Rome 14 - Takarata pɛ Sɔ Mbombe Mbon

Hio ngawi hinɛ hio mɔka wi ha wal mɔ Sɔ

¹ Wi ka dung nɛ mɔka ha wal mɔ Sɔ, ɛnɛ ba wɛnɛ nɛ dede kɔ. Ka ɛnɛ asikafɛ hinɛ wɛnɛ hazu ndɔki deamɔ ka wɛnɛ zɔka nɛ dedea mana nɛ gdanga na.

² Hio ma wi mɛkara nde, mbwa lɛma yɔng tili yɔngamɔ fɛt. Ma, hio wi ndɔng ka dung nɛ mɔka ha wal mɔ Sɔ, mbwa yɔng pɛ mbwa sɔna nɛ wakpo.

³ Wi ka yɔng tili yɔngamɔ fɛt, lɛma nde, ka wɛnɛ abhɛsiri wi ka zim hio ma tili yɔngamɔ na. Nɛ wi ka zim hio ma yɔngamɔ, ka wɛnɛ agɔn kita ha zu wi, ka yɔng tili mɔ fɛt na. Hazu Sɔ baa wia nɛ dede kɔ kari.

⁴ Pɛ mɛ, mɛ zɔk tɛ mɛ tuka o hazu gɔn kita ha zu wan-tom pɛ ma mbing wi, o nde? Ngase wɛnɛ bhɔna ha yola ha ngɔn, ngase wɛnɛ teka ha nu, yo zɔk nɛ wan pɛa sɔna. Ma, wɛnɛ bebhɔn ha yola ha ngɔn hazu yo nê *Kongawan ka dung nɛ ngatɛ mɛ yolsi wɛnɛ ha ngɔn.

⁵ Hio ma wi takiri nde, ha li Sɔ, hio ma swe ang ka dung nɛ zioa pen hio oloa. Ma, hio ma wi takiri pɛ mbwa nde, hio swe fɛt gbesi, yo pen may na. Mɛgi, dea nde, wi ndang ndang aing nɛdedea mɔ ka wɛnɛ takiri hazua.

⁶ Wi ka takiri nde, ma swe nɛ zioa pen mbinga, a de mɛgi hazu lukisi Kongawan. Wi ka yɔng tili yɔngamɔ fɛt, a tɔ oeba ha Sɔ hazua, nɛ wɛnɛ ha yɔnga yo hazu lukisi Kongawan. Wi ka zim hio ma tili yɔngamɔ, a de ka fin mɛgi gbesi hazu lukisi Kongawan, nɛ wɛnɛ fin ha tɔa oeba ha Sɔ.

⁷ Hazu, ha soko ɔ, ma wi ka dung nɛ zutunɔ hazu tɛ wa nɛ pɛa tɛ bona. Nɛ ma wi ka fe hazu tɛ wa nɛ pɛa tɛ bona.

⁸ Ka ɔ dung nɛ zutunɔ, ɔ dung nɛ zutunɔ hazu lukisi Kongawan. Nɛ ka ɔ fe, ɔ fe ka fin hazu lukisi Kongawan. Mɛgi, ngase ka ɔ dung nɛ zutunɔ, mana ka ɔ fe, ɔ ka fin nê hio wi pɛ Kongawan.

⁹ Mɛgi Christ fea, nɛ wɛnɛ guotɛ nɛ zutunɔ fin nɛ mbinga hazu dung nê Kongawan pɛ hio fiowi nɛ pɛ hio tunɔ wi.

¹⁰ Ma, hazu ge mɛ gɔn kita ha zu ya mɛ ge nde? Nɛ mɛ, hazu ge mɛ bhɛsiri ya mɛ ge nde? Ɔ hinɛ ɛnɛ fɛt benɛ yol ha li Sɔ nde, ka wɛnɛ agɔn kita ha zu ɔ.

¹¹ Yo gbesi tuka Sɔ tɔa ha takarata pɛa: «Mi, Kongawan, mi kan nɛ tunɔ pɔm nde, zigolo wi ndang ndang fɛt bengbi ha si mi, nɛ lembe wi fɛt belukisi Sɔ.»

¹² Mɛgi, ɔ ndang ndang fɛt, ɔ betɔ nɛ pɛ ɔ tɛ pata deamɔ pɛ ɔ ha Sɔ.

Ka mɛ adak ya mɛ pi ha dea gdangamɔ na

¹³ Mɛgi, ɔ lak gɔna kita ha zu may gde. Ma, ɛnɛ kpo nɛ zuwen sɔna nde, ka ɛnɛ ade ma mɔ ndang ka teksi ya ɛnɛ ha wal mɔ Sɔ, mana ka dak wɛnɛ pi ha dea gdangamɔ na.

¹⁴ Nɛ wal sɔy ka mi de hinɛ *Kongawan Jésus, mi ingɔ nɛdedea fɛt nde, yɔngamɔ ndang bo nɛ nzing ha li Sɔ na. Ma, ka ma wi takiri pɛa nde, ma tili yɔngamɔ nɛ nzing ha li Sɔ, yɔngamɔ ɛngɛ tɛ bo nɛ nzing ha li wia.

¹⁵ Ka mɛ ha ngɔtɛ ha ya mɛ nɛ wal yɔnga tili yɔngamɔ mɛgi, yo osi nde, mɛ bo fin ha ngoya wɛnɛ na. Christ fea gɔn zu ya mɛ, mɛgi dea nde, ka mɛ abhondisi wɛnɛ nɛ wal yɔngamɔ pɛ mɛ na.

¹⁶ Mɔ ka ɛnɛ zɔk tuka dedemɔ ha li ɛnɛ, dea nde, ka ɛnɛ aha wal ha hio wi mɛ fɛngsi yo na.

¹⁷ Hazu, *Kongakandɔ pɛ Sɔ, yo zɔk wen yɔngamɔ nɛ nɔa mɔ na. Ma, yo zɔk wen dea nzengmɔ, gaamɔ, nɛ totɛ ka tɛ nɛ wal *Nzɔy-Sɔtɛ.

¹⁸ Wi ka de tom ha Christ tuka ɛngi, Sɔ bede totɛ tɛ wa, nɛ hio wi betɔ dede lingtɛ wa.

¹⁹ Hazu ɛngi, ɔ gbɛngsi tɛ ɔ hazu de mɔ ka ha gaamɔ ha hio wi, nɛ hazu gbakiri may mɛ kpɔtɛ ha wal mɔ Sɔ.

²⁰ Ka mɛ agdangsi tom pɛ Sɔ ha wen yɔngamɔ na. Kpasawen, ma yɔngamɔ ka de nde, wi adung nɛ nzing ha li Sɔ ndang bona. Ma, yo nɛ gdangaa mɛ yɔng ma mɔ, ka teksi ma wi ha wal mɔ Sɔ.

²¹ Dea gdang, mɛ akafi yɔnga sari, mɛ akafi nɔa dɔkɔ, nɛ mɛ akafi fin dea olo mɔ fɛt ka lɛma teksi ya mɛ ha wal mɔ Sɔ.

²² Mɔ ka mɛ nɛ pɛ mɛ tɛ mɛkiri ha wena, mɛ pam yo ha soko mɛ hinɛ Sɔ sɔna. Totɛ ha wi ka de mɔ ka wɛnɛ mɛkiri tuka dedemɔ, nɛ ka sila wa gɔn kita ba nɛ tɛ wa hazua na.

²³ Ma, ka ma wi yɔng ma tili yɔngamɔ nɛ takaratɛ, Sɔ begɔn kita ba nɛ wɛnɛ hazu a dea mɔ ka tɛ lɛm nɛ mɛkaramɔ pɛa na. Hio mɔ fɛt ka ma wi de, nɛ ka lɛm nɛ mɛkaramɔ pɛa na, yo nê gdangamɔ.