Gbasamɔ 16 - Takarata pɛ Sɔ Mbombe Mbon

Hio kɔpɔ mɔrkɔ zanga bwa mɔ ngambi pɛ Sɔ

¹ Hapata ɛngi, mi zea ma gɛl ka gboa ha zang *gasa twa Sɔ. Yo tɔa ha hio *telenge mɔrkɔ zanga bwa: «Ɛnɛ nɛ nɛ gɔsi hio kɔpɔ mɔrkɔ zanga bwa mɔ ngambi pɛ Sɔ ha zu nu.»

² Nɛ bosi telenge nɛa nɛ gɔsi kɔpɔ pɛa ha zu nu. Mɛgi, hio gdanga dalɛ ka yim pentɛ, gboa ha tɛ hio wi ndɔng ka dung nɛ dafu ngɔnzu, nɛ ka lukisi zizi tɛ wa tuka ma sɔ.

³ Zebwa telenge gɔsa kɔpɔ pɛa ha zang nana-litɔng. Nɛ lia kiforo tuka tɔktɛ wɔl wi. Mɛgi, hio tunɔ mɔ ha zang nana-litɔng fɛt fea.

⁴ Zetar telenge gɔsa kɔpɔ pɛa ha hio nanali nɛ ha hio zu ndong li fɛt. Nɛ hio lia kifo tɔk.

⁵ Nɛ mi zea gɛl telenge ɛngɛ ka dung nɛ ziomɔ ha zu hio li, a tɔa: «Mɛ ka gɔna kita mɛgi, mɛ nɛ nzeng. Mɛ nê nzɔy wi, ka dung ang, nɛ ka badung ang.

⁶ Ey, hio wi gɔsa tɔktɛ hio wi pɛ mɛ nɛ tɔktɛ hio *wan-tɔkuliwen. Nɛ sising mɛ haa mbwa tɔk mɛ nɔ. Ɛngi nê mɔ ka lɛma hazu mbwa.»

⁷ Hapata, mi zea ma gɛl ka gboa ha bhandi ha sadaka, yo tɔa: «Ey, *Kongawan Sɔ, mɛ nê wan-zu mɔ fɛt, hio kita pɛ mɛ nɛ kpasa, nɛ nzeng.»

⁸ Zenar telenge gɔsa kɔpɔ pɛa ha li swe. Nɛ swe kpaa ziomɔ mɛ dɔ hio wi nɛ we pɛa.

⁹ Mɛgi, swe dɔa hio wi nɛ gasa gbɛngamɔ, nɛ mbwa fɛngsa ling Sɔ ka dung nɛ ziomɔ mɛ tomsi hio kemɔ mɛgi. Ma, mbwa tɛ kifiri sila mbwa na, nɛ mbwa kafa lukoso Sɔ.

¹⁰ Zemɔrkɔ telenge gɔsa kɔpɔ pɛa ha zu solowan pɛ ngɔnzu. Mɛgi, ngɛ-ngɛ-ngɛ tutum gdɔka kandɔnu ka ngɔnzu dung *kongapora ang. Nɛ hio wi yɔnga lembe mbwa hazu gasa yimtɛ ka mbwa kpaa.

¹¹ Mbwa fɛngsa Sɔ ka dung ha zang ngɔn, hazu hio yimtɛ nɛ dalɛ pɛ mbwa. Ma, mbwa tɛ to gdong ha hio gdanga deamɔ pɛ mbwa na.

¹² Zemɔrkɔ zanga ndang telenge gɔsa kɔpɔ pɛa ha zang gasa nanali Efrate. Nɛ yo ɔsa koti, hazu gbosisi wal ha hio kongawan ka gutɛ ha wal gutɛ swe.

¹³ Nɛ mi zɔka hio ma gdanga sɔtɛ tar tuka hio na-gdangdole ha gboa ha nu ndibha, ha nu ngɔnzu, nɛ ha nu wan-tɔkuliwen dalo.

¹⁴ Yo nê *Satan ha tomsi hio sɔtɛ ndɔng, ka de hio *mɔweka. Mbwa nɛa ha pɛ hio kongapora mɔ zu nu fɛt hazu wesiri mbwa tuka nde, mbwa abi bulo ha gasa swe pɛ Sɔ, wan-zu mɔ fɛt.

¹⁵ Kongawan tɔa: «Ɛnɛ pangay, mi betɛ tuka wanzu. Totɛ ha wi ka yang la, nɛ ka pam latɛ pɛa hapɛtɛ wa. Mɛgi, wɛnɛ lɛm yal nɛ sɔngɛrɛ na, nɛ foy lɛm de wɛnɛ ha li hio wi na.»

¹⁶ Hio gdanga sɔtɛ ndɔng wesara hio kongapora ha bhandi ndang. Nɛ nu *hebro ɛ sa ling bhandi ɛngɛ nde, Harmagedon.

¹⁷ Zemɔrkɔ zanga bwa telenge gɔsa kɔpɔ pɛa ha zang bok. Nɛ ma gasa gɛl gboa ha solowan ka dung ha zang gasa twa Sɔ. Yo tɔa: «Yo kara!»

¹⁸ Pioli kolo, gisi nɛ tubho da kolo gboa ha ngɔn, nɛ nu yaka nɛngaya. Angiri ha ngimɔ ka hio wi ang ha zu nu, nu tɛ yak nɛngaya mɛgi swe ndang na. Yaka nu ɛngɛ penatɛ.

¹⁹ Mɛgi, gasa le Babilone gbaa soko tar, nɛ hio gasa le pɛ hio kandɔ fɛt tukolo. Tazu Sɔ tɛ bisi nɛ gasa le Babilone na. A haa wɛnɛ kɔpɔ mɔ gdanga ngambi pɛa mɛ nɔ.

²⁰ Hio kisi fɛt yɛmala ha si li, nɛ ɛ kpa hio ngari fin na.

²¹ Nɛ gasa kolo bhɔkala ɔla ha zu hio wi. Zio kili bhɔkala ndang ndang lɛma nɛ kilo bhukɔa nar. Nɛ hio wi fɛngsa Sɔ hazu kemɔ mɔ bhɔkala, ka dung nê gdanga kemɔ nɛkpasa.