Matthieu 28 - Takarata pɛ Sɔ Mbombe Mbon

Jésus guotɛ ha soko hio fiowi

¹ Hapata *swe ɔmtɛ, ha sutole sut mɔ swe dimasi, Marie Magdala nɛ mbinga Marie nɛa hazu zɔk zupisi.

² Nɛhasa nu yaka nɛngaya, hazu ma *telenge pɛ *Kongawan Sɔ zilo ha liswe tɛ, nɛ a kinso ta gdɔki nu zupisi gde hapɛtɛa, nɛ a dungɔnu ha zua.

³ Zang li wa dungɔ nɛ saa tuka piolikolo, nɛ la pɛa nɛ bua kpung-kpung.

⁴ Hio wan-bibulo ka pɛma zupisi yaka nɛ ke, nɛ mbwa gɔna ngiri tuka mbwa fea fe.

⁵ Ma, telenge wolamɔ ha hio bhoko ndɔng nɛ tɔa: «Ka ɛnɛ ayu ke na! Mi ingɔ nde, ɛnɛ ki nɛ Jésus ka ɛ ngbaa ha getakate.

⁶ Wɛnɛ bo hakɛ na. A guotɛ ha soko hio fiowi tuka a batɔ. Ɛnɛ tɛ, tɛ zɔk bhandi ka wɛnɛ ɔanu ang.

⁷ Mɛgi, ɛnɛ nɛ nɛhasa, nɛ tɔ ha hio *wan-yambimɔ pɛa: ‹Wɛnɛ guotɛ ha soko hio fiowi. Nɛ a pena sɔngsi ɛnɛ nɛ ha Galile. Ɛnɛ bezɔk wɛnɛ haki.› Ɛngɛ nê wen ka lɛma nde, mi atɔ yo ha ɛnɛ.»

⁸ Bhoko ndɔng laka zupisi gde nɛhasa. Ngase mbwa nɛ ke, totɛ dona sila mbwa. Mbwa sɔawi hazu ba kasia ha hio wan-yambimɔ pɛ Jésus.

⁹ Nɛhasa, Jésus kpaa may hinɛ mbwa nɛ a tɔa: «Wolmɔe!» Mbwa tiko tɛ, tɛ ba nanga wa, nɛ mbwa lukoso wɛnɛ.

¹⁰ Mɛgi Jésus tɔa ha mbwa: «Ka ɛnɛ ayu ke na! Ɛnɛ nɛ, nɛ tɔ ha hio ya mi nde, mbwa anɛ ha Galile. Mbwa bezɔk mi haki.»

Kasi pɛ hio wan-pɛm zupisi

¹¹ Ka bhoko ndɔng boka ha liwal, hio ma wan-bibulo ka pɛma zupisi sɔawi nɛ ha gasa le, nɛ ba kasi mɔ fɛt ka hɔa ha hio gasa wan-hasadaka.

¹² Mɛgi hio gasa wan-hasadaka wesara may hinɛ hio kotowi. Nɛ mbwa kpoa zuwen mɛ ha dɔka mbɔli ha hio wan-bibulo ndɔng.

¹³ Mbwa tɔa ha mbwa: «Ɛnɛ betɔ nde, hio *wan-yambimɔ pɛa tɛa nɛ zɛ tɛ zu wɔl wa, ha ngimɔ ka ɛnɛ ha ɔala.

¹⁴ Ka kasia lea zala gɔfɔrma Pilate, ɔ bebhɔngiri wen hinɛ wɛnɛ nde, ɛnɛ akpa yeksamɔ na.»

¹⁵ Mɛgi mbwa kuo mbɔli, nɛ mbwa deamɔ tuka ɛ tɔa ha mbwa. Nɛ wen ɛngɛ ha yambala ha soko hio *zuife kanɛ swe mɛsɛ.

Jésus gbasa tɛ ha hio * wan-yambimɔ pɛa

¹⁶ Hio wan-yambimɔ bhukɔ gbala ndang nɛa ha Galile, ha zu ngari ka Jésus baha nua ha mbwa sɔngsi.

¹⁷ Ka mbwa zɔka wɛnɛ, mbwa hilo ha si wa. Tangere, hio ma dungɔ ha sio kafɛ ha sila mbwa.

¹⁸ Nɛ Jésus tiko tɛ hapɛtɛ mbwa nɛ tɔa: «Sɔ gdea ziomɔ fɛt ha zang ngɔn nɛ ha zu nu ha kɔ mi.

¹⁹ Mɛgi ɛnɛ nɛ ha pɛ hio kandɔ fɛt. Nɛ ɛnɛ de tuka nde, mbwa atɛ wan-yambimɔ pɔm. Ɛnɛ gdumsi mbwa ha li nɛ ling Bafa mi, nɛ ling mi, Bewei pɛa, nɛ ling *Nzɔy-Sɔtɛ.

²⁰ Nɛ ɛnɛ osi ha mbwa wal mɛ pam hio mɔ fɛt ka mi haa nua ha ɛnɛ. Nɛ ɛnɛ aing nde, mi dung hinɛ ɛnɛ swe fɛt tee, hɔ ha kpogio nzan.»