Gbasamɔ 10 - Takarata pɛ Sɔ Mbombe Mbon

* Telenge nɛ bebe takarata

¹ Hapata ɛngi, mi zɔka ma mbing nga telenge ka guotɛ ha ngɔn zil. Wɛnɛ yola buswe tuka la, nɛ ndumbe dungɔ zikiri zu wa. Zangli wa dungɔ ha baa tuka swe, nɛ hio nanga wa dungɔ tuka hio mbing lembe we.

² Ha kɔ wa, a baa ma bebe takarata nɛ gbosasaa. A gdea nanga wa mɔ wekɔ ha zu nana-litɔng, nɛ nanga wa mɔ gare ha zu nu.

³ Wɛnɛ gdɔra nɛ ngagɛl tuka dila ka bembi hirr. Nɛ ka wɛnɛ gdɔra kari, hio da kolo mɔrkɔ zanga bwa fuo.

⁴ Hapata hio fuo da kolo mɔrkɔ zanga bwa, mi bangoy ngɛriki mɔ. Ma, mi zea ma gɛl ha ngɔn ka tɔa: «Mɛ pam nɛ wuso mɔ ka hio da kolo mɔrkɔ zanga bwa tɔa. Ka mɛ angɛriki yo na.»

⁵ Ndangtɛ telenge ɛngɛ ka mi zɔka ha yola nɛ nanga wa ndang ha zu nana-litɔng nɛ ma ndang ha zu nu, guo wekɔ wa ha ngɔn.

⁶ A kana mɔ nɛ ling Sɔ ka dung nɛ zutunɔ kpoo nɛ kpoo, ka dea ngɔn nɛ mɔ fɛt ang, ka dea nu nɛ mɔ fɛt ang, nɛ ka dea nana-litɔng nɛ mɔ fɛt ang. A tɔa: «Ngimɔ zik fin na.

⁷ Ha ngimɔ dɔma mbia pɛ zemɔrkɔ zanga bwa telenge, Sɔ belɛmsiri mɔ ka wɛnɛ babheki nɛ wuso. A bede mɔ tuka wɛnɛ batɔ wena ha hio wan-tom pɛa, hio *wan-tɔkuliwen.»

⁸ Nɛ gɛl ka tɛa nɛ ngɔn, nɛ ka mi zea sɔngsi, wola mɔ ha mi fin nɛ tɔa: «Mɛ nɛ ha pɛ telenge ka yol nɛ nanga wa ndang ha zu nana-litɔng nɛ ma ndang ha zu nu, nɛ mɛ ku takarata ka dung nɛ gbosasaa ha kɔ wa.»

⁹ Nɛ mi tiko nɛ ha pɛ telenge ɛngɛ, nɛ mi ana bebe takarata ɛngɛ ha kɔ wa. Nɛ wɛnɛ tɔa ha mi: «Mɛ ku yo, nɛ mɛ yɔng yo. Yo bepang ha zang mɛ zekeke, ma, yo beyefi ha nu mɛ lɔkɔ-lɔkɔ tuka nɔ gɔlɔ.»

¹⁰ Mi kuo takarata ɛngɛ ha kɔ wa, nɛ mi yɔnga yo gul. Yo yefa ha nu mi lɔkɔ-lɔkɔ tuka nɔ gɔlɔ, ma, ka mi gulo yo kari, yo tɛ bo nɛ pangaa zekeke ha zang mi.

¹¹ Hapata, ɛ tɔa ha mi fin: «Lɛma nde, mɛ atɔ kuliwen fin. Kuliwena bezɔk dɔka hio kandɔ, hio kandɔnu, hio nu le, nɛ hio *kongapora.»