Tite 1 - Takarata pɛ Sɔ Mbombe Mbon

Fanamɔ

¹ Yo nê mi, Paul, wan-tom pɛ Sɔ nɛ *wan-nɛtom pɛ Jésus-Christ, ka ngɛriki takarata ɛngɛ. Sɔ tomsa mi mɛ bul wen pɛa ha wi ndɔng ka wɛnɛ weka bingiri, tuka nde, mbwa amɛkiri wɛnɛ, nɛ nde, mbwa aing tɛwen ka osi wal mɛ ndari Sɔ.

² Mɛgi hio wi ndɔng begde tazu mbwa ha tɛ Sɔ nde, a beha mbwa *tunɔ kpoo. Gde ka Sɔ tɛ de ka nzan na, a bagɔn nu mɛ ha ɔ tunɔ kpoo. Nɛ Sɔ bo nê wan-tɔ dalo na.

³ Ka ngimɔ ka wɛnɛ baweki lɛma, a gbasa wen pɛa long. Nɛ Sɔ, *Wan-kpasisi ɔ, haa mi tom bul wen ɛngɛ.

⁴ Mi ngɛriki takarata ɛngɛ ha mɛ Tite, ka tɛa ngbak bem pɔm nɛ wal Jésus-Christ ka ɔ hinɛ mɛ mɛkara gbesi. Sɔ, Bafa ɔ, nɛ Jésus-Christ, Wan-kpasisi ɔ, mbwa ade *dede sila ha tɛ mɛ, nɛ mbwa aha gaamɔ ha mɛ.

Tom ka Tite bede ha kisi Krete

⁵ Mi gdea mɛ haki ha kisi Krete hazu nde, mɛ alɛmsiri hio olo tom ka mi tɛ karsi na, nɛ nde, mɛ aweki hio ma kotowi mɔ eglize ha hio le ndang ndang fɛt gbesi tuka mi baosi yo ha mɛ.

⁶ Lɛma nde, kotowi mɔ eglize adung nɛ ma wen ndang ha zu wa na. Wɛnɛ adung nê wan-si bhoko ndang sɔna. Hio bem pɛa adung nê hio wi pɛ Christ, nɛ fin, ka mbwa adung ngase pofa wi, ngase wan-de kpandele na.

⁷ Lɛma nde, wan-pam *giliwi mɔ eglize adung nɛ ma wen ndang ha zu wa na, hazu wɛnɛ nê wan-pam mɔ pɛ Sɔ. Ka wɛnɛ adung nê wan-sutɛ na, wan-de ngambi na, wan-nguru dɔkɔ na, wan-bi tumbɔ na, nɛ fin, ka wɛnɛ aki mbɔli nɛ gdanga wal na.

⁸ Ma, wɛnɛ adung nê dede wan-pam gɛnɛwi, wan-de dedemɔ, wan-mbarimɔ, *nzeng wi, mboazu wi ha wal mɔ Sɔ, nɛ fin, wɛnɛ agan zu tɛ wa fɛt.

⁹ Wɛnɛ apam osamɔ ka wɛnɛ yamba hazu wen mɛkaramɔ. Mɛgi, a lɛma mbo hio wi nɛ wal dede osamɔ ɛngɛ, nɛ a lɛma gan zu hio wan-sungiri osamɔ pɛa.

¹⁰ Hazu hio wi ang nɛdɔka ka sungiri dede osamɔ ɛngɛ. Mbwa ha osala hio wi nɛ wal tumbulu wen pɛ mbwa. Sulo wi ndɔng nê hio *zuife ka mɛkara Christ.

¹¹ Lɛma nde, ɛ agdɔki nu mbwa, hazu mbwa ha dea nde, hio ma nam zɛm agde gdong ha dede osamɔ. Mbwa ha osa mɔ ka lɛm na, hazu kpa nɛ mbɔli nɛ gdanga wal.

¹² Yo nê ma wi pɛ mbwa, ma *wan-tɔkuliwen mɔ kisi Krete, ka batɔ se: «Hio wi mɔ Krete nê hio wan-tɔ dalo, hio gdanga sari bɛlɛ, hio wan-pɔsa ka zɔk sɔna nɛ zang mbwa.»

¹³ Wen ka wɛnɛ gbasa mɛgi, yo nê tɛwen. Hazu ɛngi, mɛ sɛn wen ha mbwa nɛkpasa tuka nde, mbwa akifiri tɛ ndari nzeng wal mɛ mɛkiri Sɔ.

¹⁴ Lɛma nde, ka mbwa alɛngi fin zala mbwa ha hio to pɛ hio zuife na, nɛ nde, mbwa akarsi mɛ ndari hio *mbonga pɛ wi ndɔng ka gdea gdong ha tɛwen.

¹⁵ Ka sila hio ma wi nɛ saa ha li Sɔ, mɔ fɛt nɛ saa ha wal pɛ mbwa. Ma, pɛ wi ndɔng ka sila mbwa nɛ nzing, nɛ ka tɛ mɛkiri Sɔ na, ma mɔ ndang bo nɛ saa ha wal pɛ mbwa na. Hazu, takaramɔ pɛ mbwa nɛ ingɔmɔ sila pɛ mbwa nɛ nzing ha li Sɔ.

¹⁶ Mbwa ha tɔa nde, mbwa ingɔ Sɔ. Ma, deamɔ pɛ mbwa osi nde, mbwa kafa Sɔ kari. Mbwa dung tuka mɔ nyɛl, mbwa nê wan-nga zala, nɛ mbwa lɛm de ma dedemɔ ndang na.