ಆನಂದ್ ವ್ಹತೊ. 7 ಸಗ್‌ಳ್ಯಾಚಾ಼ ಸಮ್ ಗಿತಿ. ಸಗಳ್ಯಾಚಾ಼ ಇಸ್ವಾಸ್ ಕರ್ತಿ. ಸಗ್‌ಳ್ಯಾಚಿ ಆಶಾ ಕರ್ತಿ. ಸಗ್ಳ ಸುಸಿವ್ತಿ. 8 ಮಾಯಾ ಕಂದಿಸ್ ಮರತ್ನಾಹಿ. ಪ್ರವಾದನ್ ವರ ನಾಹಿ ವ್ಹತಿಲಾ. ದುಸರ‍್ಯಾ ಬೊಲ್ಯಾ ಉಬ್ಯಾ ರಾತಿಲಾ. ಸಮಜು಼ಕ್ ನಾಹಿ ವ್ಹಯಿಲ್. 9 ಆರ್ದ ಮುರ್ದ ಸಮಜು಼ನ್ ಗೆತಾವ್; ಆರ್ದ ಮುರ್ದ ಪ್ರವಾದನ್ ಕರ್ತಾವ್. 10 ಫನ್ ಸರ್ವ ಆಲಕಿ ಆರ್ದ ಮುರ್ದ ನಾಹಿ ವ್ಹನಾರ್. 11 ಮೀ ಬಾಳ್ ಆಸ್ತಾನಾ ಬಾಳಾಚೆಗತ್ ಬೊಲ್ಲೊ. ಬಾಳಾಚೆಗತ್ ಯವಜ಼್ಲ. ಬಾಳಾಚೆಗತ್ ಅನ್ಬವ್ ಕೆಲಾ. ದ್ಯಾನ್ಗಾ ಜಾ಼ಲೊ ತವಾ ಬಾಳ್ಫನಾಚ಼ ಸುಡುನ್ ದಿಲ. 12 ಆತಾ ಆರ್ಶಾತ್ ದಿಸತ್ಯಾಚೆಗತ್ ದೇವಾಚ ತ್ವಾಂಡ್ ಆಮಾನಾ ಆಂದಕ್ ದಿಸ್ತ, ಫನ್ ತವಾ ತ್ಯಲಾ ಸಮುರ‍್ಯಾ ಬಗ್ನಾರ್. ಆತಾ ಆರ್ದ ಮುರ್ದ ಮನಾ ಸಮಾಜ಼ಲ್ಯಾ. ಫನ್ ತವಾ ದೇವಾನಿ ಮನಾ ಸಗ್ಳ ಸಮಜು಼ನ್ ಗೆತಲ್ಯಾಚೆಗತ್ ಮೀ ಸಗ್ಳ ಸಮಜು಼ನ್ ಗೆನಾರ್. 13 ಆಸ ಆಸ್ತಾನಾ, ಇಸ್ವಾಸ್, ಆಶಾ, ಮಾಯಾ ಹೀ ತಿನುಸ್ ಥಾಂಬತ್ಯಾತ. ಹ್ಯಾತ್ನಿ ಮುಟಿ ಮಾಯಾಸ್. |
The New Testament in Gowli Marathi Language © The Word for the World International and Gowli Marathi Translation Samiti, Karnataka, 2023.