Gbasamɔ 18 - Takarata pɛ Sɔ Mbombe Mbon

Babilone teka

¹ Hapata ɛngi, mi zɔka ma mbing *telenge ha ngɔn ha ziloa ha nu. Wɛnɛ nɛ gasa ziomɔ, nɛ yolo tɛ wa baa ha zu nu fɛt.

² A gdɔra nɛ ngagɛl: «Gasa le Babilone teka, yo teka kari. Yo tɛ bo nê bhandi pɛ hio gdanga sɔtɛ. Yo tɛ bo nê bhandi wusi tɛ pɛ hio tili sɔtɛ fɛt mɔ nzing, nɛ pɛ hio tili nɔy fɛt mɔ nzing nɛ mɔ nyɛl.

³ Hazu hio kandɔ fɛt nɔa ba li vigne mɔ wanza pɛa. Hio *kongapora mɔ zu nu dea wanza hinɛ wɛnɛ, nɛ hio wan-de gɛnɛ mɔ zu nu kpaa mbɔli hebhe nɛ wal yɛbha tandamɔ pɛa.»

⁴ Hapata, mi zea ma gɛl ha ngɔn ka tɔa: «Mɛ, kandɔ pɔm, mɛ gbo ha Babilone pen, yu nde, mɛ betɛ de sɔy hinɛ wɛnɛ ha dea gdangamɔ, nɛ hio kemɔ betɛ mɛl mɛ tuka wɛnɛ.

⁵ Hazu, hio gdangamɔ pɛa yɛbha dang zu may kululu hɔ ha ngɔn. Nɛ tazu Sɔ tɛ bisi nɛ kalbho-kalbho deamɔ pɛa na.

⁶ Ɛnɛ ade ha tɛ wa tuka a dea ha tɛ ɛnɛ. Mɔ ka wɛnɛ dea, ɛnɛ akifiri yo ha wɛnɛ zebwa. Ɛnɛ ku li vigne ka ngaya zebwa pen ɛngɛ ka wɛnɛ haa ha ɛnɛ mɛ nɔ, gɔsi ha zang kɔpɔ pɛa.

⁷ Ɛnɛ aha wɛnɛ dɔka yimtɛ nɛ ngɔtɛ lɛm nɛ dɔka *lɛkɛ-lɛkɛmɔ nɛ tandamɔ ka wɛnɛ bade le ha zanga. Wɛnɛ batɔ ha sila wa nde, ɛ ha dungɔnu hakɛ tuka kongapora, ɛ bo nê nagula na, ɛ lɛm kpa ngɔtɛ ndang na.

⁸ Yo nê ɛngi, hio kemɔ tuka ginga zɛlɛ fio, ngɔtɛ, nɛ ginga foto betek ha zu wa ha ndangtɛ swe ndang. We bebesisi wɛnɛ, hazu *Kongawan Sɔ, ka gɔna kita ha zu wa, nɛ ngatɛ fɛt.»

⁹ Hio kongapora mɔ zu nu bade wanza hinɛ Babilone, nɛ mbwa bade le ha zang tandamɔ hinɛ wɛnɛ. Mɛgi, mbwa behe kwa nɛ zim mɔ hazu wa ha ngimɔ ka mbwa bezɔk zɛwe ka besisi wɛnɛ.

¹⁰ Gasa ke bede mbwa ka mbwa bezɔk gasa yukotomɔ pɛa. Nɛ mbwa beyol nɛyɛa nɛ tɔa: «Ngɔtɛ, ngɔtɛ ha mɛ, gasa nɛ zio le Babilone! Ngonga ndang lɛma hazu Sɔ mɛ gɔn kita ha zu mɛ!»

¹¹ Hio wan-de gɛnɛ mɔ zu nu fin behe kwa nɛ zim mɔ hazu wa, hazu ma wi ndang lɛm hɛ hio toy pɛ mbwa fin na.

¹² Hio toy ndɔng, yo nê hio toytɛ mɔ gbɛbolo nɛ mɔ bubolo, mɔ lɔka ta nɛ mɔ mɛtɛtɛ, hio tili ngagɛnɛ latɛ mɔ lɛgbɛ-lɛgbɛa nɛ mɔ gbɛa nzong-nzong, hio tili mɔ dede te nɛtɛ-nɛtɛ, hio tili toy mɔ yini folo, mɔ ngagɛnɛ te, mɔ gbɛwele, mɔ bolo, nɛ mɔ ngagɛnɛ ta,

¹³ hio tili wate ka de nde yɔngamɔ ayefi, hio tili liyama, paka nɛ kulo pɛlmɔ mire, hio li vigne, nɔ, fok nɛ kpalmɔa, hio nday, sami, yanga, puspus mɔ yanga, hio bala nɛ hio wi ka ɛ baa ha bulo.

¹⁴ Nɛ hio wan-de gɛnɛ betɔ: «Hio mɔ ka sila mɛ dea wɔa, yo pena nɛyɛa nɛ mɛ. Hio kpaamɔ nɛ hio tandamɔ pɛ mɛ yɔa mɔ pen ha kɔ mɛ, mɛ lɛm kpa yo fin ndang na.»

¹⁵ Hio wan-de gɛnɛ ka kpaa mɔ nɛdɔka nɛ wal dea gɛnɛ ha le Babilone, mbwa bezɔk gasa yukotomɔ pɛa. Mɛgi gasa ke bede mbwa, nɛ mbwa beyol nɛyɛa. Mbwa behe kwa nɛ mbwa belokitɛ.

¹⁶ Mbwa betɔ: «Ngɔtɛ, ngɔtɛ ha mɛ, gasa le! Mɛ bayol hio ngagɛnɛ la mɔ lɛgbɛ-lɛgbɛa nɛ mɔ gbɛa nzong-nzong. Nɛ hio toytɛ mɔ gbɛbolo, mɔ lɔka ta nɛ mɔ mɛtɛtɛ badon ha tɛ mɛ.

¹⁷ Ngonga ndang lɛma hazu yangili yɛbhɛ-yɛbhɛ kpaamɔ pɛ mɛ!» Hio wan-ba kuga fɛt, hinɛ hio wan-toma nɛ hio wan-yali, hio wi fɛt ka de tom ha li nana-litɔng, mbwa yola nɛyɛa.

¹⁸ Nɛ ka mbwa zɔka zɛwe ka besisi wɛnɛ, mbwa gdɔra nɛ tɔa: «Nge ma gasa le ka lɛma may nɛ gasa le ɛngɛ, ge nde?»

¹⁹ Mbwa aa gbutunu ha zu mbwa, mbwa hea kwa, mbwa lokatɛ, nɛ mbwa gdɔra: «Ngɔtɛ, ngɔtɛ ha mɛ, gasa le! Hio wan-kuga ha li nana-litɔng fɛt bakpa mɔ nɛdɔka nɛ wal yɛbhɛ-yɛbhɛ kpaamɔ pɛ mɛ. Ngonga ndang lɛma hazu yangili hio mɔ pɛ mɛ fɛt!»

²⁰ Ɛnɛ, hio wi mɔ ngɔn, hio wi pɛ Sɔ, hio *wan-nɛtom, nɛ hio *wan-tɔkuliwen, ɛnɛ ade totɛ hazu Sɔ gɔna kita ha zu Babilone mɛ kundiki nɛ ɛnɛ!

²¹ Hapata ɛngi, ma nga telenge kuo ma ta tuka gasa ta hɔn mɔ, pi ha zang nana-litɔng. Nɛ a tɔa: «Yo nê mɛgi ka Sɔ bepi gasa le Babilone nɛ zio kɔ. Ɛ lɛm kpa fin wɛnɛ nɛ mbinga ndang na.

²² Ha pɛ mɛ, ɛ lɛm fin ze hio wi ha mɛla kunde, mana ha bea gima, mana ha dɔma mbele, mana ha dɔma mbia ndang na. Ha pɛ mɛ, ɛ lɛm kpa fin ma wan-de zɛng ndang na, ngase zɛng pɛa mɛng. Ha pɛ mɛ, ɛ lɛm fin ze gisi hɔna kpalmɔ ndang na.

²³ Ha pɛ mɛ, yolo lamba lɛm ba fin ndang na. Ha pɛ mɛ, ɛ lɛm fin ze gɛl wan-si bhoko hinɛ ko pɛa ndang na. Mɔ bedung mɛgi, hazu hio wan-de gɛnɛ pɛ mɛ badung nɛ gasaa pen fɛt, nɛ hazu mɛ baosili hio kandɔ fɛt nɛ dua pɛ mɛ.»

²⁴ Sɔ gɔna kita ha zu Babilone, hazu ha pɛa, ɛ kpaa tɔktɛ hio wan-tɔkuliwen, tɔktɛ hio wi pɛ Sɔ, nɛ tɔktɛ hio wi ndɔng fɛt ka ɛ gbɛa ha zu nu.