Rome 4 - Takarata pɛ Sɔ Mbombe Mbon

Wal ka Sɔ gdea Abraham nzeng ha li wa

¹ Mɛgi, ɔ betɔ nɛ nge wen hazu Abraham, ngbabafa mɔ kandɔ pɛ ɔ, ge nde? A bakpa nge mɔ ge nde?

² Ka bo se nde, Abraham adung nzeng ha li Sɔ nɛ wal dede deamɔ pɛa, ki a lɛma mɛ sutɛ. Ma, ha li Sɔ, a lɛm mɛ sutɛ na.

³ Yo gbesi tuka ɛ ngɛraka ha takarata pɛ Sɔ: «Abraham mɛkara Sɔ, mɛgi Sɔ zɔka wɛnɛ tuka *nzeng wi.»

⁴ Wan ha kɛa wan-tom pɛa, bo hazu a ngoya mɛ de yo nɛ sila wa na, ma, hazu lɛma ka lɛm nde, wɛnɛ akɛ wan-tom pɛa.

⁵ Pɛ Sɔ yo nɛtɛ, wɛnɛ gde wi nzeng ha li wa, bo hazu tom pɛ wia na, ma, hazu wia mɛkara wɛnɛ, wɛnɛ ka de nde, hio wan-kafi wɛnɛ atɛ hio nzeng wi ha li wa.

⁶ Yo nê ɛngi, ka *kongapora David batɔ wen totɛ pɛ wi ndɔng ka Sɔ zɔk mbwa tuka nzeng wi, ngase ka mbwa tɛ de ma dede tom na. A batɔ:

⁷ «Totɛ ha wi ndɔng ka Sɔ guo kpandele pɛ mbwa yunɛ, nɛ ka Sɔ biso *sɛmbɔ pɛ mbwa kari!

⁸ Totɛ ha wi ndɔng ka *Kongawan tɔl gdangamɔ pɛ mbwa na.»

⁹ Ɔ ani mɔ nde, totɛ ɛngɛ ka David batɔ wena kɛ, yo sɔna nê pɛ hio *zuife, hio wan-gɔn sɔru, mana, yo fin nê pɛ hio olo kandɔ nde? Ɔ tɔa sising nde, Sɔ zɔka Abraham tuka nzeng wi hazu Abraham mɛkara wɛnɛ.

¹⁰ Ɔ ani mɔ fin nde, Sɔ dea mɛgi sɔngsi ing ki Abraham tɛ gɔn sɔru wa, mana ha pata? Ey, Sɔ dea mɛgi sɔngsi ing ki Abraham tɛ gɔn sɔru wa.

¹¹ Abraham mɛkara Sɔ, nɛ Sɔ zɔka wɛnɛ tuka nzeng wi, gde a tɛ gɔn ka sɔru wa na. Sɔ haa nu ha wɛnɛ mɛ gɔn sɔru wa, hazu gde ma sali ha tɛ wa ka osi nde, a mɛkara Sɔ kari. Mɛgi Abraham tɛ bo nê bafa mɛ hio wan-sɔru fɛt ka mɛkara Sɔ, nɛ ka Sɔ gdea mbwa nzeng ha li wa.

¹² Abraham dung fin nê bafa mɛ hio wan-gɔn sɔru ndɔng, ka gɔn sɔru mbwa nɛgbelea na, ma, ka nak pata ngbabafa mbwa, Abraham, nɛ ka mɛkara Sɔ tuka wɛnɛ dea sɔngsi nɛ gɔna sɔru wa.

Mɔ ka Sɔ gɔna nua ha hio wi ndɔng ka mɛkiri wɛnɛ

¹³ Sɔ bagɔn nu ha Abraham nɛ hio bezang pɛa sɔngsi nde, a beha mbwa nzan tuka mɔ likɔ. Sɔ gɔna nu ɛngɛ bo hazu Abraham pama *mbonga na. Ma, a gɔna nu ɛngɛ hazu Abraham tɛ bo nê *nzeng wi ha li wa nɛ wal mɛkaramɔ pɛa.

¹⁴ Ka bo se nde, yo sɔna nê wi ndɔng ka pam mbonga ha bekpa mɔ ka Sɔ gɔna nua, ki hio wi ndɔng ka mɛkiri Sɔ, mbwa mɛkiri pɛ mbwa nɛgbelea, nɛ ki gɔnanu pɛ Sɔ tɛ bo nê gbelemɔ fin.

¹⁵ Hio wi ha kimbolo mɛ pam mbonga pɛ Moïse gan, yo nê ɛngi ka mbwa lɛm nɛ ngambi pɛ Sɔ. Yo sɔna ha bhandi ka mbonga bo ang na, ka hio wi lɛm tukili yo na.

¹⁶ Mɛgi, gɔnanu pɛ Sɔ, yo sɔna hazu wi ndɔng ka mɛkiri wɛnɛ, tuka nde, yo adung nê mɔ ka Sɔ ha ha mbwa nɛ gangtɛ. A ngoya mɛ ha yo ha hio bezang pɛ Abraham fɛt mburr. Yo bo sɔna ha wi ndɔng ka pam mbonga pɛ Moïse, na, ma, yo ha wi fɛt ka mɛkiri Sɔ tuka Abraham, hazu Abraham nê bafa ɔ fɛt.

¹⁷ Yo gbesi tuka ɛ ngɛraka ha takarata pɛ Sɔ: «Mi gdea mɛ gdibafa hazu hio dɔka kandɔ.» Mɔ hɔa mɛgi hazu Abraham mɛkara Sɔ, Sɔ ka ha tunɔ ha hio fiowi fin nɛ mbinga, nɛ ka de tuka nde, hio mɔ ka tɛ dung ang sɔngsi na, yo adung ang sising.

¹⁸ Sɔ gɔna nu ha Abraham nde, «Mɛ bedung bafa mɛ hio dɔka kandɔ», nɛ nde, «hio bezang pɛ mɛ bedung nɛdɔka.» Abraham bhɔna ka ha mɛkara Sɔ, nɛ ha gdea tazu wa ha tɛ Sɔ, ngase ka ɛ zɔka nde, mɔ lɛm hɔ mɛgi na.

¹⁹ Hazu ha ngimɔ ɛngi Abraham tɛ bo hapɛtɛ bɛlɛ gɔmmay ndang, tɛ wa gbɛla kari, nɛ Sara, ko pɛa, dungɔ nê nakomba. Ngase ɛngi, a tɛ kati mɛ mɛkiri Sɔ na.

²⁰ A tɛ si kafɛ ha gɔnanu pɛ Sɔ na. Ma, ha zang mɔ ndɔng fɛt a tɛ bo ha mɛkara Sɔ nɛngaya pen mɔ sɔngsi, nɛ a dungɔ ha lukoso Sɔ.

²¹ A dungɔ nɛ nɔa nging ha gdea tazu wa ha tɛ Sɔ nde, Sɔ lɛma lɛmsiri gɔnanu pɛa.

²² Mɛgi, yo nê hazu mɛkaramɔ pɛa, ka Sɔ zɔka Abraham tuka nzeng wi.

²³ Wen ɛngɛ nde, Sɔ zɔka Abraham tuka nzeng wi, ɛ tɛ ngɛriki yo sɔna hazu Abraham na.

²⁴ Ma, ɛ ngɛraka yo hazu ɔ fin. Sɔ zɔka ɔ tuka nzeng wi hazu ɔ mɛkara wɛnɛ, wɛnɛ ka guo Jésus, *Kongawan pɛ ɔ, ha soko hio fiowi.

²⁵ Sɔ haa wal nde, Jésus afe gɔn nɛ zu gdangamɔ ka ɔ dea. Nɛ a guo wɛnɛ ha soko hio fiowi tuka nde, ɔ akpa wal mɛ dung nzeng ha li wa.