Rome 7 - Takarata pɛ Sɔ Mbombe Mbon

Ɔ bo fin nê bala ha si * mbonga na

¹ Hio ya mi, mi wolmɔ ha ɛnɛ ka ingɔ mbonga pɛ Moïse. Ɛnɛ ingɔ nɛdedea nde, yo sɔna ha ngimɔ ka wi boka nɛ zutunɔ, ka wɛnɛ dung ha si mbonga.

² Mɛgi, ka ma wei sio bhoko, mbonga pɛ Moïse ndara ko pɛa ha tɛ wa ha ngimɔ tunɔ pɛa fɛt. Ma, ka wei fea kari, ko pɛa bo fin ha si mbonga ka ndara wɛnɛ ha tɛ wei pɛa na.

³ Ka wei bhɔna nɛ zutunɔ, nɛ ka ko pɛa ndari tɛ ha ma mbing wei, bhoko ɛngɛ dea wanza. Ma, ka wei fea kari, ko pɛa bo fin ha si mbonga ɛngɛ na. Ka wɛnɛ si ma mbing wei, yo bo fin nê dea wanza na.

⁴ Hio ya mi, yo fin gbesi nɛ ɛnɛ. Ɛnɛ tɛ bo nê hio fiowi ha li mbonga, hazu Christ fea gɔn nɛ zu ɛnɛ. Sising, ɛnɛ nê hio wi pɛ Christ, ka Sɔ guo wɛnɛ ha soko hio fiowi. Yo nê ɛngi, ka ɔ lɛma mɛ de dede tom ha Sɔ.

⁵ Sɔngsi, ha ngimɔ ka ɔ bade mɔ tuka sila ɔ ngoya, ɔ badung nɛ hɛl mɛ de hio ngbak gdangamɔ ndɔng ka mbonga kafi mɛ de yo. Hɛl dea mɛgi dea tom ha gbakɔtɛ ɔ fɛt, nɛ yo daka ɔ nɛnɛ ha fio.

⁶ Sising, ɔ bo fin nê bala ha si mbonga na, ɔ tɛ bo nê fiowi ha lia. Mbonga bo fin nɛ ziomɔ ha zu ɔ na. Mɛgi, ɔ ha dea tom ha Sɔ nɛ wal mbombe ndɔki deamɔ ka *Nzɔy-Sɔtɛ osi ha ɔ, yo bo fin nɛ wal mɔa ndɔki deamɔ pɛ mbonga pɛ Moïse na.

Tom ka * mbonga de

⁷ Ɔ betɔ nde ge? Ɔ betɔ nde, mbonga nê gdangamɔ nde? Way! Yo bo nê gdangamɔ na. Ma, yo nê mbonga ka osi ha mi mɔ ka dung nê gdangamɔ. Mbonga tɔa nde: «Ka mɛ agol mɔ pɛ ma mɛ na.» Ka bo se nde, mbonga atɔ mɛgi na, ki mi tɛ ing nde, golamɔ nê gdangamɔ, na.

⁸ Tuka wen mbonga osa gdangamɔ mɛgi kari, gdangamɔ kpaa wal mɛ de tom ha tɛ mi, nɛ mi angara gola hio tili mɔ fɛt. Mbonga abo se na, ki gdangamɔ bo nɛ ziomɔ ha zu mi na.

⁹ Sɔngsi ka mi tɛ ing ka mbonga na, mi dungɔ tuka wi ka dung nɛ zutunɔ. Ma, ka mi ingɔ hio wen mbonga kari, hɛl dea gdangamɔ angara dea mi nɛkpasa,

¹⁰ nɛ mi tɛ bo tuka fiowi. Sɔ dea hio wen mbonga nde, ka yo aha tunɔ ha hio wi. Ma, pɔm, yo kpala tɛ dung nê mɔ gbɛ mi.

¹¹ Hazu nɛ wal wen mbonga, gdangamɔ kpaa wal mɛ osili mi. Nɛ gdangamɔ kuo wen mbonga hazu gbɛ nɛ mi.

¹² Ngase ɛngi, mbonga nɛ pɛa tɛ nɛ nzɔya, nɛ hio wen mbonga fɛt nɛ nzɔya, nzeng, nɛ dedea.

¹³ Mi ani mɔ nde, mbonga ka dung nê dedemɔ, kpala tɛ dung nê mɔ gbɛ mi nde? Way! Yo bo mɛgi na. Ma, yo nê gdangamɔ ha gbɛ mi. Gdangamɔ kuo dedemɔ ɛngɛ gbɛ nɛ mi. Nɛ wal ɛngi, hio wen mbonga osa long nde, gdangamɔ nê tɛ kpasa gdangamɔ.

Gdangamɔ ha dea le ha tɛ wi

¹⁴ Ɔ ingɔ nɛdedea nde, *mbonga tɛ nɛ wal *Nzɔy-Sɔtɛ. Ma, mi nê wi mɔ multɛ sɔna. Mi dung tuka tɛ bala ha si gdangamɔ.

¹⁵ Mɔ ka mi de, mi ing zu mi nɛ yo na. Mɔ ka mi ngoy mɛ de, mi de yo na. Ma, mɔ ka mi sɛn, yo nê ɛngi ka mi de.

¹⁶ Ka mi de nɛ mɔ ka mi sɛn, yo osi nde, mi mɛkara mbonga tuka dedemɔ.

¹⁷ Mɛgi, yo bo nê mi nɛ pɔm tɛ ka de mɔ mɛgi na, ma, yo nê gdangamɔ ka de le ha tɛ mi ha de yo.

¹⁸ Hazu mi ingɔ nde, mi nê wi sɔna, dedemɔ bo ha dea le ha tɛ mi na. Tangere, mi nɛ hɛl mɛ de dedemɔ, ma, mi bo nɛ ngatɛ mɛ de yo na.

¹⁹ Mi bo ha dea dedemɔ ka mi ngoy mɛ de na, ma, mi kpala tɛ de nɛ gdangamɔ ka mi kafa.

²⁰ Ka mi ha dea mɔ ka mi ngoy na, yo bo nê mi nɛ pɔm tɛ ka de mɔ mɛgi na, ma, yo nê gdangamɔ ka de le ha tɛ mi ha de yo.

²¹ Mi kpaa nde, ma mbing mbonga dung ang ka tɔ nde, mi nɛ hɛl mɛ de dedemɔ, ma, mi ha dea kanɛ gdangamɔ.

²² Ɛngi tɔ nde, ha zang sila mi, mi nɛ totɛ hazu mbonga pɛ Sɔ.

²³ Mi mɛkara yo nɛ takaramɔ pɔm. Ma, mi zɔka ha zang tunɔ pɔm nde, ma mbing mbonga ang ka bi bulo sungiri nɛ yo. Mbing mbonga ɛngɛ, yo gdea mi tuka bala ha si gdangamɔ, ka dung ha tɛ mi.

²⁴ Oee, mi nê kpasa wan-ngɔtɛ! Tɛ mi ha kuo mi nɛnɛ ha fio! Nge wi ha bekpasisi mi ang, o nde?

²⁵ Mi ha lukoso Sɔ, hazu yo nê wɛnɛ ka kpasasa mi ang nɛ wal Jésus-Christ, *Kongawan pɛ ɔ. Mi zɔka nde, nɛ wal takaramɔ pɔm mi ngoy de tom ha mbonga pɛ Sɔ, ma, nɛ wal tɛ mi, mi ha dea tom ha mbonga pɛ gdangamɔ.