Matthieu 15 - Takarata pɛ Sɔ Mbombe Mbon

Jésus tɔa wen ndɔki deamɔ pɛ hio * zuife

¹ Hapata, hio ma *Farizien nɛ hio ma *wan-osi mbonga guotɛ ha Jérusalem tɛ ha pɛ Jésus, nɛ mbwa ana wɛnɛ:

² «Hio *wan-yambimɔ pɛ mɛ tukili osamɔ pɛ hio ngbabafa ɔ, hazu ge? Hazu sɔngsi yɔngamɔ, mbwa tay kɔ lɛm nɛ ndɔki deamɔ pɛ ɔ na.»

³ Ma, Jésus kiforo wen ha mbwa: «Nɛ pɛ ɛnɛ, ɛnɛ tukili mbonga pɛ Sɔ, hazu gde ha bhandia ndɔki deamɔ pɛ ɛnɛ, hazu ge?

⁴ Sɔ haa nu nde, ‹Mɛ ba bafa mɛ nɛ nana mɛ nɛ zioa.› Nɛ fin nde, ‹Wi ka fɛngsi bafa wa mana nana wa, lɛma nde ɛ agbɛ wɛnɛ.›

⁵ Ma, pɛ ɛnɛ, ka ma wi tɔ ha bafa wa nɛ nana wa nde, wɛnɛ beha mɔ gbakiri mbwa nɛ sadaka ha Sɔ,

⁶ ki wɛnɛ lɛma laka gbakara mbwa gde. Mɛgi ɛnɛ laka wen pɛ Sɔ gde, hazu gde ndɔki deamɔ pɛ ɛnɛ ha bhandia.

⁷ Ɛnɛ hio wan-dambari, Esaïe batɔ kuliwen hazu ɛnɛ nɛ wala, ka wɛnɛ ngɛraka wen pɛ Sɔ:

⁸ ‹Kandɔ ɛngɛ lukisi mi nɛ kpatanu sɔna. Ma, sila mbwa yɛa nɛ mi pepepe.

⁹ Mbwa lukisi mi nɛgbelea, hazu mbwa osi tuka mbonga sɔna nɛ mɔ, ka tɛ nɛ wal takaramɔ pɛ wi.›»

Mɔ ka de nde wi adung nɛ nzing ha li Sɔ

¹⁰ Hapata Jésus saa giliwi nɛ tɔa ha mbwa: «Ɛnɛ ze, nɛ ɛnɛ ing ɛngɛ nɛ dedea:

¹¹ Mɔ ka le nu wi, de nzing ha tɛ wa na. Ma, yo nê mɔ ka gbo ha nu wi, ka de nzing ha tɛ wa.»

¹² Mɛgi hio *wan-yambimɔ tiko nɛ ha pɛ Jésus, nɛ ana wɛnɛ: «Mɛ tɛ ing nde, wen pɛ mɛ yimɔ sila hio *Farizien na nde?»

¹³ Nɛ Jésus kiforo wen: «Hio te ndɔng ka Bafa mi ha zang ngɔn tɛ gun na, ɛ bezuri yo fɛt pi.

¹⁴ Ɛnɛ lak mbwa gde. Mbwa nê hio wan-gdɔka li ka ngbɔsi may. Nɛ ka wan-gdɔka li ngbɔsi mbinga, mbwa fɛt bwa betek ha kɔ.»

¹⁵ Nɛ Pierre tɔa ha wɛnɛ: «Mɛ tɔ goto towen ɛngɛ ha ɔ!»

¹⁶ Ma, Jésus ana mbwa: «Ɛnɛ fin, ɛnɛ tɛ ing gotoa na?

¹⁷ Ɛnɛ ing nde, mɔ fɛt ka le ha nu wi, nɛ ha zang wa. Nɛ yo begbo nɛ wal mbom.

¹⁸ Ma, mɔ ka gbo ha nu wi, yo gutɛ ha sila wa. Ɛngɛ nê mɔ ka de nzing ha tɛ wi ha li Sɔ.

¹⁹ Hazu hio gdanga takaramɔ gutɛ ha sila. Mɛgi hio wi gbɛa may, dea wanza, dea li bhoko, zuo mɔ, gɔna yɛlɛ ha tɛ may, nɛ fɛngsa may.

²⁰ Yo nê mɔ ndɔng ka de nzing ha tɛ wi. Ma, ka ɛ yɔngmɔ nɛ kɔ nɛ nzing, ɛngɛ de nzing ha tɛ wi ha li Sɔ na.»

Ma bhoko ka bo nê * zuife na mɛkara Jésus

²¹ Hapata Jésus pena ha kandɔnu ɛngi, nɛ ha kandɔnu mɔ le Tir nɛ Sidon.

²² Ma bhoko mɔ kandɔ Kanaan ka de le haki, tɛa ha pɛa nɛ gdɔra: «*Kongawan, *Bewei pɛ David, de kobhe tɛ mi wa! Gdanga sɔtɛ ha yeksa bem pɔm mɔ bebhoko nɛngaya.»

²³ Ma, Jésus tɛ kifiri ma wen ndang ha wɛnɛ na. Mɛgi hio *wan-yambimɔ tiko nɛ ha pɛa, nɛ tɔa: «Mɛ tɔ ha bhoko ɛngɛ nde, wɛnɛ asi, hazu wɛnɛ ha gdɔra ha pata ɔ.»

²⁴ Nɛ wɛnɛ kiforo wen: «Sɔ tomsa mi sɔna ha pɛ hio wi mɔ kandɔ *Israel, ka dung tuka sami ka yɔamɔ.»

²⁵ Ma, bhoko ɛngɛ tɛa tɛ ngbi zigolo ha si wa nɛ tɔa: «Kongawan, gbakiri mi wa!»

²⁶ Nɛ Jésus tɔa ha wɛnɛ: «Yo bo nɛ dedea mɛ ku yɔngamɔ pɛ bem pi ha betolo na.»

²⁷ Nɛ bhoko ɛngɛ tɔa: «Kpasawen, Kongawan. Ma, hio betolo dung mɛ yɔng mbuli yɔngamɔ ka tek ha si tabolo pɛ wan pɛ mbwa, na nde?»

²⁸ Mɛgi, Jésus kiforo wen ha wɛnɛ: «Woo, bhoko! Mɛkaramɔ pɛ mɛ gasa gdang. Mɔ ahɔ ha mɛ tuka mɛ ngoya.» Nɛ bem pɛa kpasa ha ndangtɛ ngimɔ.

Jésus kpasasa dɔka wan-zɛlɛ

²⁹ Jésus pena haki, nɛ hɔa hapɛtɛ tɔ Galile. A danga zu ma ngari nɛ dungɔnu.

³⁰ Nɛ dɔka zugiliwi kuo hio wan-zɛlɛ mɛla, kumɔ wi, wan-gdɔka li, wan-gdɔka nu nɛ dɔka mbing wan-zɛlɛ tɛnɛ. Ɛ gdea mbwa ha si nanga Jésus, nɛ wɛnɛ kpasasa mbwa.

³¹ Hio wi yaksa ka mbwa zɔka nde, hio wan-gdɔka nu ha wolamɔ, kumɔ wi kpasa, wan-zɛlɛ mɛla ha nɛa nɔ, nɛ wan-gdɔka li ha zɔka mɔ. Nɛ mbwa lukoso Sɔ pɛ *Israel.

Jésus haa yɔngamɔ ha hio wi tomay nar

³² Jésus saa hio *wan-yambimɔ pɛa nɛ tɔa: «Kobhe tɛ wi ndɔng ha dea mi, hazu tɛ bo mɛsɛ nɛ yala tar ka mbwa dung hinɛ mi. Nɛ mbwa bo nɛ ma mɔ mɛ yɔng na. Mi ngoy gdea mbwa pen nɛ wɔ na, yu nde, mbwa betɛ tek ngata ha liwal.»

³³ Nɛ hio wan-yambimɔ ana wɛnɛ: «Ɔ bede mɛng mɛ kpa mampa nɛdɔka ha kpɛnu hakɛ, hazu day dɔka giliwi tuka ɛngɛ, ge nde?»

³⁴ Wɛnɛ ana mbwa: «Ɛnɛ nɛ mampa ge?» Mbwa kiforo wen: «Ɔ nɛ mampa mɔrkɔ zanga bwa nɛ hio ma bebe kɔyɔ.»

³⁵ Nɛ Jésus haa nu ha giliwi ndɔng nde, mbwa adungnu.

³⁶ Hapata a baa hio mampa mɔrkɔ zanga bwa nɛ hio kɔyɔ ndɔng. A lukoso Sɔ hazua, nɛ a gbinɔ yo ha hio wan-yambimɔ, nɛ mbwa kapana yo ha hio giliwi.

³⁷ Nɛ hio wi fɛt yɔnga zang mbwa don. Nɛ hio wan-yambimɔ kaya olo titia don gɛsɛ mɔrkɔ zanga bwa.

³⁸ Dɔka wei ndɔng ka yɔngamɔ lɛma nɛ tomay nar. Ɛ tɛ tɔl hio bhoko nɛ hio bhobem ha zanga na.

³⁹ Ka Jésus haa wal ha giliwi si kari, a lea sɔngu nɛ ha kandɔnu Magadan.