Dede Wen hazu Jésus-Christ ka Luc ngɛraka 4 - Takarata pɛ Sɔ Mbombe Mbon

* Satan wea sila Jésus

¹ Jésus dona nɛ *Nzɔy-Sɔtɛ, a laka li Jourdain gde, nɛ Nzɔy-Sɔtɛ ngbɔsa wɛnɛ nɛ nɛ ha kpɛnu.

² Satan wea sila wa haki yala bhukɔa nar. Ha zang yala ndɔng fɛt, a tɛ yɔng ma mɔ ndang na. Nɛ ka ngimɔ ɛngɛ kara wɔ dea wɛnɛ.

³ Satan tɔa ha wɛnɛ: «Ka mɛ nê *Bewei pɛ Sɔ, mɛ tɔ ha ta ɛngɛ akifi mampa.»

⁴ Jésus tɔa ha wɛnɛ: «Way! Takarata pɛ Sɔ tɔa nde, wi lɛm dung nɛ zutunɔ nɛ wal mampa sɔna na.»

⁵ Satan kuo wɛnɛ nɛnɛ ha zu kuso bhandi. Nɛ ha bebe ngimɔ, a osa hio kandɔnu fɛt ha wɛnɛ,

⁶ nɛ a tɔa: «Mi beha mɛ ziomɔ nɛ *lɛkɛ-lɛkɛmɔ pɛ hio kandɔnu fɛt. Ɛ haa yo ha mi, nɛ mi lɛm ha yo ha wi ka mi ngoya.

⁷ Pɛ mɛ, ka mɛ ngbi zigolo ha si mi nɛ lukisi mi, mɔ ndɔng fɛt bedung ha mɛ.»

⁸ Jésus kiforo wen ha wɛnɛ: «Takarata pɛ Sɔ tɔa nde, mɛ alukisi *Kongawan, Sɔ pɛ mɛ, nɛ mɛ ade tom Sɔ ha wɛnɛ ndang sɔna.»

⁹ Satan kuo wɛnɛ nɛnɛ ha Jérusalem nɛ gdea wɛnɛ ha bhele-bhele kuso *gasa twa Sɔ. Nɛ a tɔa ha wɛnɛ: «Ka mɛ nê Bewei pɛ Sɔ, mɛ bhil tek ha nu,

¹⁰ hazu ɛ ngɛraka ha zang takarata pɛ Sɔ: ‹Sɔ beha nu ha hio *telenge pɛa nde, mbwa apam mɛ.›

¹¹ Nɛ ɛ ngɛraka fin: ‹Mbwa beba mɛ ha kɔ nde, mɛ akɔ nanga mɛ ha ta na.›»

¹² Jésus kiforo wen ha wɛnɛ: «Ka mɛ awe Kongawan, Sɔ pɛ mɛ na!»

¹³ Hapata ka Satan wea sila wa nɛ wal nɛtɛ-nɛtɛ gan, a laka wɛnɛ gde pen, kanɛ ma ngimɔ.

Jésus angara dea tom ha Galile

¹⁴ Jésus kiforo tɛ si ha Galile nɛ a dona nɛ ngatɛ pɛ *Nzɔy-Sɔtɛ. Ɛ baa kasi tɛ wa dam kandɔnua fɛt.

¹⁵ A osa mɔ ha hio *twa gɔ Sɔ, nɛ wi fɛt lukoso wɛnɛ.

Hio wi mɛ Nazaret kafa wen pɛ Jésus

¹⁶ Jésus hɔa ha Nazaret, le ka wɛnɛ kpɔatɛ ang. Ha *swe ɔmtɛ a lea *twa gɔ Sɔ tuka ndɔki deamɔ pɛa. Nɛ a guotɛ hazu tɔl takarata pɛ Sɔ.

¹⁷ Ɛ haa wɛnɛ kalka takarata pɛ *wan-tɔkuliwen Esaïe. Ka wɛnɛ bulso yo, a kpaa bhandi ka Esaïe ngɛraka:

¹⁸ «*Nzɔy-Sɔtɛ pɛ *Kongawan dung ha zu mi, hazu wɛnɛ hɔnga mi mɛ bul *Dede Wen ha hio fabha wi. A tomsa mi hazu tɔ ha hio wan-zɔbhɔ nde, zɔbhɔ pɛ mbwa kara, hazu gbosisi li hio wan-gdɔka li, hazu gbosisi wi ndɔng ka ɛ yukoto gde sɛɛ.

¹⁹ Nɛ hazu tɔ nde, yo nê bɛlɛ ka Kongawan bede *dede sila ha tɛ ɔ.»

²⁰ Hapata a kalka takarata ɛngɛ ha yo ha wan-pam twa gɔ Sɔ, nɛ a dungɔnu. Hio wi fɛt ka dungɔ ha twa gɔ Sɔ gɛra wɛnɛ gdoo.

²¹ Mɛgi wɛnɛ tɔa ha mbwa: «Swe mɛsɛ, ngɛrakamɔ ɛngɛ lɛmsara tɛ ha li ɛnɛ.»

²² Wi fɛt lukoso wen pɛa, nɛ mbwa yaksa ha dede wen ka wɛnɛ tɔa. Hapata, mbwa tɔa: «Wi kɛ bo nê bem pɛ Joseph na nde?»

²³ Jésus tɔa ha mbwa: «Kpasawen, ɛnɛ betɔ zɛngwen ɛngɛ ha mi nde, ‹Wan-yina, gu zɛlɛ yunɛ ha tɛ mɛ nɛ pɛ mɛ tɛ.› Hazu tɔ ha mi nde, mi ade fin hakɛ ha le pɔm hio *mɔkifi fɛt, ka ɛnɛ zea nde, mi dea yo ha Kapernaum.»

²⁴ Nɛ wɛnɛ tɔa fin ha mbwa: «Kpasawen mi tɔ ha ɛnɛ nde, ɛ ba wan-tɔkuliwen ha le pɛa nɛ dede kɔ ndang na.

²⁵ Nɛ fin, mi tɔ kpasawen ha ɛnɛ nde, ha ngimɔ pɛ *Elie, hio nagula dungɔ nɛdɔka ha *Israel. Ha ngimɔ ɛngi kolo tɛ ɔl na, kan ɛ bɛlɛ tar nɛ ndambu, nɛ foto teka ha kandɔnua fɛt.

²⁶ Nɛ Sɔ tɛ tomsi Elie ha pɛ ma nagula ndang mɔ Israel na. Ma, a tomsa wɛnɛ sɔna ha pɛ nagula ɛngɛ ka dungɔ ha Sarepta ha kandɔnu Sidon.

²⁷ Nɛ fin, ha ngimɔ pɛ wan-tɔkuliwen Elisée, hio wan-doko dungɔ nɛdɔka ha kandɔnu Israel. Ma, ma ndang ha soko mbwa tɛ kpasi na, kanɛ Naaman, wi mɛ kandɔnu Siri.»

²⁸ Wi fɛt ha twa gɔ Sɔ dona nɛ ngambi, ka mbwa zea wen ndɔng.

²⁹ Mbwa guotɛ nɛ baa wɛnɛ nɛnɛ ha gdong le, ha kuso ngenge nu ngari, ka le pɛ mbwa dung ang, hazu nde, mbwa ail wɛnɛ pi ha fongo.

³⁰ Ma, Jésus pena ha soko mbwa wong.

Jésus yinɔ gdanga sɔtɛ ha tɛ ma wei

³¹ Jésus nɛa ha le Kapernaum ha kandɔnu Galile. Ha *swe ɔmtɛ a osa mɔ ha hio wi haki.

³² Hio wi yaksa nɛdɔka ka mbwa zea osamɔ pɛa, hazu wen pɛa nɛ zioa.

³³ Ha *twa gɔ Sɔ, ma wi ka dung bala ha kɔ gdanga sɔtɛ ang, nɛ wɛnɛ gdɔra nɛ ngagɛl:

³⁴ «Yiss, Jésus wi mɛ Nazaret, mɛ ngoy de nɛ ge nɛ ɔ, ge nde? Mɛ tɛa ha gdangsa ɔ? Mi ingɔ mɛ nɛdedea. Mɛ nê nzɔy wi, ka Sɔ tomsa.»

³⁵ Jésus sɛna wen ha gdanga sɔtɛ ɛngɛ nɛ tɔa: «Gdɔki nu mɛ, gbo ha tɛ wi kɛ!» Nɛ gdanga sɔtɛ pio wi ɛngɛ ha nu ha soko hio wi, nɛ gboa ha tɛ wa pen. Ma, a tɛ kɔmbiri wɛnɛ fin na.

³⁶ Hio wi fɛt yaksa nɛdɔka, nɛ mbwa wolamɔ ha soko may: «Ɛngɛ nê nge tili wen ge? Wi ɛngɛ haa nu nɛ ziomɔ nɛ ngatɛ ha hio gdanga sɔtɛ nɛ mbwa gboa!»

³⁷ Hapata ngimɔ ɛngi, kasi tɛ Jésus yambala dam kandɔnu Galile fɛt.

Jésus kpasasa hio wan-zɛlɛ

³⁸ Nɛ Jésus laka *twa gɔ Sɔ gde, lea ha twa pɛ Simon Pierre. Folo mɛ Simon mɔ bhoko dungɔ nɛ nga bawetɛ. Nɛ ɛ ana Jésus hazu kpasisi wɛnɛ.

³⁹ A hilo ha zu wa, nɛ sɛna wen ha nga bawetɛ ɛngɛ. Nɛ yo kara ha ndangtɛ ngimɔ. Folo mɛ Simon guotɛ, nɛ a dea tom ha mbwa.

⁴⁰ Ka swe lea, ɛ kuo hio wi ka dung nɛ tili zɛlɛ nɛtɛ-nɛtɛ nɛnɛ ha pɛ Jésus. A gdea kɔ ha tɛ mbwa ndang ndang fɛt, nɛ zɛlɛ pɛ mbwa kara.

⁴¹ Hio gdanga sɔtɛ gboa ha tɛ dɔka wi nɛ gdɔra: «Mɛ nê *Bewei pɛ Sɔ!» Ma, Jésus gaya mbwa nde, ka mbwa awolmɔ na, hazu mbwa ingɔ fɛt nde, wɛnɛ nê *Mesi.

Jésus osa mɔ ha kandɔnu Judée

⁴² Ka mɔsaa, Jésus gboa nɛ ha ma bhandi ka wi bo ang na. Nɛ hio wi kio wɛnɛ kanɛ mbwa kpaa wɛnɛ haki. Mbwa ngoya dola wɛnɛ mɛ pen lak mbwa gde.

⁴³ Ma, a tɔa ha mbwa: «Dea nde, mi abul fin *Dede Wen *Kongakandɔ pɛ Sɔ ha hio wi mɔ mbing le. Yo nê ɛngɛ ka Sɔ tomsa mi.»

⁴⁴ Nɛ wɛnɛ nɛa nɛ bul wen ha hio *twa gɔ Sɔ ha Judée.