Rome 3 - Takarata pɛ Sɔ Mbombe Mbon

¹ Ka mɔ dung tuka ɛngi, hio zuife dung nɛ nge mɔ ge, ka hio olo kandɔ tɛ kpa na, ge nde? Mbwa kpaa ma dedemɔ nɛ wal gɔna sɔru, nde?

² Ey, mbwa kpaa dedemɔ ang nɛ wal fɛt. Hazu, ha bosia, Sɔ gdea hio wen pɛa ha kɔ mbwa, hio zuife.

³ Kpasawen, hio ma zuife tɛ dung nɛ mboazu ha li Sɔ na. Ma, ɛngi bedol Sɔ mɛ bhɔn nɛ mboazu nde?

⁴ Way! Yo bo mɛgi na. Ɔ aing nde, Sɔ bhɔna ha tɔa tɛwen, ngase ka hio wi fɛt ha tɔa dalo. Yo gbesi tuka ɛ ngɛraka ha takarata pɛ Sɔ: «Hio wi being nde, mɛ nɛ nzeng nɛ wal wen nu mɛ. Nɛ ha li kita mɛ began zu hio wan-fundi mɛ.»

⁵ Hio ma wi ha tɔa nde, ka deamɔ pɛ mbwa bo nzeng na, yo nê ma dedemɔ, hazu ɛngi osi long nde, deamɔ pɛ Sɔ nɛ nzeng. Mɛgi, mbwa bhɔna ha tɔa nde, ka Sɔ bendulsi mbwa ha li kita pɛa, wɛnɛ bo fin nɛ nzeng na.

⁶ Yo bo mɛgi na. Sɔ nɛ nzeng, wɛnɛ abo se nzeng na, ki a begɔn kita ha zu hio wi mɔ nzan mɛng?

⁷ Nɛ hio ma wi ha tɔa fin nde, ka mbwa tɔ dalo, yo nê ma dedemɔ fin, hazu yo osi long nde, Sɔ nê wan-tɔ tɛwen, nɛ wɛnɛ lɛma nde, hio wi alukisi wɛnɛ. Mɛgi, mbwa bhɔna ha tɔa nde, hazu ge, Sɔ begɔn fin kita ha zu mbwa, hio *wan-de gdangamɔ, ge nde?

⁸ Ka mɛ takiri mɔ mɛgi, mɛ betɔ fin nde, ɔ ade gdangamɔ tuka nde, yo agbasi dedemɔ ka Sɔ de. Hio ma wi ha tɔa gdanga lingtɛ mi nde, mi ha tɔa tili wen mɛgi. Yo nê Sɔ ka begɔn kita ba mbwa, hazu mbwa lɛma nɛ kita pɛa.

Hio wi fɛt dea gdangamɔ

⁹ Mɛng? Ɔ, hio *zuife, ɔ nɛ dedea pen hio olo kandɔ nde? Way! Yo bo mɛgi na. Mi tɔa kari nde, hio zuife nɛ hio olo kandɔ, mbwa fɛt nê bala ha si gdangamɔ gbesi.

¹⁰ Yo gbesi tuka ɛ ngɛraka ha takarata pɛ Sɔ: «Ma *nzeng wi ndang ha li Sɔ bona, ndang bona.

¹¹ Ma wi ndang ka dung nɛ mbaramɔ bona. Ma wi ndang ka ki wal mɛ ing Sɔ bona.

¹² Hio wi fɛt laka wal pɛ Sɔ gde, nɛ mbwa yɔamɔ gbesi. Ma wi ndang ka de dedemɔ bona, ndang bona.

¹³ Gɛl mbwa tuka gdanga pɛlmɔ ka gbo ha zang kɔfio. Lembe mbwa ha osala hio wi. Kpatanu mbwa ha gbosasa nɛ nzong pɛ da gɔk.

¹⁴ Nu mbwa dona nɛ panga fomi.

¹⁵ Mbwa nɛ hasatɛ hazu nɛ nɛ gbɛ wi.

¹⁶ Mbwa ha gdangsa mɔ, nɛ mbwa ha gdea ngɔtɛ ha bhandi fɛt ka mbwa nɛ ang.

¹⁷ Mbwa ing wal mɛ dung nɛ gaamɔ ha soko hio wi na.

¹⁸ Mbwa bo nɛ ke pɛ Sɔ ha sila mbwa ndang na.»

¹⁹ Ɔ ingɔ nde, hio wen *mbonga pɛ Moïse fɛt zɔk hio wi ndɔng ka dung ha si mbonga. Mɛgi, wi ndang bo nɛ ma wen hazu ngangi nɛ tɛ wa ha li Sɔ na. Hio wi mɔ nzan fɛt lɛma nɛ kita pɛ Sɔ.

²⁰ Nɛ wal dea mɔ lɛm nɛ wen mbonga, ma wi ndang lɛm dung nzeng ha li Sɔ na. Mbonga ha sɔna nɛ wal ha hio wi mɛ ing nde, mbwa fɛt ha dea gdangamɔ.

Wal ka Sɔ gde nɛ wi nzeng ha li wa

²¹ Sising, Sɔ gbasa ha ɔ wal ka wɛnɛ lɛma mɛ gde nɛ wi nzeng ha li wa. Yo bo nê wal pama hio wen *mbonga na. Mbonga pɛ Moïse nɛ pɛa tɛ, nɛ hio *wan-tɔkuliwen batɔ wen ɛngɛ bingiri.

²² Wi ka mɛkiri Jésus-Christ, Sɔ begde wɛnɛ nzeng ha li wa. Sɔ gbosasa wal ɛngi ha wi ndɔng fɛt ka mɛkiri Jésus-Christ. A gba pɛa soko wi na.

²³ Wi fɛt dea gdangamɔ, mɛgi, mbwa lɛm fin nɛ *lɛkɛ-lɛkɛmɔ pɛ Sɔ na.

²⁴ Ma, nɛ wal *dede sila pɛa, Sɔ gde mbwa nzeng ha li wa nɛ gangtɛ. A de mɛgi nɛ wal Jésus-Christ ka guo *sɛmbɔ pɛ mbwa yunɛ.

^25-26 Sɔ haa Jésus nɛ sadaka. Nɛ wal fio pɛa, Jésus kpea sɛmbɔ pɛ hio wi ka mɛkiri wɛnɛ. Yo nê ɛngi, ka Sɔ osa nde, wɛnɛ nɛ nzeng. Ha ngimɔ sɔngsi wɛnɛ baa sila wa nɛ kɔ, nɛ wɛnɛ tɛ gɔn kita ha zu hio *wan-de gdangamɔ na. Ma, ha ngimɔ sising, wɛnɛ gbasa wal ka wɛnɛ gde nɛ wi nzeng ha li wa. Ɛngi osi nɛkpasa nde, Sɔ nɛ nzeng, nɛ hio wi ka mɛkiri Jésus, wɛnɛ gde mbwa nzeng ha li wa.

²⁷ Ka mɔ dung mɛgi, ma wal ka ɔ besu nɛ tɛ fin ha ndo? Wal mɛ sutɛ bo fin na, hazu gasa mɔ, yo bo nê dea mɔ lɛm nɛ mbonga na, ma, yo nê mɛkara Jésus.

²⁸ Hazu ɔ ingɔ nde, Sɔ gde wi nzeng ha li wa hazu wia mɛkara Jésus, bo hazu wia dea mɔ lɛm nɛ mbonga na.

²⁹ Mana ɛnɛ takiri pɛ ɛnɛ nde, Sɔ nê Sɔ pɛ hio *zuife sɔna nde? Bo nê wɛnɛ fin nê Sɔ pɛ hio olo kandɔ, na nde? Ey, wɛnɛ fin nê Sɔ pɛ hio olo kandɔ.

³⁰ Hazu, Sɔ ka nê ndang sɔna. Wi ka mɛkara Jésus, mana wia nê zuife, mana wia bo nê zuife na, Sɔ begde wɛnɛ nzeng ha li wa.

³¹ Mana, nɛ wal mɛkara Jésus, ɔ dea tuka nde, mbonga pɛ Moïse atɛ tum mɔ nde? Way, yo bo mɛgi na. Ma, nɛ wal mɛkara Jésus, ɔ osi nɛ tɛ goto mbonga ha hio wi.