Dede Wen hazu Jésus-Christ ka Luc ngɛraka 7 - Takarata pɛ Sɔ Mbombe Mbon

Jésus kpasasa bala pɛ ma kagama-bulo

¹ Ka Jésus karsa bulo wen ndɔng fɛt ha hio wi, a nɛa ha Kapernaum.

² Haki, ma kagama-bulo dungɔ nɛ ma bala, ka wɛnɛ ngoya pentɛ. Nɛ bala ɛngɛ dungɔ nɛ zɛlɛ hapɛtɛ fio.

³ Ka kagama-bulo ɛngi zea kasi tɛ Jésus, a tomsa hio ma kotowi pɛ hio *zuife mɛ ani nde, Jésus atɛ tɛ kpasisi bala pɛa.

⁴ Mbwa hɔa ha pɛ Jésus, nɛ mbwa lokatɛ ha wɛnɛ nɛ tɔa: «Wi ɛngɛ nɛ zioa nde, mɛ akpasisi bala pɛa.

⁵ Hazu a ngoya kandɔ pɛ ɔ, nɛ yo nê wɛnɛ ka bɛa *twa gɔ Sɔ ha ɔ.»

⁶ Jésus nɛa hinɛ mbwa. Ma, ka wɛnɛ hɔa sanga nɛ twa, kagama-bulo tomsa hio ma dan wa hazu tɔ ha wɛnɛ: «*Kongawan, mɛ yeksi tɛ mɛ na, hazu mi bo nɛ zioa nde, mɛ ale ha zang twa pɔm na.

⁷ Nɛ fin, mi kpaa nde, mi bo nɛ zioa mɛ tɛ ha pɛ mɛ na. Ma, mɛ tɔ ma wen ndang sɔna, nɛ bala pɔm bekpasi.

⁸ Hazu mi fin, mi dung ha si ma zio wi, nɛ hio wan-bibulo dung ha si mi. Ka mi tɔ ha ma wan-bibulo pɔm: ‹Nɛ!› A nɛa. Nɛ ka mi tɔ ha ma mbinga fin: ‹Tɛ!› A tɛa. Nɛ ka mi tɔ ha ma bala pɔm fin: ‹De ɛngɛ!› A dea yo.»

⁹ Jésus yaksa ka wɛnɛ zea wen ndɔng. A kiforo tɛ zɔk giliwi ka ndara wɛnɛ, nɛ a tɔa ha mbwa: «Mi tɔ ha ɛnɛ nde, mi tɛ kpa ka ma wi ndang ka mɛkiri Sɔ nɛkpasa tuka ɛngɛ na, ngase ha soko hio wi mɔ *Israel yo bona.»

¹⁰ Ka wi ndɔng ka kagama-bulo tomsa kiforo si ha twa pɛa, mbwa kpaa nde, zɛlɛ pɛ bala pɛa kara.

Jésus tunso bem pɛ nagula ha fio

¹¹ Hapata, Jésus nɛa ha ma le linga nde Naine. Hio *wan-yambimɔ pɛa nɛ ma gasa zugiliwi nɛa hinɛ wɛnɛ.

¹² Ka wɛnɛ hɔa ha nu le, a kpaa nde ɛ ha kuo ma wɔl wi gbo nɛ. Yo nê ndanga bewei pɛ ma nagula. Nɛ dɔka wi mɔ le nɛa hinɛ nagula ɛngɛ ha gunɔ bem.

¹³ Ka *Kongawan Jésus zɔka nagula ɛngɛ, sila wa doya nɛ kobhe. Nɛ a tɔa ha wɛnɛ: «Mɛ he kwa na!»

¹⁴ Nɛ a tiko nɛ nɛ gde kɔ ha zu kubha fio. Nɛ wi ndɔng ka ba yo nɛnɛ yola, nɛ Jésus tɔa: «Pɔlɔmbɔ wi, mi ha nu ha mɛ, gutɛ mɛ!»

¹⁵ Mɛgi fiowi kiforo ha tunɔ, a dungɔnu, nɛ wɛnɛ angara wolamɔ. Nɛ Jésus haa wɛnɛ ha nana wa.

¹⁶ Ke baa wi fɛt. Mbwa lukoso Sɔ nɛ tɔa: «Gasa *wan-tɔkuliwen hɔa ha soko ɔ!» nɛ fin «Sɔ tɛa hazu kpasisi kandɔ pɛa!»

¹⁷ Kasi mɔ ɛngɛ yambala dam kandɔnu Judée nɛ kandɔnu fɛt ka zikiri Judée.

* Jean wan-gdumsiwi pio kasara ha Jésus

¹⁸ Hio *wan-yambimɔ pɛ Jean wan-gdumsiwi tɔa ha wɛnɛ wen mɔ ka Jésus dea. Jean saa hio ma wan-yambimɔ pɛa bwa,

¹⁹ nɛ a tomsa mbwa ha pɛ Jésus hazu ani wɛnɛ: «Mɛ nê *Mesi ka betɛ nde? Mana ɔ akeri ma mbinga?»

²⁰ Ka mbwa hɔa ha pɛ Jésus, mbwa tɔa: «Jean wan-gdumsiwi tomsa ɔ hazu ani mɛ nde, mɛ nê Mesi ka betɛ, mana ɔ akeri ma mbinga?»

²¹ Ha ndangtɛ ngimɔ, Jésus kpasasa hio dɔka wan-zɛlɛ nɛ wan-kumɔ. Nɛ wɛnɛ yinɔ fin hio gdanga sɔtɛ gbosisi ha tɛ hio wi, nɛ wɛnɛ gbosasa li hio dɔka wan-gdɔka li.

²² Jésus tɔa ha hio wan-nɛkasara pɛ Jean: «Ɛnɛ nɛ, nɛ tɔ ha wɛnɛ, mɔ ka ɛnɛ zɔka nɛ zea: ‹Hio wan-gdɔka li zɔka mɔ, hio kumɔ wi nɛa nɔ, tɛ hio wan-doko saa, hio wan-gdɔka zala zea mɔ, hio fiowi kiforo ha tunɔ, nɛ hio fabha wi ha zea *Dede Wen.›

²³ Totɛ ha wi kɛ ka kafi mɛkara mi na!»

²⁴ Ka hio wan-nɛkasara pɛ Jean sio, Jésus angara tɔa kasi tɛ Jean ha giliwi, a tɔa: «Ɛnɛ nɛa ha kpɛnu ha zɔka ge? Bɛlɛ ka bok fesi nde? Way!

²⁵ Ma, ɛnɛ nɛa ha zɔka ge? Ma wi ka yol lɛkɛ-lɛkɛ la nde? Way, hazu hio wi ka yol lɛkɛ-lɛkɛ la, nɛ ka de le ha zang yɛbhɛ-yɛbhɛ kpaamɔ dung ha zang twa pɛ *kongapora.

²⁶ Ma, ɛnɛ nɛa ha zɔka nɛ o? *Wan-tɔkuliwen? Ey, yo gɔ. Nɛ mi tɔ ha ɛnɛ fin nde, wɛnɛ nɛ gasaa pen wan-tɔkuliwen.

²⁷ Hazu Sɔ tɔa wen hazu Jean ha zang takarata pɛa nde, ‹Mi betomsi wan-nɛkasara pɔm ha li mɛ hazu bhɔngiri wal ha mɛ.›

²⁸ Mi tɔ ha ɛnɛ nde, ɛ tɛ bhɛ ma wi ka dung nɛ gasaa pen Jean ndang na. Ma, wi kɛ ka dung nɛ bebea fɛt ha zang *Kongakandɔ pɛ Sɔ, nɛ zioa pen Jean.

²⁹ «Hio wi fɛt hinɛ hio wan-ndɛm mbɔli garama fin zea Jean, nɛ mbwa mɛkara nde, Sɔ nɛ nzeng. Mɛgi mbwa tɛa tuka nde, Jean agdumsi mbwa ha li.

³⁰ Ma, hio *Farizien nɛ hio *wan-osi mbonga kafa mɔ ka Sɔ bhɔngara ha mbwa, nɛ mbwa tɛ ngoy nde Jean agdumsi mbwa ha li na.»

³¹ Nɛ Jésus tɔa fin ha mbwa: «Mi beweki hio wi mɔ sising nɛ nge wi ge? Mbwa dung tuka o?

³² Mbwa dung tuka hio bhobem ka dungnu ha binsila dɛl ha gdɔra ha may: ‹Ɔ mɛla bio nganmɔ ha ɛnɛ, nɛ ɛnɛ tɛ yo yula na! Ɔ bea gima ngɔtɛ ha ɛnɛ, nɛ ɛnɛ tɛ he kwa na!›

³³ Hazu, ka Jean wan-gdumsiwi hɔa, a kafa dɔkɔ nɛ hio ma yɔngamɔ. Nɛ ɛnɛ tɔa nde, wɛnɛ dung bala ha kɔ gdanga sɔtɛ.

³⁴ Ka mi, *Bewei pɛ Wi, hɔa, mi yɔnga nɛ nɔa mɔ. Nɛ ɛnɛ tɔa nde, mi nê wan-yɔngmɔ nɛdɔka nɛ wan-nguru dɔkɔ. Nɛ fin nde, mi de sɔy hinɛ hio *wan-de gdangamɔ nɛ hio wan-ndɛm mbɔli garama.

³⁵ Ma, deamɔ pɛ hio bem pɛ Sɔ gbasi nde, mbaramɔ pɛ Sɔ nɛ nzeng.»

Jésus ha pɛ ma * Farizien, ling wa nde Simon

³⁶ Ma Farizien saa Jésus hazu yɔng mɔ hinɛ wɛnɛ. Jésus nɛa ha pɛa nɛ a dungɔnu hapɛtɛ tabolo.

³⁷ Ha le ɛngi ma bhoko-de mɔ nɛ tum ang. Nɛ ka wɛnɛ zea nde, Jésus ha yɔnga mɔ ha twa pɛ Farizien ɛngɛ, a kuo bebe dak ka dona nɛ liyama tɛnɛ. Ɛ sɛka dak ɛngɛ nɛ ma ta ka ɛ sa nde, albatre.

³⁸ Nɛ a tiko tɛ ha gdong Jésus hapɛtɛ nanga wa. Wɛnɛ hea kwa nɛ milikwa huyo ha nanga Jésus. Nɛ a dio yo nɛ bumɔzu wa. A duyo nanga Jésus nɛ hɔnga yo nɛ liyama.

³⁹ Nɛ ka Farizien ɛngɛ ka saa Jésus, zɔka mɛgi, a takara ha sila wa nde, ka bo se nde, wi ɛngɛ abo nê *wan-tɔkuliwen, a ingɔ nde, bhoko ɛngɛ ka baa tɛ wa, nê bhoko-de mɔ nɛ tum.

⁴⁰ Mɛgi Jésus tɔa ha Simon: «Mi nɛ ma wen mɛ tɔ ha mɛ.» Simon kɔa nɛ tɔa: «Wan-osimɔ, mɛ tɔ yo.»

⁴¹ Jésus tɔa ha wɛnɛ: «Wi bwa dungɔ nɛ mbee pɛ ma wi ha zu mbwa, ndang nɛ lafu mbɔli gɔmmay mɔrkɔ, nɛ ma nɛ lafu mbɔli bhukɔa mɔrkɔ.

⁴² Ma, ka wan-ha mbee zɔka nde, mbwa fɛt kpa wal mɛ kpe yo na, a laka mbee bwa fɛt gde. Mɛ tɔ ha mi, ha soko wi ndɔng bwa, yo nê o ka bengoy wan-ha mbee pen mbinga, o nde?»

⁴³ Simon kiforo wen ha wɛnɛ: «Mi takiri nde, wi ka bengoy wɛnɛ pen mbinga nê wi ɛngɛ ka dungɔ nɛ gasa mbee ha zu wa.» Jésus tɔa ha Simon: «Mɛ tɔa kpasawen.»

⁴⁴ Nɛ Jésus kiforo tɛ zɔk bhoko ɛngɛ nɛ wɛnɛ tɔa ha Simon: «Zɔk bhoko ɛngɛ nɛdedea! A dea mɔ ka mɛ tɛ de na. Hazu, ka mi lea twa pɛ mɛ, mɛ tɛ ha mi li mɛ fal nɛ nanga mi na. Ma, a taya nanga mi nɛ milikwa pɛa, nɛ a dio yo nɛ bumɔzu wa.

⁴⁵ Mɛ tɛ duy mbuku mi na. Ma, ha ngimɔ ka mi lea twa pɛ mɛ kanɛ sising, bhoko ɛngɛ tɛ karsi duyo nanga mi na.

⁴⁶ Mɛ tɛ a nɔ ha zu mi na, ma, yo nê wɛnɛ ka aa liyama ha zu nanga mi.

⁴⁷ Hazu ɛngi, mi tɔ ha mɛ nde, Sɔ biso dɔka *sɛmbɔ pɛa kari. Yo nê ɛngi ka wɛnɛ osa ngoy ha mi nɛdɔka. Hazu wi ka sɛmbɔ pɛa biso tikiring, beosi ngoy fin tikiring.»

⁴⁸ Nɛ Jésus tɔa ha bhoko ɛngɛ: «Sɛmbɔ pɛ mɛ biso fɛt.»

⁴⁹ Mɛgi, wi ndɔng ka dungɔ hinɛ wɛnɛ ha tabolo angara tɔa ha sila mbwa: «Wi ɛngɛ ba tɛ wa tuka o mɛ bisi sɛmbɔ, o nde?»

⁵⁰ Ma, Jésus tɔa ha bhoko ɛngɛ: «Mɛ kpasa hazu mɛ mɛkara mi. Mɛ si nɛdedea.»