Matthieu 22 - Takarata pɛ Sɔ Mbombe Mbon

Towen hazu hio wan-gal yenga sibhoko

¹ Jésus angara fin wolamɔ ha mbwa nɛ towen, a tɔa:

² «Wal ka Sɔ bhɔngiri mɔ hazu *Kongakandɔ Ngɔn, yo dung tuka ma *kongapora ka dea yenga sibhoko hazu bewei pɛa.

³ Ka wɛnɛ tomsa hio wan-tom hazu sa hio wan-gal yenga, mbwa tɛ ngoy tɛa na.

⁴ A saa fin hio ma mbing wan-tom pɛa nɛ tɔa ha mbwa: ‹Ɛnɛ nɛ, nɛ tɔ ha hio wan-gal yenga nde, mi gio dɔka yɔngamɔ kari. Mi gbɛa hio nday nɛ hio namdalɛ pɔm. Mɔ fɛt lɛma. Mbwa atɛ ha yenga sibhoko.›

⁵ Ma, sala ndɔng to sila mbwa na. Nɛ mbwa pena si ha tom pɛ mbwa, ndang nɛa ha fɔ pɛa, ma mbinga nɛa ha gdonga mɔ.

⁶ Nɛ hio ma mbinga baa hio wan-tom pɛ kongapora de gdangamɔ ha tɛ mbwa nɛ gbɛ mbwa.

⁷ Mɛgi kongapora dea ngambi. Wɛnɛ tomsa hio wan-bibulo pɛa nɛ mbwa gbɛa hio nagbɛwi ndɔng fɛt, nɛ mbwa besasa le pɛ mbwa.

⁸ Hapata a tɔa ha hio wan-tom pɛa: ‹Ngimɔ yenga sibhoko lɛma, ma, hio wi ka mi saa sɔngsi bo nɛ zioa mɛ gal yenga na.

⁹ Hazu ɛngi, ɛnɛ nɛ ha hio sabhaka wal, nɛ sa wi fɛt ka ɛnɛ bekpa mɛ tɛ ha yenga sibhoko.›

¹⁰ Hio wan-tom ndɔng nɛa ha hio sabhaka wal nɛ wesiri hio wi fɛt ka mbwa kpaa, gdanga wi nɛ dede wi fɛt. Mɛgi, hio wan-gal yenga dona twa yenga sibhoko hɛrr.

¹¹ «Ka kongapora lea twa hazu zɔk hio wan-gal yenga, wɛnɛ kpaa ma wi ka tɛ yol la yenga sibhoko na.

¹² A tɔa ha wɛnɛ: ‹Dan mi, mɛ, ka bo nɛ la yenga sibhoko na, mɛ lea hakɛ mɛng?› Nɛ wi ɛngɛ bo nɛ ma wen mɛ kifiri na.

¹³ Mɛgi kongapora tɔa ha hio wan-tom pɛa: ‹Ɛnɛ sang kɔ wa nɛ nanga wa, nɛ ɛnɛ ba wɛnɛ pi ha dɛl ha zang ngɛ-ngɛ-ngɛ tutum. Haki a behe kwa nɛ a beyɔng nzata.›»

¹⁴ Nɛ Jésus tɔa: «Ɛ saa wi nɛdɔka, ma, ɛ weka mbwa tikiring sɔna.»

Garama pɛ * kongapora Sezar

¹⁵ Hapata hio *Farizien nɛa nɛ kpo zuwen nde, mbwa aba Jésus nɛ wal wen nu wa.

¹⁶ Mbwa tomsa hio ma *wan-yambimɔ pɛ mbwa nɛ hio ma ngali pɛ Herode ha pɛ Jésus mɛ tɔ ha wɛnɛ: «Wan-osimɔ, ɔ ingɔ nde, mɛ nê wan-tɔ tɛwen, ka osi ngbak mɔ, ka Sɔ ngoya nde ɔ ade. Mɛ yu ke li ma wi na, nɛ mɛ de mɔ hazu pea li wi na.

¹⁷ Mɛgi mɛ tɔ takaramɔ pɛ mɛ ha ɔ. *Mbonga pɛ ɔ ha wal mɛ kpe garama ha kongapora Sezar, mana yo gdɔki wal mɛ kpe yo nde?»

¹⁸ Jésus ingɔ likisi pɛ mbwa nɛ wɛnɛ tɔa: «Wan-dambari, ɛnɛ we sila mi hazu ge?

¹⁹ Ɛnɛ ku ma mbɔli mɔ kpe garama tɛnɛ ha mi azɔk.» Mbwa kuo ma mbɔli mɔ bubolo ndang tɛnɛ ha wɛnɛ.

²⁰ Nɛ wɛnɛ ana mbwa: «Zizi zu wi nɛ ling wi ha lia nê pɛ o?»

²¹ Mbwa tɔa ha wɛnɛ: «Yo nê pɛ kongapora Sezar.» Nɛ wɛnɛ kiforo wen ha mbwa: «Mɛgi ɛnɛ ha mɔ pɛ kongapora ha kongapora! Nɛ ɛnɛ ha mɔ pɛ Sɔ ha Sɔ!»

²² Ka mbwa zea kiforo wen pɛa, mbwa fɛt yaksa nɛ mbwa pena lak wɛnɛ gde.

Anamɔ hazu wen guotɛ pɛ hio fiowi

²³ Ha ndangtɛ swe hio ma *Sadusien tiko nɛ ha pɛ Jésus. Hio Sadusien tɔ nde, ka wi fea kari, a lɛm gutɛ fin na. Mɛgi mbwa ana wɛnɛ:

²⁴ «Wan-osimɔ, Moïse batɔ nde, ka wi fea lak ko pɛa gde, bem bona, dea nde, ya wa asi nagula pɛa bhɛ nɛ bem, tongiri nɛ nugala pɛ ya wa ka fea.

²⁵ Sɔngsi bhee, hio ma ya mɔ bewei mɔrkɔ zanga bwa dungɔ ha soko ɔ. Kaya sio bhoko, a bhɛ na, ma a gɔna fe. Zebwa ya sio ko pɛa.

²⁶ Ma, ndangtɛ mɔ hɔa gbesi ha wɛnɛ, nɛ fin ha zetara, nɛnɛ kanɛ mbwa mɔrkɔ zanga bwa fɛt.

²⁷ Hapata mbwa fɛt, bhokoa fea nɛ kpogio.

²⁸ Ha ngimɔ guotɛ pɛ hio fiowi, wɛnɛ bedung nê ko pɛ nge wei ha soko mbwa mɔrkɔ zanga bwa ge nde? Hazu mbwa fɛt sio wɛnɛ.»

²⁹ Jésus kiforo wen ha mbwa: «Ɛnɛ yɔamɔ. Hazu ɛnɛ ing takarata pɛ Sɔ nɛ ziomɔ pɛa na.

³⁰ Hazu ha guotɛ pɛ hio fiowi, hio wei nɛ hio bhoko lɛm si may fin na. Ma, mbwa bedung tuka hio *telenge ha zang ngɔn.

³¹ Ɛnɛ tɛ tɔl mɔ ka Sɔ batɔ ha ɛnɛ ha wen guotɛ pɛ hio fiowi na nde? Wɛnɛ batɔ:

³² ‹Mi nê Sɔ pɛ Abraham, Sɔ pɛ Isaac nɛ Sɔ pɛ Jacob.› Sɔ bo nê Sɔ pɛ hio fiowi na. Ma, wɛnɛ nê Sɔ pɛ hio tunɔ wi.»

³³ Nɛ hio giliwi ka zea wɛnɛ yaksa nɛdɔka hazu osamɔ pɛa.

Gasa * mbonga pen mbinga nɛ nge tɛa ge?

³⁴ Ka hio *Farizien zea nde, Jésus gana hio *Sadusien nɛ wen, mbwa wesara may hapɛtɛ wa.

³⁵ Ma ndang ha soko mbwa, ka dung nê *wan-osi mbonga, ngoya we sila Jésus nɛ anamɔ:

³⁶ «Wan-osimɔ, gasa mbonga ka pena hio mbinga fɛt nɛ nge tɛa ge?»

³⁷ Nɛ Jésus tɔa ha wɛnɛ: «Mɛ ngoy *Kongawan, Sɔ pɛ mɛ, nɛ sila mɛ fɛt, nɛ tunɔ pɛ mɛ fɛt, nɛ takaramɔ pɛ mɛ fɛt.

³⁸ Yo nê mbonga ɛngɛ ka dung nɛ gasaa nɛ zioa pen mbinga.

³⁹ Nɛ zebwa mbonga ka dung gbesi tuka bosia, yo nê; engɛ: Mɛ ngoy ma mɛ tuka tɛ mɛ.

⁴⁰ Mbonga ndɔng bwa dung nê goto mbonga pɛ Moïse nɛ goto osamɔ pɛ hio *wan-tɔkuliwen fɛt.»

* Mesi nê wan hazu kongapora David

⁴¹ Hio *Farizien wesara may hapɛtɛ Jésus, mɛgi wɛnɛ ana mbwa:

⁴² «Ɛnɛ takiri pɛ ɛnɛ nɛ ge hazu Mesi ge nde? Wɛnɛ nê bezang pɛ o?» Mbwa kiforo wen ha wɛnɛ: «Wɛnɛ nê bezang pɛ David.»

⁴³ Nɛ Jésus kiforo wen ha mbwa: «Ka yo bo mɛgi, hazu ge *Nzɔy-Sɔtɛ gbasa ha David mɛ sa Mesi nde, *Kongawan, ge nde? Hazu David batɔ se:

⁴⁴ ‹Kongawan Sɔ tɔa ha Kongawan pɔm: Mɛ dungnu ha wekɔ mi, mi begde hio ngana pɛ mɛ ha si nanga mɛ.›

⁴⁵ «Ka David saa Mesi nde, Kongawan, Mesi bedung fin nê bezang pɛ David mɛng?»

⁴⁶ Nɛ wi ndang tɛ lɛm kiforo wen ha wɛnɛ na. Angiri ha swe ɛngi, ma wi tɛ gu fin nu mɛ ani wɛnɛ nɛ ma wen na.